El teritorio de Brenson, el parte da le aque del Lago de Garda par dopo rampegarse fin su le greste del Monte Baldo, traersando tereni coltivadi a olivo e rusteghe contrà sparse chi e la. E par comprendar mejo come jè sudivise le frassioni e relative contrà, analisemo le parochie. Brensòn el g'a la parochia a Magugnâ (Magugnano) 'ndoe podemo catàr el municipio e le contrà Marnìga e Câmp (Campo) mentre la Césa l'è dedicada a San Gioani Batista. Nel sié e seteçento s'à stacà le parochie de Castelét (Castelletto) e Castèl (Castello); la parochia de Castelét l'è dedicada a San Carlo Borromeo e la conta do contrà Biàsa (Biaza) e Fasór (Fazor). Da visitar gh'è la césa romanica de San Zen da l'oselét del XII secolo; a Castèl gh'è la parochia de Santa Maria Assunta o de Castelbrenson con le contrà La Sénsa (Assenza), Pôrt (Porto), Somaìla (Sommavilla), Bosî (Boccino), Boràch (Borago) e Zignâch (Zignago). Parfin la ceséta de Santa Rosa arènte al Rifugio Telegrafo del Baldo dipende da 'sta parochia. Tra le curiosità ghe la famosa "Piera de Castelét", un lastron de l'età del bronso con relative incisioni de 4550 ani fa nel palasso del municipio a Magugnâ. Carateristica l'è l'isola disabitada de Trimolon (Trimelone) di fronte a la sponda de La Sénsa, che nel X secolo l'è stà fortificada contro le invasioni dei Ungari; La fortessa l'è stà butà zò da Barbarossa nel 1158 e ricostruida dai scaligeri. 'Na çinquantina de ani fa, l'isola longa 200 metri, l'era usada come deposito par material militar, ma dopo n'esplosion la s'à mèsa spacà su. Secondo 'na legenda el nome Brenzone el dovarìa derivar dal paladin de Carlo Magno, un çerto Bruncione ma se vardemo le varie derivasioni etimologiche latine Brencionum, Branzonus, Brunzonium l'è più probabile che vegna indicà un teren montagnoso o mal gualivo. Gh'è ci dise che'l nome el possa derivar da la tribù germanica dei Brenni posissionada sul Monte Baldo o da una nobil fameja. Storicamente el primo çentro abitado l'è de origini romane anca se, come avemo 'isto, i "grafiti rupestri" jè de l'età del bronso quindi la presensa de l'omo nel teritorio l'è milenaria. Dopo i romani jè passadi i longobardi che jà fortificado la zona con i castei de Trimelon, Castelbrenson, Câmp e Biàsa par difendarse da le invasioni barbariche, mentre Federico Barbarossa l'à pensà ben de tirarli zò a metà del XII secolo. Analisemo ben le belesse artistiche del teritorio: a La Sénsa gh'è la céseta del XIII secolo dedicada a San Nicola con magnifici afreschi. Chi la fameja Scudellari a la fine del '600, l'à fato costruir una vila deventà residensa de la fameja Spolverini; a Castèl se pol amirar le carateristiche abitasioni in piera e la césa parochial costruida da un çerto Bartolomeo Noto quondam Bonaventura a propie spese nel 1336 con l'autorisassion del Vescovo Teobaldo. Sgrandà nel 1579, ricostruida nel 1813, consacrà el 6 agosto 1930, la presenta drento un imagine lignea de la Madona del colera ritegnuda miracolosa; Da visitar a tuti i costi l'è Câmp con la céseta in rovina de San Piero con mura interne afrescade in stile bisantin, un castel picenin sconto da la vegetasion e un borgo pitoresco e rustego de origini medievali ma lassà al so destin; Castelét presenta oltre a la ceséta de San Zen anca 'na bela césa parochial in stil neogotico ricostruida su inisiativa de mon. Giuseppe Nascimbeni dopo èssar stò restaurada nel 1826 parché in precedensa i gavea tacà fogo; Biàsa (Biaza) con la so césa de Sant'Antonio, con afreschi del tri-quatroçento.