Dimande & Risposte 1° TURNO
in rosso le risposte esate - no jè presenti le dimande foto, cruci, cartoline e quadri d'arte.

01 - Poesia (valida anca par concorso Barbarani) - Punti da 3 a 7. Completàr la poesia con fantasia dando 'na forma de senso compiù. Par ci vol missiàr l'ordine ghe vegnarà cavà 1/2 punto su la valutasion.

El bastardin
La vien su da Sotoriva,
co ‘na bici sensa freni
co le man ne la traversa:
e un cagneto nel çestin
co la sbessola roversa,
nei pensieri tuta persa
e na voia sul copin,
intanto baia el bastardin.
(I meo de la coà - voto 7)

La voia
La vien su da Sotoriva
Con el sesto pien de roba
Co le man ne la traversa
E la sèrla su la goba
Co la sbessola roversa
Sensa denti par de soto
E na voia sul copìn
Dal color del bon recioto…
(Fritaja co' la seola - voto 7)

La vecia
La vien su da sotoriva
Co’ na bava de saliva
Co le man ne la traversa
La se tien caldo ala pansa
Co la sbèssola roversa
La remessia el fià che vansa
E ‘na voia sul copin
Che ha segnado el so destin
(El Gato - voto 7)


02 - Proerbio in anagrama. Meti in ordine e completa l'anagrama con le letare chi soto e te risultarà un tipico proerbio veronese - P.3
AAAA, EEE, T, MM, OO, PPP, I, U, R, N, L, S
PROERBIO: 5, E, 4, 5, ANCA, LE, 7
(Tempo e paia maura anca le nespole)


03 - Cultura Moderna P.3
Ci de 'sti atleti no l'à vinto 'na medaja a le olimpiadi:
a) Aleardo Menegazzi
b) Eros Poli
c) Luciano Dalla Bona
d) Severino Andreoli
e) Damiano Cunego


04 - Cultura Moderna P.3
Nel famoso H.Verona-Napoli del 16-09-1984 ci no l'à segnà?
a) Briegel
b) Galderisi
c) Di Gennaro
d) Marangon


05 - Dimanda Provincia P.3
Dove se cata el Museo del fer batù?
a) Fumane
b) Cogòl
c) Bolca
d) Cavrìn


06 -Dimanda Provincia P.3
Da quale strada consolàr l'era traversà ai tempi dei romani el Comune de Terazo-Terasso?
a) Postumia
b) Claudia Augusta
c) Emilia Altinate
d) Appia




Dimande & Risposte 2° TURNO
in rosso le risposte esate - no jè presenti le dimande foto, cruci, cartoline e quadri d'arte.

01 - Poesia (valida anca par concorso Barbarani) - Punti da 3 a 7. Completàr la poesia con fantasia dando 'na forma de senso compiù. Par ci vol missiàr l'ordine ghe vegnarà cavà 1/2 punto su la valutasion.

Voto 7

Brava, adesso, che son chieto,
e g'ò tempo par imbriagarme
m'è anda' via tuta la voia,
quindi el vin non sta udarme
tanto più che g'o el difeto.
se scominsio a sbeaciar,
de tremar come na foia
e tacar a piansotàr....Rh Bardolino +

Brava,adesso,che son chieto,
fame na caressa e dame un baso
me anda' via tuta la voia,
de parlar, te vardo e...taso.
tanto piu' che g'o' el difeto
quando i oci del to cor i me varda
de tremar come na foia
anca se 'l fogo del to amor me scalda!... Scorese Vestie

Brava,adesso,che son chieto,
tè strènso forte quà nel leto,
m'è andà via tuta la voia,
adeso mochela,metela in moìa
tanto più che g'ò el difeto
de non darte mai un baseto
de tremar come una foia
come se gavesse nà fifa boia!.......... Fc Cimbri


02 - Storia e Léngua Veronese - A Berto Barbarani l'è restà impresso un episodio particolàr veramente tristo che l'à vissù in prima persona, tanto da metarlo par scrito in poesia. In qual paese Berto el se catava quando l'à ciapà ispirasion par la poesia "I va in Merica?" P5
a) Bolca el paese dei "fossili"
b) San Vitòr del progno "Tramigna"
c) Prada ai pié del "Monte Baldo"
d) Ossenigo ne la val d'Adese

Berto quando el ga vù l’ispirassion par la so poesia el se catava a S. Vitòr ne la val del progno Tramigna. La val de Tramigna poeticamente la vien dita “val dei çiresi”, la ciapa el nome da “ Vallis Terminea” - Valle terminale. El nome de Tramigna l’è sta attribuio al progno che da Cassan el va zo a Soave par congiungiarse a l’Alpone vizin al ponte de Villanova e de S. Bonifacio. Col steso nome, ne la forma diminutiva di Tremagnola l’è indicà anca el torente che scomizia con la val, ai piè del monte Ferara, par arrivar al progno in una località presso Colognola ai colli. Del periodo neolitico ghe poche tracce, inveze nel’età del bronzo l’e sta acertà la presenza de l’omo con i Castellieri della Rocchetta di Soave e del monte Gardon. Ne l’epoca romana ghe sta i romani in tuta la val , proprio alora Soave, vista la so vicinansa con la via Postumia l’a acquistà una certa importansa. Soave l’e una testimoniansa del mondo medioval con i so muri merlè, le so 24 torri situa su ‘na collina. La val de Tramigna l’è forse una de le poche restè ancora verdi incontaminè. Le acque le riva in parte dal Monte Bellocca e in parte dal Monte Faiardan, tuti du arente a la contrada Rancani. El Bellocca l’è geologicamente interessante par la carateristica de verghe grossi afioramenti de material vulcanico.



