Caminàr par Verona, co' i mile pensieri ne la testa, tra vie, piasse e palassi, con un ocio a le belesse storiche che le te porta a viagiàr nei ricordi e ne l'esperiense de vita passadi nel ben e nel mal...

1° capitolo / Coàtro passi - Far coàtro passi par la çità, de sera, sensa un vero parché, solo par el desiderio de ciapàr un po de aria, stando fora da le mura de casa o del laoro. Te vardi le vetrine de le botéghe sensa che te ne possa fregàr calcossa o magari co' curiosità te buti un ocio a una camisa firmà giusto par confrontarla a coèla che con manco schéi t'avei crompà al marcà del stadio dai cinesi; colòr istesso, seda pura, botoni blu e scarséle sagomade in stile. Ma 'pena te lassi i oci dal cartelìn de le scarpe de coràme, le to gambe le va avanti masenando chilometri. Védar via Nova, uda, sensa un ànema che ciassa, la pol darte un senso de tristessa e de libartà nel stesso momento. A 'olte éssar soli in un çità deserta, come un can 'bandonà, contribuisse a fogàr soto ai mile pensieri che i te rusa par la testa. L'è vera, parò se te lì par i fati toi, sensa 'na persona 'rente a ti e sensa avér tentà de taiarte le vene, vol dir che te si rivà al massimo del to equilibrio psicologico e che forsi te pol far de manco de çerte persone che iè riussì a metartela nel de drio e che t'e ciamà amighe fin a pochi giorni fa. Bisognarìa dimandarse el parché de ‘sta situassiòn e forsi altri passi tra el porfido incastrà nel çimento e ‘l marmo impastrocià da le ciunghe smigassade, no i fa mal par capìr se te si ti la vera causa o i altri......... ^ su ^

2° capitolo / Persone amighe - Girando el cantòn, te pol catàr la classica pissada de can, che l’a fato ‘na sorta de paciarina con el muro sporco de un vécio palassòn del ‘700. Tanti i dise che la nostra l’è ‘na çità pulida, ma anca un sempliçe cartél stradàl o un insegna luminosa pol dar un inquinamento visivo. Poco distante rodolà par tera, come un “involtìn primavera” drento a ‘na coérta spessa tri schéi, 'n barbòn, che se ne frega del provedimento del sindaco. Tuti i ghe passa de sora, arente,  ma nissuni riesse a védarlo.  A la fin semo “orbi” tanto o poco, un po tuti, a ‘olte no te vedi ci te gh’è poco distante, dando par scontà che coéla persona, ghe sia sempre par ti, in ogni momento. E l’è propio lì che scominsia la fine de la storia e de profonda amicissia. Tra i primi comportamenti negativi, farse i cassi propi l’è  a l’ordine del giorno. Ghe, ci come mi, fa de tuto par conbinàr logo, orario, persone, nel stesso punto, nel stesso momento, rinunciando in parte a i propi impegni. Ghe ci inveçe, prima se fa i cassi propi e se vansa tempo vién a spasso con ti. La dimanda che me fasso, mentre me sto ligando le scarpe sora a un pilotìn de Piassa Erbe, poco distante da la famosa costa, l’è, se son un amigo de conveniensa. Calchedùn ghe piase star con ti, altri, par spudorà interesse, altri par tute e du le motivassioni. Coàndo te capissi che no l’è el primo caso, l’è massa tardi. ^ su ^

3° capitolo / I parché - Se vardo la statua de Dante in Piassa de i Signori, me dimando el parché l’è inmusonà. Conossendo i veronesi, capisso el parché. Se a un veronese te ghe dimandi che làoro el fa, la risposta l’è tra el lamento e al massimo do parole. Pochi i g’a el coràio de dir el propio pensiér e tanti i g’a paura che te pol torli par el cul, ma l’importante l’è metarse in mostra con un bicér de scabio in man, davanti a una de le tante ostarie de Piassa Erbe. L’arte del darla a inténdar, al dì de ancò, l’è la méio, ma se no te ghè l’ànema da rot’in-cùl, la vén esercità al posto tuo da altri, o méio, da  i soliti. Se magari, no te parli e te ‘ste al to posto, te vén visto come Dante. La bona educassiòn e l’arte del savér ‘scoltàr, no l’è de moda, méio dir cassade e parlàr anca da le réce. Se vardo la statua de Fracastoro de drio al “sommo poeta” me dà l’idea che Girolamo sia pronto a butarghe la bala in testa, in pratica el comportamento del veronese medio, stàr sconto, no dir gnente, no esporse più de tanto e ‘pena possibile, metertela in che’l posto. ^ su ^

