Cap.1 - Ricordi e realtà d'ancó
Introdussion - I a savù, ansi i savèa, che me interesso da sempre de bóli e de monede e che, par zonta, me piase scrìvar e parlar el dialèto veronese. Par questo i m'a dimandà se avarìa scrito calcossa su sti temi.
Modesti fin che te vól ma nó l'è che mi sia 'na scensa de la materia. Farò quél che podarò e me sento onórà, ringrassiando de cor par la simpatia che la Diression del sito amigo la m'a acordà. Speremo de nó tradir tuto questo e se sbaliarò, compatime! Vorìa dir calcossa de interessante par ci gavarà la bontà e la passiensa de lésarme, tégnendo presente che, ala fine quél che ne interessa de più l'è scoltar, parlar, lesar e scrivar el veronese, nostra màrelengua, che émo imparà a capir, fin da bùtini, da nóstra màre e da nostro pàre. Se capìsse che nó gh'è solo el dialéto par passarse via e nel nóstro caso consideremo valida anca, oltre a altri passatempi, la colessión de bóli e de monede.

Quando ho scominsià a racòliar bóli....
Dovì saver che nel 1942, quando nó gavéa gnanca sinque ani, destacava, con passiensa, i bóli da le buste de la corispondensa che me papà el ricevéa in uficio, in via Quatro Spade e che, par sicuressa me metéa in scarsela…Figurève che colessionista che era! Questo, però par dirve che, zà alóra, la tendensa la gh'éra e che, in fondo, gh'éra un modesto piaser de un pçro buteleto. In ogni caso, nissuno el m'avéa messo in mente sta passión. Na passión che l'è sta un fógo de paia, almanco in un primo tempo, parchè, ala fine dei conti, l'è andada presto a farse benedir. Via de l'uficio nó ghéra po' altra fonte de rifornimento che mi conósesse. Dù o trì ani più tardi, quéla tendensa, a dir la verità, l'è saltà fora n'antra olta e ho riscominsià a destacar bóli: staòlta, parò, dela "Repubblica" parchè fin al 1945 se parlava del "Regno". Na picola parentesi: par destacar i bóli dale buste, un vero pecà, nó me metéa più in uficio ma adiritura sul pontesel de via Sotoriva 2! Andando avanti e par capirse méio, bisogna dir che quando avea scominsià la prima olta sto passatempo -ancó i ghe dise "hobby", ma se trata de 'na parola moderna che no riesso a digerir- se éra sóto el Re Vitorio Emanuele III e che quando ho riciapà la mania, el re l'era zà sparì da du o tri ani (nel 1943). Par questo, nel 1945 i nóvi bóli nó i portava più la so imàgine o la so testa. Nóvi tempi, altri bóli, comunque nó conto tuto par nó tirarla massa par le lónghe. Siè o sete ani dopo ho conossù un buteleto andando a scola da Don Bosco, çerto Cavalleri, che da alora nó ho più visto, ch'el m'a donà un pochi de bóli, anca malandadi, ma che avea scominsià a comodar in un quadernó a quadreti che, a dir poco, el gavéa çinquantani! L'avéa trovà in un armadio de mé papà e el dovéa èssar un residuado de quando mé nóno Emilio el laoràva a le Strade Ferrate Meridionali e che ai giorni de ancó i ghe ciama Trenitalia. Pensa letor che albo che gavéa: giàlo da 'na parte, giàlo da che l'altra! Insoma alora nó gh'éra le modernità de ancó. I album coi listéi de celofàn, se diséa, dove se inserìa i bóli sensa tocarli, zà i era in comercio ma nó podea comprarmeli. L'era n'afar da siori! Come ripiego e cosa nórmale, se dovea tacar i bóli sui foi de quaderno e con un tochétìn de carta zà incolà e che i vendea in rodolini, se lecava 'na parte e se la tacava sul bol (e se lo sassinava!) po' se lecava l'altro orin (orlo) e se lo tacava su l'album…Cusì quél poco che gh'éra de bon l'era da considerarse perso, ma chi lo savéa? Par andar avanti co la colession nó ghéra gnente da far parchè mancava i schei, schei che vólea dir poder comprar i bóli (a presso salà) e i album adati al mestier parchè se deve anca saver che un bol nóvo (nó usà) el ghà el so valor quando la cola del dedrio l'è intata e perfeta e che, de conseguensa, se el bol el mostra de verghe, de drio, apena un segneto de carta tacada (la lenguela) nissun più le vól. In più el deve averghe i dentini (denteladura) in massimo ordine. E anca ancó l'è cusì: ghe poco da far e da dir: na olta era anca un de boca bona e tuto andava ben, ma, come hò zà dito, un bol in quéle condissioni nól val proprio gnente. In un modo o in un altro però son andà 'vanti co' la filatelia, ho imparà a essar ordinado, a tegnar ben le cose, a interessarme de storia e de giografia, a conóssar le valute diverse del mondo, a dar un pur modesto parer su le vignete dei bóli e dele monede, e, nó ultimo, a scrivar a altri colessionisti, anca stranieri e, infine, a far un bon uso dei schei, visto che era sempre al verde. Par questo, ghè vólù dei ani prima che podesse far na racolta de bóli apena discreta. Me ricordo che a dovù vegnar el 1953 o 1954 par dir de aver fato calcossa de serio: catando su le carte de casa in un saco, vecio, de campagna che se tegnea nel localeto a fianco dela cusina, podea andar a vendar al strassarol de via Interato Acqua Morta, che, nó sempre, el me dava du, tri, sinque franchi. Par portar el saco, nó sempre profumado parchè el contegnea anca carta de pesse o de formajo verde, lo metéa sula bici da dona de me mama e su par Via Sottoriva, Ponte nóvo, San Tomaso ecc. Par de più, dovea risparmiar anca sul meio dei canarini che, in cambio, i magnàa polenta, con un dispiaser che nó ve digo. Sempre par poder comprar qualche bol che mancàa rinunciava a tuto: al gelato, a qualche ciocolatin e parfin a qualche matita: me contentava de vedarla in vetrina o de usar qualche toco vecio tolto segretamente dala scatola de me poro nónó…de meio nó se podea far…epur me la cavava sensa tante metùe. Intanto m'era vegnù la combinassion de comprar du bóli da un me compagnó de scola: Dopo un par de setimane de tratative s'a combinà par mile franchi e l'è stà la olta de un inissio de colession metodica, ma cape, quanta passiensa, anca parchè al me compagno, che ciamaimo "el nóno" ghè pagava rate da sinque, diese franchi ala olta. Semo andadi proprio par le longhe ma l'è stà la olta bona: se tratava de tri grandi bóli italiani del Regno emessi nel 1923 par catar su schei par le "camise nere". N'àntro contributo el m'è vegnù da n'àntro amigo ch'el m'avea dà in cambio de altri bóli la serie dela "Vitoria" del 1921. Passiensa sora passiensa è finì anca le scole e s'hà scominsià a ndar a laorar: ghéra poco tempo par i bóli, ma una o do palanche -nò de più- par andar avanti in scarsela le gh'éra. Calcossa, ma quasi na limosina, ciapàva portando in giro qualche turista par la cità…l'è stà quando ho podù permetarme el primo album un poco decente.