03 - Storia Veronese P.3
Completa l'epigrafe presente su 'n monumento a Verona:

A Cavour Auspice
la Fratellanza Militare

a) Aleardi b) Garibaldi c) Cavour d) Vittorio Emanuele II
El monumento se trova in Piassa XXV Avril a Verona e l’e de bronzo; l’dea del monumento a Cavour nasse par volontà de la Società Fradellansa Militar nel 1890 . El relativo concorso el vien venzo da Carlo Spiazzi (1854 – 1936) chel vien preferio a Egidio Girelli e Tullio Montini con un bozeto chel ritrae la figura intiera ritegnua adata par poderlo celebrar con le dovue proporssion, con tuti i onori ma sensa retorica.Sto munumento l’e sta inaugurà solo nel 1908 ne la piasseta de Castelvecio, e nel 1932 l’e sta trasportà dove l’e adeso par far posto a l’arco dei Gavi. El monumento a Aleardo Aleardi l’è in marmo el se trova in Piassa Ss. Apostoli a Verona, le firmà sul basamento a sinistra” UGO ZANNONI 1883” . Ne l’agosto del 1878 la Società de bele arti de Verona l’a afidà la realissasion del monumento a Ugo Zannoni (1836 – 1919) ilustre e generoso scultore tanto da far l’opera par gnente. Subito dopo l’inaugurassion del 1883 el giornal “L’illustrazione Italiana” ga dedidà la copertina a figura intiera: Aleardo Aleardi l’ impugna un guanto ne la man sinistra e uno dei so libri ne la destra, inveze el basamento ne decanta le so imprese.In mezo al giardin de piassa Bra viçin a l’arena ghe ‘na statua equestre dedicà a Vittorio Emanuele II de Savoia (1820 -1878) primo re d’Italia soranominà “gentilomo”. El monumento l’e sta ereto par le rason scrite su la base: nel 5° aniversario de la so morte l’intiero mondo civilizà versa lagrime par lu- 9 genar 1883. Grasie al sovran che con grandi virtù l’a trasformà l’Italia da debole e divisa a stato libaro e indipendente.Nei giardini de piassa Viviani se trova el monumento a Giuseppe Garibaldi. Davanti, a la destra de ci lo varda, ghe ‘na stele con su i nomi dei veronesi che j’a partecipà a la storica spedission. Come in quasi tute le statue in Italia, Garibaldi el varda verso Roma, cità che no’l g’a mai vu la sodisfassion de conquistar. Solo in quela de l’isola de Caprera (indoe l’è morto) el varda le Boche de Bonifacio in diression de Nizza, indoe l’e nato.Tanto par ‘no farse mancar gnente, a Verona ghe anca el ponte dedicà a Giuseppe Garibaldi, l’e quel che da via Rosa porta allAdese…….Sto ponte l’e sta costruio da l’impresa vensiana Newille, verto el 16 agosto 1864, a Garibaldi le sta intitolà nel 1867 quando l’era finio el dominio austriaco. El ponte l’era longo m. 75 e largo m. 8,90; el posto scielto par la costrussion l’era l’ottimal par agevolar la cominicassion de Piassa Erbe e del centro de la cità con Campagnola. ‘Na olta distruto par passar da ‘na parte a l’atra se passà a usar un tragheto. Però anca questa l’era ‘na situassion poco stabile, ghera bisogno de un ponte vero, così el comune l’a afidà lo so costrussion a un’impresa inglese, dandoghe el pedagio de 2 centesimi; così in 49 ani l’e vegnua recuperà la spesa. Avendo agevolà la comunicassion fra la cità e la Campagnola ghe fu uno stimolo par costruir vile e palassi, par riconosensa al ponte Garibaldi a quasi tute le vie ghe sta dato el nome e posti o eroe de l’epoca Garibaldina. Visto tuto sto lusso, se volea far anca un ponte più decosoro, così el comune ciamando l’impresa dell’ingenier Forte el la fato costriur in cemento armà su pile de piera e par rendarlo ancora più lussuoso e decoroso i ga messo quatro statue in piera tenara o tufo, tute opera del scultor veronese Ruperto Banterle. Le statue in tufo j’è ste distrute parchè considerè poco de valor, quele de piera parchè ‘no j’e ste mia curè., così ancora ‘na olta sa messo a man a la ricostrussion de sto ponte da parte de la società Chiesa de Milan che la costruì el ponte Novo.



04 - Dimanda Dialetàl P.3
El famoso "bruco di geometride" come l'è conossù nel veronese?
a) marùgola
b) mussolin
c) mesuraspàne
d) molinèl

Par prima cosa analizemo i termini che ghemo a disposission e çerchemo de rivar a ‘na conclusion. Mussolin ‘no l’e altro che il moscerino. Molinél vien riferio al mulinello o arcolaio Marùgola l’e un vezegiativo a olte dispregiativo nei confronti de le done.Mesuraspàne el podaria essar un bruco dato chel se moe come quando ‘na roba la vien misurà a spane. Qua a Regio Emilia un termine adeguà par sta situassion l’è:“dopara el spanometro” Se trata de un bruco mimetico (fameja geometridae) chel vol imitar qualcosa o qualche d’un essendo preda par tanti tipi de osei, de insetti e picoli mamiferi. Certi de lori i se mimetiza ciapando el color de le robe su le quali i se posta (omocromia), dei altri i ga il corpo talmente colorà che nol pol confondarse con l’ambiente alora i produse de le sostanse velenose da lasar l’amaro in boca ai predatori. Altri ancora i se dà un aspeto simile a le specie velenose pur esendo lori comestibili.


05 - Dimanda Provincia P.3
De qual Comun l'è 'sto Municipio?
a) Cavrìn
b) Cavaion
c) Negrar
d) Ilasi