4° capitolo / La Banchéta - Anca el tempo pol contribuìr a farte stàr par i cassi toi, nei to pensieri. Le strade e i vicoli sconti del Domo i è sempre deserti e se piove, no te vedi gnanca un can o un gato. Te si ti e la çità, una fusiòn, un sorta de pastòn, ma ogni cosa pol ricordarTe coél che te credéi desmentegà. Una sempliçe finestra in stile venessiàn o un sempliçe pòrtego, come coél de Sotoriva, m’a fato vegnér in mente un bel giro a pié, a brasso de ‘na butéla, finì poco distante in Piasseta Bra Molinari, sentàdi su ‘na banchéta, ‘ndoe me son dichiarà e ‘ndoe me stà dito un bel “no”. Par mi, speciarme nei so oci, ne l’Adese e vardàr Castel S.Piero, el Ponte Piera e ‘l Teatro Romàn, l’era el massimo, figuremose, dichiararse a ‘na butéla, nel punto più storico de la çità, ‘ndoe l’è nata Verona! Ne la me testa séitava ripetarse, le parole, “mi, éla, Verona, mi, èla, Verona” a l’infinido…. No sempre parò te si drento a un lago de sfiga, poco distante, verso el Ponte Piera, me ricordo anca del primo baso da moroso, ma la banchéta me la portarò sempre nel cor par coànto el risultado l’è stà negativo......

.“La Banchéta”
El me primo baso,
la me prima "dimanda",
le me prime làgreme,
sentà sora,
coéla vécia banchéta,
'ndoe i me oci,
se perdéa in coéi de èla,
specio de la me Verona,
co' l'Adese,
el Ponte de la Piera,
e le roine del Teatro antico.
Banchéta
de i ricordi,
de i sogni,
de le speranse;
'ndoe tuto
pol scominsiàr,
'ndoe tuto
pol realisarse,
'ndoe tuto
finisse.
Coéla, l'è......
la me banchéta!

^ su ^

5° capitolo / Positivo e negativo - Parlando de fortuna e sfortuna, de positivo e negativo, me vién in mente, che ‘na sera, stufo de far el solito giro nel çentro storico, me son spinto piassé in là, verso San Zén. Si parché, dovì savér che par i "Veronesi de soca" ligà al rosòn de la césa del Santo patrono, gh’è un proverbio, che ne dise "che la vita, l’è come la rua de San Zén, un colpo la va e un colpo la vén". Nissuni s’a del propio destìn, noantri comuni mortali podémo solo costruirse la base de la sopravivensa, par riussìr a caminàr longo la strada de la vita. Coàndo te tochi el fondo, te pol risalìr, almanco l’è coèl che podemo augurarse, co’ la speransa che la fortuna no séita a farne i corni. Riussìr a édar bianco in un periodo nero, pol èssar la svolta o la fine del classico periodo che ciamemo vorgalmente, "de merda". Se te scominsi a védar bianco, te si più convinto del to valòr e sempre più forte, la soferensa la t’a laorà l’ànema come Berto da Cogolo co' 'n toco de fér scaldà sora al fogo e tornàr in futuro su i to passi dopo un amòr vero, penso sia molto dura. Ci vol stàr mal da novo? Negativo e positivo, come el "ricordìn" de un can, che ò pestà fora da la césa, lassà nei giardini de San Procolo. De positivo, un euro saltà fora propio da soto coéla crema. Un lato positivo in ogni cosa te lo cati sempre, dipende parò se gh’èmo la volontà de scoérsarlo no fermandose al primo colpo d’ocio o ai discorsi inutili de la gente maligna......... ^ su ^

6° capitolo / Rose co’ le spine - Pensieri, storie, la testa séita a masenàr nel disparà tentativo de catàr ‘na solussiòn a i problemi, ma come dito, del futuro no gh’emo certessa, su come costruirselo e viverlo un poco serenamente sensa grandi pretese, semo responsabili, méio un passo a la 'olta, ogni giorno un cubéto de porfido in più magnà da le to scarpe. Ci sémena vento el bina su tompesta, dise un vécio proverbio. A tal proposito me vién in mente el vento, che come al solito supia sora le Regaste de San Zén in tute le staioni, anca coéla sera, coàndo son passà tra i fiori e la fila de piante vécie. Rosari muciadi de un colòr rosso vivo, dal gambo curto ma da le spine che ponséa, tanto che a tocarle, te faséa un mal tremendo, come el tradimento, la mancansa de rispeto o el dolòr provocà da ‘na persona cara, co’ la coàl te volevi condivìdar la to vita, a la coàl, t’è donà fiducia, stima, oltre al to cor ne le so mane. Coàndo manca uno de ‘sti valori fondamentali, che pol dar un senso a la to esistensa e a ci te gh'è vissìn, no ghe Santi che tegna, tuto casca e tuto te par udo arente a ti, da no credarghe, da no riussìr a entràr co’ la testa ne la nova realtà che in verità l’è vécia. A ‘olte le cose che no nasse ben, col tempo no le va al méio e te çerchi de vìvar nel'ilusiòn che calcossa possa cambiàr, ben savendo che coèla strada no la te menarà da nissuna parte, spostando de giorno in giorno la fine.......

