Dimande & Risposte 1° TURNO
in rosso le risposte esate - no jè presenti le dimande foto e i cruci.

Dimande Storiche
punti 3
1-Quali tra questi NO l’è stà uno dei XIII Comuni de la comunità Cimbra in Lessinia?a) Asarin b) San Bortolo c) Tavernole d) Giassa
e) Val de Poro

Ne la storia de Verona e fra el popolo de la Lessinia se parla speso de i XIII Comuni de la Comunità Cimbra ma sto numaro non le mi sta sempre costante, infati el numaro 13 el se riferisse ai comuni che ne l'ultimo periodo de la dominassion venessiana j'a costituido el "Vicariato de la Montagna". L'istitussion del Vicariato, a dir la verità, l'è più antica ma prima l'era composto solo da un numero minor de comunità. I primi coloni jè rivadi nel 1287 nel teritorio de Roverè con una colonisassion che la interessava un'area triangolare con el vertice che tocava S.Rocco e la base che la partiva da la Val Squaranto a Velo e jà otenu l'autorisassion a fondar una tersa colonia Cimbra, dopo quela dei sete comuni a Vicensa e quela nel Trentin, dal Vescovo de Verona, Bartolomeo de la Scala. Dopo le comunità Todesche che verso el 1320 le se stava apena formando si ingrandirono colonisando altre zone del'Altipian e si costituirono in Comuni in forma de amministrassion separata col Diploma de Cangrande I (1326) anca se par comune in quei tempi se entendea più che altro un numaro de case sia tante che pochetine. Da un documento sel 1403 se vede che al tempo de la dominassion Viscontea el Vicariato el se componea de 12 comuni e ne l'elenco del 1509 jera caladi a 11. Carlo Cipolla, grande storico, el ne conta che el 22 agosto 1603 i sa radunado presso el Vicario massari e/o rapresentanti de le comunità cimbre de la Montagna Alta del Carbon ma in sto caso le comunità jera ancora solo 12 visto che i rapresentanti de San Bortolo jera anda lì solo par scoltare cosa i disea. L'apelativo de 13 comuni l'apare la prima volta in una statistica , purtropo incompleta, risalente al 1616 e sti 13 comuni che ancora nel XVIII secolo i formava una unita aministrativa autonoma jerà: Velo, Roverè, Val de Poro, Asarin, Camposilvan, Selva de Progno,SanBortolo apunto, Badia Calavena (l'antica comunità de "Sprea con Progno" che la comprendea Sprea a l'atuale S'Andrea de Badia) Saline, Bosco Ciesanoa (antica Bosco Frizzolana), Tavernole, Erbezzo e Cero (o Alferia). Sembrarà strano che non ghe sia proprio GIASSA che ancò l'è el centro e el fulcro de la storia cimbra ma Giassa fin a la fine del XVIII secolo l'era unida a Selva de Progno e l'à asunto una qualche importansa solo dopo che l'è stà inalsà a Parochia nel 1798. Complimenti par le risposte a Rh Bardolin Positivo e Ave Mate

punti 3
2-Quale caserma in tempi austriaçi l'era usà par la produssion de pan e galete?a) Catena b) Santa Marta c) Campone

La Caserma Santa Marta sorse originariamente come antico edificio conventuale. Nel 1211 el Podestà de Verona Bonifacio Sambonifacio donò siè campi de tera a un tal Forzano del Castello par fondarve na ciesa e un monastero par i frati e le monaghe de l'Ordine de Sant'Agostin zontandoghe nel 1293 un chiostro. Nel 1300 Alberto De la Scala rinovò e ampliò la ciesa ciamada prima de Santa Maria Maddalena e dopo de Santa Marta. Nel 1350 el monastero el fu unì al visin Convento de Santa Maria de le Vergini (Maddalene) Nei ani 1805-1810, par decreto napoleonico el convento di Santa Maria delle Vergini el vien sopresso; ciesa e monastero i vien alienadi. La ciesa de Santa Marta, sconsacrata, e usada par alcuni anni come ricovero per i cavai, la vien venduda nel 1829 a un privato e el campanil pericolante el fu abatudo nel 1833, nel steso ano i le compra i Padri Capucini che i le restaura assieme al convento e i se insedia dentro dal 1835. El 18 fevrar 1850 el comando austriaco l'alontana i frati Capucini e acquisisce el convento volendo costruir su quel'area el Grandioso Panificio e Gallettificio de l'Imperial Regio Esercito Asburgico. Dal 1863-1865 inissia la costrussion del stabilimento de la Provianda su ordine de F. Z. M.Ludwig von Benedek (Comandante d'Armata a Verona) e su progeto del tenente colonnel Andreas Tunkler von Treuimfeld (1820-1873), che l'era noto in Europa par le so publicassioni da sciensa de le fortificassioni e par l'atività de insegnamento a l'Academia del Genio di Kloster Bruck, del capitan Ferdinand Artmann (1830-?), esperto de tecnologia de la sussistensa, de la produssion e conservassion alimentare; nel progeto de la provianda organizò el ciclo de produssion e curò l'instalassion de i machinari; e de Anton von Naredi-Rainer che l'avea za dato prova del so talento nel progeto par l'ampliamento de Porta Vescovo, negli anni 1862-1863. La Provianda di Santa Marta la se compon de tre edifici disposti in uno spazio rettangolare recintato, completamente autonomo rispeto al compleso militar del Campo Marzo, nel quale l'è inserì. El progeto original el prevedea un quarto edificio, prospetante su via Cantarane ed elevà su quatro piani, nel quale i se saria dovui insediar i ufici de amministrassion del stabilimento ma el grande edificio ch'el saria servido come ingresso monumental nol fu mai realisado. La capacità de produssion dei dodise forni che ghera nel panificio la corispondea a cinquantaduemila rasioni giornaliere de pan (da 750 grammi) e a venti quintali di galete biscotade. Oltre agli edifici de produssion de pan e galete gh'era anca altissimi silos par la conservassion de le granaglie che in tempo de pace le podea servir par l'alimentassion de n'armata de centomila omeni par disdoto mesi. I fasea parte del vital servissio logistico de la Provianda anca el vicin Panificio de Santa Caterina da Siena e parte de la Caserma de San Francesco de Paola.

