Dimande & Risposte 1° TURNO
in rosso le risposte esate - no jè presenti le dimande foto e i cruci.

0) p3 - Special - Secondo el grande Tolo da Re, l'Adese a Passo Rèsia come nasse?
L'Adese
nasse italian
da na mare todesca a Passo Resia
Presente su www.larenadomila.it - Rubrica "El Canto del Cor"

Dimande Storiche Provincia
punti 3
1-La gens attia l'à dato el nome a che paese? a)Angiari b)Arcole c)Castel D'Assan d)Gressana

Castel D'Assan come anca in Vigasi, el nome lè de sicura origine romana, anca se lè dificile catàr l'esata derivassion: "Vicus Aderis", "Vicus Athesis","Vicus Atticus", "Vicus Attii". Sti nomi se troa in documenti de varie epoche, anca se ancò se pensa che la piassè probabile la sia "Vicus Attii", dal nome dela Gens Attia, popolassion che par diversi ani la gà ocupà el teritorio. I Straca Masele - Presente su www.larenadomila.it - Rubrica "Provincia In "

punti 7
2-Qual' èlo el paese ora con poca anime, che nel 1268 el g'avea ben 3 notai? a)Calmasin b)Bolca c)Mezzane d.Sora d) S.Roco de Piegara

El primo documento uficial in cui se sente parlar de Bolca l'è el "Liber illorum qui reperuntur esse guadiati in arte notarie" in sto "liber" scrito tra la fine del 1267 e l'inissio del 1268 ne l'ultima pagina, forse agiunta dopo el 1268, se parla de "tri notari in Bubulka" che iera Ligatus Langrentus, Domenicus Zenatus e Anzolinus Prescenicus. RH Bardolino Positivo - Precisemo che i notai presenti in Bubulcha nel 1268 i era i numari 609 Dominicus Zenatus, 610 Anzolinus Prescenicus e el 611 Rigus Langrentus. Amizi del Pistor

punti 5
3-Acereda seu cerete.... stemo parlando de un vecio insediamento, ora famoso paese, qual?
a)Cerea b)Cero c)Concamarise d)Somacampagna

Considerando che el nome antico de Cerro l'è Alferia, quelo de Concamarise l'è Conchamaris (dal latino conchiglia di mare) e quel de Somacampagna el vien sempre dal latino Summacampagna, semo giunti a la conclusion che la risposta giusta la sia CEREA. La Pita de Tacheto - El Paese de Cerea nei antichi registri del 923 el vien denominado spesso come Cereta o preferibilmente come Acereda o Acereta. E questo se pensa el possa derivar dal fato che forse ne la zona gh'era dei aceri visto che le caraterristiche fisiche de quel'area Geografica jera idonee a la presenza de quel tipo de albaro. RH Bardolino Positivo - Acereta seu Cerete... stemo parlando de Cerea; infati l'è nominà Cereta in documenti medievali fin dal 923 quando, i omini libari de che la tera lì i gh'avea otegnù l'autorisassion da Eriprando, arcidiacono de la césa veronese, a costruirse un castel par difenderse dai Ungari. El grande Scipion Maffei, sul nome de sto paese, l'era incerto tra la forma Cereta (o Cerreta, da cerro) e la forma Acereta (da acero), sempre comunque un nome che el vien da 'na pianta. Acereta l'è mejo parchè l'area l'era più adata a l'acero. Sul stema comunale de Cerea ghe 'na pianta de cerro in campo bianco, cresua desora un rialzo de terren de color maron. Da le do' parti de la pianta ghe do' C in rosso (COMMUNITAS CERETAE). Le ave mate

Dimande Storiche Bacanal
punti 5
4-In che ano el Podestà Giovanni Orti Manara l'à rievocado la cavalcada de Tomaso da Vico?
a)1832 b)1846 c)1829 d)1838

Esatamente el 7 febrar 1838 el vegnea publicado dal Municipio un manifesto in cui se invitavai Veronesi a concorer tuti par solenizar “una Festa, che sino dal secolo XVI procacciò a questa bellissima città orrevole rinomanza”. Le più importanti inovasioni aportade dal Podestà Orti Manara al Baccanale del Gnocco jè stà: 1) l’istitusion de la cavalcada de Tomaso da Vico e de 24 cavalieri nei costumi del secolo XVI; 2) i cari alegorici al seguito del tradizional Caro dell’Abondanza; 3) l’ino uficial de la Festa, musicado dal Lenotti. Ci Ghe Dirli

punti 3
5-El 15/01/1528 Tomaso da Vico el fasea parte de la "Fantastica Cavalcata" par andar a incontrar el futuro:
a) Vescovo b) Podestà c) Re d) Sindaco

