Dopo el clamoroso sucesso de "Quel giorno", émo deciso de publicàr altre storie del diario de l'amigo Sergio, che dopo èssar stà lassà da la morosa l'è scapà da Verona in "esilio", prima a Monaco e dopo a Milàn, 'ndóe la tentà de rifarse 'na vita. Fati realmente sucessi, scriti sul diario del nostro amigo e publicà in forma romanzà dal nostro Diretòr. Nomi de persone e de località i è puramente inventadi, el resto l'è tuto vero.

Introdussion ....."L'è in partensa dal Binario sié el trèn par Milàn çentràl.....ferma a.....Peschiera del Garda, Desensàn, Bressia, Rovato, Ciari, Romàn, Trevejo, Pioltél, Milàn Lambrate"......scominsia cossita la fola da pendolàr del mitico Sergio, tute le matine, a le sié e quaranta, da la stassiòn de Porta Noa.

1° capitolo / el biliéto - Te pol incontràr de tuto ne l'arco de la to vita, se te giri in longo e in largo par l'Italia e nel mondo, spesialmente sui treni, persone de ogni rassa e stassioni costruì in forme artistiche da architeti pagà a peso d'oro. El primo problema l'è cromparse el biliéto, una colona de persone una drio l'altra, come formighe, a spetàr el propio turno davanti a la bilietéria. Dopo averlo crompà e mostrà come trofeo viste le dificoltà, Sergio pian pian el va verso el binario par Monaco. Si parché, dovì savér, che dopo èssar stà molà da la morosa, el s'à catà laoro ne la çità todesca, co' l'oscuro tentativo de desmentegarse de la so trista storia. Ma chél giorno la so vita l'è cambià da novo. 'Na diésina de "vu cumprà" de ciare origini africane (più scure che ciare!) coi classici borsoni neri con drento, borse, valise tarocade, i scapava da la polisia feroviaria parché i avéa viagià a maca, e propio in chél momento Sergio el vién buta contro al muro, da la forsa incredibile de 'na mandria de bufali inpaurì, come chéla che te vedei un tempo nei film de cai boi (cowboy). El biliéto el vola in siél e come 'na piuma mossa dal vento se posta par tera arénte a un altro biliéto de 'na pora dona cascà anca éla par el stesso motivo. Cossita de pressia, el ghe ne tol su uno, mentre el so trén l'era drio a partìr. Ma pena rivà al binario tri, el vede che l'era el biliéto sbajà. E via de corsa in serca de la dona con in man destinassiòn Monaco. No la gh'era più. Sergio a che'l punto el va al binario sié e parte par Milàn. La so vita la stava cambiando da novo........ ^ su ^

2° capitolo / el trén - "L'è in partensa dal bin....rio....é.....el tr.....par M.làn, ferm.a.......Garda...sia.....ovato, ari, tél........centràl"....Dopo èssar montà su 'na "carrozza" ciamà cossita ancora nel domila, gnanca te fussi nel mile e otosento, el se senta tacà al finestrìn. La siélta de carossa e posto va secondo 'na logica. Ciapàr uno de i ultimi vagoni, no chél 'ndóe la zénte l'è più vissina a le scale che te porta drento la stassiòn e gnanca uno de i primi, in caso de scontro te saressi messo mal. Una dona par sentarse in carossa la va tra i primi posti se la vede che gh'è un omo tra i ultimi; se entra un altra dona la va poco distante da la prima o in caso la va tacà o un bocia o un vécio entrà ne la "paçe dei sensi"; in tuti i casi i bianchi i va lontàn dai neri, ma mal che vaga arénte al manco scuro. La "fortuna" l'à volù che 'ndóe gh'era lìbaro, una tribù de "vatussi" s'à sentà e scominsià a zigàr talmente forte che no gh'era bisogno del celulàr par telefonàr in Africa. Sergio el manda zò, i so problemi i era ben altri, ma el caldo sahariano se faséa sentìr, cossita el verze el finestrìn co' la speransa che la spussa de ci no s'a lavà se confondesse co' i campi ben inluamaradi de la Spianà e i freni del trén. Pronti, via, el trén parte, in compagnia de i mile pensieri del nostro amigo, che nel longo viàio i saltava da 'na parte a l'altra de la so testa. Passa cinque minuti e 'na dona sentà trenta posti più in là, va dal Sergio dimandandoghe se podéa par cortesia seràr el finestrin parché gh'era massa aria. El nostro amigo ghe fa presente che magari la dimanda l'era da far a ci gh'era sentà arénte a ela, la famosa tribù dei Vatussi. Cossita in modo non direto, anca lori i séra el finestrìn. A volte entràr ne la testa de le done l'è come far sié al super enaloto. Ormai el trén l'era rivà, co' la so calma a la stassiòn de Peschiera. ^ su ^

