Dimande & Risposte 1° TURNO
in rosso le risposte esate - no jè presenti le dimande foto, cruci, cartoline e quadri d'arte.

Poesia
1-Completar la poesia a propio gusto dando un senso logico Poesie voto 7 - "Straca Massele" e la poesia matrimonial; "Bala che vegna" un nome una poesia! "Giremo come Moscoli" e la poesia del cor; "I Brigaldoli" la poesia par la so Giulieta (Marika); "Zin Zeta Forbezeta" e l'amor;

Straca Massele
I to oci quando i sluse *
i me sveia dal sognar
i me alsa e i me conduse *
par la strada da ciapar.
Come piume in boca al vento *
che le vola e le se posa
nel paese de l'argento *
mi te porto come sposa.

Bala che vegna
I to oci quando i sluse
i par gosse de recioto
i me alsa e i me conduse
a çercar un altro goto
come piume in boca al vento
i me porta insima al lago
nel paese de l'argento
mi, de novo, me imbriago.

Giremo come moscoli
I to oci quando i sluse
I me ciama li’ visin
I me alsa e i me conduse
A tor in braso el me butin
Come piume in boca al vento
Mi te canto nina nana
Nel paese de l’argento
Ti te sogni la to mama

I Brigaldoli
I to oci quando i sluse
i me fa vegnar el malmatòn
i me alsa e i me conduse
nel cor sento un rebaltòn
come piume in boca al vento
te me rende el più contento
nel paese de l'argento
te farìa en monumento

Zin Zeta Forbezeta
I to oci quando i sluse
i me toca dentro al cor
i me alsa e i me conduse
verso i sogni de l’amor
Come piume in boca al vento
i se lassa trasportar
nel paese de l’argento
'ndoe tuti vol andar

Cartolina
punti 5
2-Purtropo una gossa de aqua l’è cascà su la cartolina scancelandoghene un bel toco. L’è restà, parò, un campanil o forse ‘na tor. De qual paese parla la cartolina, vecia de almanco 50 ani?Vestananova

El campanil in question l’è quel de Vestenanova, costruio nel 1921, l’è sta inaugurà dopo 27ani el 3 Giugno 1948; al so’ interno je ste colochè nove campane. La cesa de S. Leonardo de Vestenanova l’è sula somità de un colle dove la domina tuta la Val d’Alpon. Progetà da l’abate Angelo Gottardi, la g’a un stile neoclasico e ‘na faciada monumental con un portego formà da quatro colone corinzie. La someja a un tempio greco-romano e se ariva tramite do’ gradinate laterali; la so’ costruzion l’è scominzià nel 1849 e finia nel 1853, però consacrà solo nel 1924. Arente la piaza è stà costruia la canonica dove ghera la vecia cesa del 1472. Ave Mate

Foto
punti 5
3-I Du de l'Ave Maria ‘ndoe i è andà? Tóri del Benaco

A parte el fato che se i du de L’Ave Maria i stesse a casa sua, no’ i ne faria mia tribolar par capir el posto che j’a visità; comunque visto che cosita ‘no le mia , se adatemo e disemoche staolta j’è ste a Tòri del Benaco. Ne la foto se vede el castel che l’è un borgo fortificà de antica origine, con ‘na cinta muraria parallela la lago, andando a finir a nord con un torion, chel podaria essar romano, e inglobando la tore de Berengario. El lato est, indoe i muri j’è più bassi e grossi, el podaria essar del X secolo, inveçe de quelo a sud se sa che Antonio della Scala nel 1383 l’a ricorso a l’opera de Bonaventura Prendilacqua par edificarlo. Fiancheggià da tre tori (scudata quela centrale), la cortina, che difende la darsena: che forse le sta amplià in quanto essendo a metà tra Malcesine e Lazize, la risultava indispensabile al controlo del Garda. Fotificà probabilmente in età romana, Castrum Turrium l’a lascià cospicue vestigia. Quando j’è scomizià le invasion dei Ungari (dal 899), la nova Tulles carolingia la ga avù el benestar de ristrutturar le so difese murarie. El paese, che l’era in posission strategica su le rive del Garda e anca ben fortificà, costituea una de le ciave de volta del sistema militare e commercial benacense, par questo l’e riussì ad averghe oltre a de le agevolassion fiscali anca dei previlegi. Nel 905 le sta usà da Berengario come sede par incontri politici. Comunque tuti quei poteri locali che i avea dato prosperità ai borghi de la riviera, difese da Turrisendo, j’è ste messe in crisi da Barbarossa fin il 1193, quando Enrico IV el ga ceduo le tere del mediolago al comune de Verona. Dopo le prime lote comunali, la prosperità le ritornà con i scaligeri, che raforzando e sgrandando le mura, j’a fato de Torri la sede del “colonnello del medio lago”. Ne le guere par la sucession ai Scaligeri, a la fine del 1300, Tori l’e sta la prima a subir le canonè da parte de l’artiglieria de Azzo degli Ubaldini. Dopo le guere soferte tra el 1400 e la metà del 1500, a parte qualche incursion de trupe nel 1600 e 1700, ghe sta un periodo de tranquilità. Ave Mate