Dimande Storiche Bacanal
punti 5
3-Quale tra questi quartieri çitadini, no'l g'à un "Re" nel Carneval Veronese? a) Porto San Pancrasio b) San Massimo-Croçe Bianca c) Q.Re Carega d) Golosine e) Q.Re Filipini

Tra quei citadi ne la dimanda l'unico quartier che nol ga un "re" l'è el Q.re dei Filipini che dal 1952 el ga "solo" un principe, el Principe de la Concordia, Reboano dalle Carceri, che come Carlo d'Inghiltera l'è sempre principe ma l'è fadiga ch'el deventa re :-). El Porto San Pancrasio invese el Re Saltucchio e la Regina Caterina, San Masimo e la Croce Bianca el Re de la Stanga dal 1978, el nobile quartier de la Carega Re Teodorico dal 1970 e le Golosine Re Goloso dal 1968

punti 5
4-Quale pietansa vien distribuì da tradission el Luni Pignatar a Santo Stefano? a) Menestron b) Risoto c) Paparele coi Figadini d) Patate calde

Al Luni Pignatar a Santo Stefano vien distribuio el minestron de maltagliati ( piato che merita de essar afiancà al gnoco par quanto riguarda l'antichità del carneval...) del Duca de la Pignata. La figura de 'sto duca trae origine da un personagio realmente vissù a Verona: Siro Zuliani nato el 9 genar 1852. Le cronache del' otocento le parla de 'na ramina che la boje e la riboje, dove se cusinava el minestron che dopo el vegnea distribuio in scudele a tuto el rion de Santo Stefano. Giani Scolaro el cogo de l'Ostaria al Duca, cioè el tempio del Duca de la Pignata, el ricorda come el dovea essar el vecio minestron: un minestron poaro come tuta la cusina del tempo. Se metea a cosar par tre ore e mezo solo verdure locali, de stajon tajà a tochetini: patate, çeole, verze, sedano e carote, bisognaria zontarghe anca de l'orzo. Come pasta i Maltajè, naturalmente fati in casa con ovi e farina el tuto servio de bojo. Ai giorni de ancò, podemo metarghe anca un pò de formajo e un giro de oio de oliva cruo... ma 'na olta, i veronesi de alora, 'no i podea mia permetarselo.

Dimande Dialetali
punti 3
5-Completa el Proerbio: Se no pioe su l'olivela, pioe su la brassadela e 'l contrario
El proerbio el dise: "Se no pioe su l'olivela, pioe su LA BRASSADELA. El proerbio el vol dir che se no pioe a la dominica de le palme, vegnarà a pior el dì de Pasqua. La brassadela l'è infati na pasta tipica del periodo pasquale fata a forma de ciambela. La Pita de Tacheto

punti 3
6-"Pigiare" a esempio l'uva, corisponde in dialeto al verbo:
a) pelatàr b) inzingalàr c) folàr d) insolàr

Folàr deriva dal verbo francese fouler=pigiare la saria l'operassion che se fa tra el pigiar e torchiar per imergere nel mosto le buce che sgonfiandose le vien a gala e con el contato de l'aria le podaria smarsir. Goto sempre pien

punti 3
7-In boca al lupo ! Qual'ela la "tana del lupo"?
a) lòra b) loròto c) lóza d) loàra

Loàra o Lovàra l'è la tana del loo: in senso figurà vol dir anca preson, in quanto a Verona le preson le jera in via Lovara (ancò la se ciama via Alighieri).

punti 5
8-Quale tra questi l'è l'osel "Codirosso" ?
a) Pavalarin b) Magòga c) Squarussolo d) Valangoto

El squarussolo l'è un picolo turpide longo 14 cm. con 'na apertura alare de 20-24 cm. Le ale jè pitosto longhe e la coa de color arancio la se moe su e zo. El piumagio del mas-cio su el dorso l'è griso, soto la gola e su i lati de la testa nero. El peto, i fianchi jè de color rosso ruseno evidenti. El canto el someja a quel del pitiroso: breve e squillante. L'è un osel solitario e teritorial, laoro esclusivo de la femena l'è quel de costruir el nido ne la cavità de un tronco, qua vien deposità 5-7 ovi de color celeste e coè par 2 setimane. Se nutre de inseti fin verso la fine de l'istà, dopo campa con de le bacche. Fin pochi ani fa, l'era molto più frequente nei notri boschi; ora forse la variassion del clima e l'utilizo de sostanse chimiche in agricoltura le sfavorisse la presensa e la riprodussion de sto turpide

punti 7 FOTO
9-I Du de l'Ave Maria nel 2001 i era andà a far un escursion in un logo unico nel Veronese. Parlemo de un logo 'ndoe se pol amirar el famoso "Baloc tacà via" che l'è 'na piera incastrà in un vajo. Nel 2006 i vorìa ritornarghe ma i à perso la cartina de la nostra provincia. Podì aiutarli a ricordar in quale Vajo el se cata?
a) Del Zocco b) De le Laine c) Malacarne d) de la Fraga e) Del Torente

Tute le località indicade le se cata su la riviera gardesana del lago de Garda. Del Torente l'è el nome del corso d'aqua che ghe passa soto, l'è arente a Somavila e Asensa.