3° capitolo / Peschiera - Ogni volta che Sergio el passava da Peschiera el pensava a chél baso, ghe sembrava che'l tempo se fusse fermà, tanto che s'a alsà de scato, quasi el dovesse smontàr par incontràr la so dona, Silvia, quasi da volér provàr ancora che l'emossiòn che da la testa al cor ghe rosegava drento a distansa de un ano. El posta le mane al vero, mentre le làgreme le vegnéa zò una drio l'altra e bastiemando el ciapa a pugni el finestrìn zigando più volte "parché, parché". La zénte vardandolo la pensava che fusse mato, ma forsi visto chél sucesso durante la giornada, lu l'era forsi el più normàl. Cossita el se senta da novo mentre la so testa l'era fissa su chél ricordo, su chél fotograma de la so vita, co' la speransa de incontrarla ancora, seitàndo a giràr chél film che g'avéa propio lu come protagonista; ma el trén el parte da novo e i ricordi via via i va 'ndóe i s'era fermà "quel giorno". Poco dopo 'na bela bionda, alta, na bela gnoca de butéla, la va arénte al nostro amigo e con voçe dolsa e fina la ghe dimanda se'l posto dinànsi a lu l'era disponibile. Da chél momento e fin a la stassiòn de Desensàn i do i scominsia a ciacolàr come amiçi de longa data. De boto tuti chéi bruti ricordi i va via da la testa de Sergio, fin quando, 'sta butéla l'è andà in bagno prima de smontàr, fasendose compagnàr dal nostro amigo. Un colpo de vento l'à verto la porta del cesso no ben serà e Sergio el vede éla, ansi lu, pissàr in pié. No l'era 'na dona ma un omo che l'avéa cambià sesso; in giro gh'è done più brute e la chirurgia al dì de ancò fa passi da gigante. Sergio a chél punto el scapa via come l'avesse visto el diàolo, pensando al pericolo pena scampà e a la stassiòn maledeta de Peschiera. ^ su ^

4° capitolo / Sandokan - A la stassiòn de Desensàn monta sul trén un indiàn con tanto de turbante, come Sandokan la tigre de la Malesia contà da Emilio Salgari. Sergio l'era ancora soto-sora par chél pena sucesso, ma ormai gnente podéa spaventarlo de più. L'indiàn el ghe dimanda in inglese se l'era un interçity, forse parché in India i g'à i treni messi peso dei nostri? Me par impossibile. El nostro amigo el parlava solo el veronese, no posso dirVe cosa el g'abia risposto, ma la fortuna l'à volù che su chél vagòn un controlòr l'era lì poco distante e tuto s'a risolto con una sganassada. A Sandokan no ghe restava altro, visto che, la persona che la dovéa darghe 'na man conossèa solo el romàn. El belo de noantri Italiani, che quando se catemo in situasioni lenguistiche sfavorevoli catemo sempre la solussion, magari con 'na serie de gesti. L'indiàn torna indrio da Sergio e se senta poco distante, fissandolo piassé volte sensa pensàr che in Italia, quando calchedùn el te "punta" l'è 'na specie de gesto de sfida. El nostro amigo se cava i ociai e con un inglese-macheronico ghe dise:"dick want?"....casso vuto?....Sandokan el resta lì e da la giachéta mesa sbusa tira fora un nùmaro telefonico, che l'era chél, del ristorante che gestiva a Milàn con la so faméja. Sergio el g'avéa da magnàr a la sera, ma con la promessa, de tor la fiòla come sposa, questo spiegà a la fin del viajo da un butél de l'Università Bocconi che l'avéa scoltà la conversassion. Par caso, el podéa 'verghe mojér e laòro, ma no conossendo le léngue, el ciapa el foiéto e ghe ne fa coriandoli davanti a la facia de l'indiàn incassà, gnanca fusse deventà un caso diplomatico. Milàn l'era ancora lontana...... ^ su ^

