Secondo n'iscrission scoerta su un antico sarcofago, le origini del toponimo le deriva da Bardàli, fiola del Re Aulete, fradel de Ocno, forse fondator de Mantoa.

M-AR-M-PARDALI PUELLA
TENERMA-AULETIS
REGIS-FILIA-BENACENSES

Antico insediamento palafiticolo, sucessivamente ocupado da popolasioni retiche e sensa contar che l'era molto importante anca in epoca romana, infati el nome de la frassion Sisàn (Cisano), deriva da "Caesius", antico abitante roman, paron de un teren in questo logo. A Bardolin (deventà libaro comun nel 1193), ghè stà la visita anca dei Scaligeri de cui podemo ancora 'edar tochi de mura difensivi, Porta Verona, Porta S.Gioani e du tori che le varda el lago. E propio soto el dominio scaligero, Bardolin fasea parte de la "Gardesana del'Aqua", federasion de diese comuni (Malsésen, Brenson, Pai, Tórri, Albisan, Garda, Costerman, Bardolin, Sisàn e Lasise) che la gavea compiti de repression e de ripartision dei oneri fiscali oltre a una larga autonomia, riconossuda anca da i dominadori sucessivi come i Visconti (1387), i Da Carrara (1404) e la Republica de Venesia fin al 1802. El Paese l'è da sempre considerado un grandioso çentro de sogiorno basta vardar vile e palassi fati costruir da le fameje nobili de le çità visine. La Vila Gianfilippi-Campostrini del 1541 a esempio l'à ospitado lo Zar Alessandro de Russia, La mojer de Napoleon, Maria Luisa duchessa de Parma, e Ferdinando IV de Napoli. Da segnalàr anca le vile otocentesche Vila Guerieri-Rizzardi, Bassani, Betteloni, Carrara-Bottagisio. Tra i edifici sacri de un çerto valor gh'è el complesso romanico de la césa de San Severo. Dovì pensàr che nel'893 in un documento scrito da Berengario I° Re d'Italia se parla de questa césa, rifata e sgrandà a le atuali proporsioni tra l'XI e 'l XII secolo. La cripta l'è l'ultimo resto del tempio precedente. A l'interno la se presenta a tri navade con querto a capriade; su la navada çentral se pol notàr dei magnifiçi afreschi rafiguranti "El ritrovamento de la crose da parte de Sant'Elena e l'Apocalisse". Su l'Abside meridional, l'è murado a l'esterno un "genietto" funebre roman. Poco lontan catemo la céseta de San Zen (tra VIII e IX sec.) incastrada tra le case de una corte rural con interessanti testimonianse de architetura carolingia veronese e con un sacel a crose latina. Bardolin el presenta una bela serie de cése come quela parochial dei Santi Nicolò e Severo con fasàda Neoclassica, ricostruida su disegno de l'architeto veronese Bartolomeo Giuliari tra el 1830 e 'l 1844 su i testi de una precedente césa dedicada a San Nicolò risalente a quanto i dise al 1223. Sempre nel çentro storico ricordemo la césa de la Dissiplina costruida nel 1393 da la confraternita dei Dissiplinadi e 'desso sconsacrà. Ai piè de la Roca de Bardolin in diression Garda catemo la céseta de San Piero con interessanti afreschi e tele. Sora la Roca, inveçe, gh'è i resti del Priorado de San Colonban ricordà dal' 862, quando el dipendea dal Monastero de San Colonban de Bobbio. Poco distante, ghe l'Eremo de San Giorgio dal 1530 el dipendea, dal Priorado de San Colomban e sucessivamente riedificado nel 1663 dai Camaldolesi. ancora presenti. Tra le opere conservade segnalemo "San Romualdo" de Palma il Giovane (1548-1628). Su le coline de drio al paese, gh'è la céseta de San Vito de Corteline del XIII secolo con al so interno un ciborio longobardo e un reliquiario. Da segnalar ne la frassion de Sisàn la pieve romanica de Santa Maria con iscrissioni medioevali e poco lontan, drento al çimitero la céseta de San Vito. A Calmasin, altra frassion de Bardolin, gh'è la curiosa césa de San Michel (VIII sec.) con i "muraglioni" costruidi con le serégne, piere tonde trasportade in epocalontana dai "ghiacciai". Poco lontan duranti dei scavi jè stà catade tombe longobarde de l'VIII secolo. Foto: Césa de San Severo