"Rose"
Rame che ponse,
pianse el me cor,
làgreme spante,
par ‘n dolòr,
rose che ponse
l’ànema intiera,
rosse de fogo,
par fate de siéra…
‘Desso le brùsa,
fora me sfògo….
“Sonti ‘na strusa
butà da ‘na parte?”
Vàrdo par tèra,
me tègno distante!

^ su ^

7° capitolo / Giorno e note - De giorno la çità l'è un splendòr, pochi i se rende conto che gh'emo un vero e propio tesoro. L'erba del vissìn l'è sempre più verda i dise, sensa savér che soto ai propi oci se pol 'verghe tanta roba bela, ma par el gusto de farse védar bèi davanti ai amissi, se va in vacansa, magari faséndo un mutuo, in Africa, Cuba, Sciarm en sceic ecc...e se te ghe dimandi a un veronese 'ndoe l'è Piassa Erbe, storse el naso, parchè conosse solo la "vasca" o méio, Via Nova. Sempre el solito discorso, darla a inténdar. El strovo de la note, co' le lanterne che sluse par i vicoli, dà coél senso de intimità e de serenità a la to ànema, sicuramente méio del giorno, 'ndoe no te gh'è tempo de fermarte a vardàr e a pensàr, parché la vita moderna, co' la gente che core, te fa còrar anca ti. Còrar no serve gnente, el ris-cio de desmentegarse de ci te vol ben, l'è alto e alora risulta inutile la solita frase "par ti ghe sarò sempre", parché l'unico sistema par 'verghe un dialogo a coèl punto, l'è un sms col celulàr, fonte infinida de beghe par mal interpretassioni,'ndoe te devi intivàr anca el sugo del discorso e l'umòr de ci t'a scrito el messaio. De note par la çità te si uno dei pochi e de giorno uno dei tanti e come ne la vita bisognarìa capìr, in çerti momenti, come contàr e come farse valér.......... ^ su ^

8° capitolo / Fatalità - Ogni tanto pol sucédar de insucarse o de scontrarse con un altra persona, che come ti, l'è a spasso par Verona ma a testa bassa, intenta a vardàr el celulàr e no 'ndoe l'è drio 'nar. Cossita, par caso, te pol far dei strani incontri, come una volta tra Via Stela e Via Capél, g'avéa pestà un ongia a 'na butéla, 'na gnoca de coéle "olimpioniche", che l'era drio a scrìvar un sms; el risultado l'è stà el so nùmaro de telefonìn, una serada in so compagnia e par finìr vegno a savér che l'era 'na me vissina de casa. La fatalità a volte, el destìn, dovarìa farte pensàr che le cose no le vén da ti par caso e se te si bravo e maùro te dovaressi capìr, che se calcossa t'è capità tra le mane, sensa volér e che te fa stàr ben, no bisogna lassarsela scapàr. No pérdar el classico trén che te porta "l'alegria" e stàr lì a spetàr che te vegna in brasso un calcossa de ancora piassé bél. No l'è el discorso de contentarse, ma de stàr co' i pié par tera. Seitàr a spetàr, rimandàr le decisioni, in particolàr modo coéle che pol rivardàr la to vita, l'è un modo par evitàr le propie responsabilità e de créssar ma anca in 'sto caso, fasendo atensiòn a no far del mal ci te vol ben e che l'è sempre al to fianco. Purtropo come nel caso del barbòn o del scontro da celulàr, te si un invisibile. Ghe ci vive nel so mondo e no se inacorse che pol pérdar un calcossa de importante e coàndo casca drento ne la realtà, l'è massa tardi. A la fin se te si ne la convinsiòn che'l to orto l'è el méio, l'è dura farte capìr che pol èssarghe calcossa de piassé importante fora da la to ànema. Ricordemose parò che l'è el to mondo, 'ndoe solo poche persone riesse a fàrghene parte e 'ndoe l'è façile che le staga con ti par un periodo limità visto che no te ghe si solo ti ne la so vita. Savér scoltàr, ci secondo ti, te pol fidarTe, deventà un ponto de riferimento, che te vol ben e che séita alsarte la man par farse notàr ai to oci, disendote che te stè sbaiàndo e magari dandote un conséjo soto vosse, podarìa èssar l'unica via de ussida. Ma se te si orbo e no te scolti se core el ris-cio de pestàr el barbòn. ................

