Comun de la Bassa Veronese a 24 chilometri da Verona, posissionà con la frasion Vilafontana in un teritorio traversà da nord a sud dal fiume Menago. L'òmo l'è presente da 'ste parti fin da la preistoria come pol dimostrar i reperti scoerti nel 1876 ne la "necropoli" de località Prà Castel e in tuto el teritorio de Bovolon de la çiviltà "teramaricola", vegnù nel veronese a caval tra l'Età del Fero e del Bronso, nel 2500 a.C. çirca. Prima dei romani a Bovolon jè passadi i Atestini, i Etruschi nel VI secolo a.C. e i Gai Cenomani nel IV secolo a.C. El primo documento scrito su Bovolon l'è del 24 dugno 813, un "previlegio" del Vescovo Ratoldo conossudo come "pagina firmitatis" che podea distribuir in quatro parti "aequalis" (Vescovo, Clero, pitochi e Fabriche de la Chiesa) el guadagno del feudo de Bovolon; nel tempo Imperadori, Vescovi e Papi i à confermà al Vescovo de Verona i antichi privilegi de "Conte de Bovolon" fin a tuta l'epoca Venessiana. Quando l'è rivà la nova organisassion comunal, Bovolon, l'à scomincià a sviluparse, cossita el Vescovo par no perdar el so poter l'era andà a dimandar aiuto prima a l'imperador e dopo al "furbo" Comun de Verona che 'isto la situassion l'à messo le mane sul paese lassandoghe i veci diriti vescovili come sucesso al Vescovo de Verona Norandino a l'inissio del '200. In località Crosare verso la metà del XII secolo l'è stà costruì un castel come scrito nei documenti del 1154 e del 1178 "Castrum de Bodolone" deventà el çentro çivil e aministrativo del paese. A la fin del XII secolo grande svilupo agricolo e conferma inveçe par el comercio e soratuto s'à 'isto 'na bela cressita economica, mentre a l'inissio del XIII, jè scomincià i laori par incanalar in qualche maniera, el Menago, che'l corea libaro par Bovolon. Da segnalar che nel 1287 e nel 1313 no gh'era da magnar e nel XIII secolo da 'ste parti s'à 'isto anca le lote tra guelfi e ghibelini che jà messo soto sora el paese, come nel 1233, quando i mantoani amiçi de Rizzardo de Sambonifacio i gà tacà fogo par dar dispeto a Eselin da Roman. Bovolon in 'sto secolo l'è stà sempre in meso a le guere, prima par colpa dei soldà bressiani e mantoani nel 1234 e dopo par colpa de la riolta del 1269 de Pulcinela Da le Carceri e Lodovico Sambonifacio contro Mastino I De la Scala. In quel periodo, da segnalar la nassita de la Fiera de San Biagio nel 1278, mentre pochi ani prima la fondassion de l'Ospedal de San Daniel grassie a 'na donassion de Donna Verde, mojer de Alberto De la Scala e mare de Cangrande. Nel 1401 da segnalàr l'inissio del gran laoro de costrussion dei arzari del Menago finido verso el XVII secolo. Entremo cossita nel periodo Venessian, 'ndoe la vita a Bovolon l'è andà avanti tranquila a parte i briganti, le guere coi soldà de la Lega de Cambrai tra el 1509 e 'l 1516 e la peste del 1630 che l'à copà 800 abitanti su 2500 con sepoltura ne la fossa arente a la césa de San Pierin e Lasareto in località Lovara. Una de le poche note positive l'è stà el svilupo de la coltivassion dei morari par la laorassion de la seda, sensa desmentegarse de la risicoltura. Soto Napoleon nel 1796, jè scomincià le rogne, butando el paese soto sora con violensa e roinando l'economia, ma anca soto i austriaçi nel 1814 le cose no jè andà al mejo. Nel 1866 Bovolon l'è deventà italiana. Tra le cése da segnalar el Monastero de San Gioani Batista volù dai monaci benedetini tra la fin del XII e l'inissio del XIII secolo e consegnà ne le mane nel '500 dei Frati Minori Francescani; al dì de ancò gh'è restà l'Oratorio otagonal e le basi de la basilica dopo la trasformassion del monastero in casa colonica. L'antica césa de San Biagio, Fermo e Rustico del XII secolo, l'era un tempo la capela privata del Vescovo de Verona; ristruturà nel 1742 la se presenta con un bel campanil del '400 e la conserva 'na Pietà del quatrosento e dipinti del sinquesento de Nicolò Giolfino, Paolo Farinati e Felice Brusasorzi, del '700 de Gioani e Nicola Marcola, Saverio Da la Rosa, Gioani Batista Burato e Agostino Ugolini, un afresco sul sofito de Marco Marcola mentre del 1760 l'è l'altar magior in marmo dedicà al patron S.Biagio l'è del Maderna. La Parochial de San Giusepe del XIX secolo l'è stà scomincià nel 1844 e consacrà nel 1945. El Santuario de la "Madona de la Cintura" (ver.sengia) l'è stà volù da l'arciprete don Antonio Barbieri e dai abitanti de la contrada Madona nel 1648 e devastà dai francesi nel 1796. Tra le vile e palassi da segnalar el Palasso Vescovil che lo catemo scrito su 'na relassion de un notaio de la curia nel 1279 come "casa merlata"; al dì de ancò ospita la sede del municipio, la biblioteca comunal e 'l percorso tra i stili del mobile d'arte che da 'ste parti i le produse ben. A Vilafontana se pol 'edar la Vila Noris, 'ndoe gà dormio nel lujo 1796 Napoleon. Par ci ghe piase le curiosità, secondo tradission l'antico nome de Bovolon "Bodolonem" vol dir "Tera de le Rane" mentre i studiosi i le fa derivar da "Bodos" che ne l'antico idioma greco-romano vol dir "piano de la crea" pianura con tera argilosa; come proa de 'sta version esiste ancora la contrà Creari 'ndoe un tempo gh'era de le fornase par quarei e anfore. Dopo aver leto tuta la storia de Bovolon Ve convien sponsar un poco o far quatro passi nel magnifico parco "Val del Menago".