Angiari, el se cata a 37 chilometri in diression sud da Verona con a est l'Adese e a ovest el Canal Bussè. Par questo paese l'Adese l'è stà una fonte de svilupo economico, 'ista la presensa de un porto, non massa grando, che'l vegnea utilisado anca dai abitanti dei comuni vissini, con "scalo" dei burchi che i trasportava una serie infinida de mercansie oltre a legna, giara e sabia. El nome Angiari secondo i esperti el seriva dal latin "in glareis" ne la giara, molto probabilmente trasportada da le aque de l'Adese, che in questo paese l'à provocà nel corso dei secoli numarose piene. Un documento del 935 el ne parla del borgo fortificado de Angiari "Castrum Anglarii" con céseta e relativa corte, regalado ai Canonici de Verona da Ermengarda mojer de Gandolfo de la nobile fameja dei Gandolfingi-Di Palazzo. Papa Eugenio III conferma ne l'elenco de le pievi veronesi al Vescovo Tebaldo II nel 1145, anca quela de Angiari dedicada a S.Michel Arcangelo:"Plebem Englari cum capellis et decimis et quidquid aliud ibidem juste possides". La césa atual l'è stà consacrada nel 1772 mentre el campanil l'è del 1842, a l'interno la Circoncision dipinta dal pitor G.Batista Rossi e 'na Santa Eurosia de Antonio Pellegrini. Da 'edar l'Oratorio de Santa Crose del 1523 longo el Bussè vissin a la provincial che la va da Roerciareta a Legnago, con dipinti del '500, du altari de cui uno in marmo del '600 e n'altro più picenin in legno del '500. Molto bela l'è la Vila Lando-Murnovo del '400 con modifiche del '700 ne la piassa çentral del paese. Famosa l'è anca la Corte Vidali-Murnovo definida "la casa grande de Angiari" che nel '700 la gavea un posso, un forno, la corte, la caneva, 'na stala, un fienil e 'na barchessa e che 'desso la conserva gran poco de l'aspeto original. Infine da segnalar l'è anca la bela Corte domenical Avrese a la Paina, con du portali, tori colombare del '400 e un bel giardin.