Dimande & Risposte 2° TURNO

Dimande Storiche Provincia
punti 3
In qual stema comunal catemo rafigurà "El Ponte de la Rosta" o Diversivo?a) Vilabartolomea b) Brentin Belun c) Castagnaro d) San Gioani Lupatoto e) Zevio

Ne l'araldica dei stemi dei comuni taliani così vien descrito quel de CASTAGNARO "Troncato, semipartito; nel primo d'azzurro;nel secondo di acqua al naturale; nel terzo di verde al castano al naturale attraversante la Divisione. Sul tutto, attraversante in fascia un ponte a dieci arcate, le cinque a sinistra murate" Sinceramente go capio gran poco ma l'unica roba sicura l'è che quel ponte l'è el Ponte de la Rosta o par mejo dir el Diversivo Castagnaro, ciamà Ponte de la Rosta parchè situà in Via Rosta, che l'è un poderoso sostegno in muradura a diese arcate e longo quasi 80 metri. In pratica na diga progetada da Anton Maria Lorgna con la supervisione del Canova su comission del Senato della Serenissima de Venessia e costruida nel 1791 par dar sfogo, tramite un canal, a le piene de l'Adese e farle confluir nel visin Canal Bianco e par cercar de risolvar così un problema ch'el sa presentà fin, sembra, dal 1198 quando el Canal Castagnaro, un canal desso quasi scomparso ma che nel 1700 l'era tanto grande da portar via quasi el 60 per cento de le acque de l'Adese e costrinzar Venessia a nominar un Magistrato solo par el so controllo, l'à scominsià a portar le acque bianche dell'Adese nel Tartaro e che par secoli l'avea influensà nel ben e nel mal l'economia del paese. Na olta se podea pasarghe sora e su na lapide conservada su un lato del ponte se pol ancora vedar i dazi che persone, animai e cari i dovea pagar par pasarghe insima. A l'inissio pare che el Ponte el funsionasse al mejo ma za nel 1838 l'è sta serà par impedir el sensibile aumento del leto del fiume. Ai nostri giorni el se trova in uno stato de abandono totale e la cosa l'è particolarmente grave proprio parchè, come dito, insieme con l'Ippocastan l'è raffigurà parfin nel stema del Paese e l'è uno dei simboli de Castagnaro. RH Bardolino +

punti 5
2-El piassé antico edificio Sacro esistente nel Comun de San Gioani Lupatoto l'è la "Ceséta de Sorio". A ci l'è dedicà? Dimanda a risposta multipla. La césa l'è stà costruì dedicandola a la Vergine Assunta come scrito sul timpano, col tempo dedicà a San Piero come risulta in molti documenti. (Risposta presente ne la rubrica Provincia In) a) Vergine Assunta b) San Michele c) San Roco d) San Sebastian e) San Piero da Verona

El più antico edificio Sacro esistente nel comune de San Gioani Lupatoto l'è la çesa de Sorio ereta nel 1585 e dedicà a la Vergine Assunta come se trova scrito soto el timpano del portale "Ecclesie - Assuptini - Beate Marie - Virginis - MDXXXV".In realtà la çeseta ne i documenti ufficiali l'è chiamà "Oratorio de San Piero Martire" e la ga come compatrono San Giorgio. Le sta edificà da la nobildona signora Isotta Borghetti, mujer del nobile Guglielmo Guarenti.L'edificio se prensenta in forme semplici con la faciada a capanna e un picolo roson, inveze a lato strada se verze tre finestre piombà con vero tondo de Venessia. Su sto lato ghe anca un campanileto formà da un semplice archivolto in cotto chel tirn su 'na picola campana. Da le parte del timpano ghe du stemi nobiliari, scolpii ne la piera de la fameja Borghetti, che i rapresenta el profilo de du gali che se guarda. Dentro la çesa ghe 'na sola navata col teto a capriate linee, arco trionfal e abside con copertura a botte.Ne la zona presbiteriale ghe du afreschi che i risale ai primi del XVII secolo e i rafigura i dodese apostoli. Oltre ai afreschi ghe anca do pale de altar una dedicà a San Michele e San Giorgio e autografà da l'autor, che l'altra rapresentante la Madona con San Piero da Verona, San Sebastiano e San Roco. 'Sta ultima pala risale a la meta del siesento, rica de color, liminosa e ben struturà ne la composission figurativa l'è sicuramente de scola veronese. La çesa l'è sta costruia sora el terassamento del fiume Adese. Ave Mate

Dimande Storiche Bacanal
punti 7
3-In qual ano el quotidian L'Arena l'à dà notisia de la realisassion de un opuscolo su la Storia del Carnevale intitolà "Verona in laetitia resurget" e sototitolà "Ridendo benficat" ? a) 1902 b) 1913 c) 1924
d) 1935 e) 1939 f) nissuna de 'ste date (specificar...)