"El Trenìn"
Un bel trenìn, che coréa
tuto pressia de scapòn
el paréa drio a sgolàr
strapegando i so vagòn.

Un ricordo buteléto
de la vécia ferovia
'ndoe a maca mi podéa
viagiàr co' fantasia.

Me bupà belo scéto
el m'a dito de ciapàr
de la vita tuto el ben

no lassàr scàparme via
se un trén pòl passàr
che me porta l'alegria!

^ su ^

9° capitolo / La Ferìa - De autuno, la nebia se impregna tra le case e i me ossi, coérsendo el sol e scancelando i colori de l'istà, ma primo de morìr ne l'inverno, le foie del Ginco biloba de le vécie Poste, le pitura Verona, co' un gialo cargo de colòr e de calòr, unica pianta de una çerta dimensiòn 'ndoe un poro can pol catàr un poca de sodisfassiòn ne l'alsàr 'na zata e far una bela pissada. 'Na pianta che l'a visto passàr e pissàr de tuto, vécio abitante de la me çità che propio su la so scorsa g'o scavà un cor con un cortél pensando a "éla", ma taiandome un diél. La me ultima soferensa, una ferìa profonda, come uno sbrego fato da un s-ciàntiso a una de le rame del Ginco, restà troncà. Coàndo vén a mancàr la fiducia verso un altra persona, la ferìa provocà da 'na mancansa de rispeto nei to confronti, sfadìga a serarse. De sera, el ciaròr dei lampioni passa tra 'na rama e l'altra, tanto che par ciapàr vita destacandose co' le raìse da la tera e mi ai so pié, me insenocio in segno de rispeto. Anca lu come noantri no'l sarà de çerto "indispensabile" ma come alcune persone l'è "insostituibile". Te vién voia de brincarlo, de strucarlo come coàndo te ste ben co' 'na persona cara, avendoghe la sensassiòn che sia un calcossa che no finissa mai, un calcossa che no te pol fàrghene a manco. Coànti sogni g'o contà a 'sta pianta e coànte delusioni el m'a coértà con le so rame.............

"La Ferìa"
Me son fato 'na ferìa,
co' 'na lama de cortél,
no l'è stada colpa mia,
'ndoe l'era el me servél?

Ghe inveçe uno sbrego,
che more drento al cor,
un dolòr che no spiego,
ma che nasse da l'amòr.

L'è profondo che te cucia,
da no riussìr a perdonàr,
gnanca el tempo te le giusta,

se de boto la fiducia,
la sparisse, vién a mancàr
e la to ànema se frusta..... ^ su ^

10° capitolo / Ricordi - 'Na sera avéa bevù tri, quatro goti in Sotoriva par desmentegàr le rogne, la testa la girava come 'na giostra, ma sul più bél, par pagàr el conto ò verto el tacuìn e tra le foie de schéi, l'è saltà fora la so foto, mi co' éla. L'ò ciapà in man, vardandola piassé volte, sognando, pensando, cosa l'era par mi, fasendome portàr, a spasso tra le nugole dei me pensieri, lisiéro come 'na piuma mossa dal vento, che sgola, sensa un motivo e sensa un parché. De colpo, el celulàr sona, mentre el cor sguissa, come spaentà, riportandome indrio, ne la realtà, ne la vita de tuti giorni, coi oci fissi su quel nùmaro, che se ripete, a l'infinido ne la me testa, con la speransa, che sia ancora ela. Gnente da far, lo smorso de boto, no voi sentìr nissuni, restando nel silensio de 'n ostaria uda a le una de note. Scapo via, lasso i schéi sul bancòn serando drio de mi la porta a quei ricordi, che te voressi scancelàr, sensa riussirghe, seitando a caminàr a testa bassa, sensa saver 'ndoe nar, con el cor impastrocià, con la testa nei mile mensieri soto la piova. 'Na gossa drio l'altra, la me fa còrar verso el portego del Cine Rivoli 'ndoe la me ànema la scomincia a tremàr no par el fredo o el vento seco, ma par coéi ricordi, passadi in coéle sere, tra le boteghe e l'udòr de onto. Me giro, da 'na parte, me giro da coel'altra, agità, pien de sudor, 'ndoe ogni piera, casa, cosa, ponti, palassi, strade, vicoli, piante, fiori, me ricorda ela, tormentandome, nel cor de la note, postando le mane nei oci pieni de làgreme fasendome zigàr el so nome. Tuto coél che vedo, tuto coél che sento, g'à la so facia, scolpida par sempre, nel so ricordo. 'Desso l'è matina, sponta el sol da drio le Toreséle e mi, dopo avér girà par Verona, me indormenso su la me "banchéta"..

