RAI UNO TV
El servissio televisivo sul nostro Carneval
Par la çità con la R.A.I. TV.
El giorno del Venardi Gnocolar g'ò vù el compito de portar in giro par Verona su invido del Presidente D'Agostino del Comitato Bacanal del Gnoco la troupe de la R.A.I. che la dovea far un servissio televisivo sul 476° Bacanal del Gnoco. La me esperiensa nel campo internassional sia con La Rena Domila e sia con el Carneval l'è stà messa in pratica. A le 9 son andà a tor in compagnia de Zeno D'Agostino el Regista, la Responsabile R.A.I. e la l'intervistatrice Irene Benassi mentre verso le 10 se semo direti verso el Comune 'ndoe gh'era el tradissional saludo del Sindaco ai Carnevalanti e tra le altre 'ndoe ò incontrà i telecameramen provenienti da Padoa. Dopo aver dimandà el parmesso a la Società Letararia de piassar una de le do telecamere sul so balcon in modo da averghe 'na ripresa da l'alto de Piassa Bra, g'ò fato da guida a la "troupe" spiegandoghe la storia de Verona (ero restà unico rapresentante Veronese al servissio R.A.I.). Cosita un poche de riprese jè stà fate dal Ponte Garibaldi verso le Toresele inquadrando la césa de San Giorgio, el Santuario NS. de Lourdes e verso el Domo, un altra da soto la "cupola" de San Giorgio con inquadradura verso Ponte Piera, Santo Stefano e Castel San Piero.

articolo

Dopo ò pensà che Piassa Erbe coi bancheti verti sarìa stà magnifica, cosita con 'na bela corsa semo 'rivà anca lì. No podea mancar la tor Lamberti e tirando driti verso Porta Leoni, el Balcon de Giulieta. El problema piassé grosso l'è stà l'aqua che l'à roto le bale, piovea a secie roerse e la telecamera se bagnava de continuo.Verso le 13.30 altro giro in Piassa Brà a 'spetar la partensa del corteo. No gh'è stà tempo de fermarse gnanca 5 minuti parché el Regista el dovea ciapar l'aereo a le 19, tanto che, ò magnà tri piati de gnochi in Piassa San Zen a le 16. Altro problema l'è stà, l'intervista al Papà del Gnoco no l'era vegnù fora ben causa mal tempo e grassie a la me esperiensa son riussìdo a farghela rifar. Come? O guidà la "troupe" par Via Roma fin a l'Arco dei Gavi 'ndoe fatalità a poca distansa l'è rivà el corteo che l' avea percorso da Piassa Bra, stradon San Fermo, Lungadige Rubele, Via Nizza, Piassa "de le Poste", Piassa Erbe, Corso Porta Borsari, Via Diaz e par finir Corso Cavour. Grande sorpresa R.A.I. par 'sto tempismo. El Papà del Gnoco l'à ciapà in brasso la Benassi dopo l'intervista, sensa desmentegarse de 'na breve batuda del mitico Re Pipin. A la fin l'è stà el me turno in Regaste San Zen 'ndoe par crear un çerto sfondo g'avemo fato far la "retro" al car del Dio de l'Oro. Poco parole le mie con 'na ponta de veronesità; no podea restar fora dal servissio televisivo el storico-antropologo (cosita definì dal regista)! Dopo de che, la Benassi l'è montà sul car del Principe Reboano col telecameramen fin a rivar in Piassa Corubio. In Piassa San Zen 'na bela spadelà de gnochi l'è stà el gran final. Disemo che come esperiensa l'è stà fantastica par mi, portar in giro la troupe de la R.A.I par Verona no capita tuti i giorni. Propor le me idee e sugerimenti oltre a métar a disposission la me esperiensa e tuto el me saver su Verona par mi l'è stà 'na grande sodisfassion. Grande disponibilità e professionalità de la R.A.I. devo dir. Irene Benassi che avea visto fin a la dominica prima in tv m'à fato 'na "bela" impression, in gamba, simpatica e come se dise a Verona fora come un balcon. A le 18 i saludi, i basi e ringrassiamenti da parte de tuti. Avemo capì in quel momento che'l prodoto che vegnea oferto ai spetatori italiani l'era de otima qualità. Me dispiase par quela diesina de persone "conossude" a Verona, desiderose de farse riprendar da le telecamere se g'ò risposto mal al telefono, ma 'isto che par 'na 'olta g'avea l'ocasion de andar a finir in una trasmission nassional e 'isto che me son roto el cul oltre aver caminà un mucio de ore soto l'aqua, par 'na 'olta el protagonista volea essar solo mi. De solito dopo aver laorà come un musso i meriti i se le ciapava i altri, 'stà 'olta no. L'è giusto lassar par 'na 'olta el posto ai zoeni !...... Dominica matina ne la trasmission "Sabato Domenica &..." su la R.A.I., el servissio sul nostro carneval l'è stà ecessional. Oviamente i comenti da parte de un poche de persone a i 6 minuti e meso de filmato, i era i classici de ci g'avea 'na ponta de invidia...a tal proposito posso solo dirghe che se l'invidia la fusse rogna quanti se gratarìa! El Diretor

Rassegna Stampa - www.larenadomila.it
sutorna su indrio indrio stampa stampa