Albaredo l'è posissionà 'ndoe el progno Alpon el se buta ne l'Adese, a 30 km diression sud-est da la çità de Verona. El teritorio l'è stà abità con tuta probabilità fin da l'antichità, prima dai Euganei e dopo dai Atestini verso el 1000 a.C. In epoca romana dopo la bataja de Azio nel 31 a.C. contro Antonio e Cleopatra, el vitorioso Otavian "Augusto" el g'à dà ai soldà veterani dei tereni da spartirse, formando cossita de le colonie, come nel caso de Albaredo. L'Adese no'l passava in 'sta zona in quel periodo ma da Cologna Veneta in diression Montagnana-Este, 'n fato parò importantissimo l'à fato deviar el corso del fiume verso Albaredo: la tremenda piena con relativa "rotta della Cucca" (=Veronela) del 17 otobre del 589 d.C. El primo documento scrito 'ndoe podemo 'edar el nome de Albaredo l'è quel del 893 d.C., che ne dise de la donassion de la "Curte de Albareto" da parte de Re Berengario I a la contessa Gisla. Tra i propietari de Albaredo da segnalar Giovanni Vescovo de Verona che nel 1035 l'avea comprà piassé del 30% dei tereni donà nel 1037 al Monastero Benedetin de SS.Nazar e Celso; nel 1077 Albaredo l'era de propietà de la casa d'Este e in 'sto periodo le tere tra l'Alpon e 'l Guà i era soto la giurisdission del governador de Vicensa; da Enrico d'Este la zona l'è passa nel XII secolo, come ne dise un ato de vendita, ne le mane de Crescenzio fiol de un comerciante de Verona, che l'à dà origine a la potente fameja dei Crescenzi con pien control su Albaredo fin a l'arivo de Eselin da Roman. E grassie a Eselin nel XIII secolo, scomincia le lote tra i ghibelini da lu guidà e i guelfi con a capo i Sambonifacio. In che'l periodo i Trevigiani, i Vesentini e i Padovani i s'era messi d'acordo par çercar de vìnsar su Eselin, butando zò tuto quel che gh'era de strategico longo la strada verso Verona, come nel caso de Albaredo arente a l'Adese e de la so "Rocca de Rivalta" ('desso loc.Motta), ricostruida in poco tempo dai Crescenzi mentre tra el 1232 e 'l 1237 el castel l'à cambià paron un fraco de 'olte fin a la so completa distrussion da parte de Eselin. Con i Scaligeri s'à 'isto un çerto svilupo de Albaredo anca parché la popolassion l'era stà esentà nel pagamento de le tasse, ma essendo ligà ai De la Scala gh'è tocà subir tuti i vari episodi politiçi e militari de Verona. Nel 1338 da 'ste parti jè passadi anca i Fiorentini e i Venessiani aleadi contro Mastino II, ciavando tuto quel che se podea ciavar e butando soto-sora tuto el paese fin a la paçe del 1339. Nel 1387 dopo i Scaligeri, Albaredo l'à perso tuti i privilegi e vendù a Nicolò Bastiani mentre nel 1392 tuti i beni de Rivalta jè passadi dai Visconti a Iacopo del Castello. Con Francesco Carrara paron de Padoa pochi ani dopo, se vede la nassita su l'Adese de un ponte fortificado e par deventar paron de la Marca Veronese l'avea dichiarà guera ai Visconti. L'an dopo nel 1406 jè rivadi i Venessiani che dopo aver vinto sui Carraresi i s'à imposessà de Albaredo. Soto la Serenissima a parte el passajo de le trupe de la Lega de Cambrai e la peste nel 1630 la vita l'è andà avanti in tuta tranquilità con el costante svilupo del comercio su l'Adese. Nel 1797 jè arivà i francesi portando casini e guere ripetude contro i austriaçi fin a la paçe del 1815. Nel 1870 l'è stà costruido un ponte par unir le do sponde de l'Adese (fasendo parò pagar un pedagio) e fato saltà in aria nel 1945 dai todeschi in fuga ne la seconda guera mondial. Da segnalàr la césa parochial de Santa Maria ricostruida nel 1735 sui resti de 'na vecia césa del XIV secolo ma restaurada piassé 'olte nei ultimi secoli; drento gh'è conservà 'na tela del pitor veronese Francesco Montemezzano dissepolo de Paolo Caliari "el Veronese" e 'na bela statuain legno color oro del XV° secolo. A Cà del Sete se pol darghe n'ociada a la césa de Santa Lussia costruida sicuramente prima del 1480 quando l'è stà afrescà el presbiterio; tra i afreschi da segnalar quei del XV secolo con la "Madonna in trono allattante bimbo", " Madonna in trono tra i SS. Giacomo e Caterina", "Madonna in trono tra i SS. Antonio Abate e Rocco" e "San Rocco". Tra le vile da 'edar Vila Perosini-Fontana in stile rinassimental e con linee neoclassiche, Vila Serego-Rinaldi in località Becasieta de Corian conossuda fin dai tempi dei Scaligeri parché Antonio de la Scala el ghe l'avea regalà nel 1382 al so capitan general Cortesia Serego, Vila Colombaron-Rocca a Rivalta antico castel trasformà in nobile residensa.