Presente su www.larenadomila.it - sito uficial del Carneval Veronese
El 15/01/1528 Tomaso da Vico el fasea parte de la "Fantastica
Cavalcata" par andar a incontrar el futuro: el Vescovo GIANMATTEO GIBERTI che giungea da Roma par prendere possesso de la Diocesi di Verona. Ci Ghe Dirli

Dimande Dialetali
punti 3
6-Ne la poesia Barbaraniana, a che cosa se riferisse Berto quando el ne dise la parola "Spiuma" e in quale poesia la catemo?
Presente su www.larenadomila.it - rubrica "El Grande Berto" - Dimanda a tema Libaro - Risposta più sempliçe l'era el butier balosso ne la Cabala del Gnoco ma ghera anca:

Cabala del Gnoco
- E ti destrighete
butier balosso:
SPIUMA, desfrìsete
sàltaghe adosso...
La se cata ne "Un disnar in çità":
..e tuta una rosaria
de bei palassi in aria,
SPIUMA e spiansisa su ...
La se cata ne "Avesa lavandara" quando el parla del lissiasso
Ci che ciac, ci che ciac, nei calderoni
trema e boie el lissiasso e, via con lu,
tra un missioto de SPIUMA e de carboni,
merletti e strasse se roveia su!
e anca (sempre col stesso sogeto) ne "La lissia de autuno":... tra morbida SPIUMA,
che boie e consuma,...
La se cata ne "La cuna" e el sogeto l'è el late:
Un late che spiuma
'na tenda de franse, ...
La se cata nel nono soneto de "Val d'Adese":
E brusa tuta la valada, e a bissa-
boa spiuma l'Adese...
La se cata ne "Ruda, ruda" :
- Ruda, ruda:
la ruda del molin la fà la spiuma,
e l'amor l'è un molin che ne consuma!
E infin ne la poesia "Fumane" dove inveçe el protagonista el el vin:
...qua SPIUMA el nobile vin de Fumane,
che l'è la fabrica de l'amicissia;.....
Pita de Tacheto

punti 3
7-Qual'èlo el "raschiatoio" dei luçidatori de mobili?
a)Spalon b)Spaola c)Spédo d) Spéra

El raschiatoio dei luçidadori de mobili l'è la SPAOLA.
El Spalon l'o trova solo nel modo de dir :andar all'albergo del Spalon che voria dir andar al "carcere dei scalsi", lo Spedo el ga da essar el spiedo e la Spera lo pecchio o un raggio de sol, de luce o simili Rh Bardolino Positivo

punti 5
8-Du de queste parole no vol dir "soranome".
a)Scutamài b)Cojonela c)Pontivo d)Spinièl
c) Pontivo = Aguzzo, Appuntito
d) Spinièl = Spina, inteso come cannello della botte


Dimande & Risposte 2° TURNO

Dimande Storiche Provincia
punti 7
1-In che paese la peste del 1630 l'a copà 490 abitanti su 830 totali?
a)Peschiera b)Bardolin c)Salizzole d)Sanguinè e)Fumane

Par eliminar un poche de risposte se podea vardar i abitanti atuali e far una proporsion...."Nel 1630, par par colpa de i lanzichenechi todeschi scesi in Italia, Verona e tuta la so provincia iè state colpide e decimade da la peste, quela ricordada da Manzoni ne "I promesi sposi". In particolar BARDOLIN l'à visto la so popolassion ridurse da 830 abitanti a 490. A Verona invese par che la popolassion da le 55.000 anime del 1625 la se sia ridota a poco più de 20.000 del 1630"...... Rh Bardolino Positivo

punti 7
2-Nel 1961 un fulmine l'a meso tirà zo un campanil de che paese? a)Bovolone b)Pressana c)Arcole d)Montechia

Complimenti a le squadre che jè riusside a parlar con el paroco e la perpetua de Arcole.... - El Campanil de Arcole l'è crolado nel 1950 non par colpa de na "sita"- Adiritura su la Domenica del Coriere in prima pagina ghe el campanil de Arcole, inaugurado sucessivamente nel 1957.

punti 7
3-Ndoélo l'obelisco ereto da Galiari nel 1810 per celebrar na bataja? a)Arcole b)Pastrengo c)Peschiera d)Riole V.

