Comune posissionà ne la campagna de l'est veronese e traversà da l'Alpon. Su l'origine del nome gh'è varie ipotesi, el toponimo Arcole podarìa derivar da arculae sepolcri non grandi o da l'arma harcus par tirar le frece. Anca l'origine del paese no l'è sicura, i numarosi reperti catadi durante i scavi archeologici podarìa farne pensar de la presensa romana nel teritorio anca se no l'è da butàr l'ipotesi de un insediamento ne l'Età del Bronso de la "çiviltà teramare" mentre el primo documento scrito su Arcole l'è del 1075. Nel medioevo se parla de la presensa de 'na fortificasion "Castrum de Arculis" come 'ne dise el cronista Rolandino nel 1224 su i numarosi assalti de Eselin da Roman terminadi nel 1242 con la distrussion del castel insieme con quel de San Bonifacio. Un documento del 1375, inveçe, ne parla de la costrussion del Palasso de Giustissia a Soave voludo da Cansignorio co i schei dei vintiun paese che i era soto la giurisdission de Soave, tra cui anca Arcole. Dopo el periodo Visconteo l'è stà l'ora nel 1405 de la Serenissima in paçe e con 'n notevole svilupo economico del paese fin a l'arivo dei francesi. Famosissima nel mondo l'è la bataja de Arcole combatù nei giorni 15-16-17 noembre 1796 tra le trupe Napoleoniche e quele austriache. Par ricordar 'sto evento l'è stà posissionà nel 1810 un obelisco arente al ponte su l'Alpon 'ndoe Napoleon l'à combatù e vénso la bataja, sensa desmentegarse che a Parigi su l'Arco de Trionfo gh'è scolpido el nome de Arcole. Par ci vol aprofondir l'argomento el pol far 'na visita al Museo Napoleonico de Arcole. Da 'edar in paese gh'è Palasso Ottolini del XVII secolo con portego a quindese archi con sora dei bei mascaroni, Vila Malaspina-Pellegrini "la Decima" 'ndoe un tempo se pagava le Decime (tasse) ricostruida nel 1563 sui resti de n'altra costrussion, mentre, arente gh'è "l'Arco dei Croati" fato con i quarei nel '400. Ne la frassion Alzana gh'è la céseta del XII secolo de Santa Maria arente a l'Alpon, documentà fin dal 1199, che la se presenta con 'na bela fasada in stile rinassimental e campanil a forma de toreta de l'800. Drento se pol amirar du bei afreschi, "La Madona col Butin" ritegnudo miracoloso e la "Pietà". Poco distante da la césa se pol far 'na visita al Museo de la çiviltà contadina con vecie atressadura agricole e reperti interessanti de un tempo. E par ci ghe piase el vin, magari pol bearse un bel goto de Arcole D.O.C. in una de le so forme, Bianco, Rosso, Sciardonè (Chardonnay), Pinot Bianco, Pinot Griso, Garganega, Novel, Cabernet, Merlot e Cabernet Savignon (Sauvignon) a la nostra salute! Foto: Obelisco che ricorda la bataja Napoleonica del 1796