Arte
punti 5
4-'ndoe se cata ‘sta pala e a ci l'è dedicà: Altar de San Rafael ne la césa de San Fermo

La pala la se trova su l’altar de San Rafael ne la césa de S. Fermo Maggiore. L’e colorata assè, con una gran varietà de tinte, opera de Francesco Torbido deto “El Moro” (1482/85-1562). La rapresenta la SS Trinità, la Vergine col Butin, San Rafael che ‘l g’à par man el picolo Tobiolo e S. Giustina. In mezo se verze ‘na visual de paesagio dove se vede do persone oranti. L’e sta messa sora l’altar costruio par volontà de Torello Saraina, primo storico de la cità de Verona nel 1923 e dedicà a la SS. Trinità e San Rafael Arcangelo. Francesco Torbido, deto “El Moro” (che probabilmente el so’ vero cognome l’era “India”) l’è nassuo a Venezia dove forse l’à imparà le basi de la pitura a la botega de Giorgione. Nel 1500 circa el s’à trasferio a Verona, indoe l’à laorà par i conti Giusti, che, visto che el prometea ben, i l’a favorio par riprendar lo studio de la pitura ne la botega de Liberale da Verona. Le malelengue de l’epoca le disea che lù l’avesse sposà ‘na fiola naturale de Zenovello Giusti, ma no ghè mia nessuna conferma documentà. Ben presto el Torbido l’è deventà alievo predileto de Liberale; questo, quando l’e morto, l’à lassà i so’ averi a le fiole de Torbido: Lucrezia e Margherita, che l’a finio par sposar un altro pitor: Batista del Moro. Dal 1546 al 1555 el ritorna a Venessia, a la Scuola de la Trinità, doe el scominzia ‘na serie de tele che le vegnarà completè dal Tintoretto. Ritornà a Verona l’à vissuo nel palazzo dei Giusti in S.Maria in Selle dove l’è morto. L’era talmente ben voluo da la fameja Giusti che i l’à sepolto lori personalmente. L’e sta un omo da le bone maniere, acolto ne le case de la nobiltà veronese, proteto dal vescovo Gianmatteo Giberti, amico de artisti come Sanmicheli e Danese Cattaneo (scultor). L’à frequentà anca leterati e omini de cultura, come Fra Castoro, L’Aretino, Torello Saraina e Fra Marco De’ Medici, el “reporter” de l’epoca che l’a riferio le notissie sul Torbido publichè dal Vasari. In ‘sto ambiente colto e rafinà l’à trovà forse la so’ vena artistica più congenial ne la ritratistica, piutosto che la pitura sacra. Ne la pitura veronese el g’a un posto notevole come ritratista, anca se tanti dei so’ ritrati j’e andè persi. Ave Mate

Dimanda Dialetàl
punti 3
5-Dimanda Dialètal p.3 Qual de 'sti ingredienti el va ben ne la pizza ? a) sbarìni b) piasòto c) samarol d) mostrànci

El campanil in question l’è quel de Vestenanova, costruio nel 1921, l’è sta inaugurà dopo 27ani el 3 Giugno 1948; al so’ interno je ste colochè nove campane. La cesa de S. Leonardo de Vestenanova l’è sula somità de un colle dove la domina tuta la Val d’Alpon. Progetà da l’abate Angelo Gottardi, la g’a un stile neoclasico e ‘na faciada monumental con un portego formà da quatro colone corinzie. La someja a un tempio greco-romano e se ariva tramite do’ gradinate laterali; la so’ costruzion l’è scominzià nel 1849 e finia nel 1853, però consacrà solo nel 1924. Arente la piaza è stà costruia la canonica dove ghera la vecia cesa del 1472. Ave Mate


Dimande & Risposte 2° TURNO
in rosso le risposte esate - no jè presenti le dimande foto, cruci, cartoline e quadri d'arte.

Poesia
1-Completar la poesia a propio gusto dando un senso logico Poesie voto da 4 a 7

Ci ghe dirli
Nina, te piase i fighi co la gossa *
no te ne magnarese mai abastansa,
el late fresco con la pana sora,*
monto ala fine dela transumansa,
l'ua tirada so bonora*
quando l'autuno ancora no 'l se mostra
e bèar del vin, na bossa?*
Ma si, dai, ala salute nostra!