El 21/6/1806 Napoleon Bonaparte in una letera al Principe Eugenio Beauharnais, so fijocio e vicerè d'Italia, el chiedea che i fuse edificadi dei monumenti sui luoghi de le so più importanti bataje, con la clausola che tuti i monumenti i fusse uno diverso da l'altro. El 28/7/1806 el vicerè l'ordina con so decreto l'eression dei monumenti e nel decreto el stabilisse che la spesa la deva essar de 20.000 lire e che i architeti i gabia da essar italiani. Nel veronese se stabilisse de costruir una colona a Rivoli e un obelisco a ARCOLE. par ricordar la bataja del 17/11/1796. El 17/6/1808 el Vicerè l'è a Arcore par scegliar el posto dove farlo e a la fine se decide de farlo sul ponte dove par che Napoleon steso el s'abia scaglià contro le trupe austriache dando così l'esempio ai so soldà che in quel momento i se stava quasi ritirando e convincendoli a contratacar e vinsar po la bataja. I laori i fu comisionadi su disegno del capitan Gaspare Galliari e la prima piera la fu posada el 15/12/1808 mentre l'obelisco el fu inaugurado el 1/12/1810. Da notar che questo l'è l'unico monumento de quei fati a quel tempo che gli austriaci, durante la riconquista del lombardo veneto, no ja abatudo mentre de la colona de Rioli resta solo el basamento e un tochetin de colona. Rh Bardolino Positivo

Dimande Storiche Bacanal
punti 7
4-Quale tra i seguenti personagi l'a ricevudo l'importante "Comenda de Tomaso da Vico" ? Spieg.De solito questa comenda la vien data a ci dà 'na man al Comitato Bacanal del Gnoco, metendo a disposission el propio tempo libaro, le propie risorse sia economiche che personali o in altre forme che possa valorisar el carneval veronese, ecc... a) D. Eisenhower b) G.C. Marshall c) D. Mac Arthur d) R. Nixon e) H. Kissinger

Se podea escludar Eisenhower e Nixon, du Presidenti U.S.A che no jè stà a far visita a la nostra çità e pensar a un Ministro dei Esteri........

punti 5
5-In quale negosio l'è stà esposta el 16 setembre 1883 la prima "Pignata" del celebre Duca de Santo Stefano?
a) Negosio de la "Ditta Martini" in via Noa (via Mazzini)
b) Negosio de la "Ditta De Robertis" in via Galina (via Cairoli)
c) Negosio de la "Ditta Fratelli Rossi" in via Gran Czara (via Oberdan)

Nel 1882 el Comitato Carnevalesco l'avea organisà un'assension de baloni reostatici da l'Arena e un tal Siro Zuliani, nato el il 9/1/1852 a San Stefano, l'avea oferto un belisimo balon anunciando la fantastica ascension del Duca de Saint Julien, da quel giorno el Zuliani l'è deventà el Duca. L'ano dopo lù e el comitato del so rion jà posto a proprie spese, parchè anca alora el Comune el nol ghe sentia par ste robe, davanti a la Ciesa de San Stefano una "piereta" comemorativa de la teribile inondasion che l'avea colpì la cità l'ano prima. Nei giorni sucesivi el giornal "Arena" l'à incomincia a scrivar articoli su la cosa e sopratuto a farse deomande su dove el catase i schei el Zuliani. "Il duca di San Stefano è reputata la persona più misteriosa di Verona. Tutti parlano delle sue ricchezze , dicono che ha scoperto il tesoro, sennò non si spiega come potrebbe spendere tanto denaro in costruzioni, pallonie aerostatici ecc." "Impiegato di casa Lacchi a 5-6 lire al giorno ne spende 3 per farsi portare a casa per far colazione" "Il popolo dice aver egli trovato una pentola di marenghi nella sua vecchia casa, che ha così ben ricostruito a San Stefano" "Sembra che interrogato il Zuliani abbia risposto - Son ben contento che non lo sappiano. Non lo sapranno neanche mai" El giorno dopo sembra che il cognato, l'Avv. Ferrighi, l'avesse dito che l'avea vinto una grossa loteria. Finalmente sempre su l "Arena" esce una articolo col titolo "Abbiamo un uomo di spirito" dove se spiega che "Il Duca di Santo Stefano ha esposto ieri sera nella vetrina dello stovigliaio Martini in Via Nuova alle Campane, la pignatta del tesoro trovato. E' una magnifica pignatta di terracotta foggiata ad olla da ochette in unto o da salami in concia" Par che ghe fusse anca un cartel con scrito " "Ecco la vera pignatta trovata dal Duca di S. Stefano. El giornal el riferise anca che praticamente tuta Verona, dal spasacamin al nobile, quel giorno l'è passada dal negossio par vedar sta pignata. Rh Bardolino Positivo