"Sponta el sol"
Ancò l'è un giorno novo,
te scanceli co 'na strassa,
le rogne che te infassa,
vegnendo fora da quel strovo;

che t'à cucià nei to pensieri,
pensando che bel sarìa
se dimàn te cambi via
sensa vardàr 'sa te eri....

fasendo se te vol,
magari cose bele.....
quando spunta el sol !

spere su le mura,
de drio le Toresele,
ne la vita sempre dura..

^ su ^

11° capitolo / Salmoni e Amissi - Vardàr, pensàr, caminàr e ustàr. G'avì presente i salmoni che i risale i progni norvegesi? Eco, la stessa cosa l'è far coàtro passi par via Nova o Via Capél nel senso de marcia contrario a coél dei turisti. Te finissi in méso con poca possibilità de movarte, magari, solo saltàndo come un pésse scandinavo te pol vegnerghene fora; par de èssar strucà come 'na renga e la respirassiòn se fa via via sempre piassé dificoltosa ma finché iè giaponesi alti pochi schéi, te pol ciapàr un bocòn de aria, ma se te capita un todesco co' spale larghe come un armadio a do ante, magari inbriago de bira, te si "soto-aqua". Se scominsia l'usta de parfumi e de udori, un missioto incredibile da la fragransa de marca al sudòr selvàdego de çinghiàl dei boschi che ormai i à impregnà, la pél bianca come el late (deventà nel giro de mes'ora de sol...colòr aragosta) e i vestidi dai gusti piassé assurdi che nissùn stilista g'avarìa el coràio de vardàr, compagnadi a le calse cafelate alte fin sora ai senoci e a le savate francescane. Come ne la vita e come i salmoni, 'nar avanti par la propia strada, sensa girarse indrio, difendendo le propie idee contro tuto e tuti ma stando atenti a no far del mal a nissuni soratuto a ci te vol ben. Se te 'scolti i discorsi de la gente o de coèi che i se definisse to amici che 'l più de le 'olte i fa finta de darte un consilio valido, te vén tirà drento ne la "corente del progno". Te pol risultàr un pésse fora da l'aqua, ma sicuramente te dimostri personalità, unicità, sicuressa e de 'verghe un bel par de bale! Si parchè la parola amicissia l'è importante e no te pol dirghela a tuti, infati i veri amissi te pol contarli su la ponta dei diei. El resto iè dei conossenti, che no esprime opiniòn, i stà neutrali e come giusto che sia, i vol restàr fora da ogni questiòn ma con spirito finto-caritatevole i te dise che al posto tuo i lassarìa pérdar ogni sorta de complicassiòn. Magari a volte, no conossendo a fondo ci g'a davanti, i riesse a farte convinto, cossita te finissi nel mar de la gente comune.

"L'Amicissia"
Quante 'olte 'sta parola,
la ven dita da la zente,
sensa darghe un gran valor,
sensa far funsionàr el cor,
ma solo co' la mente,
come 'na bela fola....
Ma cosa falo un vero amigo?

Te scolta, el te rispeta,
el te da un aiuto,
se te si agità, te chieta,
par ti mola tuto...

L'è mejo de 'n parente,
te vol un ben che no se sà,
par ti el va contro corente,
te dise sempre la verità....

Quando gh'è rogne l'è vissìn,
te pol contarghe de tut,o
un consilio te le dise pianin,
par un segreto el resta muto.

Ma che valor g'ala 'sta parola?

Al dì de ancò ormai gnente
parchè ci cata un amigo
el cata un tesoro....
e ci cata un tesoro
se ne ciava de l'amigo !
L'è quel che pensa la zente...