Cartolina
Punti 5
2-El Diretor con un bel colpo de sisóra l'à taià la cartolina a metà. De quale césa l’era ‘sto bel campanil a la fin del ‘800? Madona dela Corona a Spiassi

El campanil in question l’era quel de la césa de la Madona de la Corona a Spiassi. El santuario el se trova a metà de la parete verticale rociosa del Monte Baldo, a 700 m. de altitudine, scavà completamente ne la rocia viva che la va zo a pico par 400 m. L’è dedicà a la Madona Adolorà, ma el vien ciamà “ de la Corona” par la forma de le rocie che ghe intorno. In origine nel lontan 1139, se tratava solo de ‘na picola ceseta sede de eremiti da le dimension de ‘na camareta. Verso el 1437 le passà soto l’ordine dei Cavalieri de Malta, dal 1480 al 1522 l’è sta costruia ‘na céseta un poco più granda, inaugurà nel 1530 dopo la visita del vescovo de Verona Mons. Gian Matteo Giberti; però l’unica via de acesso al Santuario l’era un sentiero par gnente comodo che da la val el rampegava su par el monte par diverse ore de marcia. Da chì partea na scalinada in piera con le sete stassion raffiguranti i dolori de Maria, ciamà “Via Matris”. Dopo çent’ani, dal 1625 al 1680, l’è stà costruia n’altra cèsa un altro poco più granda, che nel’ano 1898 l’e sta slongà de du metri in avanti, verso el piazzal; l’ano dopo l’e sta rifata la faciada decorà con marmi de S.Ambrogio in stil neogotico, come la podemo vedar adesso. Nel 1928 par migliorar la nicchia de la madona e stà ritocà l’altar magior, dove el legno l’è stà sostituio col marmo; tra el 1946 e el 1949 l’è sta eseguia un’opera de sfondamento de la parete rociosa che l’a permesso de slargar el presbiterio contegnuo in una cupola de 8 metri e de trasformar l’altar magior. El 20 Genar 1975 (ano santo) j’e scominziè i laori de ristrutturazion e de ampliamento, difati da 220 m.q. s’è passà a 600 m.q.; la lunghezza de la cèsa l’e de 30 metri, la larghezza de 20 metri e l’altezza de la cupola 18 metri. El novo santuario l’e sta consacrà el 4 Giugno 1978, ma el completamento de l’opera l’e stà portà a termine in occasion de la visita apostolica del papa Giovanni Paolo II el 17 april 1988. (Ave Mate)

Foto
Punti 5
3-I Du de l'Ave Maria ‘ndoe i è andà? Bonavigo

Partémo dal nome “pieve”. Prima de tuto, la pieve l’è la césa parochial che la ga soto de ela el Prior e el Retor e par lo più vile e castel. Ci se curava dela comunità, cioè la “plebs”, l’era el “plebanus” e col nome “plebato o pieve” se indicava el posto dove ghera sta aggregassion, e con el termine “plebano” el so reggitor immediato. Dito questo, anche la césa de Bonavigo la ga sta origine. Subito dopo l’ano mile, l’è stà tegnuda dai Canonici regolari de San Giorgio in Alga e dopo, dal XV secolo con i Venessiani, dai Padri Camaldolesi de San Michel de Muran; nel 1400 ai Camaldolesi j’è subentrè i frati del convento de San Maria de Muran che i ghè stei fin al 1768, ano in cui la repubblica veneta la ga tirà via ai monasteri la cura delle parochie rurali. Bonavigo la ga avuo un paroco del clero, de nomina vescovil, e le deventà parochial na nova césa, ciamada anca ela de S. Maria, in centro al paese. El convento fu sopreso e tuto el teritorio dove la stava, con le opere de ogni genere jè ste incamerade dal demanio e vendue in un’asta publica. Un tal Luigi Zaccagna comprò tuto, l’a cavà zo la césa e adirittura el sa venduo anca i dipinti, i paramenti sacri, tuto trane la campana. Ai primi del novecento, la fameja Mutti acquistò la proprietà e la césa ancò l’è monumento nassional. Come strutura la césa la risale ala prima metà del XII secolo; annessa al monastero, forse l’è stà costruia dai frati stessi con poca roba ispirandose al stil romanico. Col pasajo de proprietà la póra césa l’à assunto con le case intorno l’aspeto de ‘na corte rural. La faciada l’è a capanna, con archeti pensili che i segue l’andamento dei spioventi de l’edificio, visibili nel lato destro, mentre al centro jè interoti da ‘na fassa vertical che l’à inquadra la porta e l’oculo e ne la metà sinistra dal campanil, sempre in stile romanico. Le mensolete dei archeti con le incisioni orissontali e la parte soto arrotondà, jè tipiche de la prima metà del XII secolo. I muri i vede el tufo e el coto e se trova anca el motivo a spina de pesse; anca l’alternansa dei filari de matoni grossi e sottili jè tipici de quei che laorava nela bassa veronese. La tore campanaria, messa ne la faciada ala fine del XIII secolo, la se alsa con i so’ corsi de tufo alternè a corsi de coto e la finisse con na bela cella a bifore tegnuda su da colonine de pièra dandoghe slancio ed eleganza a la costrussion. In origine el campanil l’èra sormontà da ‘na cuspide, butada zò nel 1736 parchè pericolante, metendoghe semplicemente un querto in coto. La cornisa a dente de sega l’è certamente del XIV-XV secolo. De drio no se ghà abside, indice che el muro drito che se trova l’è el risultado de restauri: dopo l’abandono dei frati, de drio ghe se postò un rustico, butando zo però el muro curvo de l’abside. El portal de la faciada, retangolar e agetante, con arco de scarico in tufo l’è del XV secolo, de sora ghe stà un oculo non romanico originario. Al portal ghe apartegnea ‘na maniglia in fero batudo de rara belessa 'desso ne le mani dei paroni. L’interno l’è ad aula unica,con un querto a capriate lignee. L’abside principale l’è afiancada da do absidiole, incluse nel spessor dei muri, con piture a fresco molto importanti. A destra entrando ghe stà el fonte batesimal, con tre stemi con mitre, uno adiritura el ghà dò colombe mentre l’è stà metendo el beco nel calice. A sinistra un picolo portico ed dà l’accesso al campanil. La campana che resta l’è in bronzo con du fregi retangolari e la porta la data del 1503. Nel muro a sinistra ghè un picolo loculo, a destra de questo ghe stà un’epigrafe scrita su alcuni matoni, in gotico corsivo, che la ricorda forse la consacrasion de la césa, ma forse quela del loculo stesso; eco cosa ghè scrito:

Primo quarèl
+ ANNO DM MILL. CC. NONAGESIMO
QUARTO INDICIONE SETIMA HEC
…KMARSE FUIT HEDIFICATE
O P R DM CONF P B R I ET R D E E

Secondo quarèl
CNST D ANO SECUDO

Terso quarèl
+ E GOTEBALDUS (segue el sigilo)

La croce la dise che el tempio l’è stà consacrado; l’iscrission la dise: NEL’ANO DEL SIGNOR 1294, DURANTE LA SETIMA INDISSION, STA césa dedica a S. Maria(?) tabernacolo (?) L'E' STA' EDIFICADA PAR OPERA DEL SIGNOR, DEI CONFRADEI SACERDOTI E DEL RETOR DE STA CESACONSACRADA NEL SECONDO ANO DA GOTEBALDO Probabilmente la césa la gh’avea afreschi; sicuramente ghè stadi tanti restauri. Infati ne la absidepicenina de destra ghe stà scrito la data 12.11.1414, nel catino centrale ghè ‘na cartela con la scrita DOM RESTAURATA FUIT ANNO SALUTIS MDCCXXXVI. Altri restauri jè stè fati agli inizi del Novecento. L’altar l’è baroco, del 1705 e sòra ghe stava un tritico su tavola de Leonardo da Verona con la data 1494 ma par fortuna l’è al riparo da furti possibili. Nel tritico ghe sta la Vergine in tron col Butin, a destra un vescovo e a sinistra S. Zuan Batista, nela luneta de sora el Padre Eterno. Soto gh’era na predela venduda par poco a la fine del’Otozento a un antiquario de Venesia. Ma el giojel de la césa jè i afreschi. Ne l’abside de sànca nel catin se trova la meza figura de un vescovo che el benedise, probabilmente San Gregorio, col palio su la veste viola, e che el sta sora do figure sotili de santi: a sinistra un giovane santo in tunica bianca e mantel viola con ‘na corona in man, quela del martirio, a destra un altro santo giovane ne la stessa postura con veste giala quadretà e manto bianco. El San Gregorio sembra la copia del San Gregorio Taumaturgo dipinto ne la nicchia del naos del monastero di Hossios Lukas, in Focide de la prima metà del XI secolo. Sta abside l’è stà murà nel XV secolo e ridota a fossa comune par le moneghe; infati dentro s’à trovà ossa de scheletri femminili. Ne l’abside de destra, su un sfondo bicolore, gialo ne la parte soto e azzurro ne la parte sora, se trova la figura de Cristo a mezzo busto, con testa cerchiata da ampio nimbo, con ‘na tunica azurina 'ndoe gh'è fato su un bel mantel rosaceo, rafigurà con l’iconografia ellenistica, con grandi oci persi ne la fissità frontale, sensa barba e benedicente a la maniera greca, cioè a man verta. Ne la parte soto, de fianco a un riquadro a finto marmo giallognolo, se pone frontalmente a sinistra un santo vescovo con la barba, con casula e càmise ornà con fini quadretature e palio, visto ne l’ato de benedir, sempre a man verta, e de tegnar ne la man sinistra un libro, mentre a destra se trova San Giorgio (o Demetrio o Teodoro) con le sembianze de un soldato bisantin, mentre in man ‘na longa asta messa de traverso con intorno su ‘na lorica zala, ‘na clamide roscea ligà su la spala destra che la casca secondo el costume tipico de Bisanzio. (Ave Mate)