Dimande Dialetali
punti 3
6-Quale parola de queste no l'è riferida a una persona stupida e/o grossolana? a)Tibidoi b)Tananai c)Catafè

Le parole Tibidoi e Tananai le g'a la stessa raisa etimologica.....El vocabolo CATAFE' nol ga gnente a che vedar con el riferimento a una persona stupida o grossolana. Par, che el catafè, el sia el limite del campo de zugo specialmente ne la lippa (non so se anca nel s-cianco el se ciama così) Tibidoi e Tananai invese pur avendoghe principalmente el significato de confusion, strepito, cicalecio derivado dal rumoregiar che fa la gente in ciesa e i sia proprio originadi da le invocasioni rispetivamente latina e ebraica "Tibi Deo" e "Be Donai" de la gente che prega, le ga entrambe anca el significato de persona stupida e grossolana. Rh Bardolino Positivo

punti 5
7-Partendo da la testa e arivando ai pié, métar in ordine le seguenti parti del corpo:
b) nasèle-narici a) leséna-asella c) smìsa-milza d) pùpola-polpaccio

punti 3
8-Le parole "poro", "poaro", "poareto" nel'etimologia le deriva
a) dal latin Pauper b)dal greco Pokos c)da l'arabo Pòar d)dal turco Paupas dal latino pauper pauperis composto da pau de la stessa raisa di paucus=poco e da per da la raisa par= produrre cioe' colui che produse poco


Dimande & Risposte PLEI-OF

Dimande Storiche Provincia
punti 5
1) Qual'élo el paese entrado a far parte del regno d'Italia napoleonico nel 1806, dopo 2 ani agregà a Legnago. Stacado da Legnago nel 1815 e tornado de soto Legnago nel 1828 restandoghe soto fin al 1947? a)Boschi S.A. b)Minerbe c)Terasso d)Angiari e)Bonavigo - Risposta presente su la rubrica "Provincia In"

punti 7
2- Nel'ano 1870 ghe stà diverse aparisioni dela madona in un paese de la provincia.. tanto che gh'era 7-8000 fedeli in visita al dì... de che paese parlemo? a)Maran de V. b)Ferara de Monte Baldo c)Cavrìn d)Dolcè e)Erbeso

Don Cristiano Zocca paroco de ERBESO el scrivea al Vescovo de Verona Mons. Luigi Marchese di Canossa in relassion ad alcune strane aparissioni che g'avea avudo alcuni buteleti de la so zona. In particolar el racontava che una certa Marìa Teresa de 8 ani e abitante in località Ragazzini mentre la portava al pascolo le so bestie l'avea visto a distansa de 50 metri una dona sentà con un butin sui genoci e a capo chin come se la le adorasse e con tuto un splendor intorno. Tornada a casa la raconta tuto a so mare che la va sul posto con l'altro fiol Cristiano de 10 ani. Anca staolta el fiol el vede sta signora col butin mentre la mare non la vede gnente. El paroco nei giorni sopo el porta sul posto altri buteleti che vede la stesa scena. Da quel momento le aparissioni le se moltiplica e par che sta Madona la se veda in altri posti nei paraggi e ancha in pose diverse, con e sensa butin, con vestiti neri, azuri, bianchi e con fiori, nastri doradi e altre robe ne la testa. Quei che dise de aver visto la Madona je quasi tuti butini dai 8 ai 15 ani ma ghe anca qualche persona dai 25 ai 30 ani e anca qualche 50enne. Dopo aver fato de le ricerche par che la diocesi l'abia preferido far passar tuto par psicosi coletiva e far passar par mata la gente che g'avea avudo le visioni. Rh Bardolin Positivo e Ave Mate