5° capitolo / la faméja Ikea - El viaio l'era ancora belo longo e Sergio se indormensa poco distante da la stassiòn de Bressia, straco dopo 'na matina 'bastansa movimentà. Purtropo quando te si in un logo publico in mèso a la zente e no ne la foresta de Giazza, l'è façile che te vién disturbà. Con diése valise, una drento l'altra come na matrioska se fa avanti ciassando e urtando a destra e a sanca, la faméja Ikea cossita ciamà par le ciare origini svedesi. Un omòn con spale larghe come un mobile a quatro ante, biondo che più biondo no se pol, 'na mojèr con braghe curte e sandali da frate sensa contàr i calsetoni sexy longhi fin ai senoci; i quatro fioi, de cui la più grande, con quarta misura de....e un par de ciape da nobel, ghe struca de ocio al Sergio, che con molto stile, da gnagno, ghe fa posto arente a lu. A chél punto i verze le valise e le borse e i tira fora una cartina dei laghi italiani. I le gira da 'na parte e le gira da l'altra, i scominsia a ciacolàr con frasi curte come i fusse drio a mandàr i sms col celulàr Nokia. Altro giro de cartina e i ghe dimanda el Sergio in svedese un informasiòn. I gira le cartine, i le posta una a l'altra i le gira ancora, i le varda, come i fusse drio a lésar le istrussiòni par montàr un mobile Ikea, fin quando i se rende conto che i era le cartine dei laghi scandinavi. La butéla l'era bionda con 'na pel bianca come la neve, do ganasse 'pena 'pena rosse sensa contàr i oci celesti grandi come el Garda, ghe struca la man a Sergio disendoghe una parola conossù in tuto el mondo: "ciao". Poco dopo la faméja Ikea smonta a Bressia e 'l nostro amigo se indormensa da novo, come fusse stà un bel sogno...... ^ su ^

6° capitolo / la dotoressa - Stavolta sembrava la volta bona, l'avéa incontrà la dona de la so vita, infati 'sta storia l'è durà a longo, anca dopo 'sta bela aventura che ve sto contando. De punto in bianco a l'altessa de Lonato, una butéla de origini russe, la perde conossensa, la va via de testa e mola i brassi in tera. La dovéa dar al mondo un bocia. Sergio el ciama aiuto, fatalità sul vagòn gh'era 'na dotoressa, Sonia, che in colaborassiòn col nostro amigo riesse ne l'impresa de far nàssar un butìn sul trén, che ciaparà el nome de Sergej. Da chél momento Sergio e la dotoressa veronese i sarà più che amiçi, ogni sera i se scrivéa in ciat e i ciàcolava par ore e ore, esperiensa ciapà co' le tanàie visto che l'era stà molà da la so Silvia con comunicassiòn via internet. Me ricordo de aver visto Sergio feliçe come un tempo, arénte a la dotoressa Sonia, durante 'na festa 'ndóe el s'era esibì come balerìn e dj. Un sucesso clamoroso, tanto che gh'era la fila de done che voléa balàr con lu. Purtropo le storie bele le finisse, infati Sonia trasferì in altra çità par laoro, l'è sparì sensa dirghe a Sergio 'ndóe l'è finì. Sul più bel che la fortuna sembra giràr da la so parte, la sfiga g'a bussà ancora a la porta. La cosa più incredibile, che da chél momento, Sergio el girava par bar e discoteche, feste, come animatòr, dj, cantante e balerìn; altra svolta a la so vita e cariera da impiegà. Milàn l'era sempre più lontana ne la testa del nostro amigo, ormai desfà, a tochi, par tute le emossioni provocà par colpa de un biliéto del trén...... ^ su ^