Arte
Punti 5
4-‘Sto dipinto con Gesù e la Samaritana ‘ndoe se cata? Césa parochiàl de Monteforte

La césa Parochial de Monteforte l’è dedicà a S. Maria Maggiore, edificà a partir dal 1805 su progeto dell’architeto Bartolomeo Giullari e completà nel 1868; el so interno l’è a colonne e pilastri corinzi con de le importanti decorassion pitoriche de Giovanni Bevilacqua. De importansa ghe anca de le tele come “ Gesù e la Samaritana al pozzo” attribuia a Girolamo dai Libri e na’ “Visitazione” opera de Giovanni Caliari. Girolamo dai Libri l’era fiol del miniaturista veronese Francesco dai Libri, nato verso el 1474 secondo l’anagrafe del 1492 che lo rigistra quanto el ga disdoto ani. Da so papà l’a imparà l’arte de le miniature, el mestir dei Dai Libri, supusision che parea confermà da pagamenti del 1495 in avanti, efetuè da du miniatori dal monastero de Santa Maria in Organo de Verona. La formassion pitorica de Girolamo no le mia ben ciara, forse par qualche tempo l’a frequentà la botega de Domenico Morone, laorando con el fiol de questo: Francesco Morone. Girolamo e Francesco nonostante un po’ de diferensa de età jera amici, e fra de lori ghe sta de la colaborassion, difatti ghe dei documenti in Santa Maria in Organo. Nel 1529 Francesco Morone l’a nominà Girolamo so erede. Comunque le afinità tra Domenico Morone e Girolamo dai Libri no j’è mia massa strete; ne la pala che ghe a Monteforte d’Alpone, Girolamo dai Libri el ga la tendensa de rapresentar i personagi con dei vestiti preziosi, de lusso con dei bei efeti de luce. Le sta un aritsta che l’a prodoto tanto, le so opere j’è aparse anca ne l’ultima mostra dedicà al Palasso de la Gran Guardia “Mantegna e le Arti a Verona”.(Ave Mate)

Dimanda Dialetàl
Punti 3
5-Solo una no l'è la "trottola" in Valpolesela a) moscolo b) tartara c) palpignìn

Palpignìn (l'è un tipo de stofa, el nome el deriva dala çità francese ('na olta catalana) de Perpignan (en catalàn Perpinyà). Moscolo (trotola) el vien dal latin Musculus - diminutivo de Mus (rato) Tartara l'è na trotola. (Bala che vegna) ‘Na curiosità, del moscolo i ghe ne parlava i scritori greci e nel medioevo se organizzava in Francia de le gare citadine. A quei tempi el moscolo el se ciamava “sabot” perché el vegnea costruio utilizando el taco de veci zocoli. Se tratava de ‘na specie de trotola de legno conica con de le scanalature circolari e su la ponta un grosso ciodo chel servea parchè no se consumasse massa in pressia fregando par tera. Se tolea un toco de legno e a un cao se tacava un toco de spago: l’era la frusta dove se rodolava el moscolo par farlo patir con un straton. Prima che el moscolo el se fermasse, bisognava darghe ‘na paca con la frusta par darghe più velocità. Naturalmente el vincitor l’era quel che el le fasea girar par più tempo. (Ave Mate)

Dimanda Storica Verona
Punti 3
6-A quale césa nei ani ’50 gh’è stà tacà l’atual fassàda (facciata) che prima se podea amirar su la césa de San ‘Bastian bombardà ne la seconda guera mondial? a) S.Paolo b) S.Nicolò c) S.Nazar d) S.Giorgio in Braida

Le prime notissie su la césa le risale al sec. XII, però se presume che le origini de San Nicolò le sia più antiche, situà ne l’omonima piassa a le spale de l’arena inissia con l’arivo a Verona, nel 1591 dei padri Teatini, el cui ordine l’era sta fondà da S. Gaetano da Thiene. Subito sti padri i sa stabilio nel convento e ne la césa de S. Maria de la Ghiara, dopo i ga vu el permeso de trasferirse a S. Nicolò. El 21 marso 1627 j’è scomizià i laori par costruir la césa che j’è andè avanti fin el 1630 ano de la peste. Dopo un periodo de ferma i laori j’è proseguii un po’ più in pressia grassie ai lasciti testamentari ai Teatini a titolo de ricompensa par el servisio de socorso prestà durante el dilagar de l’epidemia. Fu costruia la sagrestia e scomizià la olta de la navata el tuto parea el fusse sta finio nel 1683. Però ben presto i fondi j’è finii, ‘no ghera più lasiti o oferte così ‘no sa mia poduo realizzar la cupola e decorar la faciada. Inveze le decorassion interne le sa poduo far grassie a l’intervento de alcune fameje aristocratiche veronesi. Nel 1806 i Teatini j’è ste costreti a abandonar Verona in seguito a le sopression de le comunità religiose volue da Napolen, così jà lassà incompiue le docorassion de la faciada, la costrission de la cupola e la tore campanaria. Però con el ritorno de la césa a le antiche funzion parochiali, sa riprensentà el problema de portar a fine i laori. Tanti progeti j’è ste presentè e tanti j’è restè solo su la carta da quelo di B. Giuliari del 1835 a quei de M.A. Pagan del 1836, quelo dell’Aleardi del 1870 e de E. Fagiuoli del 1939. Solo nel secondo dopo guera s’a risolto el problema de la faciada, trasponendo i resti de quela de S. Sebastiano a S. Nicolò susitando aspre polemiche. (Ave Mate)