Dimande Storiche Bacanal
punti 7
3-Nel 1952 el Rion dei Filippini ispirandose a un cavalier del XII° secolo, Reboano Dalle Carceri l'à creado la so màscara. Ma storicamente, un dissendente de Reboano l'à ispirado a so 'olta la nassita de una màscara italiana. Quale? a)Arlecchino b)Brighella c)Gianduia d)Stenterello e)Pulcinella

L'origine del Principe de la Concordia el risale all'XI - XII secolo, un periodo de lota cruenta tra le fassion che le stasea in çità. La fameja Dalle Carceri, tra le più facoltose de Verona, la fasea opera de mediassion e de concordia. El strano nome el derivava da la contrada de San Marco alle Carceri ( adeso la se ciama piasseta Tirabosco e dintorni) tra piassa de le Erbe, corso Porta Borsari e via Quatro Spade dove stasea Reboano. Ma se da subito i Dalle Carceri i tentava la mediassion, dopo anca lori jè stà coinvolti in 'ste lote e i sà unio ai Sambonifacio contro i Monticoli, e de conseguensa le loro case jè stà distrute nel 1205 e jè cascà in proscrission du ani dopo. Reboano, che mal el digerea 'ste lote veronesi, el decise de aderir a 'na ducale de Venesia che dasea l'isola de Negroponte (adeso la se ciama Eubea) a ci la ocupava a so nome con la forsa. Reboano l'è riussio ne l'impresa, unendose a Pecoraro de' Pecorari e dal fiamingo Jacopo De Avesnes l'à ricevù un terso de l'isola che nel 1209 l'è deventà sua dopo averla governà dandoghe ogni ano 2100 monede d'oro a Venesia. Morto Reboano Dalle Carceri, l'isola de Negroponte l'è passà ai so' disendenti fin al 1490, quando l'è andà in man ai turchi. Ma dopo la metà del XIII secolo, ne la Marca Veronese entra in scena un personagio politico che el portava el nome ridicolo de Pulcinela Dalle Carceri. 'Sto tipo strambo, ribel a l'imperador Coradino e al so vicario de Verona, Mastino I Della Scala, più olte parà via e esilià, la acquistà con le so gesta temerarie tanta fama, non solo a Verona ma in tuta l'Italia setentrionale, che in un documento del 1363 basta a ricordarlo el solo nome de Ponzinela, sensa bisogno del cognome. Con questo non se vol dir ( come el dise Fainelli) che la mascara de Pulcinela la deriva dal personagio storico Dalle Carceri, ma piutosto parchè questo l'è deventà così popolar con quel nome parchè el ricordava nel comportamento - le similassion, i voltafacia, le astussie, asalti e ingani, le turbolense - e forse anca 'ne l'aspeto e nel vestir, 'na figura del floclor a tuti nota, un tipo che za el gh'era carnevalesco Ave Mate

punti 7
4-Dal 1843 al 1847 ghera l'usansa de rapresentar le mascherade coi fati storiçi. Cosa l'è stà rapresentado nel 1844? a) el ritorno da la 'Merica de Cristoforo Colombo
b) la fastosa corte scaligera de Mastino II° e Alberto II° ne l'ano 1336
c) Ingresso trionfal de Cangrande I° a Verona
d) l'episodio de la paçe de Paquara tra Ghelfi e Ghibelini nel 1233
e) l'ingresso de Eselin (Ezzelino) da Roman in Verona nel majo 1238 sposo a Selvaja (Selvaggia fiola de l'imperador Federico II°)

Nel 1843 se decise de rapresentar durante el Carneval fati storici. Così in quel'ano se rapresentò el ritorno da la Merica de Cristoforo Colombo; con un brigantin dove gh'era figuranti vestidi come spagnoli e indiani de l'epoca. Nel 1844 invese se decise de rapresentar l'ingresso trionfal de Cangrande I Della Scala a Verona nel 1328 dopo le vitorie de Padova e ne la Marca Trevisana. Nel 1845 se rapresenta la fastosa Corte Scaligera de Mastino II e Alberto II nel 1336. Nel 1846 l'ingresso de Eselin Da Roman in Verono nel Majo 1238 sposo a Sevaja fiola de l'Imperador Federico II. La tradision la se conclude nel 1847 quando se riproduse a la grande nei costumi e nei caroci l'episodio de la pace de Paquara conclusa visin Verona nel 1233 tra Guelfi e Ghibellini e che sfociò nel matrimonio fra Rinaldo d'Este e Adelaide fiola de Alberico da Romano. Rh Bardolin +

