La Rena Domila - El Canto del Cor

La Rubrica dei Poeti veri e de quei in erba. Se te vol colaboràr anca ti e far conòssar le to poesie in tuto el Mondo, el nostro sito te mete a disposissiòn una pagina al mese in questa rubrica.... alora cosa te speti? scrivi a: redassion@larenadomila.it La Redassiòn, no l'è responsabile de le poesie spedì dai nostri letori e in particolàr coàndo el materiàl no l'è propio e no autorisà da tersi. L'è proibì publicàr le poesie sensa citàr autòr e sito. I dati fornidi i vegnarà conservadi da la redassiòn e no distribuidi a tersi.

[Come on bogon!]

L’era lì
querto da ‘na montagna de parchè
on giachetón ónto
e ‘na cìca de traverso,
sensa pressia el strapegàva
on pàr de barche ai piè,
caminàndo drìo ai muri.

I òci ciari jera ‘nboscàdi
fra barba e cavéi...
sginse de cel
in meso a tuto quel griso!
… cissà, me digo
se’l vorea ‘na caseta calda
co’n bel cadenasso
par no’ dormìr soto le stéle
o su’n carton a la stassion,
a fianco de'n fiasco vudo...

Lù, forsi,
l’è contento cossì
con tuto adrìo
soto la scorsa dura
come on bogon …

... Libaro!
Paron del mondo...
anca se l’è...
solo on barbón.

// Agnese Girlanda //

^ torna su ^

-------------------------------------------------

[Le Sgiàvare]

Drènto la scóla,
che adesso la soméja
a un scatolìn de cipria,
no' gh'è pì el solàro de legno.
El canto,
che le sgiàvare indosso
ai nostri pié birbanti
le faséa con ogni asse,
come no'l ghe fusse mai sta'.
Sgiàvare, scarpe de legno
co' le bròche soto
par slissiar sul giazo,
sgiàvare co' la paja drènto,
ónte de grasso,
me par de vérveghe
ancora adosso.
Tuti me conoscéa dal passo
e mi conoscéa tuti,
uno par uno
e classe par classe,
veri squadroni
de cavaleria.
Ghe ne j'era una
che la faséa el canto
de 'na caroza a tiro quatro.
Chissà forse quela
de qualche principessa
invità a 'na festa
in qualche castèlo.
Nessun rimpianto tutavia
par quei tempi pitochi.
El progresso però...
tirarghe via a le scarpe el canto...

// Luciano Rossi - Vangadizza//

^ torna su ^

-------------------------------------------------

[Santa Giuliana]

Sóra a ʻna vècia marògna,
che varda de sóto ʻl paese
coèrte de mùs-cio destése
lóngo el sentiér a saléso,

sporcà de tèra coʼ ʻn méso,
rame de olivo sbregàde.
dal tempo vién spampanàde,
supiàde coʼ forsa dal vento,

che sóna ʻna dólsa campana,
desmìssia de bòto ci sogna,
me spècio nei òci de éla,

ghe digo coànto l'è bela,
el cór in gola me sento,
rivàdi a Santa Giuliana....

//Andrea Toffaletti //

^ torna su ^

-------------------------------------------------

Luigi Ederle

El poeta che te porta a spasso tra i ricordi ne la so Valpantena. vai

Mario Maimeri

In esclusiva le so poesie. Uno tra i poeti pì grandi del '900. Tra i so capolavori Alpin de giasso e le poesie su Verona.. vai

Tolo da Re

El pì grande poeta Veronese. L'Adese la poesia più bela de la léngua Veronese. Chi te pol gustarTe le pì bele poesie su la nostra çità...vai

Angelin Sartori

5 poesie del grande Angelin con Mama, El Primo baso, L'eto tratada, Nina Nana, 10 consili a n'amigo vai

Franco Ravazzin

Le bele poesie nostalgiche del nostro amigo "Rava" con vecie ostarie, caval a dondolo....vai

Andrea Toffaletti

Le poesie del nostro Diretor da quele operaie a quele d'amor par finir con quele su Verona. vai

G.Paolo Feriani

5 poesie del nostro amigo Feriani piene de sentimento con Non me vergogno più, De sori i copi, El Salgaro rosso, Fora la piova, L'ultima stassion vai

Gianni Recchi

5 poesie del nostro amigo Gianni con Sgalmare, El Calsirel de oro, Soneto par Piassa Erbe, Quando i rumarà, E sfido mi....vai

CANTO DEL COR

Rubrica dedicà ai pì grandi poeti veronesi del '900 come Tolo da Re, Angelin Sartori e Mario Maimeri a quei del giorno d'ancò come Feriani, Recchi, Luigi Ederle e 'l nostro Diretòr Andrea Toffaletti, par finir con quei in erba che ogni mese i g'à la possibilità d'esportàr le propie poesie par el mondo con La Rena Domila.