La cartolina la mostra el municipio de Cavrin, Palasso Carlotti. La sede del municipio l’e sta trasferia qua nel 1952 dopo che era sta fato laori de restauro. Sto palasso un tempo l’era circondà da un bel parco, considerà nel ‘600 uno dei più bei del Veneto. La casa l’era in origine de proprietà dei Vimercati; i Carlotti j’è entrè in posesso del palasso nel 1601 e proprio a l’inissio del secolo i risale i curiosi e vivaci afreschi della Sala dei Sogni e i festoni de le stanse al piano de sora, aatribuide a la scola del Ligozzi. Nel salon del piano nobili i grandi afreschi paesagistici i risale al settecento e più probabilmente ai discepoli del Bibiena. La forma del giorno de ancò del palasso la porta la data 1725, ano a cui risale la scrita fata mettar ne l’edificio atuale de l’anagrafe da Alessandro Carlotti. El palasso l’e sta vendù al comune nel 1937. In tante camare al primo piano, la parte centrale del sofito lìè sta afrescà con figure alegoriche da le forme piotosto pesanti, seicentesche. Su i muri del salon, pituradi in cornise de stuco sagomade par che ghe sia dei quadri; nei du più grandi ghe rafigurà de le scene de cacia: in uno se vede dei gentiluomini a caval con tanti cani che i copa un cinghial, in che l’atro dei cavalieri vestii a l’oriental e de le strane bestie come una ligadora enorme volante che par la sia ‘na cacia oriental. In chei altri riquadri i temi i va da paesagi fantastici de lagheti e boschi a motivi architetonici con colonadi sul verde e rosa, scaloni scenografici, fontane e statue. Angioleti in soaze ovali i fa da soraparete. Molto original l’è proprio la “Sala dei sogni” con decorassion che le par rifarse in chel stil ciamado “grottesco” del XVI secolo. El sofito a volta l’è ricoprio da ‘na fantasiosa decorassion a picole divertenti figure su fondo biano che le rapresenta: galeoni, personagi vestii a la oriental, oselini, scimiete, carosse; la tradission la j’è ciama “I sogni del marchese Carloti”. In mezo la figura de la Fama tra le nuvole la segue lo stesso gusto de le alegorie del piano de sora.


06 -Dimanda Provincia Cartolina P.5
'Ndoe l'è stà scatà la foto nei primi del '900?
a) Peschiera
b) Legnago
c) Pescantina
d) Parona


07 -Dimanda Arte P.5
Sto bel afresco, tra i più conossudi a Verona in quale cesa se cata?
Un aiuto: Anagrama par la solusion del pitor: 3, 4 EOODRLM
a) Santo Stefano
b) Domo
c) Santa 'Nastasia
d) San Bernardin

L’afresco in question, monocromo el se cata ne la cesa de Santo Stefano (difronte a questo se cata l’altro afresco con la sepoltura de S. Stefano) e l’è de Batista del Moro. Batista d’Andelo dito del Moro, nato a Verona nel 1514 da Altobelo pitor e da Costanza.El soranome el là ciapado da Francesco Torbido dito del Moro da cui le sta discepolo (come el disea el Vasari) e anca genero avendo sposà so fiola. Torbido a so olta le sta discepolo del venesian Giorgione e di Liberale da Verona. Pittor a oio e afrescator fu paragonà a Jacopo da Ponte dito il Bassano,oltre che da Tiziano l’a ricevù diversi stimoli anca da incisori come: Agostino Venessian, Giulio Campagnola, Giulio Romano, Rafaelo, Parmigianino e Paolo Veronese. L’e dificile stabilir ‘na cronologia par le so opere anca parchè tanti afreschi su casi j’è andè persi. Se sa che nel 1552 l’e sta ciamado con Paolo Farinati, Paolo Veronese e Domenico Brusasorsi a Montoa a decorar el duomo. A Verona l’e sta molto ativo, dopo a Venessia e a Murano indoe la fato de le opere egregie con i masimi pitori del tempo. Ritornà a Verona el sa cimentà anca ne l’arte de le miniature dei libri e corali sacri, ma soratuto l’a afrescà le faciade dei palassi che i se afaciava su l’Adese e le vie de cità. Nel disegno le sempre sta personalissimo, el so stile el se carateriza ne l’usar acquarei colorà in azuro, verde, rossi su geseti o pena. De la so vita se sa poco, da la mujer Margherita el ga avudo tri fioi: Ciro, Marco e Paolo e uno deventà scultor Giulio. El more tra el 1573 e el 1575.


08 -Dimanda Carneval P.5
Come se ciama 'sta bela màscara de carneval?
a) Principe Reboano
b) Conte de la Via Bassa
c) Conte del Liston
d) Comendator Lasagna

El Conte del Liston l'è comparso par la prima volta nel Vendri Gnocolar 2008. El conte de la via Bassa l’è nato diese ani fa ne la parochia de la Fratenità apunto in via Bassa. El principe de Reboano l’e ‘na mascara del quartier Filippini del 1952. El conte del Liston proprio no lo conosemo al masimo conosemo el Conte de la Brà de Butapiera. El Commendator Lasagna l’è un personagio del carneval de Perzacco de Zevio,   carneval considerà el più antico de la provincia de Verona. In antichi manoscritti i dimostra che le prime rapresentasion carnevalesche le risale a un par de secoli fa e le ricorea el giorno prima de l’insio de la quaresima. Ste ricorenze no jera viste ben da la cesa de alora, difati le sucesso che de le persone vestie da prelati de l’epoca lì j’è ste arestè e procesè e el carneval sospeso par un certo tempo. Anca qua ghera la so tradission, se scumiziava qualche setimana prima preparando el pajaso da brusar a la fine de le feste. Dopo se fasea la gara de le lasagne indoe i concorenti i dovea magnarle nei piati con le man lighè dedrio la schena, quel che vinzea el raprensetava la mascara uficial par tuto l’ano: Commendator Lasagna.





Dimande & Risposte 3° TURNO
in rosso le risposte esate - no jè presenti le dimande foto, cruci, cartoline e quadri d'arte.

Poesia
01 - Poesia (valida anca par concorso Barbarani) - Punti da 3 a 7. Completàr la poesia con fantasia dando 'na forma de senso compiù. Par ci vol missiàr l'ordine ghe vegnarà cavà 1/2 punto su la valutasion.

