Paolo Veronese o Paolo Legnaghese? <<<
Monte Baldo - Fotografà l'asteroide <<<
Valpantena - Ricordi de filó <<<
Ilasi - Miracolà al capitél <<<
Bosco Césa Noa - Un buso de mondissie <<<

Finalmente una de le inissiative del nostro sito su carta stampà. Un bel libro su la storia del carnevàl Veronese in 164 pagine a cura de Andrea e Stefano Toffaletti, con 82 foto a colori, 32 documenti storici, manifesti e poesie inedite. Se parte da la storia del Bacanàl del Gnoco passando par le curiosità storiche, le sfilade de l'800 e le feste ne le piasse e nei teatri. La storia de ogni singola màscara de la çità, foto de la Corte Gnocolara, foto de le màscare de la provinsia, dei caréti alegorici e in più el Museo del Carnevàl con documentassiòn storica de grande valòr. Noantri femo cultura, le stéle filanti e i coriandoli ghe li lassémo ai altri......No Ve resta altro che entràr nel magico mondo de Bacchanalia!!!!!!
Sabo 11 febràr 2012 a le ore 11 la presentassiòn ne la Sala Culturàl Al Calmièr de Piassa San Zèn a Verona. Sarà possibile cromparlo su Ebay e su ordinassiòn ne le librerie a 15 euro. Edissioni Stimmgraf (ISBN 9788896689103)...su Facebook Bacchanalia par èssar agiornadi par coàndo sarà pronto par el publico.......

L'edissiòn 34 del premio giornalistico del Ristorante 12 Apostoli l'è andà a Massimo Gramellini, giornalista de "La Stampa" presente anca ne la trasmissiòn televisiva "Che tempo che fa" de Fabio Fazio, mentre l'altro premio rivà a la quarta edissiòn dedicà a "l'Arte" l'è andà al famoso regista Ermanno Olmi. Premiassiòn e çena 'ndoe el Diretòr g'avù l'onòr de far do ciàcole sentà coi pié soto la tola tra bone pietanse tipiche e bicéri de vini veronesi d'alta qualità.
Massimo Gramellini

Ermanno Olmi

A la Gran Guardia fin al 9 de aprìl 2012 una mostra de grande livél, coéla con dipinti del '700 con artisti del calibro de Tiepolo, Cignaroli e Rotari. Con 150 capolavori tra dipinti, disegni, stampe e documenti, provenienti da importanti musei stranieri come l'Ermitage de Pietroburgo, el Prado de Madrid, el Victoria and Albert de Londra, la Gemäldegalerie de Dresda, el Kunsthistorisches de Vienna, el Szépmuvészeti de Budapest, oltre che dai prinçipali musei italiani, la mostra porta Tiepolo e i so contemporanei a la Gran Guardia. El publico podarà 'vérghe el privilegio esclusivo de scoérzar el laòro de recàupero che l'a portà a la restitussiòn virtuàl del sofito dipinto da Giambattista Tiepolo par Palazzo Canossa a Verona, andà in parte distruto al termine de la seconda guera mondiàl. Costo del Biliéto intiero 10 euro. Orario da le 9.30 a le 19.30 La Redassiòn

L’era un marti de note e l’osservatorio che gh'è sul Baldo l’è riussido a scatàr 'na foto a sto bolide che’l ne passa più vissin de la luna. che el coréa che no se sa, che l’era largo quatrosento metri grando quasi come 'na portaerei. I siensiati ià confermado che no gh'era pericoli par la popolassiòn umana, ma che parò bisòn sempre tegnerghe de ocio a sti asteroidi, i ne ricorda anca che l’ultima 'olta che un asteroide l’a colpido la tera l’à sbatù in Russia nel 1908 scancelando intiere foreste. Stemo atenti tuti… La Redassiòn S.A.O. Don Calabria

El se ciama Igino, el gà i so ani, co' tanto fià da andàr via in bici, e l'e stà bon anca de far un infarto a Ilasi. Igino el séita a dir che el gà da ringrassiàr el Signòr e anca coél dotòr che l’à salvà coéla duminica che l’è stramassà in tera dopo l’infarto. Igino el conta che l’era 'na duminica come chele altre, dopo messa, giro in bici sù e zò par le solite stradèle, ma tra Cassàn e Ilasi el s'à sentido mal. Par fortuna, come un angelo dal çièl, l'è passà un dotòr che l’è intervenudo subito in aiuto de Igino e l’à fato rianimassiòn fin che no l'è rivada l’ambulansa. Igino 'desso el stà ben, l’è tornado come prima e no passa giornada che’l no ringrassia la Madonna del Capitèl e el dotòr che i l'à salvado.… La Redassiòn S.A.O. Don Calabria

Un gruppo de volontari speleologi l'a catado sù sinquesento chili de mondissie da un buso a 1535 metri sul livel del mar. Atressè come par andàr in montagna, solo che invesse de 'nar in sù i va in zò, drento i busi. Dopo aver armà (come i dise lori quando che i pianta ciodi e vide par tacarse co le corde ) el buso iè ne zò e ià scomisià a catàr su de tuto. Rue de goma, sporte de mondissie, latine, baterie, fero vecio, vero e plastega. Insoma 'na discarica. El Comùn de Bosco Ciesa Noa e l’Amia i s'a organisè par eliminàr tuto el materiàl e metarlo ndòe che el và messo. Da sotolineàr el laoro importantissimo dei volontari sensa dei quali no se avarìa podù far gnente..… La Redassiòn S.A.O. Don Calabria

