Possionado un tempo in un teritorio conossudo come "Silva Carpaneda o Carpenea", un area bela granda piena de vegetession e de boschi, da 'ndoe deriva el nome del paese. Le origini de questo comun jè romane 'isto le prime opere de bonifica del teritorio servide par costruir la strada "Vicinalis" che da Ostiglia la portava a Este. Citado in numarosi documenti come Bosco de Porto de Legnago, l'è sta feudo de la fameja scaligera dei De la Scala che nel 1377 i l'à passà ai Dal Verme mentre el 2 agosto 1387 l'è deventà feudo imperial soto Venceslao de Boemia e Germania. Passà a le dipendense de la Serenissima, nel 1455 el Bosco l'era controlà dai "saltari" guardaboschi, «necessarissimo al nostro arsenale e alle fortezze». Nel 1507 l'è stà costituido el comune de Boschi con titolo de vicariado. Nel 1509 passa soto Federico Cavalli e poco tempo dopo, soto la fameja venesiana Donà da le Rose. Nel 1690 l'è scomincià una vera e porpia opera de bonifica del teritorio. Nel 1806 con la paçe de Presburg el comune l'è entrà a far parte del regno d'Italia Napoleonico. Un par de ani dopo el passa a Legnago e nel 1815 con el Congresso de Viena el ritorna autonomo. Ma no l'è gnancora finìa, dal 1828 al 1947 l'è ancora a le dipendese de Legnago. El stema comunal definitivo l'è del 3/9/1958 con rapresentà l' Adese, un albaro cavà su, le letare S. A. e una stela sié ponte (una ponta par ogni frassion + quela del comune: Boschi San Marco, Oni, Belfior, Faro, Sabioni). La césa de Boschi Sant'Ana l'è deventà parochia nel 1690 par opera de la nobile fameja Donà da le Rose de Venessia mentre quela atual dedicada a San Gioachin e Sant'Ana l'è del 1884. La césa de Boschi San Marco l'è stà smembrà da quela de Porto de Legnago deventando parochia el 15 febrar 1929 ma in verità costruida e sgrandà nel 1400 dal Podestà de Venessia Barzoni. Dedicada inissialmente a la Madona de le Grassie l'è passa a San Marco Evangelista. Tra le curiosità da segnalar che drento una 'olta gh'era conservà un dipinto su legno de la Madona col butin che dorme atribuido al Liberale e nel 1690 l'è stà rinovà dal pitor Severin Sancelli, mentre la fasada esterna in stile neoclassico l'è del 1969 su disegno de l'ingegner Gioani Fregno. Infine ne la frassion Oni da 'edar la césa dedicada a Santa Giustina.