www.larenadomila.it - Etimologia

Partendo da la tradussiòn Veronese-Italiano-Inglese par finìr analisando le raìse de la parola......ètimo!

Arsiciòco > carciofo > artichoke

Podemo catàr parole che ghe someja tra el XV° e 'l XVII°secolo ne l'inglese "artichoke", nel todesco "artischoke", nel russo "artišok" mentre la derivassion da l'arabo "al harsaf" che tradoto in italian risulta "il carciofo".

Bacaiàr > vociare > to bawl

Probabile alterassion del francese "begaié" in "begayer" del XIV° secolo

Bacàn > contadìno > farmer

Da l'arabo "baqqal" frutaròl, con diramassioni nel turco e nel rumeno "bacal" erbaròl

Bagigi > arachidi > peanut

'Na "bona màndola" ne l'arabo "habb'aziz"

Basalicò > basilico > basil

Nel '900 d.C. lo catemo nel tardo greco "basalicòn"

Braghér > seccatore, persona trasandata > bore

In origine se indicava el "basso ventre" infati l'era el significado provenzàl de "braguier". L.R. Col tempo i ghe lo disea a la séngia de coràme (cintura in cuoio) o una fassa de contenimento erniario

Bombàso > bambagia, cotone > cotton

Nel tardo latìn del x° secolo d.C. conossù come "bambax" quasi istesso al greco-bisàntin e ai so derivadi "pàmbax, pambàkion" che in origine i vegnea da "bänbäk"

Brassadèla > ciambella > ring-cake

Pochi i conosse 'sta ciambela dolsa presente soratuto ne la campagna veronese. L.R. Etimo usà da almanco 600 ani in bona parte del nord-Italia "brazzatella, braçeelo", conossù in Germania e penetrà in Austria col nome de "bretzel" nel '300.

Broàr > scottare con l'acqua bollente > to burn

I le disea in Italia soto varie forme quasi istesse ma forse l'origine par todesca con "brüejen" col tempo deventà "brühen"

Caciòla > berretto > cap

Sembrarìa un termine che'l possa 'rivàr dal mantèl con capucio usà da la Césa o forse anca dal rumeno "caciula" con significado istesso del'Italiàn "berretto"

Càlto > cassetto o loculo del cimitero > drawer

Lo podemo catàr nei vari dialeti italiani come "càltro, calatro" o nel latìn "calathus" ma anca nel greco "kàlathos"

Fèrsa > morbillo > measles

Termine conossù in bona parte del Veneto ma de proveniensa de léngua todesca presente in tuto l'arco alpìn con "fersse e frässle".

Fìnco > fringuèllo > chaffinch

De origine germanico-antico "fincho" trasformà in "fink"

Foréta > cuscino > pillow

Cussin, cuscino; "foretis" nel latin medioevàl del '300 da colegàr al francese antico "feurre, fouarre, forre" paia e al francese moderno "fourrer" impienìr.

Maràia > compagnia > company

Dal francese "maraille", popolo

Ratatùia > cianfrusaglia > trifle

Roba da pochi schei de poco valòr; da la "sboba" francese "ratatouille".

Ronchesàr > russare > to snore

Con difusion nel Veneto come "ronchezare e runchizar", dal greco "rhonchiào, rhonchìzo", in italiàn russare

Scataron > spiga tagliata > ear of corn

Mossicon de cana o 'na spiga taià; presente nel Veneto ma i dise anca de proveniensa todesca "schaft" nel senso de fusto, tronco o dal greco "skèptron" par bastòn regale

Sabalòto > sciabola, gambe storte > sabre

Ci g'à le gambe storte "sàbale"; ma l'origine sembrarìa derivàr in Veneto da la somejansa de la sciabola incurvà con le gambe storte. L.R. L'origine de la parola "sàbala" l'è o dal todesco "säbel" o dal slavo "sablja" o da latìn medioevàl "sabel".

Scossàl > grembiule > apron

Vocabolo che te pol catàrlo in tute le parlade del nord Italia nei vari significati scorso=paltò o scosso=mantèl; L.R. Secondo noialtri quel più significativo l'è nel longobardo "skauz" o ne le forme todesche "skoza e schoss" par indicàr el grembo

Sgnàpa > grappa

De origine todesca "schnaps" che fin al XVIII° secolo indicava el classico sgorlòn de aqua, in italiàn sorso

Soràr > rinfrescare > to cool

Podarìa derivàr da la parola tardo latina "ex-aurare" missià con quela francese "essorer" par indicàr 'na cosa da sugàr a l'aria.

Strìcola > strisciolina > strip

Più de 700 ani fa in Veneto l'era la "stricha o strica" dal longobardo "strihha" cambiado nel tempo nel germanico "striks" e nel todesco "strich"

Trincàr > bere > to drink

dal todesco antico de mile ani fa "trinken", passado in Italia, par spostàrse col tempo in Francia quasi 500 ani dopo "trinquer". Fonti L.R.

^ torna su ^