L'Arena del 29/02/1924 dopo aver descrito l'intero programa de la sfifada dei cari del Venerdì Gnocolar che la se tegnea proprio in quel giorno la da notissia de un opuscolo sul Carneval a cui avea colaborado anca alcuni veronesi famosi. Questo opuscolo de 27 pagine, che l'era sta stampà nel Stabilimento Tipografico Editoriale "il domani d'Italia" de via Lombroso, 8-10 a Verona d ch'el costava 1 lira e l'intero ricavato del quale el saria andà in beneficenza, el se ciamava "Verona in laetitia resurget". All'interno dopo la prefassion del comitato e le adesioni de alcuni veronesi famosi come Renato Simoni e Arnaldo Fraccaroli da la Redassion del "coriere de la Sera", de Angelo da l'Oca Bianca e Giuseppe Adami. El riportava prima de tuto el "Manifesto del Carnevalon" de la società del Gnocolar, dopo alcuni soneti de quel che vien nominà come el major poeta del venerdì gnocolar, Padre Antonio Cesari, un Decreto Prefettissio par el Carneval del 1806, un po' de storia su le origini e su le feste carnevalesce del poeta gnocolar F. Dionisi, un saggio sul Gnocolar fine secolo, "alcuni spunti in tema de gnochi" de Luigi Messedaglia, la "Salutatio al Papà del Gnoco" de Francesco Viviani, un saggio su "Verona e el so Adese" de un certo Victor el storiografo, un raconto ilustrà da disegni de Vignola intitolà "el stregon" e scrito da Mariù Fontana, el"Testamento de Marco Paparela", "Merlin Cocai" del dott. Vittorio Fontana che l'à anca curà l'intera organissassion, un "Epigramma di Goliardo Italico" p Gagliardo Italico come scrito nel somario, "Carnevaleide" de Riccardo Chiarelli e anca un "saggio de poesia dialetale trentina de un certo Rivanus. Come dito tuto el ricavato l'è andà in beneficensa, infati "el comitato che con Papà del Gnoco sa ridere e divertirsi a tempo, ricorda alla beneficensa cittadina la nobile istitussion "Cesare Lombroso" la quale provvede con l'erigenda "Casa di Custodia e di Lavoro" a la tutela e rieducassion dei disgrassiadi "mostri" vaganti per le contrade Veronesi".... insoma na specie de riformatorio. RH Bardolino +

punti 3
4-Quali tra questi comuni de la provincia Veronese no'l g'à un "Re nel Carneval"? a) Belfior Re Mengo b) Negrar Re Cioto con Regina Amarone c) San Gioani Lupatoto Re del Goto d) Somacampagna Messer Gidino e) Cavrin Re del Baldo

Poesia
5-Completar la poesia a propio gusto dando un senso logico / voto da 4 a 7 punti Chi soto le poesie piassé bele (voto 6,5 al 7)

La bogonela l'è una roba giala *
magnada spesso co la polentina,
che vista da lontan, la par' na bala,*
con du corneti su la testolina.
La ghe mete du giorni a far 'na scala *
ma no la se preocupa gnanca na nina…
Oh! Siòra bogonela, dove vala? *
Vao ne l’orto a magnar la salatina.

La bogonela l'è 'na roba giala
e la vien fora dopo 'na sguassada
che vista da lontan la par 'na bala
coi corni la riconosse la strada
la ghe mete du giorni a far 'na scala
par sparir du secondi, 'na manciada.
Oh! Siora bogonela, dove vala?
Vao via da qua par no essar schissada!

la bogonela l'è una roba giala
lisia, smilsa e anca bruta
che vista da lontan la par na bala
che rugola pianin e no l'è mai suta
la ghe mete du giorni a far na scala
e anca ieri, salendo l'ho incontrada
Oh siora bogonela dove vala ?
vo su sior, e lu, alo cata la so strada ?

La bogonela l'è una roba giala
che la se porta drio la so caseta
che vista da lontan, la par 'na bala,
tanto l'è picenina e rotondeta
La ghe mete du giorni a far 'na scala
e diese par scalar na ceseta
Oh! Siòra bogonela, dove vala?
vado nel prà .. gh'el me bogon che speta.

La bogonela l'è na roba giala
con du corneti che jè na figada
che vista da lontan la par na bala.
e che ghe piase ber la rosada.
La ghe mete du giorni a far na scala
tri par far en passetin
O siora bogonela dove vala?
a sconderme en giardin.

La bogonela l'è una roba giala
che la vien fora da orti, campi e prà
che vista da lontan, la par 'na bala,
mia bona de rugolar: l'è desgonfià.
La ghe mete du giorni a far 'na scala
ma doe vala col strascico argentà?
Oh! Siòra bogonela, dove vala?
Cosa vol-la mai catar su par de là!

VOTO 7 la bogonela l'e' 'na roba giala
e co' la polenta la se intona
che vista da lontan la par 'na bala
ma trifolada l'e' propio bona
la ghe mete du giorni a far 'na scala
e intanto la pesta parsemolo e aio la me dona
oh! siora bogonela, dove vala?
a delisiar la boca del bongustaio e de' la so parona 

La bogonela l'è una roba giala,
la se sèra se ghè l’arsura,
che vista da lontan, la par 'na bala,
par propio che no la g’ abia mai premura:
La ghe mete du giorni a far 'na scala.
Vàrdela, vàrdela, l’è ndà su par ‘na mura!
Oh! Siòra bogonela, dove vala?
”ma no vedelo? Scapo da la paura!”

VOTO 7 La bogonela l'è una roba giala
con na caséta tonda sula schena
che vista da lontan, la par 'na bala,
tuta la vita adrìo la se le mena .
La ghe mete du giorni a far 'na scala
lassando zo na riga de mocàio ….
Oh! Siòra bogonela, dove vala?
Siòr, lu el vol farme in téia, me la taio !

la bogonela l'è una roba giala
e la fa ridar a vardarla caminar
che vista da lontan la par na bala
che se sconde se la sente osar.
La ghe mete du giorni a far 'na scala
ma l'ariva sempre 'ndo ghè un postesin
oh siora bogonela dove vala?
coro pian e imboco el sentierin

VOTO 7 La bogonela l'è na roba giala
la vive entorcolà en la so sguseta
che vista da lontan la par na bala
la va remenga co drio la so caseta
la ghe mete due giorni a far na scala
la tira avanti par la so stradeta
OH! Siora bogonela dove vala?
Tasi moro, gho pressia, i me speta!