Moral....par ci no l'à capì el significado de 'sta parola:
La vera amicissia nasse nel cor e la vive ne l'anima de le persone che se vol ben
ma se te manchi de rispeto o te trati mal un amigo, te capiré quanto costa el sal!
^ su ^

12° capitolo / La teoria de la Crota - Coél giorno la piova, l'avéa impenì le buse 'ndoe i cubéti de porfido no i gh'era più. Corso Cavour l'era deventà come 'na palude, 'na serie de stagni scalmenadi un po qua e un po là, utilisadi da le ròndenele a sera come pissine comunali. Ogni tanto 'na machina la ciapava in pién 'na pocia anca parché no gh'era molte possibilità de mancarle e l'aqua la vegnéa dessemenà in siél par finìr 'dosso a la gente a pié che no la savéa più se l'ombrela la dovéa 'nar verso el basso, verso l'alto o de traverso. Tacà a la césa de San Lorenso, 'na pianta de gramegna l'avéa s-ciapà a metà la pavimentassiòn de marmo del marciapié e dopo el sguasso de metà giornada, l'aqua filtrà drento al crepo, l'èra riussì a dar casa a 'na crota, la fémena del rospo par capirse....cra, cra, cra...El sol al tramonto el ciocava e la pora bestia, ferma, paréa un poco insucà e un pèl rincoionida. A tal proposito m'e vegnù in mente, come lentamente, se pol stàr mal, sensa capìr che menando par coéla strada tanto piacevole che la te par èssar coèla giusta, te ris-ci de 'nar sempre più, al pèso. La teoria de la crota (da no far, me racomando!!!), l'è molto semplice. Te la meti ne l'aqua calda, a fogo basso e ogni tanto te lo alsi, pianin, pianin ne l'arco de l'intiera giornada. La bestia la g'a el tempo de abituarse a la temperatura, che la deventa sempre più calda no sentendo cossita el dolòr e la soferensa. Sul più bèl che l'è convinta de èssar a le terme de Caldiér a farse el bagno caldo, la va co' la pansa par aria. Pora crota, coàndo la s'a sveià tuta imbalonà l'è saltà fora finendo in mèso a la strada mentre l'era drio passàr un autobus. El destìn a volte te fa convinto de 'na roba ma sul più bel che te credi de èssar feliçe e contento, pol riservarte altre sorprese ancora piassè brute......... ^ su ^

13° capitolo / Nostalgia canàja - Ogni tanto ne le piasse se vede manifestassioni de ogni tipo, con banchéti da i saori nostrani a coéi foresti. A Nadàl se passa dal mandolato in Piassa Bra ai Kanederli in Piassa Dante. Parfumi e udori che se impregna ne la çità e drento de mi, come el ricordo de coéla 'olta soto l'ombrela, mi co' èla a magnàr 'na fogassa calda con patate e speck. Ancò, g'avéa 'na fame bestia, cossita, de boto, son entrà ne la prima ostaria che m'e capità a tiro, dal gusto tirolese; faséa fadìga a butàr zò coél bocòn deventà amaro, seitàndo a pensàr coàndo s'era feliçe e un senso de nostalgia l'a compagnà 'na làgrema che s'a perso drento de mi, come 'na gossa de aqua ne l'abisso de la Spluga de la Preta. Ghe ci dise, che ne la vita no se vive solo de ricordi. L'è vera, anca de amòr, de un sentimento che no te riessi a spiegàr, che te ròsega l'ànema a distansa de giorni, mesi e ani, ma che te portaré par sempre de ti, nei to pensieri par tuta la vita. Tuto fa brodo, tuto pol tornarte bon, sia esperiense bele che coéle brute e anca dopo avér ciapà 'na forte delusiòn da ci te vol ancora amàr, no te resta che tiràr su el to cor smigassà in tanti cubéti, deventà de porfido e costruìr 'na nova strada....
^ su ^

14° capitolo / La coérta - L'inverno l'è rivà e ogni passo el se fa sempre piassé pesante, do par ogni cubéto; te voressi coràr par scapàr al caldo, ma el vento supia ingiassà contro de ti mentre i denti i scominsia a sonàr come de le maracas. No te gh'è el tempo de pensàr ai to problemi ma solo al vin brulè che scalda le buéle, che va zò nel gargàto, de boio. Soto al portégo de la porta de Bombardieri un toco de coérta vansa fora, tanto da invidiàr el so paròn, pecà che sia uno dei tanti barboni de la piassa del Tribunàl. Fredo càn. No me sento più le deoline dei pié e le botéghe al luni de sera iè tute serade. Ma che casso ghe fasso al luni in çità? Boh! Scapo dal fredo, passando davanti al bar de l'ultima tisana, aqua incolorìa con erba aromatica, logo preferì da mi e 'na butéla. L'era serà anca coél. I ricordi i scominsia a intorcolarse col cor deventà de porfido, de piera dura. Te voressi tornàr indrio nel tempo, averlo fermà; te ripensi al parché de le cose, al parché tuto sia finì e cosa te podaressi avér fato parché coéla storia la g'avesse vù un altra destinassiòn invesse del cesso. El destìn l'a volù coésto, l'à volù farme vìvar 'ste emossioni, ma l'a volù anca scancelàr tuto co' un colpo de strassa. Le cose le dovéa 'nar cossita. No esiste parché o par come, spiegassioni logiche no ghe n'è par coànto la to molona la séita a masenàr sensa catàr 'na solussiòn. 'Desso parò, devo pensàr a scaldarme, come no lo so, ma se rivo a casa g'o 'na borsa d'aqua calda, brulé e 'na coérta che vorìa butàr via, nel calto dei ricordi, ma che parò, me tién caldo......

