1° TURNO (dal 3 april ore 12 al 10 april a le ore 23.59)

RISPOSTE E CLASSIFICA PRIMO TURNO

Poesia (p. da 4 a 8)
1-Completa la poesia come te piase, te pol scombinàr le righe proposte, l'importante l'è no sistemàrle tra le prime quatro. (p. da 4 a 8)

La tentassion - ma parchè resìstar?
Ela, la me vardava con du oci,
che i sluseva piassè de du diamanti,
de un color che tirava in verso al çiel;
oci così no se ne vede tanti !
mi tegneva le mane su i zenoci,
no gavea più corajo de vardarla
strapassando de boto un bel capél
par frenar la me voja de basarla.
(FRITAJA CO' LA SEOLA P.7)

El Buteléto
Ela, la me vardava con du oci
furbeti,che i mostrava simpatia
de un color che tirava in verso al çiel;
pensando a che parole darghe il via.
Mi tegneva le mane su i zenoci,
ma ‘n buteleto sensa poesia
strapassando de boto un bel capél
l’ha fato che la storia sia finia.
(EL CONTE SEOLA P.7 - Premio Barbarani 2009)

I Ciocolatini
Ela, la me vardava con du oci
soridenti e birichini
de un color che tirava in verso al çiel;
Su la panchina con i ciocolatini
mi tegneva le mane su i zenoci,
finché me son deciso;
strapassando de boto un bel capél
g'o toca la man con un soriso.
(I GANASSONI P.7)

Cultura Moderna (p.3)
2-Nel 1964 Gigliola Cinquetti con ci l'à vinto in copia el Festival de San Remo?
a-Emilio Pericoli
b-Domenico Modugno
c-Patricia Carli
La risposta l'è C - Patricia Carli. Gigliola Cinquetti (Verona, 20 dicembre 1947). Dopo aver venso el festival de castrocaro ne l'autuno del 1963 con la canson de Giorgio Gaber *Le strade di notte*, l'ha debutà a sedese ani al festival de san remo nel 1964 vensendo, insieme con Patricia Carli, la manifestassion canora con la canson Non ho l'età (Per amarti). Du mesi dopo a Copenaghen la vense, sempre con la stessa canson, anca l'Eurofestival. In poco tempo la vende piassè d quatro milioni de copie in tuta Europa. Patricia Carli El vero nome l'è *Rosetta Ardito* (Taranto, 12 marso 1938) l'è na cantante italiana ma l'e naturalisà belga, e l'è nata in Italia ma l'è cressua in Belgio. L'ha partecipà al festival de san remo nel 1964 con do cansoni: *Così Felice* in coppia con Giorgio Gaber; *Non ho l'età (per amarti)* in coppia con la Gigliola e con questa la vense el festival. De sta canson qua l'ha inciso anca la version in francese intitolà *Je suis à toi*.....PITA DE TACHETO

Léngua Veronese (p.3)
3-Una machina mesa desfà, te pol dirghe:
a-sforetàda
b-rocàda
c-rocheton
‘Na machina mesa desfàse dise: rocheton; questa l’è ‘na parola abastansa generica par indicar qualcosa de grossolan e descancanà. AVE MATE. Una machina mesa desfà, te pol dirghe rocheton (come la Opel Kadett e la Lancia Fulvia che g’avea me papà) POLENTA A LA CATALANA.

4-Anagrama el proverbio 2-3-2-5-2-3 (p.5)
eeee llll oo mng rs aa - El sol el magna le ore
L'è un modo de dir a 'na persona parchè la faga presto nel laoro sensa perdar tempo in quanto la giornada la fa presto a finir sensa aver combinà gnente. Par esempio sta frase dita dal capomastro al bocia de botega, la sona così: avanti con le man, chel sol el magna le ore ( fa presto con le man che fa presto vegner sera). AVE MATE