7° capitolo / el pensionà - Come in tuti mèsi publici, gh'è sempre calchedùn che no paga el biliéto. Stavolta l'era el turno de un pensionà, che secondo una so strana teoria, ci l'è vècio no deve pagàr, parché ne la so vita, l'a versà tanti schéi a le Finanse. Cossita se sente un ciassàr come ne le più bele ostarie de Sotoriva, con el controlòr pronto a far 'na multa e 'l pensionà che se inventa le scuse più impensabili. Sergio el se alsa in pié e cambia vagòn, anzi l'à ben pensà de serarse drento al césso; ma gnanca lì podéa star pacifico, visto che un fumadòr el voléa entràr a tuti i costi par impissarse 'na sigareta. Eh si, se sul trén gh'è divieto de fumàr, i fumadòri par no ciapàr la multa i se sconde nel cesso; el problema l'è che quando i passa par i coridoi i lassa un striso de fumo e i controlori almanco che no sia stupidi, i le capisse, ma i fa finta de gnente. Sergio, dopo avér perso l'amòr de la so vita, l'avéa tentà de cambiàr vita, ma anca 'sta nova esperiensa no sembrava giràr ben, anca parché no gh'era molto sugo..... ^ su ^

8° capitolo / el caldo - Dopo èssar andà al cesso, el so posto l'era stà ocupà da un butél rasta, cossita no ghe restà altro che star tacà a la porta del vagòn in un coridoio un metro par du, in quatro persone, in pié, 'ndóe gh'era 'na finestrela come quei treni usà par trasporto bestie e par i deportadi, che faséa entràr 'na bava de vento. La temperatura l'era sempre più alta, una sauna, mentre Sergio l'era in un bagno de sudòr. Cosa far? No riussìa più a stàr in pié e de boto el casca in tera sbatendo la testa contro la porta. 'Na dona che ziga e la ciama aiuto, Sergio no risponde più. Fatalità la dotoressa Sonia l'era smontà sinque minuti prima e nissuni savéa cosa far, fin quando s'a fato avanti Stefi, butéla universitaria, ben piantà che faséndose largo tra la zènte, l'a ben pensà de butarghe 'na bossa de aqua in facia e farghe aria con un libro de matematica. El nostro amigo el vérze i oci ma seitando a dir parole sensa senso a parte el nome Silvia. Scominsia la gara tra ci l'era drio a viagiàr, par catàr 'sta Silvia, che la podesse darghe 'na parola de conforto; ma come savemo l'era solo ne la so testa. A che'l punto Stefi la ghe dise de èssar Silvia e Sergio el scurla la testa disendo una frase da far sganassàr l'intiero trén: "No, te si un altra, ma stasera se tromba?" L'era tornà chél de un tempo, l'omo bon, che riussìa a far sganassàr ci voléa restàr serio, come nel caso del so vècio amor...... ^ su ^

9° capitolo / Totò Gargiulo - In una de le stassioni, no me ricordo qual, gh'è el capostassiòn de ciare origini nordiche, forse, de "Bolzano Marittima", ciamà Gargiulo. Te si sicuro che quando te passi da chéle parti, el to trén o el se ferma o chèl che te si drio spetàr l'è in ritardo de un par de ore. Giusto parché fin a chél momento tuto l'era filà "lissio come l'oio", el locomotòr se ferma. La seconda volta a un ano de distansa, stesso giorno, mese e ora, quando Sergio, prima de partìr par 'na vacansa, l'avéa saludà Silvia a la stassiòn de Peschiera. Bastieme al siél. Milàn l'era deventà 'na conquista come scalàr el K2, ma Sergio speta de ripartìr, cucià a 'na colona, rassegnà, 'ndóe la Stefi la scominsia a contarghe la storia de la so vita come ghe ne importasse calcossa al poro omo. Da chél momento Sergio el g'avéa do done, no ò mai capì ci l'era la morosa e ci l'amante. La Stefi, l'era 'na butéla sempre piena de alegria, la organisava feste, gite, caminade campestri, giri in barca e bevude a l'ostarìa. Voja de sposarse e mètar la testa a posto, gnanca par sogno, una dona de chéle moderne sempre ciapà da mile impegni e soratuto da baracade con le amighe. Se no altro, l'era l'unica persona in grado de farghe desmentegàr le rogne a parte in chéla circostansa. Dopo tri ore da pare confessòr con la Stefi, el trén riparte verso Milàn Lambrate........ ^ su ^