El studioso Luigi Manfrin apassionà de arte el sostién na bela nius: pararia che el famoso pitòr Paolo Caliari vissudo a metà del '500, e conossudo in tuto el mondo come “el Veronese” no'l sia miga propio da Verona ma da la provinçia. Ghe dei documenti de la fameja del pitòr che dimostrarìa che i vegnaréa tuti da Legnago e mejo ancora da Vangadizza. Da le carte vien fora che nei registri ghe el nome de tale Gabriele e Caterina e un fiol Paolo de ani uno, semo nel 1529 e Gabriele, so pare, el laoràa propio a Legnago. Insoma la discussion l’è verta e le carte le parla ciaro, caso mai semo pronti a cambiarghe nome d’arte al pitor e a far i onori a Vangadizza. La Redassiòn S.A.O. Don Calabria

Coante e cossa i conbinàa na òlta i butèi de inverno, coando i naséa a far filò, de coà o de là del vaio, de sóra o de soto de la cesa, ne le stale de i pitòchi o de ci se credéa siori. Solo el bon Dio el le sa! Na cosa de sicuro l’éra, che le asenade le vegnéa senpre contè, a meno che no’ l’éra roba da morosi. Se n butél el proàa a vedare se la tale la ghe stà! O no’ la ghe stà! Su sta facenda, i butèi, no’ i diséa gnente! Al massimo, se sentéa on MA! Ma, par nar a spìarli, sti “Amanti” come faséili? Se sa che i filò se i faséa ne le stale e sóra le stale gh’è le téde o fenàri e le téde e i fenari i gà el bocaról, ch’él serve par butàr zo el fén per goernàr le bestie. Cossì, se la maraia la saéa che ne la stala gh’è n buteloto ch’él ch’él se próa con na butelota! Eco che la maraia, la metéa n moto el piano spìa! In du trì, e naséa su la teda a pian a pian, come i gati, de gatomào, dopo uno el se slongàa zo con la testa dal bocaról, i’altri du i le tegnéa par le ganbe, parché no’l sbrissia zo e a ch’éla maniera lì, i podéa a vedare coalcossa e inmaginàr tanto. Gh’éra de le stale, che de sóra i corni de le bestie, le gh’avéa n buso grando diese schéi, parché girésse n po’ l’aria, e la stala no’ la fésse massa umidità, n coele stale lì, l’éra na cucagna dal de fóra spiàr! Ste àsenade, i’è faséa anca coando mi éro n buteleto. E me ricordo de coel che n butel el ghe contàa ai altri su coel che no’ l’è sta bon de vedare, ma de coel che l’è sta bon de sentìr! E el ghe contàa: “No’ ò ìsto na malora, ma ò sentìo che la gà dito: “Sta atento a no ronperme la sotoveste, che l’è nóa.” E el butel el gà risposto: “Se te la sbrego, te la conpro nóa e pì bela!” Mi séra n buteleto e poco de ste cose me ne ntendéa, ma vegnèndo grando e ricordandome de ci i parlàa, ò fato du più du, e me son dito, che el mondo l’è senpre stesso! Altre comedie, me ricordo de érle viste e sentìe. Sérimo ne la stala del “Tale” e ne la stala gh’éra diverse butele. Capitàa fóra n corte con la moto n butel, o magari du. Na òlta rento ne la stala piena de gente ’sti butei, con so bupà e so mama de le butele e i faséa de tuto parché ’ste butelote le nésse fóra da la stala, anca par pochi minuti. Cossì n butél el tacàa: “Ma, te si vegnù con la moto Toni? Se pol mia nar a vederla ’sta bela moto?” Anca le butele le disea: “Sì, dai memo a vardarla la to moto?” Ma so bupà el ghe diséa: “È fiole, vardè che l’è la moto ch’él gh’éa dominica al brespo?” E magari calche butela la se aldegàa a risponderghe a so bupà: “Ben bupà, alora nen fóra a vedare la luna!” A ’sto punto, la mama la ghe diséa: “Va ben né fóra, ma par sincoe minuti e uàltri buteleti, nè a vedare la moto, che ’l so che ve piase goardàr le moto de i butei!” Noantri naséimo fóra, goardaimo la moto e vegnéimo rento subito, o par el fredo o parchè i butei i ne goardàa storto. Ma, de fóra no’ le podéa starghe tanto, parché, el vècio, el faséa n gireto fóra da la stala. I filò, na òlta se i faséa ne le stale grande e ’ndó gh’éra tanto posto da sentàrse. Se se sentàa su le bale de paia, la luse l’éra bassa e soto la luse se sentàa le done, parché le gh’éa da uciàr. I omeni, i butei i buteleti i se comodàa piasè distanti, nei cantoni o i se sbogolàa ne la fenàra, se gh’éra tanta gente, gh’éra ci se oltàa ne la grepia de le bestie. Coeste, de solito i’éra oltè e de consegoènsa no’ le disturbàa. Par mi, ai filò che se faséa par le stale, con uno che ciàcola, colaltro che contàa, uno che ghe da soto a na maniera, uno che urta che coà e uno che ponta de là. Ai filò, l’éra el posto giusto par conbinàr i morosi giusti e con tuto coel che… a pian pian ghe naséa a-drio.  Luigi Ederle da Gressana