La me morosa l'è da Castelroto
ma so pare no el vol che se vedemo
l'è spesso a la finestra e mi son soto;
 ghe digo “dai, vien zo che se godemo”
mi ghe son soto e se ghe buto un baso,
La ride e la me varda con amor
Ela me scaraventa un fior del vaso
Lo ciapo al volo e me lo strenso al cor..
(Fritaja co' la Seola v.7) Premio Berto Barbarani

La me morosa l'è da Castelroto
ghe passo ogni giorno par 'nar al laoro
l'è spesso a la finestra e mi son soto;
e sghimo i so bei cavei d'oro
mi ghe son soto e se ghe buto un baso,
ela la me soride e la me struca l'ocio
e la me scaraventa un fior del vaso
che cato su da tera e tegno sul zenocio
(Verona United v.7)




02 - Storia e Léngua Veronese - La poesia de Barbarani "Val d'Adese" l'è stà publicà par la prima volta su: P5
a) Il Secolo XX
b) L'Adige
c) Corriere della sera
d) L'Arena
e) Mattino di Padova

El grupo de diese soneti ciamà: “Val d’Adese”, i fa la descrission de ‘na gita autunal fata da Berto in carossa ne la bassa Val Lagarina partendo dal vecio confin col Trentin, che alora l’era anca el confin se stato tra l’Italia a l’Austria e pasava a nors del paesin de Ossenigo, el poeta l’a fato la strada che la vien zo a zig zag come l’Adese e la ferovia fin a arivar a la Chiusa, a l’epoca piena de fortificassion. Fasendo apunto sta strada l’a poduo amirar paesini, contrade , ciese,fortificassion e vegetassion descrite dopo ne la poesia apunto Val d’adese , come par esempio “La Chiusa d’Adige” un pasajo streto da indoe j’è passè i primi barbari arivè in Italia. El santuario de la Madona de la Corona costruio a pico nel paese de Brentino ( ne la posia el le descrive così: ‘na madoneta fa le grassie sconte). El paesin de Gaion con la so antichissima ceseta dove se dise che Federico Borromeo l’abia celebrà la messa. A la fine de sto discorso disemo che la poesia “Val d’Adese” le sta publicà par la prima olta nel numaro de majo 1902 de la rivista mensil “Il Secolo XX” de Milan, direta da Achille Tedeschi con diese fotografie e disegni de A. Ferraguti. Dopo l’a sa visto nel “Nuovo Canzoniere Veronese” (edission del 1911 e anca de le altre dopo) con de le note del poeta.



03 - Léngua Veronese P.5
Quale tra questi no te pol metarte ai pié?
a) gabàn
b) sopèi
c) nòni

De sicuro nojatri se metemo ai piè i sopèi che no j’è altro che dei socoli con la sola in legno, difarente parò (almanco ne la parlà de tante zone) da la pianela o savata che le ga la sola de corame o goma o peza. Anca i noni i se mete ai piè de solito j’era de peza o pano. ‘Na legenda la dise che sto tipo de calsatura l’era usà da le persone più vece i noni apunto e proprio da lori i abia ciapà el nome; però j’è usava anca i butini d’inverno par salverse da le buganze. El gabàn inveze el se mete intorno, questo l’è difarente dal paletò ( derivassion francese) parchè l’è più grosolan, maltajà e fato con stofa da poco. Se usa dir gabàna par dir ‘na roba piassè bruta e fata mal. Difati ghe dei modi de dir che i fa: curto de gabàna : poco inteligente, voltagabàna : ci cambia opinion secondo la conveniensa. Qua a Regio Emilia se dise: pan, gaban, e baston per i can (riferio a quando se viaja).



04 - Léngua Veronese P.5
Ci un tempo el fasea "il stagnino"?
a) el pearìn
b) el parolòto
c) el sogàr
d) el stramasàr

Scomiziemo col dir che el pearìn ‘no l’è altro che un biscotin chel ga tra i so ingredienti la melassa e el pearo; l’è un termine usà anca par indicar ‘na persona sbetaga (bisbetica) o mejo intratabile, acida, che ‘no la se contenta mai e dificile. El sogàr l’è quel che fa le soghe; un tempo le sogarie le fornea a la navigassion adesante, soghe, sogheti e gomene. Scomparia la navigassion quanto e vegnuo avanti el trasporto su strada, el laoro del sogàr le restà con la funzion de essar el sostegno del laoro e del bisogno de la fameja. A casa ghera bisogno de la sogà par destenda le robe, in stala par le bestie ghera bisogno de soghe grose e picole, i sogheti par i vedei . Par i cari ghe volea cai e sacai, queste jera robuste e fate con çinquanta e più spaghi ; par el caval la bria (briglia). Anca par le mietitrici servia de le matasse de spagno, insoma el bisogno de soghe l’era notevole. Oltre a tuti sti bisogni, NA SOGA ADRIO, la ghera sempre sul careto, anca parchè no se sa mai che ghe fusse un bisogno de ritar na soga. El stramasàr l’era quel che l’andava par le case a far i stramasi (materassi) che i podea essar de pena, de paja o scartosi e solo quei più siori i podea permertarse quel che lana. El mestier del parolòto l’era esercità da immigre che vegnea dal Trentin, così quando uno el vegnea al nord l’era facile sentirlo ciamar: PARULOTO. A olte el laoro del stagnin el vegnea fato dal ferar come par esempio metarghe ‘na peza al fondo del padelin, rifarghe el culo al parol, mettarghe un rebatin, questi tuti laori che i vegnea ciamà a seco parchè ‘no vegnea usà lo stagno.




05 - Dimanda Storia Provincia P.5
Nel 1903 un piroscafo el s'à arenà par la nebia a Peschiera come se ciamaelo?
a) Angelo Emo
b) Ercole
c) Conte Biancamano
d) Italia
e) Elvezia
f) Mocenigo