10° capitolo / el mato - El viajo del Sergio no podéa finìr in gloria, e prima de entràr a Milàn çentràl, un mato, par modo de dìr, che de secondo laoro el faséa el predicatòr, scominsia a vardàr l'intiero trén zigàndo che'l... "mondo l'è malà, fuochi, fulmini e saette", e puntando el deo...."tu donna dal fazzoletto in testa, trattieni il futuro dell'umana specie?" e "tu baldracca dagli occhiali scuri ti nascondi dall'idilio della sofferenza che ci attanaglia?"....ma nel fratempo un complice el ciavava schéi e cose a la zénte che scoltava el mato. Sergio el vede tuto e con un scato el brinca el brasso del ladro e buta par tera el libro del predicatòr. Ma libarandose i scapa fin a l'ultimo vagòn. El nostro amigo, no'l gà el tacuìn, tanto che i schéi el le tién un pochi nei calséti e altri ne le mudande. Ma l'era restà sensa documenti........^ su ^

11° capitolo / Milàn - Mentre i ladri i scapava con schéi e i documenti par la stassiòn de Milàn, Sergio el dovéa pensàr cosa far. Ghe vién in mente de 'nar da un so amigo, Sante, trasferì a Lesmo, par dimandarghe se savéa 'ndóe catàr un posto de laòro e par dormìr o mèjo, farse ospitàr da lu, a maca. Cossita el ciapa la metrò e via soto tera, autobus, taxi fin drio a l'autodromo de Monza. Sona el campanél e se presenta. Sante no'l riussìa a credarghe, dopo 7 ani el vede da novo el so amigo, incredibile, 'na bela sorpresa. Dopo aver ciacolà par ore, Sergio, sensa casa, el deve tornàr indrio a Verona ma con in man un posto stagionàl ne l' asiénda informatica del Sante. L'era rivà la note, calma, ne la stassion çentràl no se sente volàr 'na mosca, a parte l'altoparlante che segnala l'ultimo trén......"Eurostar....Bressia, Verona, Venessia"......No s'a mai capì parché Sergio no'l volesse star fermo, farse 'na vita a Verona ma frequentàr la çità scaligera solo de note. Cossita ogni giorno, l'era uno dei tanti pendolari italiani a ciapàr el trén par nar al laoro con incontri e disaventure particolari.... ^ su ^

12° capitolo / Verona de note - Sergio, el girava par i vicoli sconti de la çità, a pié, finendo el giro noturno ne le ostarie de Sotoriva 'ndóe lo vedéa de spesso col bicér de rosso in man. Ogni tanto el frequentava le do butéle conossù sul trén, Sonia e Stefi tra feste, ciavade e matade. 'Na sera, intorno a le diése el ghe dise a la Stefi che'l g'avéa voia de dormir, l'era straco. El giorno dopo el dovéa ciapàr el trén da novo par Milàn come tute le matine. Dopo diése giorni, avanti e indrio l'era come 'na strassa. Cossita i paga el conto e via a pié, man ne la man par Piassa Dante, Piassa Erbe, Via Noa....fin quando, incrosa par sbajo el so vécio amor Silvia. Stefi no l'a mai savù ci l'era la "concorensa". Sergio el gira par le vie de Verona, slongando la strada con dimande su dimande de la so nova dona, sul parché del cambio de programa. Poco distante dal Ponte de la Vitoria, el vede sentadi in una gelateria, Silvia con le do vècie conossense, Simone da Parona e Baghera omo col fisico scolpì nel budìn. Si, parché dovì savér che 'l so vecio amor, ciamava amiçi anca quei che i g'avea fato del mal, compreso i "amici de gelato". Sergio el scurla la testa e tira drito tirando par 'na man la Stefi. Rivà a Piassàl Cadorna i monta su la vespa spècial par tornàr a casa. Ehhh...Silvia l'a preferì scargàr Sergio, par tornàr dal vécio amòr Alessio da Riva del Garda come se a 'sto chi ghe ne fusse importà calcossa de éla; chéla sera, l'era in compagnia de chéle persone che s'a messo in méso al so raporto col nostro amigo, persone false che i voléa conquistàrla, come dito da lori. Le stesse che g'avéa segnalà el giro a pié su le Toreséle in compagnia de Alessio, 'ndóe Sergio l'era capità con mi de proposito, in un ostaria poco distante da la partensa, par 'verghe la conferma de la capitolassiòn. L'Amicissia? El mondo l'è roérso, el m'a dito Sergio, l'è mejo comportarse mal, èssar falsi ne la vita sensa 'verghe pietà e rispeto par nissuni, forsi così te si valutà mejo...... ^ su ^