"La coérta"
Eco el fredo,
l'inverno,
tra le mura de casa mia,
gnanca el fogo del camìn,
smorsa i sgrisoli
che g'ò nei ossi.

Anca le ponte dei pié,
pian pian
le se ingiassà.....

Gnanca i calsetoni,
grossi du schei,
me tién caldo......

Gnanca un maiòn
de lana de pégora
me cava el prinsipio
de mal de pansa...
gnanca...................
......gnanca....

Magari, un gosso?
si un gosso....
de vin brulè!
Zò par el gargàto,
zò par le buéle
che me scalda
fin le deoline....
de boio..................
.......de boio,
che brusa la pél....!!!!

Fin a coàndo
un altro supioto fredo
me ingiassa da novo....

Fin a coàndo un altro sgrisolo
el me ciapa tuta la schena....

Ma.... la me coérta,
si....la me coérta....
me la struco forte al cor,
la me scalda,
la se fa su come un bisso
e mi,
de boto,
sero i oci....
volando co' ela
nei pensieri,
nei ricordi....
de coàndo,
coél giorno
l'è deventà
me amiga.....

La me coérta,
no la coérta,
el ricordo
che ricordo
ogni 'olta
che la struco...

^ su ^

15° capitolo / Le cose sempliçi - Vardàr el siél bel limpido sora a la me çità e sentirse basà dal sol timido de genàr no gh'è gnente de piassé bel. Un senso de libartà, la feliçità de caminàr ne la storia e de èssar nato a Verona e no in un logo del terso mondo, magari fermarse a pensàr che in coéle strade secoli fa gh'era passà Cangrande a cavàl, Re, Imperadori o contesse, e ti, te si lì. No se rendémo conto de coànta fortuna gh'emo. La fortuna de caminàr co' le propie gambe par vie, piasse e vicoli sconti, la fortuna de scoltàr i oseléti cantàr sora ai balconi de véci palassi, la fortuna de védar un cocàl sgolàr, la fortuna de snasàr i udori de le botéghe e cose piassé importanti ancora, come portàr con la to vosse, 'na parola de conforto a ci stà mal, la fortuna de strucàr o de divìdar 'na fritàia co 'na persona cara, la fortuna de èssar in salute e de stàr ben, la fortuna de 'verghe 'na faméia, la fortuna de conòssar 'na persona sincera, la fortuna de 'verghe un amigo. Cose sempliçi che al dì de ancò, in tanti casi, le g'a poco valòr, l'importante l'è sigàr, èssar prepotenti, far i paiassi e darla da inténdar. Comportarse ben ne la vita no porta da nissuna parte e gnanca rispeto nei to confronti, in più i te mete el bastòn tra le rue e te devi farte un cul belo grando par rivàr 'ndoe i altri i ghe riva co' racomandassioni, aiuti o altro. Vago avanti, a far quatro passi, parché pensàr a 'ste robe me fa giràr i maroni; méio pensàr a coél che me fa stàr ben e de robe se vardemo, ghe n'è tante....

"Basta poco"
Me paréa de èssar un siòr,
ma sensa averghe schéi,
sentìa che arénte a éla
le cose piassé pitoche
in verità g'avéa valòr.
'Na sganassada,
'na ciacolada,
'na magnada a la bona
e mi diséa: "che coga!"
butando zò de colpo
'n bocòn de pasta scota...
Ogni giorno un imeil,
un sms, 'na ciacolada,
seitando a dìscòrar
de le rogne
che ne rosegava...
Ogni tanto un consilio,
ogni tanto 'na gran voia...
de 'nar in vacansa,
o de far quatro passi
anca ne la nebia
e nel fredo de l'inverno....
magari soto la piova,
co' un ombrela picenina
par stàr tacà a éla,
co'na spala descoèrta
e la giachéta imbombegà
de aqua....
Basta poco,
par èssar contenti,
do parole, un strucòn
e 'na caressa....
sensa tesori,
diamanti o castéi de oro,
parché volerse ben,
l'è la cosa piassé bela,
del mondo!
Ghe ci g'à fortuna ne la vita
de avér vissù 'sti momenti.
Ghe ci g'a la fortuna
de capìr el valòr
de un semplice baso.
Ghe ci g'a la fortuna
de vìvar tuto coèsto
sensa lassarlo scapàr.
Mi g'ò la fortuna
de verghe 'sti ricordi
conservà drento al cor....
^ su ^