^ torna su ^

Cap.2 - La Filatelia a Verona
L'Associasion Filatelica Scaligera fondada nel 1933 - Bisogna saver, come premessa, che su insistensa de n'antro me compagno, paraltro no filatelista, m'era messo a frequentar -era ancora a scola essendo el 1954- l'Associassion Filatelica Scaligera. Purtropo i primi do ani i ho frequentà co'n poca de vergogna…no pagàa la quota de iscrission parchè no ghe n'era…se tratava de 400 franchi a l'ano: In sostansa, ha dovù vegnar el 1956 inoltrà par sistemar la me posission e da alora son ancora socio. Bisogna dir la verità che l'era proprio un piaser frequentar l'Associassion parchè ghera gente apassionada, educatissima e gentile…come me piasea a mi. Se se riunìa, -erimo ala fine dei ani sinquanta- in un locale più longo che largo ne l'Hotel Gabbia d'Oro, vissin a Piassa Erbe. In quel local ghera na taola longa na diesina de metri e se sentava da na parte e da l'altra longo la taolada: ne scambiaimo i boli che ognuno portava -tegnudi come i fusse relichie- da casa nei so album e se ocorea, qualche bol se lo compràa o se lo vendea: a un cao dela taolada ghera sempre el sior Carlo Alberto Cappelletti, un bel omo alto con tanto de barba che con bontà e simpatia el distribuiva par ore i boli apena emessi da Italia, San Marino e Vaticano, da lu procuradi: In sto caso, essendo novi, ognun el pagava i soi, zà prenotadi: Risparmia de qua, risparmia de là, anca mi podea permetarme de comprar calcossa. La sede de l'Associassion l'era deventada col passar del tempo massa picola e dipendar sempre dai altri - se fitàa el local ala dominica dopodisnar -no parea na bela cosa. Alora s'ha tolto in afito un local ne l'ultimo pian de na casa che fasea canton tra Via Emilei e Piasseta Monte. Dopo du o tri ani, altro trasferimento, semo andadi in un local a piano tera in Lungadese Rubele (s'erimo a metà ani sessanta). Qualche ano dopo e par tuti i ani setanta ghemo avù la Sede nel Palasso del Gran Zara-dove desso ghè na banca, in via Oberdan. Ala fine dei ani setanta in via Oberdan i n'ha dà sfrato e de conseguensa, novo Sanmartin. Staolta, la sede definitiva dove semo ancora la vien a trovarse nel Palasso Carlotti al numero 2 de Corso Cavour: ghè la so spesa, ma te sì in cità.

