Bonavigo confina a Ovest con l'Adese e su la sponda oposta con Roerciareta e Angiari. A nord con Albaredo e diviso da una strada che 'na 'olta l'era el vecio ramo de l'Adese che l'andava verso Montagnana. A est con i comuni de Veronela e Minerbe mentre a sud con el Comune de Legnago. El comune de Bonavigo el se cata a çirca 35 chilometri da Verona ne la zona de pianura denominada "Bassa Veronese". Le origini del paese jè molto antiche come i ne dise dei documenti del l'887, ma tombe e lapidi le ne fa pensar a un insediamneto roman. El nome Bonavigo el deriva, secondo alcuni, dal longobardo "Botanicu-Boto", mentre par altri documenti, del 959 e del 1041, i parla de "Vicus Bonadicus". Anche nel 1145 'na bola del Papa Eugenio III la parla de "Curtem Bonadigui cum Ecclesiis et decimis", corte de Bonavigo con cesa e campi. Le invasioni barbariche e le disastrose piene de l'Adese, le avea sconvolto par secoli la vita de le popolasioni rurali de tuta la zona. Solo dopo aver incanalado e deviado el fiume da parte dei frati Benedetini e la fine de i sachegi da parte dei barbari, el teritorio l'à ciapà l'atual forma. Essendo parte de l'impero romano-germanico, anca Bonavigo l'è deventà ogeto de varie concessioni fate dai vari imperadori a vescovi, monasteri e vassali. Al tempo dei Scaligeri Bonavigo l'era vicariato indipendente, par concesion de Cansignorio, el podea elesar el so' Vicario, che'l vegnea paga' coi schei che i catàa su dale multe. Nel 1405 paro' i venessiani i ga' passà el paese soto la vicaria de Angiari e partanto Bonavigo l'a perso sto dirito. In seguito a l'aventura Napoleonica, con el tratado de Campoformio del 1797, anca Bonavigo l'è deventà dominio austriaco, liberado nel 1866 quando el Veneto l'è passà soto el Regno d'Italia. Nel 1812 un lieto evento, la nassita del famoso poeta veronese Aleardo Aleardi. Durante la seconda guera mondial tra el 20 e 'l 23 april 1945 el paese l'a subido pesanti bombardamenti par fermar la ritirada dei tedeschi in fuga, çercando de butar zo el ponte. Ja fato una bruta fine la césa, el municipio e gran parte de le case vissine a la vecia piassa. Nel dopoguera, el çentro del paese l'è stà ricostruido più a est, grassie a la donassion del teren da parte de la fameja Lugo. Da visitar la Vila Brenzoni o Pellegrini, che nel periodo de Ezelin da Roman, l'era un castel fortificado. Bela anca La Bernardina, vila dove ne la cesa gh'è 'n interessante pala: Vergine sentada con Butìn. La cesa de Santa Maria, antichissima pieve dei Camaldolesi de San Michel de Murano, l'è del XI secolo con a l'interno un tritico del 1476 de Bernardo da Verona rafigurante la "Vergine in trono, un Vescovo e S.Gioan Batista". La cesa parochial de Bonavigo la conserva "la nassita di San Gioan Batista", atribuida nel 1769 a Paolo Caliari.