REGOLAMENTO
Presentasion:
El Diretor el farà de le dimande (6 par turno) che'l spedirà via imeil (per 4 turni) a tute le squadre parteçipanti su:
-Parole dialetali in via d'estinsion
-Storia de Verona, Provincia e Carnevale Veronese
-Cruciverba e Anagrama
-Cartoline vecie de Verona e Provincia
-Foto su l'arte a Verona e de cantoni sconti de Verona e Provincia
-Poesie - Cultura Moderna Veronese
Solo le dimande storiche e dialetali le g'avarà el stesso puntegio che'l pol cambiàr nel terso e quarto turno
Le squadre le dovrà rispòndar entro un dato periodo (vedi p.4.1) al'indirisso canpionato@larenadomila.it

PRE-ISCRISSIONI - fin al 28 febràr 2010
ISCRISSIONI - dal 1 marso al 4 aprìl 2010 - Max 25 squadre
(in caso de nùmarose richieste el nùmaro pol aumentàr)
Ci se iscriVe prima del 1 marso 2010 ghe vegnarà invià una imeil el 2 marso 2010 par confermàr l'iscrission entro el 10 marso canpionato@larenadomila.it. Ci se pre-iscrive e risponde a le dimande dei tuti e quatro i turni el riceverà a fine canpionato 'na bela sorpresa! Par iscrivarse bisogna lésar tuto el regolamento e scrìvar a canpionato@larenadomila.it specificando:
- Nome dela Squadra
(es. Paese, soranome, roba da magnar o qualsiasi altra cosa che la g'à a che far Verona e la cultura Veronese)
- Numaro Conponenti :
da 2 a 4 par i Veronesi de çità e Provincia
da 1 a 4 par i Veronesi residenti al'estero
Se ne la squadra ghe un parente (fradel, sorela, nono, marì, mojer ecc,..), se pol iscrivarse in 5 inveçe che 4
- Nome o Soranome dei componenti (gnente cognomi)
(L' è vietado canbiar i componenti durante el canpionato)
- Indirisso I-meil del capitan dela squadra
(L' indirisso no'l pol essar canbià durante el canpionato)
- Logo de Proveniensa-La Diression ve spedirà via imeil la conferma d'iscrission entro 24 ore da la data de spedission de la vostra imeil con un codice identificativo de squadra.
-Una 'olta iscriti vegnarà spedì la locandina ricordo del canpionato.
-No pol partecipàr al Canpionato ci l'è membro o ci l'è stà membro de la giuria (e relativi familiari) e/o ci colabora nel sito con rubriche storiche, cruciverba, proerbi, modi de dir.

1.Canpionato:
1.1 Canpionato Dialetàl su 4 turni.
1.2 El Canpionato l'è a giron unico

2.Puntegio:
2.1 El puntegio el vien somà dal'inissio a la fine del canpionato.
puntegio I° Turno + II° turno + III° turno + IV ° turno.
2.2. In caso de parità de puntegio se varda ci l'à sbajà de manco.
2.2.1 Se persiste la parità se varda l'ordine de arivo dele risposte.
Se in questa speciàl classifica la difarensa la risulterà inferior a 50 punti le squadre le sarà classificade a pari merito.
2.2.2 L'ordine de arivo el sarà convertì in puntegio e vegnarà publicado:
es: 1° punti 200 - 2° punti 170 - 3° punti 160 ecc. (oviamente el vegnarà somà par tuti i 4 turni) tegnendo conto de velocità (1°-2°-3° ecc), giorno d'arivo (1°giorno-2° Giorno ecc), erori comessi ne le dimande.
2.3 La clasifica del canpionato la vegnarà publicada dopo 3 giorni dal termine del tempo de risposta.

3.Dimande:
3.1 El Diretor el spedirà a tute le squadre le dimande via imeil, sié par turno. Se par motivi tenici le squadre non le riceve le dimande, bisogna consultàr obligatoriamente el sito a la pagina.................... www.larenadomila.it/canpionato/dimande.htm
3.2 Come zà specificado ne la "Presentasion" le dimande i è divise par categorie
3.3 Le Dimande le vegnarà spedì la sera prima de la data stabilì entro le ore 22. In caso de problemi la giuria Ve risponderà entro 24 ore da l'invio de la "richiesta d'aiuto".
3.4 "No serVe essar poeta!" - Inventa 'na Poesia...
La Poesia sarà composta in 8 righe; a esempio le righe dispari le sarà inserì dal Diretor (dopo aver siélto da le poesie del Berto) mentre le righe pari da le squadre. Deve vegnér fora 'na poesia de senso compiù. Vien premià soratuto "l'idea" e la "fantasia". Par eventuali erori de ortografia seremo un ocio, basta che no sia gravi da impedir de capir el senso, fasemo nojaltri le eventuali coressioni prima de publicarle. Le poesia le vegnarà composte a partir dal primo turno. Un esempio:
Diretor: Eco qua mondo pitoco
Squadra: ...la balada de l'oco!...
Diretor: Drito in meso a la cusina
Squadra: ...su na teja picenina...
Diretor: Me comare moscardina
Squadra: ...ghe da 'na saladina...
Diretor: Che bisogna festegiar
Squadra: ...che diman 'ndemo al mar!...
3.5 Novità 2008 "Coeficente de dificoltà" se la squadra lassa le righe ne l'ordine proposto dal Diretor, le g'avarà un puntegio piasé alto. Se una squadra vol missiàr l'ordine de le righe proposto, ghe vegnarà cavà 1/2 punto.