La manifestassion Veronafil - Zà nel 1935 ghè stà el VI° Raduno Filatelico Triveneto ne l'Hotel Accademia de Verona. Nel 1938, visto el sucesso del raduno, el 20 marso del 1938 (mi gavea n'ano) è stà organisà a Verona da l'Associassion Filatelica la "Prima Giornata Italiana del francobollo". Da quel ano, salvo un pochi de ani a causa dela guera, le manifestassioni dela Filatelica iè continuade, nel numaro de una a l'ano, fin ala fine dei ani sessanta, par deventar do a l'ano come ancora desso se fa de solito, una in majo e una in novembre (stano in otobre 2003 parchè sule date a decidar l'è la Regione Veneto). Nel majo passà s'ha celebrà la 100° Veronafil ("Pensè" 100 convegni de filatelia e numismatica a Verona!! ) nei padilioni dela Fiera de Verona su un area de 16000 mq e co la presensa de çirca 600 comercianti, fra quei de boli e de monede e, fra questi, na trentina da l'estero. Ben 30000 iè stadi i visitadori…più de così no se pol voler e far…Lassa che i diga ma Verona ormai, nel setor filatelico e numismatico l'è sicuramente la prima al mondo !! Ormai tanti i ghà invidia, anca a l'estero!! Risulta dunque che quela de Verona l'è n'Associassion ativa, la ghà boni organisadori, con tanta esperiensa. N'Associassion che la ghà no uno ma setantani, par essar esati…e po' saveme dir qual'ela quela Associassion che l'ha savù organisar 100 Convegni…Troveghene n'antra… Par ogni manifestassion, emo dito, in majo e in novembre (quando no l'è in otobre) la "Scaligera" la prepara cartoline comemorative, disegnade dai mejo artisti veronesi, e i timbri comemorativi in colaborassion cole Poste. Ogni ano, difati, fin dal primo raduno veronese del 1938 ghè la so cartolina speciale. L'insieme de ste cartoline el forma na bela colession che, ancò, la ghà un importante valor storico: Storia de la "Scaligera" ma anca storia de Verona. Associassion Filatelica Scaligera - Palasso Carloti, in Corso Cavour 2 Verona ..... Ass. Scaligera e Circolo Dipendenti Unicredit / Colessionismo par i zoeni - via Rosa 7 Vr

^ torna su ^

Verona Fiere - Francobol emesso nel 1998 in ocasion dei 100 ani dela fiera de Verona. Sogeto: la fiera. Tiradura: 15 milioni de esemplari....
Piassa dei Signori - Francobol emesso nel 1998 in ocasion dei 100 ani dela fiera de Verona. Sogeto: la fiera. Tiradura: 15 milioni de esemplari....

Cap.5 - Le Monede Veronesi
No bisogna desmentegar che anca le monete le ocupa un posto storico a Verona …nel 1942 ghè stà infati la prima Mostra -vendita de monete (alora tute numismatiche) alestida soto la Gran Guardia dala dita Oscar Rinaldi. Chi soto vien riportade alcune monede veronesi:

epoca: Berengario II° re d'Italia nome moneda: Denaro davanti: BERENCARIVS RE nel campo, croçe de drio: VERONA nel campo, croçe metàl: Argento gr: 1,465 dim.: mm 20,5 h 6

epoca: Comunale nome moneda: Grosso da 20 denari davanti: legenda incomprensibile
de drio: VERONA e legenda incomprensibile metàl: Argento gr: 1,551 dim.: mm 20,7 h 7

epoca: Bartolomeo e Antonio dela Scala nome moneda: Quattrino davanti: BTOLOMEVS - scala a çinque scalini drento contorno perlinado; de drio: ANTONIVS - croçe metàl: Argento (lega) gr: 0,720 dim.: mm 15,6 h 12

epoca: Antonio dela Scala (1381-1387) nome moneda: Grosso da 2 soldi davanti: ANThS. DELA SCALA- can alado con scala su scudo; de drio: S. ZENO DA VERONA - el santo mentre benedisse; metàl: Argento gr:1,813 dim.: mm 23,3 h 5

epoca: Gian Galeazzo Visconti nome moneda: Grosso o Pegione da un soldo e meso davanti: COMES VIRTVTVM D. MEDIOLANI V3C'- bisso al çentro; de drio: S. ZENO D. VERONA - el santo mentre benedisse; metàl: Argento gr:2,411 dim.: mm 24,5 h 1