Molto curiosa l'è l'origine del nome de 'sto comune che molti secoli fa el se ciamava in un modo non massa elegante, "Porcile". L'è par 'sto motivo che i abitanti stufi de essar tolti par el cul dai comuni vissini el 13 zenar 1547 con 'na dimanda al Consilio dei Dodese de Verona e firmada anca da numerosi nobili del paese tra cui Jacopo Cipolla, Pietro de Pitati, Pier da Cerea, Alvise de Cerolli, Francesco Zan, Bertolamio Aleardo e Nicola Cesenato, i à otegnudo el canbio de nome, da Porcile in Belfior in meno de una setimana. In epoca Romana "Porciles" l'era traversà da la Via Porcilana che partendo da San Martin Bon Albergo la univa la Via Postumia a la Via Emilia-Altinate. Dal punto de 'ista artistico de particolar interesse l'è el Santuario de la Madona de la Strà o Césa de San Michel, costruida nel 1143 su n'altro edificio sacro de l'VIII secolo, in stile romanico veronese. L'interno l'è a tri navade con l'alternarse de colone e pilastri con capitei e dei fantastiçi afreschi del quatrosento con rafiguradi Sant'Onofrio, Sant'Agata, Santa Coronata, San Bartolomeo, Santa Maria Madalena, un vescovo e un apostolo. Su 'n par de colone podemo lésar dei fati storiçi riguardanti la césa: el primo el ne parla de una bataja sucessa ne le vicinanse mentre el secondo el ne parla de un feràr de Zevio che l'a costruido la césa. Da segnalàr la statua lignea del 1497, rafigurante la Madona sentà con el Butìn su zenoci mentre el struca ne la man un pìtaro, atribuida a Gioani da Zebellana. Ne l'Abside de sanca podemo catàr un bel crocefisso ligneo del tresento. Da 'edar consilemo le tri vile presente ne la zona: Vila Cipolla conossuda anca come "La Panterona", del 1692, con tor, colombara, posso e Capela de San Giusepe; la Vila Tantini l'è del siesento e la presenta una tor de avistamento con merladura de l'otoçento, costruida sicuramente prima de la vila, usada probabilmente come postassion de control su la Porciliana, strada imperial fata costruir da Berengario I° Re d'Italia; in località Brion inveçe gh'è Vila Moneta, de la metà del sinquesento, con afreschi del Vasari come "Ratto di Europa" e 'n altro con divinità come Venere, Giunon, Diana, Giunone, Amor e Psiche.