4.Risposte:
4.1 Tempi de risposta via imeil a canpionato@larenadomila.it
I° Turno: dal 6 aprìl al 13 april 2010
II° Turno: dal 20 april al 27 april 2010
III° Turno: dal 3 majo al 10 majo 2010
IV° Turno: dal 17 majo al 23 majo 2010
4.4 Se pol rispòndar a partir da le ore 12 del primo giorno (ci risponde prima, el vegnarà amonido).
4.5 Ci risponde:
un giorno oltre el termine stabilido ghe vegnarà cavà 5 punti
du giorni oltre el termine stabilido el vegnarà cavà 10 punti
ci no risponde el vegnarà espulso
4.6 Ogni 'olta che se spedisse le risposte a canpionato@larenadomila.it, in automatico Ve sarà spedì un imeil de ricession da parte de l'organisassion. Se par caso non Ve 'riva la risposta de ricession entro poche ore, vol dir che l'organisassion no l'à ricevù nissun imeil da parte Vostra.
4.7 Ci risponde in maniera justa a tute le dimande e in poesia el ciapa almanco 6, entro el 8 april nel 1° Turno -entro el 22 april nel 2° Turno -entro l' 5 majo nel 3° Turno -entro l' 19 majo nel 4 ° Turno, el riceverà in regàl 2 punti in più in classifica a la fin del canpionato. Con 1 eror 1 punto.

5. Par i partecipanti:
A tuti i partecipanti che jà risposto a tuti e quatro i turni, ghe vegnarà spedì via imeil el diploma de partecipassion.... Premiassion el 28 majo 2010 al primo piano del Ristorante "Al Calmiere" in Piazza San Zeno.
A le prime 3 squadre classificade ghe vegnarà consegnà la
"Pergamena de la Veronesità"
5.1 Premi de Categoria
La squadra che risponde in maniera completa a le dimande (zontando altre informasioni a la risposta da dar) la gavarà el dirito al premio "Secia" e al capitàn ghe vegnarà consegnà el premio "Testina da Brodo".
altri premi:
Premio Asso de Cope = A la squadra seconda clasificada
Premio Sinpatia = Par el nome pi bel votà da le squadre partecipanti
Premio Concorso Poesia Barbarani = A la poesia pi bela
Premio Mastino = A le squadre più combative che le rimonta almanco 8 posissioni in quatro turni.

6. Concorso di Poesia Berto Barbarani:
A la poesia più bela (p.3.4) vegnarà consegnà una cartolina-diploma inedita del grande Berto Barbarani. Par entràr tra le candidate al premio, te devi rispòndar in maniera giusta a 1 dimanda par ogni turno.

7.Reclami:
IscrivendoTe al canpionato, Te si d'acordo sul regolamento in tuti i so ponti chi de sora indicadi e del giudissio insindacabile dela Diression. Dunque l'è proibido reclamàr. Ci reclama durante el canpionato el vegnarà espulso.

8.Conclusioni:
Lo spirito justo par partecipàr al Canpionato l'è:
-Averghe voja de imparàr qualcosa de novo.
-Contribuìr con la propia sapiensa a la divulgasion de la nostra léngua.
-Non preocuparse se i risultadi jè negativi, non sà mai finìo de imparàr.
-Non 'bandonàr el Canpionato in corso, bisogna afrontàr anca i risultadi negativi, avendoghe così anca rispeto par ci organisa e de ci partecipa.
-L'importante l'è parteçipar, parchè quel che deve vìnsar l'è la léngua veronese.

P.S.
Come da lege su la Privacy i dati de persone, indirissi imeil dei partecipanti non i vegnarà ne distribuidi e ne publicadi sensa l'autorisassion dei interessadi su internet o altri sistemi de comunicasion. Questi dati i vegnarà utilisadi solo par comunicasioni tra La Rena Domila e i interessadi par invio dimande e/o comunicasioni relative al canpionato o al sito.