La navigasion sul Garda la scomizia quando par sodisfar le esigense de trasporti in quanto era cresù lo svilupo industrial, un grupo de banchieri de Milan nel 1824 i costituise la “Società milanese per la navigazione a vapore del Regno Lombardo Veneto”. Sto società la riesse averghe da l’imperator de l’Austria l’esclusività del servisio de navigassion par quindese ani. Nel 1827 vien varà a Desenzan un piroscafo in legno chel se moea grassie a do machine a vapor el so nome l’era “Arciduca Ranieri” omaggio a l’arciduca Ferdinando Ranieri d’Asburgo apena nato a Milan. Visto che le robe l’è andaa ben, nel 1842 nasse a Riva la Società Benacense par l’esercizio de la navigassion sul lago di Garda che mete in movimento un piroscafo batezà:” Benaco”; dopo varie gestion del lago e la guera ghe sta bisogno de rinovar i natanti così nel 1888 vien varè tri piroscafi che i podea portar cinquecento pasegeri. Nel 1893 el milanse Mangigli chel ciapa in man la situassion comissiona al cantier Odero de Sestri du piroscafi: “l’Angelo Emo” e el “Lazzaro Mocenigo”. Proprio el Lazzaro Mocenigo el sa arenà a Peschiera par la nebia che la rapresentava l’oscacolo più minacioso; difati ne le cronache se trova tanti riscontri de arenamenti esendo i ostacoli meteorologici ‘na vera e propria costante. Lazzaro Mocenigo (Venessia 1624 – streto dei Dardanelli 17 lujo 1657) l’era un amiraglio de la Republica de Venessia. Lo scopio de la guera contro i turchi, nel 1645, la ga permeso de far cariera e nel 1654 in ocasion de la spedission venessiana dei Dardanei, el comandava ‘na galeassa. Però morto l’amiraglio e el so vice el sa trovà a comandar tuta la flota (pur uficialmente soto el comando del proveditor Francesco Morosini, impegnà ne la difesa de la fortessa de Candia a Creta) e el 21 de giugno 1655 ne la seconda spedission dei Dardanei l’a conbatù contro i turchi vinzendo ma rimetendoghe un ocio. Dopo varie peripesie sempre più deciso de bombardar Istambul par arrivar a la pace con sti turchi, el mete insieme ‘naltra flota a la olta dei Dardanei nel 1657. Proprio sul più belo che l’era arivà a destinassion, un colpo de canon de na bateria costiera turca la fato cascar de le vele che cascando le j’a copà. La nava le sta colpia anca a la polveriera e a quel punto l’e scopià, a sto punto Venessia no la più volù andar avanti. El Mocenigo le sta l’unico, a partecipar a tute e tre le spedission dei Dardanei con tri gradi difarenti. I Mocenigo j’è ste una de le fameje patrisia venessiana più ilustre, fra questi ricordemo i Dogi Pietro Mocenigo el settentesimo e Giovanni Mocenigo el settantaduesimo. Tanto par saverghene de più: Quando el piroscafo Ercole sa inabisà nel Tiren fra el 4 e el 5 marso 1861 a bordo ghera Ippolito Nievo che da Palermo l’era in vià andar de olta a Napoli; così a trentani l’e morto par l’afondamento del piroscafo (Nievo 1831- 1861). El piroscafo “Conte Biancamano” le sta varà el 23 april 1925 e el fasea dei viaj de lusso su le rote del nord America; la so ultima crociera le sta el 26 marso 1961 che da Genova pasando par Napoli, arcelona, Lisbona, Halifax l’e rivà a New York, al so ritorno le sta demolio a la Spezia. El piroscafo “Italia” vien costruio nel 1909 de stile Belle-èpoche, la so fine l’e dovua a un ataco aereo che la fato svilupar un incendio a bordo, vegnendo tuto invaso da l’acqua dopo poche ore le afondà a un chilometro sud-ovest de la ponta de Sirmione. El piroscafo “Elvezia” vien costruio da ‘na dita de Zurigo nel 1873, rimodernà nei ani 1897 e 1924 indoe vien fato ardiritura un salotin par fumadori, però nonostante sti laori lo scafo l’era sempre quel de la nasita e le caldaie del 1867,così non esendo più adato par la navigassionnel 1937 el vien demolio nel cantier de Tavernola.



06 -Dimanda Provincia Cartolina P.10
Saluti da......
a) Vigasi
b) Butapiera
c) Raldon
d) Zevio
e) Castel d'Assàn

Tanti saluti da Butapiera a tute le squadre.
El nome le de origine incerta, se pensa che forsi el sia colegà al tipo del teren giaroso o par le tante piere dovue a lo stato aluvional, opur ai primi abitanti de sto posto. De sicuro l’e sta abità 2000 ani prima che la nasita de Cristo, visti i resti preistorici che ghe, in particolar piere de la via Claudia Augusta ( scomizià soto l’iperator Druso nel 15 a.C.) ne le contrade Settimo di Gallese e Zara. In particolar modo, ricordemo chel nome de Setimo de Galese el se colega proprio al setimo mijo de la strada Claudia Augusta da Verona, septimo ab urbe lapide, che la lambea l’attual teritorio . In epoca medioval soto l’influensa dei Scaligeri la popolassion l’a costituio un centro comunal. El punto central de sto teritorio l’era un sistema fondiario ciamà “Campagna”, riconosiuo da le istitussion citadine, inveze nei dintorni ghera un gran teritorio con poche coltivasion e qualche pascolo.Ghe attestà nel XIV secolo la presensa de un Vicariato di Ca’ di Campagna ( union de comuni comprese fra S. Gioani Lupatoto, Vigasio e Samacampagna), desfà uficialmente in un ato del 1876 archivià nel municipio del paese. Nei secolo XV e XVI ghe fu un gran laoro de disodamento del teren par poterli coltivar, in particolar la atività principal l’era quela de le risaie. Nel 1700 le sta riconosuo come comune con solo tresento anime. La cesa parochial forse costruia ne la prima metà del çinquecento, come el documenta el più antico ato pievano del paese. Se trata de un edificio sacro piassè grando par la cresita de le anime, el gavei ‘na sola navata arrichia dopo con de le capele da le parti. De interese le pale de Giovanni Chiarelli de la prima metà de l’800 che le ritrae i aspeti de vita dei santi venerè nel Veneto. Quela che se vede ne la cartolina le quela de la forma del nocecento, l’edificio de otocento le sta perso insieme a parte dei aredamenti nel 1931, quando le sta sostituio da la cesa de adeso, l’edificio le sta ampià ne la so volumetria.