Dimanda Storica Provincia Veronese
Punti 3
7-Qual tra 'sti comuni una 'olta el se ciamava "Porcile"? a) Pressana b) Pastrengo c) Belfior d) Opean

Dimanda Cultura Moderna
Punti 3
8-Qual tra 'sti personagi no l'è stà sindaco par du aministrassioni comunali a Verona? a) Zanotto G. 1956-1965 b) Gozzi 1965-1970 e 1975-1980 c) Fedeli 1946-51 d) Sboarina 1980-90 // mandati completi: 1946-51 (1) 1956-1965 (2) 1965-1970 / 1975-1980 (2) 1980-1990 (2)

Dimanda Bacanal
Punti 3
9-Qual tra 'sti paesi no'l g'a un "Conte" come màscara? a) Dossobon b) Colognola c) Gressana d) Nogara e) Montecio

Dossobon (El Conte de la Tor) da no sbaiarse con la màscara de Madona de Dossobon (El Castaldo de la Cioda); Colognola (Conte e Contessa de Bisis che i sfila dal 2003); Gressana (Conte Alegro); Nogara (Conte de le Nose); Montecio (Duca del Maron);


Dimande & Risposte 3° TURNO
in rosso le risposte esate - no jè presenti le dimande foto, cruci, cartoline e quadri d'arte.

Poesia
1-Completar la poesia a propio gusto dando un senso logico Poesie voto da 4 a 7 - Se pol no rispetar l'ordine chi de soto. L'importante l'è che deve risultar 4 righe de la Redassion + 4 righe Vostre.

I STRACA MASELE v7 "Ciao Amor"
Dopo aver lassado quel paese
passa tra monti e val verso el mar,
sensa motivo e sensa pretese
saluda tuti nel so lento andar.
L’Adese el va par loghi sconti
lassando a Verona el so cor,
bagnando rive e saludando ponti
el se gira disendo: ciao me amor.

LA PITA DE TACHETO V7 "Nostalgia"
DOPO AVER LASSADO QUEL PAESE
SENSA MOTIVO E SENSA PRETESE
L'ADESE EL VA PAR LOGHI SCONTI
BAGNANDO RIVE E SALUDANDO PONTI.
Verona la le varda serena
contandoghe, a olte, qualche pena
che lu el scolta e el se porta ia
lavando via tristessa e nostalgia.

BALA CHE VEGNA v6,5 "Migrassion"
L’Adese el va par loghi sconti
strucando de ocio i piassaroti
bagnando rive e saludando ponti
ricordemo Verona con quatro goti
Dopo aver lassado quel paese
semo rivà fin quà
sensa motivo e sensa pretese
portemo nel cor Verona con Piassa Brà.

Cartolina
Punti 5
2-La Statua de Paolo Veronese che ‘desso se cata nei giardini de la Giarina arente a Piassa Isolo, ne la foto dei primi del ‘900 l’era posissionà denànsi a Santa ‘Nastasia

La famosa statua del nostro Paolo Caliari, dìto “el Veronese” l’era posizionà dinanzi a “Santa Anastasia”. El bozeto l’è opera de un scultor veronese, Torquato De la Tore (1827-1855). De fameja aristocratica (la capela De la Tore in San Fermo la conserva un bellissimo mausoleo, i cui bassorilievi de bronzo jè stadi trasportà dai francesi al Louvre), l’à partecipà col fradel Guido ai moti risorgimentali combatendo ne le cinque giornade de Milan e de fianco a Mameli nela difesa dela Republica Romana. Dala Svizzera, dove el s’avea rifugià, l’è pasà a Firenze,dove l’à laorà intensamente. Tante de le so opere proprio a causa dei eventi in cui l’è stà coinvolto jè andà perse. Torquato l’à fato el monumento dedicà a sto nostro grande pitor, prima metendolo davanti a la césa de Santa Anastasia, dopo l’è sta trasferio ai giardini de la Giarina. La statua l’è stà fata però nel 1888 da Romeo Cristiani, in quanto De la Tore l’è morto prematuramente. A sto artista ghè dedicà na sala nel Museo dei Afreschi a la Tomba de Giulieta, 'ndoe se pol vedar anca el bozeto de la statua.

