Classifica 3 ° Turno e Prelim.:
92,0=38,0+(27,5)+(26,5) Taca la cola (CANPIONI)
91,5=37,5+(28,0)+(26,0) Fritaja co' la seola
90,5=36,0+(28,0+(26,5) Ave Mate (dif.poesia v.7)
90,5=37,0+(27,0)+(26,5) I Du Falcheti
90,0=36,5+(26,0)+(27,0) Pita de Tachéto
72,5=18,0+(28,0)+(26,5) Bugnon & Bugansa
62,5=10,5+(26,5)+(25,5) Stracamassele
53,5=00,0+(26,5)+(27,0) Tri Farfarei

http://youtu.be/fnWB7LkzGQo < Video - Poesia del Diretòr
http://youtu.be/dt1GKrgMca8 < Video - Premiassiòn

TERSO TURNO E PRELIM. - da consegnàr entro el 22 noémbre

E la mama? Oh, la mama l'è una santa
par la casa l'è un angelo che canta
Ela la lava, la strusa e la cusina
e la ne sveia co'n soriso la matina
La ne basa così.... la ne consola
quando nualtri se g'a el gropo in gola
parché sen poareti e g'aven tanta fame
e ne toca magnar solo pan sensa salame

L'Adese in corsa, qua, par che el se incanta,
al Porto el se slarga, el se cheta
come un vecio pastor che se indormeia
dopo aver visto Verona, na gran maraveia

I Du falcheti 5,5 - 6,5

E la mama? oh, la mama l'è una santa
la tien su tuta cuanta la fameja,
par la casa, l'è un angelo che canta
par tuto el dì, da cuando la se sveja.
La ne basa così.....la ne consola,
col so soriso che ne dà speransa
quando nualtri se g'a el gropo in gola!
Mama, no te vorò mai ben bastànsa…

L'Adese in corsa, quà, par che el se incanta
davanti al capitel de Maria santa
come un vecio pastor che se indormeia
disendo un' orasion par la fameja

Fritaja co'la seola 5,5 - 7

E la mama? oh, la mama l'è una santa
che la sa far miracoli d'amor
par la casa, l'è un angelo che canta
melodie, che le caressa el cor
la ne basa così.....la ne consola;
la ne dise parole sacrosante
quando nualtri se g'a el gropo in gola!
Dovemo meditarle tute quante.

L'Adese in corsa, quà, par che el se incanta
de Verona, fra tanta meraveia,
come un vecio pastor che se indormeia
sognando de amirarla tuta quanta

Taca la cola 6,5 - 6,5

E la mama? oh, la mama l'è una santa
dopo el laoro la torna e la ne fa da magnar
par la casa, l'è un angelo che canta
e noaltri sbasemo la testa non avendoghe da laorar
la ne basa così....la ne consola;
anca se la g'ha i oci strachi e giali
quando nualtri se g'a el gropo in gola!
w la mama... che la ne guarise da tuti i mali.

L'Adese in corsa,qua',par che el se incanta
Col sol che el se spea nella so acqua che core
Come un vecio pastor che se indormeia
El va chieto chieto verso el mar

Stracamassele 5 - 5,5

E la mama? Oh, la mama l’è una santa,
che tuti ne protege, che tuti ne rancura…
Par la casa, l’è un angelo che canta
la so canson de amòr e de fadiga dura.
La ne basa così… La ne consola
quèle olte che la vita la va storta:
quando nualtri se g’a el gropo in gola,
strensèndone sul còr la ne conforta.

L'Adese in corsa, quà, par che el se incanta,
imbambolado da le gràssie de Verona,
come un vecio pastor che se indormeia
vardando i monti, ris-ciaradi da la luna.

Bugnòn e Bugansa 6 - 6

E la mama? oh, la mama l'è una santa
l'è na sorela e anca un'amiga;
par la casa, l'è un angelo che canta
ma d'un boto l'è un caporal che lsiga!
la ne basa così.....la ne consola;
la ne fa ridar e la ne riprende;
quando nualtri se g'a el gropo in gola!
coren da ela: e el sol el splende!