Verona Sconta (p.3)
5-Nel sofito ligneo de la césa de San Fermo podemo catàr de le imagini incastonà ne la strutura in quatro file. In pratica una de le pinacoteche del tresento più importante d'Italia. Cosa gh'è rafigurà?
a-416 Santi
b-232 Madone
c-12 Apostoli 4 Frati 35 Madone 37 Santi
d- 320 Scene de Miracoli dei Santi Fermo e Rustico
Quelo che se vede nel sofito a carena de nave ne la césa de San Fermo j’e 416 santi, ‘na vera pinacoteca piturà nel periodo indoe ghera come abate del convento francescàn el bon Daniele Gusmerio. Sto bon omo, jutà dal consiglier de Cangrande Guglielmo da Castelberco l’avea scumizià la ristruturassion de la césa. Sti du omini i se vede rapresentè su l’arco d’ingresso a l’abside par opera del Maestro del Redentor autor de sta pinacoteca su legno. La ristrutturassion l’e andà dal 1314 fin quasi el 1330 quando l’e morto l’abate. AVE MATE

A spasso par Verona (p.3)
6-Quante éle, le famose "Toreséle", tori Massimiliane costruì par man Austriaca tra el 1837 e 'l 1842?
a-3
b-4
c-5
d-6
Tra el 1837 e el 1842 è sta fato tanti interventi che i ha riguardà le fortificassioni de la colina e de la sinistra de l'Adese ma par la gran parte jè stè adatamenti o opare de raforsamento: i bastioni de san Giorgio e de santa Toscana e el muro vissin Porta Vitoria jè stè consolidè e potensiè. E' stà completà i laori de la çinta destra de l'Adese col definitivo restauro e raforsamento dei bastioni venessiani de Spagna, san Procolo e san Francesco (salvè da le distrussioni dei francesi) e i ha potensià Porta Noa. El castel de san Felice inveçe i l'ha rifato. Intorno a la çinta continua i ha costruio de le opare destaché: i forti de la Biondela, de san Matia, de santa Sofia e de san Leonardo (el piassé grosso el podéa contegnér na guarnigion de 350 omeni) e quatro Tori dette Toresele o Tori de San Giuliano. I forti e le toresele i gavea la funsion de controlar le valli sotostanti e de protegiar le mura. PITA DE TACHETO..........Le tori martel inglesi, le tori costiere svedesi, la tore casamatta par l’artiglieria teorizà nel ‘700 da Montalembert jè i antecedenti de le tori del campo trincerà de Linz (32 in quel caso li), volue e fate costruir nei ani 1831-35 da l’Arciduca Massimiliano D’Austria-Este e ciamè par questo massimiliane. Le quatro tori fate costruir nel 1837 sul crinal de San Giulian a nord de Verona l’è ga tute lo stesso impianto. Ne l’anel esterno se verze le feritoie par la difesa ravizinà ;el tamburo central che lo sormonta el gà ‘na casamatta anulare con 12 canoniere; su la copertura (fata con uno strato asfaltà e lastroni de piera viva) ghera ‘na special bateria de canoni, sperimentà a Linz da Massimiliano, montà su rotaje metaliche par dominar l’intier giro de orizonte. Ala fine de la dominassion austriaca, nonostante sta poderosa struttura, jera armè in modo molto ridoto, e quindi soto utilizè. I veronesi j’e ciama “toresele” e el nome italianizà l’è deventà un toponimo par indicar genericamente tuta la colina. AVE MATE

2° TURNO (dal 17 april ore 12 al 27 april a le ore 23.59)

DIMANDE SECONDO TURNO

Poesia (p. da 4 a 8)
1-Completa la poesia come te piase, te pol scombinàr le righe proposte, l'importante l'è no sistemàrle tra le prime quatro. (p. da 4 a 8).
Sistema de Valutasion: originalità, idee, logica, espressioni usade, musicalità nel componimento e eventuali erori come parole in lengua italiana che le perde 1/2 punto a parola, in lengua straniera voto 4 a l'intiera poesia. Se la poesia la g'à più de 8 righe, o vién spedì 2 poesie el voto anca in 'sto caso l'è 4. El coeficente de valutasion de 'sto turno l'è più alto, in quanto el grado de dificoltà l'è magiòr.