Foto
Punti 5
3-I Du de l’Ave Maria ‘ndoe i è andà? Nogara

Alora, i nostri cari amizi sta olta j’è andè a vedar la césa de San Gregorio de Campalan de Nogara consacrà el 3 de magio del 1533. El nome de la picola frazion (Campalan) el vien da Campus Alani,che in età romana l’era un centro importante visto che a poca distansa ghe pasava la via Claudia Augusta. Se trata de ‘na céseta che al so interno la ga sia ‘na pala con S. Pietro e Gregorio de autor ignoto del 1500 che dei afreschi de lo steso periodo. Però le robe più interesanti le se trova ne la faciada, murè: j’è quatro stele funerarie de la metà del 1° secolo d.C., tre de la Gens Truttedia, e una de Gaio Cecilio Ninfo. De forma triangolare divisa in tre, con la parte de sora incornizà ne l’edicola dove se trova i busti dei morti; quela centrale la ga l’epigrafe, inveze ne la parte de soto se vede de i motivi decorativi allegorici. Soto a sinistra ghe ‘na stele funeraria de L. TRUTTEDIVS - P. F. PVB. SIBI ET - SECVNDAE - BAEBIAE. C. F.- V.F
L’ingeenuus Lucius Truttedius, fiol de Publius quando l’era ancora in vita, la fato far par lu e par so mujer Baebia Seconda el monumento. In sto monumento ghe rafigurà oltre ai defunti do eroti alati (cioè do buteleti con le ale che i vegnea usà el più de le olte in ambito funerario), una gorgone (medusa), un feston e un leoro chel magna l’ua in piè.
Con la mujer apar un liberto de lo stesso Publius al quale ghe sta ereta la stele dopo la so morte; ghe anca un erote con le ale, un omo e ‘na testa de dona.
Soto a destra ghe la stele de:
P. TRVUTTEDIO. P. L.
PHILOMVSO PATRI
MAGIAE M.F. MAXIMAE
MATRI
Questa la rapresenta la copia de defunti con el dio Attis con la facia malinconica, insieme ghe anca la gorgone e più soto el can e el leoro.
Inveze in alto a destra ghe la stele de:
P. TRVTTEDIO
P. F. TERTIO FRATRI
P V B
Da le do parte del defunto, fradel piassè zoeno de Lucius, ghe do eroti in piè con un recio de ua, soto la gorgonie, un feston, un conejo, un leoro chel sta magnado l’ua. Ave Mate.

Arte
Punti 5
4-La bela tela de Felice Brusasorzi l’è conservà Nela Césa de San Piero a Caldier

La tela l’è conservà ne la césa de San Piero a Caldier. Tanto par rinfrescarse la memoria, ve ricordemo che: el nostro caro Felice Brusasorzi, tal Felice Rizzo dito el Brusasorzi, el s’à formà in ambiente veronesian a la scola de su bupa’ Domenico, che el gha dato la prima educassion artistica. Par do olte a Firenze, nel 1567 e 1597, dai primi ani del 1600 l’è vissuo stabilmente a Verona, dove l’è morto nel 1605 e sepolto ne la césa de San Bartolomeo. Tanto importante par lù l’è stà proprio el star a Firenze, dove el fu in contato con la cultura del Pontormo e del Bronzino. Ne le cése de Verona e provincia se trova un saco de so opere.

Dimanda Dialetàl
Punti 3
5-Ne la poesia de Barbarani “Val d’Adese” el Campanil de Rìole (Rivoli Veronese) cosa el fa: a) casca zò b) se impissa c) el saluda la val d) varda l’Adese passar

Col sol del tramonto che ghe riva dal dedrio, cioè dal lago, el campanil de Riole (paese su la destra de l’Adese) “se impissa”, el se specia el “rosso de sera” già specià dal lago, e come lu anca altri campanili e i forti, come se le varie guere pasà de lì no le fusse mai finie.La poesia “Val d’Adese” la fa parte de un grupo de diese soneti indoe Berto scominzia la descrission partendo dal vecio confin col Trentin (che alora l’era anca confin de stato tra l’Italia e l’Austria); el poeta l’a percoso la strada che vien zo girando de qua e de là come l’Adese. Tragito contornà da paesini e contrade fin a rivar in fondo a la val dove l’è condiviso tra el corso del fiume, la ferovia e la strada maestra che da Ossenigo e Dolcè i core quasi de fianco. L’Adese qua in mezo el passa tra do rive de boscheti da indoe parte do cadene de monti: a zanca el Corno d’Aquilio e el Monte Pastello, da chel’altra la “grande opera architetonica” del Baldo indoe tacà a la piera se cata el Santuario de la Madona de la Corona.