13° capitolo / verso casa - Dopo avér portà a casa la Stefi, l'era ora de butarse in leto, anca se, par poche ore. La sfortuna l'a volù che mentre l'era fermo al semaforo el vede la machina de la Silvia passàr e 'pena scatà el verde, con un colpo de mato, el parte a tuta veloçità e riva a mèso metro dal para-urti "nemigo". Par lu, col tempo, el so vècio amor l'era deventà un calcossa da cavàr da la so testa, un bruto mal, ma Silvia l'è stà talmente importante ne la so vita, una persona de fiducia, che con molta dificoltà vegnarà scancelà. Cossita l'à preferì sfanalàr e sorpassarla a l'altessa de Corso Milàn, salutandola co' 'na man. Sergio el pianséa, disparà, a distansa de 'n ano, come no fusse passà el tempo. Prima de rivàr soto le querte, l'è passà da casa mia, co' le mane su la facia, in làgreme, contandome de averla incontrà, ma l'amòr no l'era par gnente desmentegà. Anca par éla, penso, visto che'l blog che gestisso par el Sergio l'è stà visità par un ano intiero da Silvia anca quatro 'olte al giorno; no ghe l'ò mai dito, par no farlo stàr mal, no savarìa la so reassiòn. L'è ora de ronchesàr co ' la speransa che fusse stà solo un bruto sogno. ^ su ^

14° Capitolo - finàl - No l'è riussì a dormir chéla note, seitando a pensàr a quanto sucesso e a tuti i vèci ricordi. Podemo dir, che par 'na storia de pochi mesi el s'a sassinà la vita e finora no l'è stà bon de vegnerghene fora, girando come un móscolo in longo e in largo par el mondo. L'era matina, el sol alto slusegava su Verona. Partensa col so trén da Porta Noa verso la çità meneghina, ma a l'altessa de Peschiera, 'ndóe s'a fermà el so cor "quel giorno", el smonta dal trén e postando i fiori a 'na colona de la stassiòn, el se insenocia in preghiera, come fusse morto calchedùn. Dopo un ora el se alsa e scominsia a caminàr sui binari, col ris-cio de èssar schissà. La cosa bruta l'è stà che'l savéa cosa l'era drio a far ma el dolòr l'era talmente forte da no riussìr a ragionàr in maniera ciara. Dopo aver percorso quasi un chilometro sui binari, un trén dal trasporto gas liquido el vién avanti a tuta veloçità. Se no'l se butava al più presto fora da la ferovia la fine l'era sicura.....Sento metri a la fine dei so ricordi, de la so vita, col trén ormai 'dosso a lu. El Capotrén che'l sona disparà, nel tentativo de svejàr Sergio dal so mondo, gnente da far....Sinquanta metri par èssar smigassà e la so soferensa sarìa finì una 'olta par tute, sensa tegnér conto de ci gh'è voléa ben dal bon....rivà a vinti metri da Sergio, el trén, ciapa l'altro binario grassie a uno scambio in corispondensa de un scalo merci. No l'era rivà ancora l'ora de lassàr la tera, ma de vìvar la so vita con tute le so sfumadure in ben o in mal. Pian pian, come no fusse sucesso gnente el ciapa la so strada, longo el binario, triste e solitario....FINE ^ su ^

Andrea Toffaletti