Soto ci toca
Gh'è un lato grando come un bastimento,
coi muri de un color bianco sbiadio
dove, quando i se mala,
i se mete in fila, ma tirando indrio
el dotor, par tastàr quei che gh'è drento,
se lava le mane ne la brentela;
el va su par 'na scala
dimandando : “Ghe toca ela?”
(STRACAMASELE P.7)

L'arca de Noè
Ne l'arca del vecio testamento
Gh'è un lato grando come un bastimento.
L'è così larga che ghe starea l'intiero firmamento.
Noè l'à pensà parfin a una stala
dove quando i se mala,
le bestie ghe va par la giusta fiala,
el dotor, par tastàr quei che gh'è drento,
el va su par 'na scala
(77HAI 22 P.7)

Cultura Moderna (p.3)
2-Ci l'à vinto el crono-prologo de Verona, longo 6 km, nel 68°Giro d'Italia 1985?
a-Giuseppe Saronni
b-Roberto Visentini
c-Francesco Moser
d-Greg LeMond
El giro d'Italia in question l'era el 68°organizà in vintidù tape ( dal 16 de maio al 9 giugno 1985) e vinto da Bernard Hinault grassie a Visentini che nonostante el fusse maja rosa el ga vu la sfortuna de malarse, e darghe quindi el primo posto. Proprio in sto giro l'e sta corsa la crono-prologo de Verona vinta da Francesco Moser. Nato in una fameja de ciclisti, tre di sui ondese fradei jè ste ciclisti profesionisti, soranominà "lo sceriffo" parchè l'era bon de tegner e gestir el grupo durante le corse; deventà profesionista nel 1973, nel 1975 ariva la vitoria del giro de lombardia e el setimo posto al tour de France. Nel 1977 el ga vu in Venezuela la sodisfazion de deventar campione del mondo.Nel 1984 a Cità del Mesico l'a batù el record de l'ora che da dodese ani l'era ne le man de Eddy Merckx, tuto questo anca grassie a 'na particolare bicicleta con le rue "lenticolari", sempre in questo ano l'a vinto anca el giro d'Italia e la Milan-San Remo. Nel 1987 dopo aver corso la so ultima gara, el "trofeo Baracchi" , l’e restà nel ciclismo solo come produtor de bicliclete e come colaborator ne l'organisassion del giro D'Italia. AVE MATE.

Francesco Moser. Nato a Giovo el disnove de giugno del 1951 l'è ancora adesso el ciclista italiano con piassé vitorie, el quinto asoluto nel mondo. Par la so capacità de gestir el grupo i l'ha soranominà el serifo. L'è passà al profesionismo nel 1973 vensendo subito 'na tapa del giro d'Italia. I primi risultati importanti jè rivè nel 1975 quando l'ha venso el giro de lombardia e l'è rivà setimo al tour de france vensendo anca la clasifica riservà ai zoeni. Mai stà un fulmine ne le salite, in compenso el gh'a fato vedar le strie a tuti batendo el record de l'ora nel 1984 a Cità del Messico (che prima l'era de Eddy Merckx) grassie anca a un tipo noo de bicicleta con le rue lenticolari. Nel stesso ano, sempre grassie anca a la bicicleta noa, vensendo la tapa a cronometro l'è riussio a colmar el svantagio e a vensar el giro. Altre vitorie inportanti jè ste el canpionato del mondo nel 1977 in Venessuela e le tre vitorie filade de la Parigi-Roubaix. L'ha fato storia in chel periodo la rivalità con Giuseppe Saronni che a tanti la gh'a fato ricordar quela tra Coppi e Bartali. Anca se manco conossui, tanti jè ste i sucesi su pista: el canpionato mondial de inseguimento nel 1976 e quel italiano del 1984 oltre a ben 15 afermassioni ne le 6 giorni. PITA DE TACHETO

