Importante Comun de la montagna Veronese, ciamà da Fogazzaro "la perla de la Lessinia", Boscocesanoa l'è posissionà tra la Val Squaranto e la Valpantena a nord del Séro, al çentro de 'n altopian çircondà da le frassioni Valdeporo, Corbiol, Arzerè, Lughessan e da un panorama stupendo con el Corno d'Aquilio (mt 1.545), Castelberto (mt 1.757), Monte Tomba (mt 1.767), Monte Carega (mt 2.130), Castelgaibana (mt 1.805). El teritorio l'a scomincià a popolarse fin da l'antichità come i ne dimostra i reperti del Paleolitico catà a San Giorgio, Lughessan e in Val Squaranto (grote del "Bus del Meo" e "Buso del Beco"). Prima de l'arivo dei coloni todeschi la zona de Boscocésanoa fasea parte, ne l'alto medioevo, de l'antica Frissolana e l'era un possedimento a boschi e pascoli, prima de propietà dei feudatari e dopo, come i ne dise un pochi de documenti, del Vescovo de Verona e dei Monasteri de San Zen (doc. 1014 d.C.) e Santa Maria in Organo (doc. 814 d.C. e 833 d.C.). Con un diploma de Otone I del 969 l'è stà concesso a de la zente de la Valpantena de poder sfrutar la Frissolana. Nel 1218 grassie ai canoniçi vien scrito 'n statuto par gestir al mejo la Frissolana, ma nel 1224 jè scomincià 'na serie de beghe par 'sti possedimenti tra el Comune de Verona e i canoniçi, che jè andà avanti fin ai tempi de Napoleon. La gestion aministrativa e giuridica de quela zona, a l'inissio del '200, ghe spetava a un gastaldo mandà dal Monastero de San Zen mentre i Scaligeri i s'à fati dar in feudo i pascoli no dasendogheli più indrio. Nel 1287 i coloni todeschi originari de la Baviera, conossudi come boscaioli çimbri "Tzimberer", jè stà ciamadi dal Vescovo de Verona Bartolomeo de la Scala par ciapar in concession dei tochi de tera in Lessinia par abitarghe e disboscar in parte. Par primo l'è stà sfrutà el teritorio de Roarè e pian pian jà fondà 'na noa comunità a Val de Poro (in cimbro Porrental) che la comprendeva anca la Frissolana (Frizzolana). Cangrande I nel 1326 el g'à concesso a la Frissolana de non pagar le tasse a Verona, privilegi confermadi anca da Mastino nel 1350 e da Cangrande II nel 1356. Con un diploma del lujo 1375 el Vescovo Piero de la Scala, l'à costituido in parochia la Ecclesia Nova (l'atual ceséta de S.Margarita), tra Val de Poro e Bosco-Frissolana, dedicà ai Santi Benedeto e Tomaso. Se vede la nàssita de Césanoa, ligà ancora çivilmente a Val de Poro. Nel documento del 1391 de Gian Galeasso Visconti, el Comun de la Frissolana sensa capologo, el vien nominà composto da Arzarè, Bosco Frizolana, Carcaro, Arbedo, Scole Boscorum e Valbusa mentre non risulta ne l'elenco Val de Poro. Nel 1403 nel Vicariado de la Montagna vien zontà anca el Comun de la Frissolana. Con l'arivo dei Venessiani vien rinconfermadi i privilegi Scaligeri, zà confermadi dai Visconti. Nel 1420 i paroni dei fondi de la Podestaria i à costituido la "Nobil Compagnia", restà in pié fin a la metà del '700, a scopo aministrativo e giuridico de la zona. Nel 1501 al çentro de l'atual paese de Boscocésanoa, a l'epoca Bosco Frizolana, l'era stà costruida 'na césa piassé granda de quela de prima 'isto l'aumento demografico, ciamandola con la denominassion "Ecclesia Nova". Da quela data risulta nei documenti Bosco Frissolana sinonimo de Césanova. Dal 1501 al 1621, Césanoa capologo del Comune de Frissolana aministrà dal "Massaro", comprendea parochia + çentro abitado + la parochia de Arbedo. Nel 1621 con la division dei Comuni de la Frissolana, Cèsanoa e Arbedo i deventa Comuni autonomi. Nel 1797 l'antico "Vicariado de la Montagna" l'è stà sostituido dal "Distreto de la Montagna" con Val de Poro frassion de Césanoa. Nel 1850 vien costruido la strada tra Verona e "Bosco Césanoa" e a l'inissio del '900 la césa atual dedicà ai Santi Benedeto e Tomaso al posto de quela vecia, mantegnendo la data 1501 scrita sul porton. Tra le curiosità, da sotolinear che Boscocésanoa l'erà indicà col nome de "Mênderla" ai tempi dei primi coloni todeschi, diminutivo de la parola cimbra "mandar" che vol dir mandria, pascolo. Al dì de ancò l'è deventà un teritorio turistico sia d'istà che d'inverno a Brancheto, Monte Tomba e Malga San Giorgio o in un panorama incantado come quel de la Podestaria. Da visitar sicuramente l'è el Museo Etnografico "La Lessinia, l'Omo e l'Ambiente" 'ndoe te vien spiegà la laorassion del late, del giasso, del carbon; numarose le opere d'arte popolar religiosa come le tipiche colonete, steli votive e dipinti de la Lessinia. Da visitar anca le sessioni stacade, la Giassara de Grietz e 'l Baito de la Coleta 'ndoe te vien spiegà la produssion del giasso e del late con i so derivadi.