16° capitolo / El tempo - Coàndo te si buteléto le giornade le par no finìr mai, più te cressi e più te par che tuto coél arénte a ti el cora. Coél che invesse no cambia mai l'è la to çità. Se fusse ancora al mondo me poro nono el vedarìa piassé machine e una tranvia in manco rispeto a 100 ani fa, ma par el resto gnente de novo o coàsi. Digo....manco màl che i romani e scaligeri i n'a costruì un poca de roba, come teatro, anfiteatro, porte, ponti, castéi, mura e altro ancora, parché i assessori comunali i fa festa par l'inaugurassiòn de 'na banchéta in un parco, figuremose se iè boni de costruìr calcossa de piassé importante! Eco, caminàr su 'sti cubéti de porfido la sera, te da l'idea che'l tempo el se sia fermà e che tuto coél che ghe "fora da le mura" el possa scapàr via. Tempo e paia maùra anca le néspole i diséa i nostri véci, el tempo l'è galantomo e paga sempre el giusto dise me bupà e mi Ve digo che vegnarà el tempo che ci v'a fato del mal el le ciaparà nel "de drio", el classico "giorno de la banana". El tempo, core? scapa? o se ferma? Dipende sempre da noantri a che veloçità volémo vìvar la nostra esistensa, ma al mondo, l'unico momento 'ndoe el tempo pol fermarse, l'è in compagnia de la persona che te vol e che te ghe vol ben.....

"Un strucòn, un baso, 'na caressa"
Ogni volta un strucòn,
un baso, 'na caressa....
come tuto finisse
in che'l momento.

Un strucòn,
un baso, 'na caressa....
seitàndo un
altra volta.....

un strucòn,
un baso, 'na caressa....
e te si ancora
lì co' ela....

un strucòn,
un baso, 'na caressa....
El tempo te par
fermo, i giorni,
le ore, i minuti,
no i passa....

un strucòn,
un baso, 'na caressa....
te pensi sia l'ultima volta....

un strucòn,
un baso, 'na caressa....
ora vago a casa,
bona note...
forse!
e passa un altra ora.....

un strucòn,
un baso, 'na caressa....
te speri de conservàr
ogni 'olta un ricordo,
par coàndo,
tuto coésto,
no ghe sarà più....

un strucòn,
un baso, 'na caressa....
^ su ^

Gràn Finàl - Del futuro no ghe certessa e no savémo gnanca el destìn cossa el ne farà catàr su la strada de la vita. In coalsiasi posto de la tera che mi sarò, portarò sempre la me çità nel cor e soratuto le persone che voio e che g'o volù veramente ben. Se pol vìvar de ricordi anca se l'è meio vìvar de persona el presente e ogni singolo momento de la nostra esistensa al méio. Ma se una cosa, te fa stàr ben, no làssarla scapàr via; a 'olte parò, no dipende da noantri, l'importante coàndo te l'è capì, de lotàr co' tute le to forze; almanco te podaré dir de avérghe provà e no te g'avaré rimorsi. Ghe ci dise anca che l'importante l'è far e pentirse, che pentirse de no avér fato; massima che l'è vera fin a un çerto punto, fin coàndo no te si la vitima sacrificàl e i te dise "scusa g'ò provà, no pensavo, me son sbajà". El pentimento no deve parò provocàr dolòr ai altri. Bisòn capìr anca, che persone sempliçi e co' çerti valori se ne vede poche, averghele arénte a ti ne la vita, l'è el regàl più grande che'l Signòr possa averTe dà, che le se contenta solo de un to soriso e importantissimo, de un poco de rispeto. Bon che tase, no vol dìr coiòn! Séita a caminàr con lori sora ai "cubéti de porfido" e te vedaré che anca se te si in un periodo de merda, el sol no tramontarà mai.

FINE

Andrea Toffaletti


Libro dedicà a ci m'a insegnà i sempliçi ma importanti valori de la vita:
"A me mama"
Ogni giorno 'na caressa,
ogni giorno la me scolta,
ogni giorno la me struca,
ogni giorno l'è lì con mi,
ogni giorno la me pensa,
ogni giorno son drénto éla,
ogni giorno l'è amòr.....
Ogni giorno....l'è me mama!


^ su ^