Léngua Veronese (p.3)
3-Ne la provinsia veronese un tempo se ciapava 'na bela zuca che la vegnéa udà sensa desmentegarse parò de farghe oci e boca con 'na trièla. Drento se ghe metéa 'na bela candela impissà. Secondo la "nostra" tradision veronese de cosa stemo parlando?
a-luméra
b-lumedàl
c-lucìfaro
Intanto scomiziemo col dir che le zuca che se doparava par far la lumera l'era quela de 'na varietà ormai sparìa de color gialo, scorza dura, rotonda e piena de buele e semi boni par far le brustoline. I ghe disea "zuca da mas-cio” parchè i la magnava solo lori. La zuca la vegnea tajà in modo da farla somejar a un teschio; drento ne la parte uda ghe vegnea messo un lumin che con la so luse metea in risalto oci naso e boca e anca se l'era solo un lumin col buio che ghera 'na olta de sera el se vedea da lontan. Questo l'era un zugo dei buteleti de campagna par far spaentar quei che pasava par le stradele. Ghera anca n'altro modo par far la lumera, vegnea doparà i zucheti andà in somenza: quando i deventava grosi, giali e longhi, ghe vegnea intajà 'na bestia de fantasia con boca e denti grandi, sempre metendo un lumin drento. Par completar "l'opara" ghe vegnea passà un baston a traverso con do rudeline (che le podea essar o de legno e do scatoline de fero de la patina da scarpe), ligà un spago par poder tirarselo a drio, e manovrà da drio un albaro, o da drento un fosso. Al giorno de ancò la tradission la sopravive ne la forma americanizà de la note de halloween. La parola lumera la se dopara anca par aludar a 'na persona magra inpizà, difati se dise: el par 'na lumera. El lumedal l'e sempre un qualcosa che ga a che far con la luce, difati se trata de 'na specie de spionsin de se trova tra i comignoli, tanto par vedarghe in granar. Se guardemo la parola lucifaro se podaria pensar che anca questa in qualche modo la l'abia a che far con quel che riguarda la luce, però non savendo ben el fignificato le solo 'na nostra supposision. Informandome sia da me mama e le me zie e saltà fora che al tempo che fu ghera 'na canzon indoe se parlava de Lucifaro come un personaio belo, zoino dai oci turchini; a l'epoca ghera anca el modo de dir: te pari Lucifaro. AVE MATE.

Anagrama el proverbio (p.5)
4-Proverbio che se riferisse al comportamento tra persone spiegà con le piante: 4-1-7-3-6 AA EEEE GG HH III MM OO RR S T
ROSE E ORTIGHE, MAI AMIGHE
Le do piante 'no le se vede mai insieme sia parchè morfologicamente difarenti sia parchè le rose le vien sempre coltivà con cura,lontan da erbe infestanti, inveze le otighe le vien su selvadeghe, indoe no ghe passa nissuni. A la stessa maniera le persone che vien arlevè con cura e dedission no’ le va mia dacordo con quele che se presenta rusteghe e greze. Le rose j'e sempre ste considerè l'embelema de la finessa e de le cura, le ortighe inveze l'esato contrario. Ghe anca dei altri proverbi a tal proposito: La rosa resta rosa anca fra le ortighe.Certe ciacole fra amighe le par rose inveze j'è ortighe. AVE MATE

