Comune de la bassa veronese a 46 chilometri da Verona con la so frassion Marega. In località Casteleto l'è nato l'antico çentro de Bevilaqua ai tempi de romani, 'ndoe ghe passava la "Strada Vicinalis" che la univa Ostiglia a Este. Prima de la famosa "Rotta della Cucca" (antico nome de Veronela) del 19 otobre 589 d.C., l'Adese el traversàva el Comune de Bevilaqua. Nei secoli sucessivi l'à subido un mucio de invasioni barbariche catandose el più de le 'olte in meso a le bataje come quela tra veronesi e padovani nel 1142 par el "dirito de cadéna", così nel 1336, Guglielmo Bevilacqua par conto dei Scaligeri l'à costruido 'n castel-fortessa par difendarse dai Cararesi e dai Estensi. La fameja Bevilacqua che l'à dato el nome al paese l'era de origine trentina e par essar precisi de Ala, 'ndoe i era brai comercianti de legna. A Verona, Guglielmo a la corte de Mastino de la Scala, el godea de una discreta fama tanto da ricevar l'investidura de Vassal del Vescovo, mentre so fiol Francesco, che l'à terminado el castel, l'era un ambassador tra i più famosi de l'epoca. El castel che durante la Lega de Cambrai l'è stà roinà, el vien trasformado da l'architeto Sanmicheli nel 1532 in vila, mentre nel 1756 Gaetano Ippolito Bevilacqua l'à restaurado l'interno, ma nel 1848 i austriaçi i g'à tacà fogo. Restaurado diese ani dopo da Felicita B., el vien trasformado in casa de riposo nel 1933 e ocupà dai todeschi ne la seconda guera mondial. Ma le rogne par sto castel no jè finide. Nel 1966 a l'interno, l'è s-ciopà 'na caldaia (a l'epoca gh'era un colegio dei Salesiani) brusando tuto da novo. Dopo èssar stà lassado al sò destin, dal 1990 grassie ai Cerato, el pol essar ancora amirà nel so splendor. Da 'edar l'è la ceséta de San Pierin con dipinti del '300-'400 con fondamenta romane, anticamente pieve de un abitado ciamà Porto.