07 -Dimanda Arte P.10
Come se ciama sto bel dipinto famoso de 'na bela césa de Verona?
a) La Pentecoste
b) La Vergine
c) Immacolata
d) La Madona del Rosario

El dipinto el se ciama: La Pentecoste - San Giorgio in Braida
El tema iconografico de la Pentecoste el ne vien spiegà nei vangeli indoe i parla de l’efussion del Spirito Santo da parte de Gesù in ocassion de le aparission ai Apostoli dopo la Resuression. Inveze nei ati dei Apostoli se nara de un preciso episodio capità diese giorni dopo l’Assension. El grupo dei più streti discepoli de Gesù l’avea ciapà l’abitudine de riunirse in ‘na casa de Gerusaleme, con la precaussion de inciavar ben le porte, avendoghe paura de aresti o interogatori par colpa de la sparission del corpo del Nazaren. Una de ste riunion le sta in coincidensa con la festa ebraica de Pentecoste, sete setimane dopo la Pasqua. A sta riunion ghe partecipa la Madona e i Apostoli, tornè a essar dodese dopo la siélta de Matia come sostituto de Giuda. Con un fragor de tron, la sala la vien atraversà da un vento impetuoso, e su le teste dei presenti vien su lengue de fogo. Lo Spirito Santo, vegnù zo sui Apostoli, el ghe da a lori la facoltà de esprimarse in tute le lengue del mondo; la presensa de pelegrini stranieri a quel tempo a Gerusaleme la fato in modo de poder verificar subito l’eficacia del prodigio. Probabilmente el posto de l’incontro l’era la casa de l’evangelista Marco, questo l’e suceso çinquanta giorni dopo la resurression.



08 -Dimanda Carneval P.10
Quel'omo ne la foto l'è:
a) Re Teodorico
b) Re del Baldo
c) Re Pipino
d) Re Cioto de Negrar
e) Re de la Stanga

L’omo de la foto l’è Re Pipino.
Pipino d’Italia (773 – 8 lujo 810) le sta re d’Italia soto la tutela de so pare Carlo Magno del 781 fin a la so morte. Pipino l’era el terso fiol de Carlo Magno, el secondo avuo da la mujer Ildegarda. A la nasita ghe sta imposto el nome de Carlomanno, ma quando so fradel Pipino il Gobbo la tradio so pare, el nome reale pipino l’è pasà a lu. Nominà re d’Italia dopo la vitoria de so pare su i Longobardi del 781 le sta incoronà da Papa Adriano I con la corona ferrea; governante ativo in Italia l’a operà anca par ingrandir l’impero franco.Nel 788-798 el sa imposesà de l’Istria, nel 791 l’a condoto l’esercito ne la val de la Drava e sachegiò la Pannonia, intanto so pare el marciava, seguendo el Danubio, nel teritorio dei Avari. Carlo Magno l’e sta costreto a abandonar l’impresa par afrontar l’insuression sassone del 792. Pipino e el duca Eric del Friuli j’à continuà a atacar le fortificassion dei Avari costruie a forma de anel. El grande Anello degli Avari, la fortessa principal lìe sta espugnà do olte, e quel che le sta porta ja invià a Carlo Magno a Aquisgrana e indoe le vegnù distribuio a tuti i so seguaci e ai governanti stranieri,compreso el re Offa di Mercia. Fra le atività de Pipino ghe compreso anca l’ataco a la laguna de Venessia; esiste anca do version difarenti riguardanti la morte de Pipino e la sconfita dei Franchi. La storiografia venessiana la dise che Pipino l’a costruio ‘na flota par conquistar la cità, i venessiani però i sa ritirà ne le isole più interne (come quela de Rivo Altus) spetando che le navi dei franchi le se arenase ‘ne le seche de la laguna par dopo poterli atacar con picole e legere imbarcassion, sbrusando la flota e fasendo ritirar i franchi, a causa de tute ste paludi el sa ciapà la malaria morendo de malatia. La storiografia francese inveze la narra che Pipino el conquista la laguna e messa soto el so controlo le popolassion locali l’era in vià retornar in Francia, quando ‘na flota bisantina la intervien sconfinzendo quela dei franchi costrinzendoli a la resa, nonostante tuto questo, anca in sta version el se mala de malaria morendo dopo poche setimane. Pipino l’avea sposà Berta, fiola de Guglielmo di Gellone, Conte de Tolosa e el gavea avù çinque fiole ( Adelaide, Atala, Guandrada, Berta e Tetrada) nate tute, a parte quela più grande tra l’800 e la so morte e morte prima de la morte de so nono nel 814. Pipino l’era destinà a ereditar un terso de l’impero paterno, ma inveze l’e morto prima de lu. La corona de l’Italia alorà le pasà a un so fiol ilegitimo, Bernardo, l’impero inveze le andà al fradel più zoeno de Pipino, Luigi il Pio. A Verona el nome del re Pipino se liga a le vicende de la çesa de San Zen, con el slargarse del culto del Santo, vien edificà ‘na çesa fra el 805 e 806 visto el voler de Pipino re franco, del vescovo Ratoldo e dell’arcidiacono Pacifico. L’8 de dicembre 806 la noa basilica le sta consacrà a la presensa de re Pipino. El 21 de majo 807 le relique del santo vescovo j’è ste traslè, porte da du santi eremiti Benigno e Caro, sempre a la presensa del re.


09 -Storia & Tradission P.10
Secondo tradission quel bel sasso tondo:
a) Butà contro Attila dai romani
b) Scultura a "fongo" regalà a un matrimonio, da Galieno a la fiola de un console romàn
c) L'è stà usà par sentarse sora e pescàr
d) Do fradei romani i l'avea usà par far "comizium politicae"

El sasso l’e ne la çesa de San Zen in Oratorio e l’era usà da San Zen par pescar in riva a l’Adese. Ne la foto se vede un’ara funebre cilindrica de età romana, databile al Isec. d. C. indoe se pol notar du busti de coniugi corosi dal tempo. El tamburo de fora l’e decorà da ghirlande e tralci de vegna de bela fatura. L’ara la tien su un groso macigno lissio indoe la tradission riconosse "la carega" indoe el vescovo San Zen el se sentava par pescar.