Punti 3
6-Quale tra ‘ste parole l’è un mureto a seco usà par terassar el teren? a) scùrtolo b) marògna c) séngia d) végro

Scùrtolo l’è ‘na porzion de teren mal fata, sèngia ‘na roccia ( però ne la bassa sengia vol dir anca cintura) , el végro un teren incolto, marògna l’è un muro a seco. El muro a seco l’e sta el primo esempio de manufato costruio da l’omo presente in tute le culture de la tera, usà sia par costruir un riparo o par delimitar un confin. El se trova ne le costrussion religiose, come par esempio nei altari costruii dai patriarchi ebrei che se parla ne la Bibia, nei nuraghes de la Sardegna. Anca i muri de le cità più vecie e antiche j’è costruii con grossi blochi incastrè a seco, con el steso sistema j’è ste fate le piramidi a scalini de l’America Latina. I antichi greci, e dopo anca i romani i costruea con sto sistema dato che l’era più facile da far e più economico, proprio par ste carateristiche anca ai gioni de ancò se pol trovar sia in Grecia che nei paesi balciti sto tipo de manufato.

Punti 3
Dimanda Storia Verona
7-In quale secolo nei testi Sacri se parla de (in alcuni libri Notkero) Notkerio Vescovo a Verona? a) IX° b) X° c) XI° d) XII°

El Vescovo Notkero o Notkerio l’a reto la diocesi de Verona dal 911 al 928 (X secolo); l’éra probabilmente franco de origine e nativo de la Valpantena. La prima notissia de lù l’e del 911 e dopo l’è stà ricordà in un privilegio de la césa de Santo Stefano del 1 zugno del 915. Sto vescovo l’ha fato un testamento nel 928 dove el ricorda anca el so padre Ademario. El ghà vù boni raporti con Berengario I e col conte de Verona Ingelfredo che nel 914 testò par el monastero de San Zaccaria de Venezia nominando Notkero usufrutario fin a la morte. La tradission la le presenta come un bon vescovo; là fondà un ospedal e anca l’è stà benefico. Ne la Catedral de Verona, la so iscrission sepolcrale la dise:” In sta tomba riposa la spoglia mortale del vescovo Notkerio che fu magnanimo e pio. Invero, quanto l’à podù averghe de suo lù generosamente el le volse a beneficio del so’ gregge con spirito liberale e puro…Sacrificandose par tuti, ripien de la luce de la carità, privo de tuto, el raggiunse gli infinidi spazi del ciel. O Vergine, Madre de Dio par le cui preci lù el stimò poderse salvar, acogli i so voti.” L’è morto el 10 de agosto del 928 veramente poareto. Come che sia comunque, sto vescovo l’è ricordà anca nel famosissimo Salon Sinodale nel Palazo del Vescovo dipinto dal Brusasorzi. Lì el figura come el numero 43 de la lista, ma bisogna star atenti, parchè la cronotassi dei vescovi de Verona l’è veramente un bel casin…a ora, varie jè le liste dei vescovi; ne l’Anuario de la diocesi de Verona del 15 zugno del 1947, Notkerio l’è el numero 52 dei vescovi veronesi, mentre in quel del 15 febrar del 1991 el compare col numaro 44 e col nome Notkero.

Punti 3
Dimanda Storia Provincia Veronese
8-In che ano i abitanti de Isola Porcarizza i à volù cambiar el nome del paese in Isola Rizza? a) 1870 b) 1872 c) 1874 d) 1876

In antichità el nome de Isola Riza l’era: “ Insula Porcharitae” e solo nel 1872 con anession al Regno d’ Italia le sta trasformà da Porca Rizza al nome attual. Paese abità za da l’antichità, difati è sta trovà dei resti de palafite dell’eta del bronzo e del fero, e popolassion come i Paleoveneti, i Celti, i Romani e Longobardi j’è ste abitanti par tanto tempo.

Punti 3
9-Nel 1396 con Scutum Rolandi se intendea una contrà arente a: a) Lugagnan b) Somacampagna c) Castel d’Assan d) San Felice Extra

Scutum Rolandi ( in latin el scudo de Rolando) se intendea la contrà a nord de Castel D’Assan longo la via par rivar a Borgo Roma; ancora adesso quela via se ciama Scuderlando che no le altro che la trasformassion de l’antico nome.

Punti 3
Dimanda Cultura Moderna
10-Cosa se intedea fin al 1960 a Verona con la denominassion “Il Diana”? a) Un cinema tacà a San Giorgio in Braida b) Quartier general del Genio Pontieri c) La Fabbrica de Tabachi in ZAI d) ‘Na zona tacà al cimitero che l’a ciapà el nome da le statue funerarie con rafigurà Diana e) El porton in fero del monte dei pegni f) Nome del ghetto ebraico tacà a piassa Erbe

Punti 3
Dimanda Bacanal
10-In qual Vènardi Gnocolar i nobili Alessandro Turco e Alvise Nogarola i è stà colpì da un archibugio? a) 1550 b) 1600 c) 1650 d) 1700