Comune de la Val de Ilasi con le frasioni SS.Trinità, Sant'Andrea, San Valentin e Sprea a nord de Tregnago e a sud de Selva de Progno. In 'stà zona jè stà rinvegnudi reperti de l'età del fero mentre la prima testimoniansa scrita su Badia Calavena l'è del 1040 su 'na lapide, 'ndoe ne vien dito che soto la giurisdission del Vescovo de Verona el todesco Walterio, l'è stà costruido un castel (1037 d.C.) sul col San Piero. Costrussion che parò l'è durà poco e precisamente fin al 1052 d.C.; cossita, al so posto, se vede la nassita del Monastero de Santi Piero con monaci todeschi de l'Ordine de San Benedeto come par l'Abasia de San Zen a Verona. El monastero nel corso dei ani l'era deventà sempre piassé importante e pien de schei, grassie a le donasioni de vescovi, papi e imperadori. Nel periodo de massimo splendor, verso la fin del XII secolo, grassie a 'na bola papal, tra i beni e le propietà de San Piero se vede anca le cése a le porte de Verona, Soave, Monteforte, Cologna, Cavaion. El 10 dugno del stesso ano, Papa Lucio III scapà da du ani da Roma e rifugiado a Verona el consacra personalmente la césa de San Piero fondà nel teritorio de la Calavena, la val che da Tregnago la menava fin oltre l'atual Badia. Nel 1287 el Vescovo de Verona Bartolomeo de la Scala el ciama dei boscaioli-cimbri "Tzimberer" originari de la Baviera, dandoghe dei tochi de tera in Lessinia par abitarghe e disboscar in parte. Se vede la nassita in 'sto periodo dei "Tredese Comuni Veronesi" Cimbri, 'ndoe ne l'elenco dei Comuni del 1326 gh'è Sprea con Progno che sarìa la vecia denominassion de Badia Calavena. La convivensa tra i abitanti de Badia e i monaci nel corso dei ani l'era deventà sempre piassé dura, con numarose beghe par pascoli e tereni, come quela ricordà in un documento del 10 genàr 1333. Nel 1390 i montanari de la zona jè riussidi a difendarse e far prigionieri i soldà de le trupe Carraresi spinte fin qua dopo la bataja coi Visconti. Dopo i Scaligeri l'è la 'olta dei Visconti e dei Venessiani che i le conferma nel "Vicariato de la Montagna" con giurisdission de la çità de Verona. Tra el 1424 e 'l 1433 par volontà de l'Abate Maffei vien costruido el novo monastero, ai pié del monte, 'ndoe gh'era la césa dei SS, Vito e Modesto, passà nel tempo ne le mane de la Congregassion de Santa Giustina de Padoa e nel 1443 in quele dei Benedetini de San Nazar de Verona. Nel '500 se vede le inmancabili beghe tra i monaci ormai in decadensa e i abitanti par el control de la zona, declino arivà nel 1529 con l'ultimo abate comendatario. Cossita se vede la nassita e 'l svilupo de l'abitado de Badia, anticamente posissionà intorno al Monastero e ne la parte alta del paese. A parte la peste del 1630 che l'à sbassà el numaro de i abitanti, la vita in sto periodo l'è andà avanti in tuta tranquilità fin al 1797 quando l'è arivà Napoleon. El teritorio veronese el vien diviso in 'sti ani in "Distreti" e Badia l'era el çentro de quel de la "Montagna". Nel 1810, con 'na riforma francese, tuti i beni eclesiali i passa ne le mane dei vari comuni de la provincia. E intorno a la metà de 'sto secolo, se verifica el fenomeno de la grande emigrasion verso la 'Merica lassando quasi 'udo el paese. Tra le cése, da visitar gh'è quela parochial, dedicà ai SS. Vito, Modesto e Crescenza su i resti de l'antica abazia, infati de 'sta costrussion gh'è rimasto el ciostro del '400, el portego, la Sala Capitolar e 'l campanil. Drento a la césa podemo amirar un bel tabernacolo scolpido e do tele una del Cavazzola e l'altra del Turchi conossudo come "l'Orbeto". Tra le figure importanti ricordemo Don Zocca el "Prete da Sprea" el piassé grande conossidor de le erbe mediche. Curiosi jè i "Trombini" ciamadi anca "Pistoni" o "S-ciopi da Sagra", armi a avancarica utilisà dai "Pistonieri de l'Abazia" par momenti significativi ne le feste paesane. E se Ve piase caminar alora val la 'pena far quatro passi o par i sentieri in meso ai boschi o par le contrà par 'edar le case afrescade de Sant'Andrea e de Pergari, la colona con la Beata Vergine co'l Butin a Valcasara de soto.