Dimande Dialetali
punti 3
6-Quale pianta, par far bela figura, te ghe pianti nel giardin de 'na dona?a) un bel Gadol b) un bel Bruscanso c) 'na Pèarda

Se proprio bisogna nel giardin de na dona ghe piantaria un bel GADOL ch'el ga da essar na specie de giaggiolo o ireos. El bruscanso a la dona ghe lo portaria ma solo par farme far el risoto. Na olta pearda l'era na parte de sponda dei corsi d'aqua dove se ligava le barche o i molini e che in dialeto la vegnea ciamà "piarda" RH Bardolino +

punti 3
7-Quali tra questi no l'è uno dei tanti nomi che vien dà al Picchio muraiolo? a) Rampeghin da le ale rosse b) Becasènge c) Sengiarol d) Sarloda

El nome che nol ga gnente a che far col picchio muraiolo l'è la sarloda che 'no l'è altro che la lodola. El picchio l'è de l'ordine de i passeriformi e de la fameja de i sittidi, l'è un oseleto longo quasi 20 cm el pesa 'na vintina de grami. La so carateristica l'è la colorassion rossa de le ale che le se nota quando el volo queste però j'è curte e larghe che le ricorda quele de la farfala. El so ambiente preferio j'è le pareti a strapiombo dove el se ferma par frugar col so beco longo e ricurvo ne le fesure a zercar inseti e larve; grassie a le so zampe con "artigli" curvi el riesse rampegar. Ave Mate

punti 3
8-Completa el Proerbio: A Santa Lussia 'na ponta de ucia, A Nadal on passo de gal, A Pasqueta n'oreta, a Sant'Antonio on passo de demonio
A olte i proverbi j'è in aparente contrasto, però in sostansa j'è un dialogo tra generassion e i diversi punti de vista i tende nel confronto a crear un equilibrio e un punto de riferimento afidabile. La tradission orale la dise che i proverbi no i sbaglia mai, ma i pol cascar in erori de indicassion i riferimenti dei fati storici, quei riferii al tempo o a le stagion. Però se i vien interpretà col senso come j'è ste fati l'aparente eror acquista significà storico. 'Sto proverbio quando l'è nato el ga zontà al concetto de solstissio invernale anche le conosense sociali altrimenti sconosue al popolo. Quando l'espressio l'è nata el solstissio invernal cascava el giorno de Santa Lussia, considerà la padrona de la luce. El proverbio l'è restà vivo solo par sto motivo senò saria sta desmentegà come tanti altri. Ave Mate

punti 3 Foto
9-"Giovane con disegno di Pupazzo" dipinto conservà nel Museo de Castelvecio, l'è opera de: El dipinto in question l'è de Gian Francesco Caroto (1480-1555 circa). El vien da la collession de Cesare Bernasconi e le iconograficamente singolar par la presensa del disegno infatil, mostrà con orgoglio dal so picolo autor; sul fojo ghe disegnà anca un ocio de profilo e 'na testa fata mal. L'ispirassion de 'sta tela deriva dai modei de Leonardo conossui da Caroto a Milan indoe Leonardo l'avea lassà el segno del so passajo.Sto quadro el par 'na foto istantanea tanto l'è messa in risalto la soddisfassion del buteleto nel mostrar quel che l'à fato; la grande lession che Caroto el ga avù da Leonardo l'è sta capia e messa a fruto. Ave Mate


Dimande & Risposte PLEI-OF

Dimande Storiche Provincia
punti 10
1) i Du de l'Ave Maria i vol bear un gosso de aqua fresca. Métar in ordine da la quota piassé bassa a quela piassé alta le seguenti sorgenti montane: c) Sorgente de la Marola / 631 mt. /arente a Malsésen - Arente a Malga Fiabio sul Baldo ne la parte de l’Alto Garda fra Casson e Malcesine
a) Sorgente Bergola / 846 mt. /arente a Spiassi
Dove nasse el fosso Canpion ne la Val Salve Regina
b) Sorgente Albinovi / 1247 mt. / arente a Noveza
Arente a Cima Paloni
d) Sorgente Ciaranela / 1670 mt. / sul Monte Tomba
Arente al Rifugio Podestaria

punti 7
2- Nel veronese, ci l'è stà arestà da de le guardie a la fin del '700 mentre el disegnava, parché credù 'na spia austriaca? a) Aleardo Aleardi b) Vittorio Betteloni c) Ippolito Pindemonte d) Victor Hugo e) Johann Wolfgang Goethe f) Jacob Ludwig Karl Grimm

Nel 1786 Johann Wolfgang Goethe l’a scominsià dal lago de Garda, che alora l’era proprio al confine fra l’impero Austriaco e la Serenissima, el so “Viajo in Italia” . Rivado a Malcesine el 12 setembre l'è stà costreto da un vento fortissimo a fermarse e rinviar la so vegnuda a Verona. Lù stesso el raconta così la cosa «Stasera avrei potuto raggiungere Verona, ma mi sarei lasciato sfuggire una meraviglia della natura, uno spettacolo incantevole, il lago di Garda; non ho voluto perderlo, e sono stato magnificamente ricompensato di tale diversione» El giorno dopo, el 13, colpido da le belesse del paesagio e specialmente da la belessa del Castel Scaligero el decise de scarabociar alcuni disegni del Castel e l’à cercà un posto chieto da dove poder disegnar con calma, solo ch’el fu scambià par una spia da alcuni passanti e subito arestà da le guardie. Solo l’intervento de altra gente, che la savea el todesco, l’à risolto la situassion tanto che sia le guardie che el Podestà i gà domadà scusa e i gà donà alcuni fruti. El giorno dopo Goethe l’è partì par Bardolin saludà dai abitanti de Malcesine che ancora adesso i lo considera el primo turista del paese. I disegni trategiadi dal Goethe j’è ora esposti in una sala apositamente riservada nel Castel Scaligero e nel posto dove el s’avea messo a disegnar prima de essar arestà ghè una lapide che dise:
HINC
J.W.GOETHE
Id.SePt.MDCCLXXXVI
ARCEM
DELINEAVIT

