El teritorio del Comun de Bussolengo l'è posissionà a metà strada tra la çità de Verona e 'l Lago de Garda e varda la Valpolesela. L'omo l'è presente da 'ste parti fin da la preistoria come i pol dimostrar i reperti de l'età del bronso, del fero e de la çiviltà teramaricola vegnudi a la luçe nel teritorio. In epoca romana l'era ciamà "Buxumlongum", da la presensa de boschi de bossi (bot. buxus sempervirens) longo l'Adese, anca se i dise che podarìa vegnér dal longobardo "Gussilingus", "Guxolingo" "Guxolengi", come riportà da antiche carte veronesi dal IX al XIII secolo. La zona l'è deventà importante soratuto quando, soto el dominio de Roma, la vegnea traersà da la Via Claudia Augusta, che vegnendo da Verona, la menàva verso nord. Piassé tardi gh'è da registrar el passajo dei "Unni" soratuto in località Cà de Capri mentre in epoca Longobarda Bussolengo l'era a le dipendense del Comitato de Verona e 'in 'sto periodo s'à svilupà el comercio su l'Adese. Nel IX secolo el Monastero de San Zen l'era paron de una parte del teritorio mentre ne l'807 Re Pipin el g'à regalà el paese e la selva del Mantico al Vescovo Ratoldo de Verona. Tra i documenti storiçi de 'na çerta importansa, da segnalar quel de l'825 che'l parla del paese "vico Gussilingus" e quel del 1213 'ndoe se lese de la presensa de un castel 'ndoe 'desso gh'è l'ospedal Orlandi costruì dopo l'invasion dei Ungari del 899. Nel 934 l'è vegnù in Italia Arnolfo de Baviera ciamà da Milone e Raterio par fermar Ugo de Provensa ma propio a Bussolengo l'è stà sconfito dopo 'na bataja. Verso la fin del X secolo Bussolengo fasea parte de l'organisassion aministrativa ciamà Iudicaria Gardense. Nel XII secolo l'è stà costituì la "Libara Università" con a capo el podestà mentre pochi ani dopo Verona, Bussolengo l'è deventà libaro comun. Federico Barbarossa nel 1154 l'à confermà al Vescovo de Verona la gestion del paese. Nel 1233 Eselin da Roman l'è passà da "Busiolengo" 'ndoe la messo a fero e fogo el paese mentre nel 1237 l'è stà aiutà da l'amigo Federico II che 'pena vegnù in Italia l'à posissionà el so campo al Mantico. Nel periodo Scaligero s'à 'isto un çerto svilupo a Bussolengo con el comercio su l'Adese, l'industria de la lana e l'agricoltura grassie a la nassita dei molini. Nel 1326 grassie a un decreto de Cangrande, San Vito al Mantico l'era deventà Comun con giurisdission fin a San Massimo. Verso la fin del XIV secolo soto i Visconti, Bussolengo fasea parte de la federassion de la "Gardesana de tera" che g'avea sede a Tori, 'ndoe el Capitan e relativo consejo i goernava anca su la Federassion Gardesana d'Aqua. Nel XV secolo soto la Republica de Venessia l'era stà costruì 'na fortessa (bastia) che insieme a quela de Pescantina riussìa a blocar le vie de comunicassion verso Verona a l'epoca dominà dai Cararesi. Nel periodo Venessian Bussolengo l'era a capo de uno dei Vicariati de la provincia Veronese con a le dipendense Somacampagna, Sona, Palassol e Ganfardine. Da segnalar el continuo svilupo economico soratuto de l'industria de la seda mentre a l'inissio del XVI secolo se vede la nassita de la Fiera de San Roco e propio in 'sti ani l'è stà costruì el Municipio rifato ne la version atual nel 1852. Nel 1630 Bussolengo l'è stà messa soto-sora dai Lansichenechi che i à portà la peste ridusendo la popolassion de la metà. Nel XVIII secolo l'è stà ocupà, durante la guera de sucession spagnola, dai francesi mentre nel 1711 l'è s-ciopà la malatia del "mal cascà" a bo e vache ma grassie a l'invocassion del patron San Valentin da parte de la popolassion, non s'à pì verificà. Da quel momento l'è nata la tradissional benedission de le bestie trasformà col tempo ne la Fiera de San Valentin. Da la fin del XVIII secolo a metà de l'800 da registrar bataje e scontri tra francesi e austriaçi nel teritorio, con comando prima de uno e dopo de l'altro su Bussolengo. Nel risorgimento scontri tra piemontesi e austriaçi fin al 1866 quando el paese l'è deventà italian. Tra le cése da segnalar quela piasse antica, la pieve de San Salvar de l' VIII secolo con finestre in stil longobardo, un tempo césa parochial fin al trasferimento de la parochia a Santa Maria Magior nel XIV secolo. Costruì nel XIII secolo e rifata nel 1717 Santa Maria conserva un bel altar in marmo con sora 'na pala del Balestra con rafigurà l'Assunsion mentre su l'altar de San Stefano se pol 'edar la pala del Santo opera de la scola de l'Orbeto. Del stesso periodo l'è la césa de San Valentin restaurà piassé 'olte nel corso dei secoli conserva afreschi e 'na Pietà in legno del XVI secolo. Altra césa antica l'è quela de San Francesco ricordà in documenti de l'856 consacrà nel 1747 e usà dai PP. Minori Osservanti l'è stà ricostruì nel XVI con la zonta del convento francescan. Del XV l'è la ceséta de San Roco arente al çimitero con magnifiçi afreschi mentre altre cése jè quele de San Michele a la Bastia, Maria Imacolà e l'antica césa de San Vito al Mantico in pié fin da l'epoca scaligera 'ndoe arente gh'era 'na toreséla; tra le curiosità da segnalar che la césa l'è stà visità secondo 'na storiela da San Carlo Boromeo durante el so viaio da Verona al Concilio de Trento. Tra le vile da segnalar Vila Spinola del '600 'ndoe s'à fermà un fraco de personalità, molto bela con portego e losa; Vila Giusti-Benati del '500 su disegno del Sanmicheli. Da ricordar la costrussion in quarei 'pena fora el paese, el famoso "Capitel de le quatro gambe" costruì nel 1770 in ricordo de un funsionario Venessian.