L'Adese in corsa, quà, par che el se incanta
el se destende, el ciapa fià
come un vecio pastor che se indormeia
quando alfin al pascolo l'è rivà

Pita de tacheto 6 - 5,5

E la mama? oh, la mama l'è una santa
che dal ciel la fa sentir la so presenza
par la casa, l'è un angelo che canta
in fondo al cor e sveia la cossienza.
La ne basa così.....la ne consola
un po’come la pol, ma che fortuna
quando nualtri se g'a el gropo in gola
saver che bona de desgroparlo ghe n’e una!

Come un vecio pastor che se indormeia
el lassa le pegore che se spampana
l'Adese in corsa, quà, par che el se incanta
e la so aqua la se ponsa e spande.

Ave Mate 6 - 5

Anagrama-Proérbio 4,1,4,7,1,4,4
AAA C D EEE F G IIII M N OOOO PP R S U
PAIA E FOGO INSIEME I DURA POCO

SECONDO TURNO - da consegnàr entro el 5 noémbre

La me morosa la sta in Val de i Lasi
e la sa farme batar forte el cor:
tuti quei rissi da robàr coi basi
i me par de oro, e mi me sento un sior.
Ave mate 7

La me morosa la sta in Val de i Lasi
la mostra con malissia dal portòn
tuti quei rissi da robàr coi basi
e a mi me vien de colpo on sgrisolòn.
Fritaia co' la seola 7

La me morosa la sta in Val de i Lasi,
e còro a catàrla ogni òlta che posso:
tuti quei rissi, da robàr coi basi,
par che i me meta el diaolo indòsso.
Bugnòn e Bugansa 7

La me morosa la sta in Val de i Lasi
l'è bela e più che altro mi me piase....
tuti quei rissi da robàr coi basi,
se i caresso pian piano, ela la tase
Taca la cola 6,5

La me morosa la sta in Val de i Lasi
Quando la vedo scurlar con la testa
tuti quei rissi da robàr coi basi
anca se l'è luni, me par za festa.
I Du Falcheti 6

La me morosa la sta in Val de i Lasi
e nemo a far l'amor longo vigneti e Progno
tuti quei rissi da robàr coi basi
a oci verti tuto el dì me i sogno
I 3 Farfarei 5,5

La me morosa la sta in Val de i Lasi
lè belo vardarla mostàr in meso le vegne
tuti quei rissi da robàr coi basi
col so visin la porta el sol in ste scaisagne.
Stracamassele 5,5

La me morosa la sta in Val de i Lasi
(da far in bicicleta l'è longa assé);
tuti quei rissi da robàr coi basi
però i me ne farea far anca piassé!
Pita de Tachéto 5

Anagrama-Proérbio 2,3,4,2,2,3,5
CI VOL VAGA, CI NO VOL MANDA

PRIMO TURNO
Poesia da far in sole 4 righe (sensa rima, podì missiàr, far coél che volì):
(Punti da 4 a 7) Completàr la poesia a propio piasér:

Ma, a furia de ingiotìr sempre polenta,
........................................................
che'l poro can de Momoleto Brenta
.........................................................

Anagrama Proerbio: Solussiòn 3,3,2,5,2,5 (punti totali 20)
AA C DD EEEEE F H I LL NNN P R
FINCHE' LA RENDE, LA PENDE

POESIA
Ma, a furia de ingiotìr sempre polenta,
invesse de i so ossi e del pastòn,
che'l poro can de Momoleto Brenta
l'à smorsegado la caucia al so paron
Tri Farfarei - v.7
Momoleto Brenta l'è el nome del can.
Premià l'idea, fantasiosa e diversa rispeto le altre

Ma, a furia de ingiotir sempre polenta,
el conpanadego l'è par i siori,
che'l poro can de Momoleto Brenta,
l'è pien de pelagra e de dolori!
La Pita de Tacheto - v.7

Ma, a furia de ingiotir sempre polenta,
polenta e supioni sensa cunel,
che'l poro can de Momoleto Brenta,
tanta pelagra la g'à ciapà el servel.
I Du Falcheti - v.6,5
Polenta e supioni, vécio modo de dir contadìn. Brai!
In pratica magnàr polenta sola, sensa gnente.
Supioni nel senso de supiarghe sora par no scotarse la léngua.

