Come l'è vestì el Sire del Carnevàl de Verona?.

El Vestito
Par vestirse ghe vol almanco 'na mes'ora co' l'aiuto de un cerimoniere. Quando vedemo sfilàr el Papà del Gnoco con in testa el capél e indosso el so vestito avorio e rosso, tegnendo in man el piròn, no podémo gnanca pensàr quali particolari se sconde drio.

Le Misure
Se parte dal 54 par i «magri» che no i pesa più de 80 chili al 64 par quei che no i supera i 110 chili. Ne la sede del Bacanal a Porta San Zén jè conservà almanco 'na diesina de vestiti da sire realisà a Milàn da la casa d'arte Fiore. Quando un candidato deventa sire o va a cromparlo da un sarto o el ciapa quél che ghe vién dato parò no deventando paròn e a fine serata el deve portarlo da novo in custodia.

El Capél
No l'è facile da realisàr e gà la forma de un baldachìn colorà da 'ndoe vién zò perline e strasse de ogni tipo e l'orìn dorà. Par ci no le savesse rapresenta el palco che in passà vegnéa posissionà a San Zén par la distribussion dei gnochi a la popolassiòn (fin al 1945).

El Piròn
El "scettro" conossù come «piròn col Gnoco», una "forchetta" che ne indica la distribussiòn dei gnochi volù da Tomaso Da Vico e come dise el proérbio «Porta Gnoco sul piròn, sempre alegro mai passiòn».

La Pansa
El vestito come dito l'è 'na cromia de colori da l'avorio al rosso: davanti, sora el cussìn che fa la pansa "dell'abbondanza" anca ai candidati più magri inpicadi, gh'è la pansa con i botoni dorà, che soto la gola vién serà con un "foulard", mentre sui orini (orli) sia de la giaca che de le braghe i finisse con un "pizzo" ricamà e vari campanéi: 12 par gamba e un pochi sul fondo de la giachéta.

El Tabàr
Da la schéna dal tabàr rosso de "pannolenci" fodràdo de raso bianco, vién fora grassie a un tajo, un grosso gnoco.

Le Scarpe
Le scarpe jè bianche, de pèl, con sora du pon pon de lana rossi.

La Barba
L'è fata in lana de bufala, la deve èssar lavà e petenà; la costa almanco domila euro. I finti cavéi un tempo i vegnéa confessionà da la storica botéga de corso Porta Borsari. «Nel tempo el vestito de la màscara l'è cambià solo in parte. Se vardémo i afreschi del pitòr veronese del '700 Marco Marcola, el Papà del Gnoco l'era vestì con una specie de tuta intiera de colòr avorio con davanti oto botoni grossi come pon pon e g'avéa el capél fato a cono. Anca la barba l'era diversa: del tipo venessiàn, a ponta, come quéla de Pantalòn, sensa contàr el grosso naso finto». Un costume intiéro el vàl come minimo 5000 euro.