punti 10
3-'Ndoe l'è stà catà dal Conte Orti Manara nel XIX secolo, l'iscrission su cipo roman chi de soto riportà, consegnà dal conte al museo lapidario de Verona ?
TIB.CLAVDIO
TIB.F.QVIR
AVGVSTANO PATRI
BELLICI SOLLERTIS
PROC.AVG.PROV.BRITAN
CLAVDIA TI.F.MARCELLINA
SOCERO OPTIMO P.

a) Nogara
b) Vilabartolomea
c) Cologna Veneta
d) Travensol
e) Castagnaro
f) Veronela

Complimenti par ci l'è andà a far visita al Museo Mafeian 'ndoe no l'è più esposta, ma se te fasei un bel giro al Museo Archeologico te podea dar un aiuto un iscrision quasi istessa. La Dimanda comunque la volea saver 'ndoe l'è stà catà l'iscrision no 'ndoe l'è stà portà. L'iscrission (CIL, V, 3337) de piera su cipo l'è stà rinvegnua dal'Orti Manara a Trevensol; el testo tradoto el dise cosita: A Tiberio Claudio Augustano, fiol de Tiberio, de la tribù quirina, pare de Belicio Solerte, procurator de Augusto ne la provincia de Britania, suocero otimo, Claudia Marcelina, fiola de Tiberio, pose. L'interese de sta epigrafe la stà nei du personagi importanti nominè: Tiberio Augustano e Belicio Solerte. El primo, procurator de la provincia de Britania, l'è vissùo ne la seconda metà del I secolo d. C. ma nonostante sta dedica de la nuora Claudia Marcelina, non l'è mia stà citadin veronese, come dimostra la sò apartenensa ala tribù Quirina. Personagio veramente importante l'è stà invese el fiol natural Tiberio Claudio Alpino, che da zoeno l'avea ricoperto cariche militari e l'è stà adotà daLucio Belicio Solerte; l'à fato la cariera equestre avendoghe dopo le cariche de procurator de la Dalmasia e de pontefice minore a Roma, par dopo essiar asunto nel Senato ed eleto in seguito pretor e console. Savemo anca che come ex pretor,l'avea domandà al senato de istituir marcà ne le sò campagne, incontrando però l'oposission dei Vicentini, e de sta roba ne informa Plinio Minore ne le letere del 105 al'amico Giulio Valeriano, e se gà anca notissie dei posedimenti e de le fabriche de laterisi che la mujer Claudia Marcelina la g'avea nel Lazio intorno ai ani 123-126. Questa, inoltre, in qualità de mojer de sto Belicio Solerte, l'è la destinataria de 'na iscrission dedicatoria al n. 47 de corso Porta Borsari (CIL, V, 3338).

Dimande Storiche Verona
punti 5
4-Quale tra questi Scaligeri no l'è stà Vescovo de Verona? a) Guido
b) Bartolomeo I c) Bartolomeo II d) Pietro I e) Pietro II f) Mastino II

L’unico fra quei Scaligeri a non essar stà Vescovo l’è stà Mastino II Guido Scaligero l’è sta Vescovo dal 1268 al 1278. Bartolomeo I Della Scala dal 1278 al 1290 Pietro I Della Scala dal 1291 al 1295. Bartolomeo II Della Scala dal 1336 al 1338 e el fu copà dai cusini Alberto e Bartolomeo el 27/08/1338 Pietro II Della Scala dal 1350 al 1387

Dimande Storiche Bacanal
punti 5
5a-Ci l'è stà "Capo dei Maccheroni" nel 1957 ? a) Ermenegildo Dall'ovo b) Giovanni Manni c) Luigi D'Agostino d) Igino Domenichini e) Attilio Martini f) Gianfranco Olivato