Dimande Dialetali
punti 5
5-Dimanda da DOTORI - Se 'na persona la g'a la palpebra gonfia con un nodulo rosso che se te lo s-ciopi vien fora el pus e l'ocio che lagrema, semo in presensa de.... a) Orsol b) Boiana c) Panarìso d) Socoléto

Ai tempi dei romani Bevilacqua l’era in do che adesso gh’è la località Castelletto, da indoe passava la strada romana Vicinalis, che la nasea da Ostiglia (Hostilia), sul mantoan, a Este (Ateste) nel padoan...Amizi del Pistor

punti 7
6-La parola "Pitoco" nel'etimologia deriva
a) dal greco Ptokhos b)dal turco Pitokis c)da l'arabo Patkoni d) dal macedone Patakis

..........Pitoco ne l'itmologia deriva dal greco Ptokhos; esiste vari modi de dir quando uno l'è proprio pitoco, senza mezzi tipo (Pitoco come la bruma) o anca ( Pitoco come la bruma de lujo). El verbo "Pitocàr" vol dir "Piansar miseria"," insistar senza pudor par otegner qualcosa".
Eco alcuni proerbi sul contrasto tra pitochi e siori:
- l'è mejo star arente a un sior avaro che a un pitoco abondante
- la rason dei pitochi l'è carga de difeti
- se te vol che te lo diga te lo digo: se te deventi pitoco, te perdi l'amigo
- el magnar dei pitochi l'è ne le scarsele dei siori
- i schei dei pitochi jè maledeti
- la consolassion del pitoco l'è vedar miserabile andar in malora
- el pitoco no'l fa mai ben: se more la vaca, ghe vanza el fien; se la vaca campa el fien ghe manca
- el pitoco che serve i siori el more a l'ospedal
Da ricordar inoltre el grande Berto che nel 1897 l'avea scrito " I Pitochi", con disegno de Angelo Dall'Oca Bianca. Ave Mate

punti 5
7- Cosa dise un famoso proerbio sul Monte Baldo: "Quando el Baldo el g'a 'l capèl o che fa bruto o che fa bel"

Quando el Baldo el g'à el capèl e che fa bruto o che fa bel. 'Na variante la dise: quando el Baldo el g'à el capel o che pioe o che fa bel. El Baldo el se mete el capel tra la tarda primavera e le prime setimane d'autuno; el capel l'è quela formassion de nuvole che le stà intorno a le cime più alte. El modo del Baldo de metarse el capel l'è diverso: a olte l'è tuta 'na capa avolgente, altre olte el capel el se mete su le ventitrè, come se usa dir. Questo vol dir che le nuvole le stà solo da 'na parte, da la parte a oriente, e questo sucede le solito nei mesi estivi. Infati in 'sta stagion le corenti umide e calde che vien da la pianura le risale verso l'alto, e, incontrandose con i strati de aria freda de la montagna, le condensa dando origine a la formassion de le nuvole, de quei fantasmi che i continua a cambiar, par ci risal la gresta de la montagna, tanto da balàr intorno con un turbinìo spetacolar e continuo. Le nebie le se alsa verso l'alto, par che le vaga sul lato ocidental e che le voja ingoiar l'escursionista fin che'l camina; ma questo non sucede mai, no le riesse mia a tracimar de là; subito le se desfa come se le trovasse 'na resistensa, val a dir 'n'aria che no' le permete de condensarse. Se trata de l'aria diversa che la vien da nord-ovest e che la continua a portar el capel su la ventitrè. Ave Mate

punti 7
8-Ne la poesia Barbaraniana, Berto a che cosa se riferisse quando el ne parla de: "l'è un Ufissio de posta, un...Ministero"?
Nel quarto Cansonier de Berto, nel Preludio intitolà "El Cristo su la scala", se trova scrito così:

El camaroto de la portinara,
l'è un Ufissio de posta, un.....Ministero;
gh'è ci ghe trova la notissia cara
e ci una busta filità de nero...
Chè, la vita l'è cuna e çimitero,
'na bocada de dolse, una de amara;
ci gode la salute e ci se mala,
soto a i oci del Cristo su la scala!

Berto el se riferisse al fato che el camaroto de la portinara de le case vece l'è el posto dove 'riva la posta, dove se pòl trovar ' na busta con bele o brute notissie, ma daltronde la vita l'è così, bela o bruta col Cristo che l'è sempre lì a guardar quel che sucede. Ave Mate