curvasup
rena
titoli
el canto del cor
cor
[Giampaolo Feriani]
Le mejo 5 poesie sièlte da La Rena Domila

No me vergogno più

Da buteleto, se i me domandava:
"'sa falo to papà?", me vergognava
a dir "l'è un ovarolo, l'è un pitoco..."
Ma quando el gemo de la vita, a poco

a poco, el s'à inroiado in una storia
negra de luti, drento la memoria
me s'à vestìo de sol un par de man:
le man de un ovarol, de un poro can...

Al ciaro che s'à fato in quel momento
s'à spalancado, a pian, un testamento....
e ò leto quel me gavea lassà,
morendo, me papà in eredità:

la so figura de omo sensa ombria,
l'amor par na fameia mai tradìa,
la so giornata tribolà, ma onesta !
Par questo adesso tegno su la testa

parlando de me opà, poro ovarol...
son orgoglioso de èssar stà so fiol !.



^ torna su ^

Fora la piova

Mi e ti che, col giornal in man,
no se aldeghemo più a vedarse in facia...
mi e ti che ormai no se contemo
gnanca na scusa e gnanca più busìe...
e fora gh'è la piova che discore...

Come che el passa el tempo,
come se imatonisse le ore...
come l'è longa da passar la sera
par quei che speta el sono...
e fora gh'è la piova che discore...

forsi anca el vento el canta
corendo a bissaboa tra i piopi...
solo noialtri du no sem più boni,
no digo de cantar,
ma gnanca de provar a dirse su...
e fora gh'è la piova che discore...



^ torna su ^

L'Ultima stassion

Soto el segheto lustro de la luna
gà perso el tempo l'orologio a muro...
n'ombra de sabre la se impica al lume
de na lanterna ingrotolìa de sono...

De là del scuro gh'è ci sta spetando
che sponsa el passo sul meal de casa...
ma mi, col zaino de i ricordi in tera,
non son pì bon de andar drento in stassion..

Fo un aeroplan de carta col bilieto
molando i sogni a rugolar nel vento...
e passa un treno, orbado da la note:
no gh'è gnanca un fassol ai finestrini..



^ torna su ^

El Salgaro rosso

No te faliva più, Tano, el segreto
come un brugnel par drento i oci ciari...
stuà nel gropo de na soga, streto,
adesso el dorme a l'ombra de i salgari...

..e l'era na dominica de april:
ne l'aria se cunava, in taligon,
l'ultimo boto invià dal campanil
e el se smorsava, come n'orassion.

sora el to corpo inzenocià nel vento
che'l ramenava i pàmpani a la bina...
Ne i oci, sensa l'ala del spavento
te se speciava un mar de pavarina...

E quando to papà el tà tirà in tera
da la croce in pingolon sul fosso,
l'ultimo sol, sul zeio de la sera,
el gà impissà el salgar de fogo rosso.



^ torna su ^

De sora ai copi

De sora i copi, negra, bate l'ala
del tempo che scunisse e ne la sera,
longa de veie, un fil de vento muto

el ruma nel me mar e el porta a gala
l'odor de l'erba spagna a primavera,
le vegne che le sfronda el primo buto...

e i me ricordi i se ingateia a un reve
filado un giorno che su i persegari
gh'era cascado un vel rosa de seda

e na litània, intabarà de neve,
la ramenava grani de rosari.
Ciamava me papà...e in un'eco freda

me rispondeva un rimbombar de sloti
drento na busa...e i fiori drento l'orto
i se cuciava al rugolar de i boti
batui pianin da 'na campana da morto.



^ torna su ^
DISSIONARIO
*ingrotolìa-intirissida
*meal-batuda de quarei sula porta de casa
*scunisse-se consuma
*se ingateia- se ingarbua
*sloti-zole
*boti-rintochi
*gemo-gomitolo
*inroiado-atorcigliado
*salgaro-salice
*faliva-sintilla
*brugnel-falò
*taligon-altalena
*binna-filare de vigne
*pavarina-erba che cresse nei fossi
*se aldeghemo-osiamo
*se imatonisse-si stordiscono
*a bissaboa- a zig-zag
cor