Provincia Veronese (p.3)
5-In provinsia de Verona, dove no gh'è 'na césa dedicà a San Zen?
a-Zarea
b-Vestenanoa (ne la frassion Vestenavecia gh'è una césa a San Zen, ma la dimanda diséa Vestenanoa, in caso de dubio bastava dimandàr al Diretòr).
c-Fumane
A Zarea la cèsa de San Zen la ghe, costruia a l'inzio del XII secolo grassie a la generosità de Matilde di Canossa (par quanto se ne sa visto che Zarea l'era de possession dela fameja dei Canossa). Nel corso dei ani la subìo dei daneggiamenti par cause naturali, l'aspeto de adesso el vien da un restauro del 1910 oltre a un rispristino abastansa recente del campanil e del querto.A l'interno se trova tre navate divise da do file de pilastri in cotto, con riportè de sora importanti afreschi de la tradission sacra popolar, come San Zen,el titolar, Santa Caterina, S. Antonio abate e maestà con el butin. A Fumane ghe la cèsa parochial, ne la piassa principal del paese, intitolà a San Zen, patrono de Verona de epoca del XIV secolo, ingrandìa e anplificà el secolo sucessivo e radicalmente rinovà nel ‘700. La ga 'na sola navata, presbiterio e quatro capele da le parte. Dentro ghe 'na serie de tele che le rafigura i dodese apostoli e pale de altar del setteçento atribuìe a importanti pitori veronesi, come par esempio Vittorio Balestra, Francesco Lorenzi e Angelo da Campo. Sora la porta meridionale un'iscrission del quatroçento la riporta el testo de un acordo con la pieve e la fameja Maffei par istitussion de la parochia. Inveze a Vestenanoa ghe la çesa intitolà a San Leonardo, posisionà su ‘na colina che la domina tuta la Val D’Alpon. La so costrussion l’e risalente al 1849 finìa, dopo quatro ani e tri mesi ma consacrà nel 1924. L’edificio in stile neo clasico (progetà da l’abate Angelo Gottardi) ne la so faciada el presenta un portego formà da quatro colone in stile corinzio; disemo che el ricorda un po’ i “TEMPLUM” greci-romani par via de l’ingresso che’l vien atraverso gradinade laterali. La canonica l’e sta costruia de fianco indoe ghera la vecia çesa risalente ne l’ano 1472. El campanil j’à scomizia a costruirlo nel 1921 e inaugurà con de la calma vintisete ani dopo e precisamente el 3 giugno 1948; nel so interno ghe stà messo nove campane che prima le jera ste colochè in modo provisorio su ‘na toreta de legno vizin a la çesa. A Vestenavecia se trova la çesa dedicà a San Zenon e San Urbano e come stile l'è simile a quela de San Leonardo de Vestenanova, la difarensa tra le do çese l'e che in quela de S. Zenon e Urbano ghe manca el portego davanti. Quindi la risposta giusta l’è Vestenanoa. AVE MATE





Dimande & Risposte 3° TURNO
in rosso le risposte esate - no jè presenti le dimande foto, cruci, cartoline e quadri d'arte.

Poesia (p. da 4 a 8)
1-Completa la poesia come te piase, te pol scombinàr le righe proposte, l'importante l'è no sistemàrle quatro de fila. (p. da 4 a 8).
Sistema de Valutasion: originalità, idee, logica, espressioni usade, musicalità nel componimento e eventuali erori come parole in lengua italiana che le perde 1/2 punto a parola, in lengua straniera voto 4 a l'intiera poesia. Se la poesia la g'à più de 8 righe, o vién spedì 2 poesie el voto anca in 'sto caso l'è 4.

O bela Nineta,
te gh'è 'na bocheta
che quando te tasi
te magno dai basi.
Dai vegni bonora
te speto chi fora,
te struco al me cor,
te colmo de amor.
(I du Falcheti v.7)

Cultura Moderna (p.3)
2-Quando l'è stà inaugurà l'atuàl stadio Bentegodi?
a-07/11/1958
b-15/12/1963
c-22/10/1968

Léngua Veronese (p.3)
3-Se una persona la g'a 'na facia piena de rughe, disemo che semo in presensa de:
a-ràpole
b-parabèle
c-pearàde

Provincia Veronese (p.5)
4-Dove se cata 'sto toco de piera con data 1754, posissionà longo "La strada dei Cordoni"?
a-Tra Podestaria e CastelBerto
b-Tra Giazza e Tregnago
c-Cavrìn e San Zen de Montagna

Storia de Verona
6- Bartolomeo Bacilieri l'è deventà Vescovo de Verona nel 1900. Nel 1901 Papa Leone XIII l'à pensà de metarlo nel Sacro Collegio de i Cardinali. A quanti conclavi, par nominàr el novo Papa, l'à partecipà el Bacilieri ? (p.5)
a-2
b-3
c-4

Anagrama el proverbio (p .5)
8-Proverbio che se riferisse a una futura vita coniugàl: 4-1-7-4-1-6
C DD EEE FF IIIIII NN OOO P TT V
DOPO I CONFETI VIEN I DIFETI