Un tempo i gnochi i vegnea ciamà Macaroni, quindi el Capo dei Maccheroni o Macaroni no l'è altro che'l Papà del Gnoco......"Nel 1957 fa la sua apparizione una delle teste più “calde” di San Zeno, il vessillifero Gineto, al secolo Luigi d’Agostino, che più simile (per congenita magrezza ) alla renga di Parona, ha l’ardire di candidarsi e di ottenere l’ambito forchettone di Papà del Gnoco. Ci riuscirà grazie ad una “ galopinata “ di Ennio Biasi. Il giorno delle votazioni, il Biasi si avvicina al banchetto gastronomico del candidato avversario di Gineto e si fa offrire una mortadella ai ferri, proprio mentre la piazza traboccava di folla; appena assaggiato un pezzo, si getta per terra colto da violenti dolori addominali, gridando a squarciagola: “ i ga le mortadele invelenà…” E la gente, mentre era in arrivo un’autoambulanza chiamata da un altro galoppino: “Cosa succede?…” “l’è drio morir…i la invelenà…” “ Ci elo sta?…” E tutti a segnare sprezzanti il rivale di Gineto che da quel momento voti sicuramente ne prese pochi. Così Gineto, magro come “na renga”, divenne il Sire del Carnevale di Verona"..... I Straca Masele - Ne la sfilada dei cari de Venerdì 1 Marso 1957 el Papà del Gnoco dito anca “el capo dei macaroni” l’è sta l’atual presidente del Comitato Bacanal del Gnoco Luigi D’Agostino. Da le cronache del tempo par che in quei ani el Carneval non godesse de bona salute tanto che el venerdì de la sfliada quasi non gh’era la notissia su l’Arena” e el giorno dopo la cronaca de la sfilada l’era de manco de mesa pagina e anca piena de critiche e sarcasmo. Invesse quel Carneval l’è da ricordar parchè poco prima che scominsiasse el corteo alcuni goliardi vicentini spaciandose par giornalisti jà rapio el “Papà del Gnoco” e el so scudiero Ennio Biasi butando ne lo sgomento tuta l’organisassion e specialmente quei che gh’era “Al Calmier” che l’era el Quartier Generale del D’Agostino. La reassion l’è stada però pronta e Roberto Recchia e Doro Martini a bordo de na 1100 i s’à butado a l’inseguimento dei rapitori ragiungendoli a l’altessa de Montecchio e liberando Papà del Gnoco e scudier e riportandoli a casa in tempo par tor el loro posto ne la sfilada ‘ndoe fin al loro arivo el Papà del Gnoco l’era sta sostituido da un Piron listado a luto. La vendeta non la s’à fato certo aspetar e l’è stada tremenda e proporsionada a l’ofesa. Infati la domenica 3 Marso de bon’ora, verso le 6 de matina, el Sire del Carneval insieme al so seguito costiuido dai “Cavalieri di Da vico” Ennio Biasi, Roberto Recchia, Eddo Foroni, Igino Domenichini, Giovanni Dall’Ora e Mario Materassi a cui el s’ava agiunto “l’Ardito” Bruno Leso ( spero che se possa far i nomi visto che el reato el ga da essar cadù in prescrission ehehehe) j’è andadi in machina fin a Vicensa con la Comenda Carnevalesca ben in vista e imposessadisi de na scala i l’à apojada a l’esterno del “Quartier General del Gato”, l’onor de la scalada l’è toca a Bruno Leso che raggiunto un balcon el s’à impadronì de un gonfalon bianco e rosso portandoselo via. Mentre i tornava a Verona jà anca porta via da na vetrina un manifesto nel qual “se invitava tuta la popolassion de Vicensa a la massima atension par far si che nei giorni de Domenica, Luni e Mardi la magnifica Vicensa non la vegnesse calpestada dal vil piè dei sozzi veronesi, chiedendo inoltre de dar la massima ospitalità ai studenti de le altre Università che i fusse rivadi a dar manforte ai vicentini. Naturalmente…come sempre …i vicentini i se l’à tolta nel …gonfalon. Rivadi a Verona i nostri eroi j’a percorso le strade de la cità anunciando a tuti la beffa perpetrada ai cusini “magnagati” . El Gonfalon l’è sta a la fine issà sul campanil de San Zen con le campane che le sonava a festa……… massa forti!!!!! Par la cronaca Ermenegildo Dall’Ovo l’è sta Papà del Gnoco nel 1923 e nel 1924, Giovanni Manni nel 1952 e 1955, Igino Domenichini nel 1953, Attilo Martini nel 1950 1951 1956 1958 e Gianfranco Olivato nel 1981 1982 2004 Rh Bardolino Positivo

punti 7
5b-Oltre al Papà del Gnoco e al Duca de la Pignata un altra maschera tra le piassé vecie del Carnevale Veronese l'è el Prinçipe Reboano. In che ano s'à 'isto la nassita de 'sta maschera?a) 1950 b) 1952 c) 1954 d) 1956

La mascara l’è nata nel 1952 El principe de la Concordia, Reboan da le Carceri come sà dito in altre ocasion, l'è la mascara del quartier dei Filipini, porto de la Verona venessiana su l'Adese, che proprio nel 1952 l'à voluo entrar a far parte del Carneval Veronese con 'na propria mascara. L'origine del Principe de la Concordia la risale a caval dei secoli XI e XII, in un periodo de lota dura tra le fassion che abitava in çità. La fameja Da le Carceri, tra le più cospicue de Verona la fasea opera de mediassion. Lo strano nome el deriva da la contrada de San Marco a le Carceri, ancò Piasseta Tirabosco e lì intorno, tra Piassa Erbe , corso Porta Borsari e via Quatro Spade, dove Reboano el stasèa. Ma se da l'inisio i Da le Carceri i tentava la mediassion, presto anca lori jè stà travolti da le passion de parte e i sà unìo ai Sambonifacio contro i Monticoli, con la conseguensa de vèdar distrute le so case nel 1205 e e cascar in prescrission nel 1207. Reboan, che mal ed digerea ste lote veronesi, el decise de aderìr a una ducal de Venessia che la dava l'isola de Negroponte (ancò ciamà Eubea) a chi l'avesse occupà a so nome con la forsa. Secondo la legenda, Reboano el riussì ne l'impresa unendose a Pegorar de Pegorari e in seguito el g'ha vù dal fiamingo Jacopo de Avesnes un terso de l'isola, che nel 1209 la ghe fu assegnà dal tuto, dopo averla governà, versando ogni ano a Venessia ben 2100 monete d'oro. Morto Reboan da le Carceri, l'isola de Negroponte l'è passà ai discendenti fin al 1490, quando l'è cascà ne le man dei turchi.