‘Na iscrission la dise:

HOC SVPER INCVMBENS SAXO
PROPE FLVMINIS VNDAM
ZENO PATER TREMVLA CAPTABAT
ADINE PISCES

Che vol dir : Seduto su questo sasso, presso l’onda del fiume, il padre Zeno con la canna flessibile pigliava i pesci. El sasso ogeto de la domanda el se cata dentro la çeseta de San Zen in Oratorio, popolarmente dito san Zeneto. Sta picola çesa la sorge ne la Via Gallica direta verso Brescia e Milan. Dai studiosi de arte clasica l’e tanto conosua par dei reperti de età romana che se trova ancora dentro o che da ela i vegnea, tanto che nel rinasimento i pensava che in sto posto nasesse un tempio dedicà al dio Bacco. Nel medioevo la çesa l’era ciamà de Sancti Zenonis Oratoris, o “San Zen Orador” (cioè predicatore); questo el lo dise anca Francesco Corna da Soncino, el fabro.poeta del quatoçento :”Per diverse vie se fanno de più arte più mestieri, arte di lana, assai mercantile; et è in sto borgo san Zen Oratore”. El cambiamento de titolo ghe stà ne la seconda metà del XVI secolo. Secondo la tradission el Santo pastor ghe piasea ritirarse par pregar e pescar in sto posto, alora fora dai muri de la cità, vizin a la riva de l’Adese e a l’imboco de L’adesetto, canal che ormai ‘no ghe più e el scomiziava a l’altessa de la çesa. ‘Na roba no le mia ciara: ‘no se sa se questa la podaria essar la primitiva çesa dove e sta sepelio San Zen prima de la costrussion de quela in età carolingia indoe ancò ghe la basilica e se sia sta qua dove ghe fu el famoso miracolo narà da papa San Gregorio Magno nei suoi Dialoghi. Nel 589/590 a causa de ‘na grande alluvion el livel de l’acqua l’e rivà a sfiorar le “finestre della chiesa di San Zenone situata fuori le mura”,:cossì el ne conta Paolo Diacono, però miracolosamente l’acqua no le entrà ne la çesa risparmiando i fedeli riunii li dentro. El doto prete veronese Giovanni Mansionario (XIV secolo), menzionà dal Pighi, l’aferma che el miracolo el sa verificà ne la çesa de San Zen Orator. El Canobbio atesta de aver visto un documento indoe risulta l’esistensa de sta çesa nel 780, in pratica prima de la traslassion del corpo del santo avegnua ne l’807. Ghe di storici che i comprende la çesa fra quele restaurè da l’Arcidiacono Pacifico (morto ne l’845), ma de sto edificio antico no è restà gnente parchè distruto dal teremoto del 1117. Ricostruio in stile romanico el gavea ‘na posision vicin a l’Adese chel vegnea esposto a le tante inondassion del fiume; questo l’e sta atenuà quando nel 1290 i Scaligeri j’à fato costruir un argine. El più antico documento de sta çesa l’e ‘na pergamena del 23-24 de genar 1307 che la se riferisse a ‘na cerimonia indoe ghera presente el vescovo e i canonici della Pieve di Correzzo j’a nominà el so arciprete, sto ato el fa pensar a lo studioso Simeoni che questa la dipendese da la pieve rurale. Pochi ani dopo, nel 1323, San Zen Orator, el figura ne le Costitussion del Clero Intrinseco (l’associassion dei preti urbani) fra le çinquantado parochie de la cità e oficà da un prete e da un chierico. Forsi in sto periodo a la çesa romanica ghe sta zontà le do navè da le parte, nei ani 1324-25 el gran borgo indoe l’e sorgea San Zen in Oratorio e la basilica del Santo, fin a alora extra-urban, j’è ste inglobè ne la noa cinta volua da Cangrande I de la Scala e diviso in guaite (contrade), e una de quela la ga vu la denominassion del titolo de la çesa. I confini de la parochia i rivava da l’odierna via Rigaste San Zeno e via Scarpellini, a i muri dei bastioni e al stradon Porta Palio da la parte destra, el prete chel se ocupava a la cura de le anime l’era ciamà rector (rettore) e solo dopo tanto tempo el ga vu el titolo de arçiprete. Nel XV secolo ghe sta du avenimenti de rilievo in San Zeneto: la costrussion de la capela ancà dedicà a l’Imacolata (1482) e dei gravi dani in conseguensa de l’inondassion de l’Adese ne l’autuno del 1493; el cronista Zagata l’a scrito:” crescete el fiume de Ladese in tanta altezza cge fu estimà che le tre parte de Verona fusse sotto acqua. Rompete la Chiesa de San Zen Oradoro”. Quali j’è ste i dani ‘no le sta posibile precisar; nel 1529 ghe ne furono dei altri. Ne lo stesso secolo la cesa le sta visità dal vescovo Gian Matteo Giberti, nel 1529; se sa che nel tempio ‘na Compagnia laicale intitolà al patrono de la diocesi la agiva. I so aredi j’è ben miseri: l’argento rivestise solo do paterne, inveze i tabernacoli, le teche ecc j’e de legno e oton. I altari jera çinque e i figurava ne la visita del vescovo Luigi Lippomano nel 1555: el magior , quelo dedicà a la Madona, a la Santa Croce, a San Zen e a San Girolamo. La parochia la contava novezento anime. Nel 1615 la çesa le sta visità dal vescovo Valier, chel ricorda çinque altari, uno dei quali dedicà a San Carlo Borromeo, che spesse olte avea sogiornà qua quando el passava par saludar el so amico cardinal Agostino Valier. Nel 1630 la peste la fato diversi morti, i du tersi de la popolassion, anca la contrada de San Zen Oratore le sta colpia: de le sue 996 anime ben 597 j’è ste contagiè e de conseguensa morte. Fra i scampè ghe sta don Giovanni Bianchini, che nel 1634 l’a dedicà un altar a l’angelo custode; questo, la ancà radunà tute le reliquie conservè ne la cesa in una teca dedrio a l’altar magior, in mezo a queste ghera quele dei santi veronesi come Zeno e Annone, Teuteria, Benigno e Caro Eremiti. Nel setesento le confraternite ghe ghera ospitè jera quele de la Madona e de la Santa Croce, el trasloco de la seconda avea reso vacante l’altare intitolà a San Zen. De questo j’a aprofità i membri de l’Arte della Seta, che i gavea come