El vento sufiava cativo, le piante più pìcole le se butava; le più grande s-ciocava. El parea el dilùvio. La nona la ze coresta in càmera e la ga portà fora on masseto de oliva benedeta e la ga messa in sima le bronse tel fogolaro. El fumo se ga levà par ària. Te quel menuto, se ga sentio in meso el bordel del temporal, na campana che sonava sensa fermarse. Sia stà par via del fumo del olivo, o par el sonar de la campana, in pochi minuti, el tempo bruto se ga fenio e el sol nantra volta ga luninà el mondo.

L’era grasso e grosso come on baril. Se fusse stà farghe dele mudandote, ghe voleva on nissol intiero. El caminava cofà na lumega, più molo che on strasso, co na velocità, manco de tre chilòmetri al ora. Più che te ghe osavi, manco el se spaurava. Ghe mancava meno de due giorni par coparlo. Che bruta sorte che i ga anca i porsei co i deveta grassi!

1. Comparativo de igualità – Cofà, come.Ex: Onòrio l’è vècio come mi e el parla cofà on avocato. El nono magna come on lupo e l’è rosso cofà el vin.
2. Comparativo de superiorità – Pi, pu, più.Esémpio: Piero l’è più vècio che Bartoldo, pi grando che Checo e pu furbo de Toni.
3. Comparativo de inferiorità –Manco, meno.Esémpio: Carlo l’è manco grasso de Piero, ma più furbo de Nani. Le còtole dela Marieta le ze meno longhe che quele dela Santina.
4. Superlativo relativo– Pi de, più de, pu de.Esémpio: Ze più de vinti ani che no vedo pi de vinti osei zolando insieme. Fa pu de trenta giorni che no piove.
5. Aumentativo – El aumentativo se sortisse col acrèssimo de on o de asso a le paroleEx: Furbo, furbon; bon, bonasso; caval, cavalon, cavalasso; omo, omenon, omenasso; beco, becon, becasso.
6. Diminutivo – El diminutivo se forma col acrèssimo a le parole de: in, ino, ina, eto, eta.Ex: Bela, beleta, belina; santo,santin, santeto; caro, carin careto.
7 - Se dopera anca i diminutivi pegiorativi, depressiativi: oto, ota, oteBel, beloto; alta, altota; gorda, gordota; negro, negroto, bianco, biancoto; mudande, mudandote.

El caval de Nani el val depiù dei quatro cavai de Nino. Un mul porta cento chili, e tre mui i ghen porta tresento. On poeta el ga scrito trenta poemi, tre poeti, novanta. Na rosa natural la sà più de bon, che trenta rose de carta. Se co na fémena l’è fadiga dàrghene fora, imaginarse co du fémene, una tirando par na banda, e nantra par quelaltra. La grande maioransa dei sustantivi mascolini i fenisse co le vogale " o" e "e" ; Qualcuna col "a", come profeta e poeta. El plural del sustantivo mascolino se forma co la sostituission de la vogale o la consonante finale par la vogale "i".Esémpio: Mul, mui; caval, cavai, primo, primi; Santo, santi; garòfolo, garòfoli; profeta, profeti, poeta, poeti. I sustantivi femenini, squasi tuti fenidi col "a", i forma el plural trucando el "a" par el "e", inquanto che coei fenidi in "e", i se mantien invariàbili, o sinò i forma el plural col "i".Esémpio: Rosa, rose; morosa, morose; poverela, poverele; fémena, fémene; la fòrbese, le fòrbese; la sendre, le sendre. Prima essession: I sustantivi fenidi con la vogale tónica che porta assento, i se mantien invariàbili.Ex: La cità, le cità; la virtù, le virtù; un bacalà, del bacalà; el pecà, i pecà. Seconda essession: Altri sustantivi i se mantien invariàbili, come: un can, dei can; na man, dele man.
Tersa essession: Forma anca el plural i sustantivi sensa règola, come: Il Dio, i dei; l’omo, i òmeni.

Quando Dio ga mandà Noè salvarse del dilùvio, el ghe ga dito: Carga te la arca on màs-cio e na fémena de ogni animal, secondo la so spèssie. Cossita Noè el ga cargà on gal e na galina, on porco e na màs-cia, on bel caval e na bela potranca, on colombo e na colomba. El ga cargà anca la so fameia: i nipoti, i fiui, le fiole, i géneri, le niore e così via. Co ga scomissià piover i zera tuti al querto. Ga piovesto quaranta giorni e quaranta note sensa fermarse.Par formar el femenino de le parole, basta trucar la ùltima vogal par "a", o sinò, conforme el caso, solo incostar el "a" dopo la ùltima consonante.Esémpio: Mul, mula; signor, signora; portel, portela; brasilian, brasiliana; bel, belo, bela; santo, santa.Tanti nomi par formar el femenino, se truca la desinénsia mascolina (unità finale) par "essa". Esémpio: Conte, contessa; prìncipe, principessa, baron, baronessa.Ancora, altri nomi i deventa femenini, co la terminassion "ina"Esémpio: Bambin, bambina; gal, galina, cosin, cosina; eroe, eroina.Altri ancora i resta invariàbili. Ex: El nipote, la niopote; el gióvane, la gióvane.Finalmente ghe ze tante parole che no le obedisse nessuna règola par restar femenine. Esémpio: Re, regina; Dio, dea; màs-cio, fémena; omo, dona; pupà, mama; beco, cavra; multon, pégora/piégora; toro, vaca; fradel, sorela, messier (sogro), madona; caval, ègua.

Bepin sona el campanin / A caval de na musseta / Sgoelta come el gal de piombo / Che adorna la saleta. / Pora mussa, bestioleta / Ze tre orete che la lumega / Cofà na vècia che fà dressa.El aumentativo dei sustantivi el se forma doperando el sofisso "on" al mascolino e "ona"al femenino. Esémpio: Piero, Pieron; sasso, sasson; gamba, gambona; tràpola, trapolona; àsola, asolona: libro, libron; porsel, porselon.Par formar el diminutivo se dopera i sofissi (terminassion): In, el (o/a), eto, eta, oto, ota. Bisogna dir che el ùltimo se lo dopara sol de una maniera desvalorisante, ribassante, aviltante.Es: Toni, Tonin, casa, caseta, casota; podol, podoleto, podoloto; caval, cavali, cavaleto, cavaloto; campana, campanin, campanel, campaneta, campanoto, campanota.