Dimande Dialetali
punti 5
6-Completa el Proerbio: A Santa Toscana se maura.... l'ua Iuliana

punti 5
7-Scarabeo Rinoceronte: In dialeto Veronese come el vien ciamà?
a) Bèga Sucàra b) Surla dal Corno c) Bao dal Corno d) Campàr

El scarabeo rinoceronte (oryctes nasicornis) el fa parte de la fameja Dynastini, i inseti più grosi de la tera che i ariva fin a 14 cm. de lunghessa, però questo in particolar el pol arivar a 4cm. El mas-cio el se riconosse par el corno chel ga su la fronte (e da questo deriva el nome), la femena inveze 'no la ghe la mia. La livrea l'è de color maron e el resto del corpo più scuro. I se vede in giro da magio a agosto e in 'sto periodo 'no i magna mia, i vola de note atirè dai lanpioni. Le femene le depone i ovi dove ghe roba vegetale in decomposision, la larva l'è bianca con le zampete arancion la ga forti mandibole che le pol rosegar el legno. Ave Mate

punti 5
8- Qual tra questi no l'è l'osèleto "Martin Pescatore"? a) Piombin b) Usél de la Madona c) Santa Maria d) Braghér

L’unico modo in cui nol vien ciamà el “Martin Pescatore” l’è Bragher che vol dir secadura, roba noiosa, fastidiosa o anca in certi posti bragher l’è l’asorbente de le done. Rh Bardolino Positivo - El martin pescatore (Alcedo atthis) le longo 16/17 cm., con un beco longo, groso a la base, ale e coa corti i piè picoli. Ne la parte in alto lè de color blu-verde, in quele in basso e su le guance color ruzene, ai fianchi del col gà ‘na macia bianca. Dato chel ga piè picoli el salta su le piere e sui pali sensa caminar mai su la tera. Vive solitario, poco socievole e nol vol mia concorrenti nel so’ teren de cacia. De solito el sta vizin ai corsi de acqua dolze: fiumi, stagni e par diverse ore fermo su un ramo a spetar la preda sempre guardando ne l’acqua. Se acopia a fine marso primi april; el nido vien fato scavando un cunicolo nei arzari sabiosi, qua vien depositè 6 o 7 ovi che nascerà i picoli dopo 15 giorni. El magna pesse e inseti.El bragher l’è la ziveta (Athene noctua) che lè longa non più de 22cm. Con apertura de le ali de 58 cm, la so testa lè apiatia con du popolini biancastri. Oci giali, pene desora brune con macie bianche, soto bianche e strie brune. La femena l’è più grande. Se riproduse in april magio, i ovi jè mete ne le buse de le rocce e dei albari, soto i muci de piera, de solito i ovi i va da 4 a 7 e la cova dura 28 giorni. La magna rati, osei çergnapole, inseti e retili, ai osei prima de magnarli la ghe tira via le pene, invece i rati la jè pela. Ave Mate

punti 5
9-In Valpolesela ci vegnea ciamà "el trifolàr" fin a meso secolo fa ?
a) Sellaio b) Tartufaio c) Seggiolaio d) Bozzolaio e) Pollivendolo

Vien ciamà tartufaio ci armà de can, esperiensa e un poco de fortuna se prodiga par el presioso tubaro. Par essa in regola con la legge el trifolar el ga da aver un tesserin de riconoscimento che el le abilita a la ricerca nei posti dove l'è consentio, però bisogna chel rispeta la natura circostante e le proprietà dei altri. Dopo aver trovà la zona interessà el scava concludendo l'operassion con la racolta, a la fine el deve metar a posto el teren parchè un brao ricercator nol deve lasciar segni del so passajo. Naturalmente l'èlemento fondamental par el trifolar l'è el can, vero protagonista de la situassion; in certe zone i usava i mas-ci però esendo grosi jera un pò scomodi ma sopratuto je sta smesi parchè i magnava i tartufi.El tartufo l'è un fongo spontaneo che ghe vol tanta fortuna par trovarlo. I antichi i pensava che i fusse originè dal scaricarse dei fulmini vizin ai alberi, in realtà i nasse spontaneamente soto certi albari come querce, selgari, tigli, piope e çiresi.I tartufi j'è anca 'na sentinela par l'ambiente, difati 'no i tolera l'inquinamento, i diserbanti e tuto quel che no rispeta la natura. Ave Mate

10-Voto da 4 a 10 ! Completa la poesia come te vol, dando un senso logico e de significado

Voto 6,5 - 7
Qua’, dove l’Adese, sensa fermarse *
El se remena visin a Brentin
Stao atento a no negarme, *
ma vao a ciapar ‘na trota o ‘n cavassin
Me tegno al suto, me meto al caldo *
Parche’ m’e’ vegnu ‘n po de raspeghin
Vago a spasso sul Montebaldo *
Dopo eserme fato ‘n sponsin...

Quà, dove l'Adese, sensa fermarse
el core par arivar al mar,
stao atento a no negarme,
e vao su l’orlo a pestolàr.
Me tegno al suto, me meto al caldo
e se propio voio strafàr
vago a spasso sul Montebaldo,
en mezo ai prà me buto a ronchesàr.

Quà, dove l'Adese, sensa fermarse
el passa chièto soto al ponte,
stao atento a no negarme,
nel lavàr sto par de braghe onte!
Me tegno al suto, me meto al caldo
me meto zaino e scarponi,
vago a spasso sul Montebaldo
Fò quel che voio...non gò paroni!

Quà, dove l'Adese, sensa fermarse
el passa arente ai sassi de Dolcè
stao atento a no negarme,
no meto drénto a l’aqua gnanca on piè.
Me tegno al suto, me meto al caldo
preparo el saco, me meto i scarponi
vago a spasso sul Montebaldo
in serca de castagne e de maroni.

Quà dove l'Adese, sensa fermarse
me struca l’ocio e ‘l me fa un soriso
stao atento a 'no negarme,
ne l’imenso splendor del to bel viso.
Me tegno al suto, me meto al caldo
par ripararme da ‘sti sgrisori:
vago a spasso sul Montebaldo
lassù con ti… dove nasse i amori.