santo titolare el Patrono de Verona, par otegner in concession l’altar (1745) j’a abandonà quelo de la çesa de San Silvestro. Qua j’à rinnovà l’altar, rivolgendose a Giuseppe Rangheri parchè lo costriusse in piera (1746), el banco de la Compagnia inveze le sta comisionà al marangon Carlo Testori, El dorator Teodoro Fantini el ga vu el compito de restaurar r dipinzar l’antica statua de San Zen e fornir siè candelieri in legno e reliquari. La parochia e le confratenite in seguito ai decreti de Napoleon nel 1806 j’è ste sopresse, la çesà sarà par nove ani, riverta dal vescovo Innocenzo Liruti con funzion de retoria de la nova parochia de San Zen Maggior. Ne l’autuno del 1802 l’edificio in Regaste San Zeno n 5 le sta donà a Maddalena de Canossa che la ga messo do maestre e diese ragasse che le ghe restè fin al 1808 quando le se trasferio ne l’ex monastero dei SS. Fidenzio e Giuseppe. Se pensa che la santa se racogliesse in preghiera in San Zenetto. Nel 1821 come retor le entrà don Leonardo Manzati, presente l’amico pitor Agostino Ugolini; don Manzati le sta ‘na figura de prete artista in quanto nel presbiterio l’a afrescà il Padre Eterno e gli Evangelisti, vegnui fori dopo i laori de restauro del 2003.
El so sucesor don Giacomo Salomoni ex frate dominicano l’a restaurà el tempio, rinovà i altari e le pale ricuperandone de antiche, nel setembre 1882 la çesa le sta inondà ancora ‘na olta durante la tragica inondassion de l’Adese. A l’inssio del novecento la sovraintendensa la fato tirar via le pitura a fresco stese ani prima su colone e capitei e libarà la faciada da l’imtonaco. Ne l’ultima guera la ga vu dei dani causè da l’esplosion che l’a distruto el Ponte Scaligero, nel 1957 la navada orientale le crolà insieme al vizin ex Oratorio, par sta causa endà persi dei afreschi mediovali. Nel 1979 l’antica canonica le sta rinovà con lo scopo de ospitar mons: Giuseppe Carraro za vescovo de la diocesi. SEGNI STORICI La çesa de San Zeno in Oratorio la ga a l’esterno verso la abside, tajà nel 1805 par sgarlar la strada de le Rigaste, finestrini mediovali e murà a la roersa un rilievo curvilineo indoe se pol vedar ‘na carega consolare e Fasci littori (Isecolo d.C.). Da sta çesa vien tre bele lastre con de le figure: do con un Satiro che bala, quela altra inveze con tri pafuti Eroti, da tempo le se trova al Lapidario Maffeiano. Sora l’entra minor, con stipiti de marmo rosso e protiro pensile, se inalsa un basso a tosso campanil del XVIII secolo, sostituio da uno più antico, che ne la so cela ghe da spazio a quatro campane, fuse tre da le dite Selegari e Cavadini de Verona, la quarta le del 1949. La çesa se presenta precedua dal sagrà, dove ghe de le lapidi, dove se acede pasando da un portal gotico in marmo rosso de San Ambrogio sopresso da la çesa de San Antonio de Vienna. Sora el muro intorno nel 1860 ghe sta sistemà do statue quela de San Zen e de San Pietro Martire scolpie nel settesento da Francesco Zorzi e za si i pilastri d’entrada de la Fiera de Campomarzo indoe i so edifici j’è ste demolii a l’inissio de l’otoçento. El portal l’e sormontà da un’arcata de tufo indoe nel so interno ghe trova l’afresco del tardo setteçento: Madonna col Bambino, inveze soto la legera arcata ghe dei medajoni che i rafigura l’Agnello mistico, Angeli e Santi (sec.XIV) La rua sepre in mamo rosso de Verona del XII secolo l’e inseria e sovraposta al roson original che se pol dir modesto.El so interno el presenta ‘na pianta a croce latina absidale con tre navi e cuerto a capriate. El presbiterio l’e quel che resta de la çesa edificà nel XII secolo, mantegnendo bona parte de le struture romaniche; La zona plebana l’e del Xiv secolo, su l’arco trionfal ghe un crocifisso atribuio a Felice Brusasorzi. Su la controfaciada ghe ‘na Crocifissione, afresco restaurà da poco del tardo tresento; el muro de destra l’e sta ricostruio dopo el crolo nel 1957. L’altar magior ‘no le mia original ma le sta rifato nel 1826. Ne la çesa ghe conservà anca ‘na statua in tufo de San Zen atribuia a l’artista Rigino di Enrico del XIV secolo con de le trace de policromia original. Le piture consergè j’è: L’Angelo custode chel protege un butin e angioleti che i tien un monograma de Cristo attribuio a Santo Prunati (1728) L’Adorassion dei Magi atribuia a Marcantonio Scalabrino, seconda metà del XVI secol J’è presenti anca dei afreschide vari periodi. De prestigio la capela rinascimental de l’Immacolà con olta a botte e paraste con scanalature. La so fondassion l’e a opera de Melchiorre Bassani, sior mercante de stofe, che la volù dedicar la a San Girolamo e destinà come tomba de fameja nel 1482 come dise ‘na scrita: HOC SACELLUM DEO MAX. HAC DIVO HIERONYMO DICATUM/MELCHIOR DE BASSANO V.F. MCCCCLXXXII. Nel 1750 la capela le sta rinovà e messa ‘na mensa de marmo dal conte Leopoldo Bassani Dondonini, discentente del fondator. La statua de la Vergine che ghe adesso, moderna, l’è tanto venerà dai fedeli come la Madona de la “medaja miracolosa”. Dedrio de l’altar le sta ritrovà un afresco chel riproduse Cristo Pantocrator. Se trova anca ‘na pala col Pio Transito De San Giuseppe, opera de A. Malatesta del 1862, un tabernacolo gotico l’e murà con scolpii a rilievo Dio Padre e soto du santi armè de spada (Martino e Giorgio?). Infine, provien sempre da la stesa çesa e ancò le conservà ne la basilica de San Zen indoe la funge da Annunciata: j’e do formele in tufo con de le figure inquadre da nichie, forsi le fasea parte de un dossal de l’alar, questa l’e atribuia al Maestro de Alberto I o al Maestro de Santa Anastasia, inssio del XIV secolo.