Ma, a furia de ingiotìr sempre polenta,
regina strassòna de un piato pitòco,
che'l poro can de Momoleto Brenta
el s'ha sgionfà come Papà del Gnoco...
Bugnòn e Bugansa - v.6,5
La polenta magnàr prinçipe dei poaréti in 'sto caso Regina strassona

Chel poro can de Mamoleto Brenta
na olta sola in vita el s’a imbugà:
ma a furia de ingiotir sempre polenta
come che l’a bevuo el s’a stofegà.
Le Ave Mate - v.6,5

Ma, a furia de ingiotìr sempre polenta,
pociada nel gustoso bacalà,
che'l poro can de Momoleto Brenta
de tuto l'era propio stomegà
Taca la cola - v.6,5

Ma, a furia de ingiotìr sempre polenta,
Parchè ‘l formajo l’èra finìo da ‘n toco
che'l poro can de Momoleto Brenta
L’è vegnù gialo che el pareva on oco...
Fritaja co' la seola - v.6

Che'l poro can de Momoleto Brenta
par curar la mossa l'avea scoltà na so amiga
ma, a furia de ingiotir sempre polenta,
no el nasea pì in bagno se no' con fadiga.
I Stracamassele - v.5,5

Presentassion:
El Diretor el farà de le dimande che'l spedirà via imeil (par 3 turni) a le méio squadre che iè riussì a vìnsar un premio o un titolo ne le vécie edissioni del Canpionato Dialetàl su "Cruciverba/Anagrami" e "Poesie"

Squadre Invitade e confermade:
1-Ave Mate (Premio Barbarani+Canpionato Dialetàl+PremioSecia)
2-I Du Falcheti (Canpionato Dialetàl)
3-Fritaja co' la seola (Premio Barbarani+Canpionato Dialetàl)
4-Tri Farfarei (Premio Barbarani+PremioSecia)
5-Taca la cola (Premio Barbarani)
6-Pita de Tachéto (Premio Mastino Combatività)
7-Stracamassele (Canpionato Dialetàl)
+1 Bugnon & Bugansa (Fora quota Top 10)

Le squadre le dovrà rispòndar entro un dato periodo al'indirisso canpionato@larenadomila.it

Tempi de risposta:
1° Turno - 15/22 de otobre (Poesia + MegAnagrama/Proerbio)
2° Turno - 29 otobre 5 novembre (Poesia + MegAnagrama/Proerbio)
3° Turno - 12/19 novembre (Poesia + MegAnagrama/Proerbio)

Par partecipàr l'è obligatorio la presensa a la premiassiòn (Vendri 2 diçembre 2011- Sala Culturàl Al Calmiere) - co' almanco un componente par ogni squadra, pena la scancelassiòn da ogni futura manifestassiòn del sito.

Vegnarà consegnà una poesia da completàr nel momento de la conferma iscrissiòn par tuti (l'8 de otobre) da riconsegnàr al comitato organisadòr entro fine torneo.

El puntegio el vien somà dal'inissio a la fine del canpionato. I Proverbi i g'a un puntegio par paròla inbrocà. Le Poesie le vién valutà con un voto da 4 a 8.

Ne la serata de premiassiòn del 2 diçembre 2011 ne la Sala Culturàl del Ristorante Al Calmiere de Piassa San Zén, le squadre le riceverà una pergamena de partecipassiòn e tra una ciàcola e l'altra, frole de Santa Lussia con vin novél. Ma le sorprese ne la serata no le finisse chi...el spetacolo del Vostro Diretòr!

IscrivendoTe al canpionato, Te si d'acordo sul regolamento in tuti i so ponti chi de sora indicadi e del giudissio insindacabile dela Diression.

Lo spirito justo par partecipàr al Canpionato l'è:
-Averghe voja de imparàr qualcosa de novo.
-Contribuìr con la propia sapiensa a la divulgassiòn de la nostra léngua.
-Non preocuparse se i risultadi jè negativi, non sà mai finìo de imparàr.
-Non 'bandonàr el Canpionato in corso, bisogna afrontàr anca i risultadi negativi, avendoghe così anca rispeto par ci organisa e de ci partecipa.
-L'importante l'è parteçipàr, parchè quel che deve vìnsar l'è la léngua veronese.

P.S.
Come da lege su la Privacy i dati de persone, indirissi imeil dei partecipanti non i vegnarà ne distribuidi e ne publicadi sensa l'autorisassion dei interessadi su internet o altri sistemi de comunicassion. Questi dati i vegnarà utilisadi solo par comunicasioni tra La Rena Domila e i interessadi par invio dimande e/o comunicasioni relative al canpionato o al sito.