Comun a sud de la çità de Verona con origini antichissime de l' Età del Bronso. In epoca romana, ne la frassion Setimo de Galese gh'era un vilajo posissionà propio longo la via Claudia Augusta che la traversava el teritorio de Butapiera. Analisando el toponimo de 'sta frassion, se capisse che l'è posissionà a sete meiàre romane dal "foro" Piassa Erbe e grassie a de le scoèrte archeologiche in località Zera de Setimo podemo averghe la conferma de la presensa romana. El nome de 'sto Comun podarìa derivar dal nome del fondator del vilajo o de 'na persona anca se qualcun el dise che 'na 'olta gh'era un "teren pien de piere", mentre nei primi documenti se pol catàr in veronese antico, Butapreda, deventà ne la forma atual Butapiera. La zona nel XI secolo la fasea parte de la "Campagna" soto la giurisdission de Verona e col tempo l'è deventà una de le propietà del Monastero de San Zen. Con la dominassion Scaligera se vede el svilupo del paese e l'inissio de 'na trasformasion teritorial con l'union de contrà che i à formado grandi propietà, come nel caso dei Nobili Campagna che i è riussidi a ciapar in concession da i De la Scala: "pezze di terre boschive, arative e prative con case copate e somarate in contrà di Fragazzole e dintorni". Finida la Signoria Scaligera, Butapiera l'è entrà a far parte del Vicariado de Cà de Campagna composto anca da San Gioani Lupatoto, Càdidai, Castel d'Assan, Vigasi e Somacampagna con a capo un Vicario eleto ogni ano dai capifameja con poter giudissiario e aiutà ne la gestion patrimonial da un Consilio Aministrativo con sede a "Cà de Macici". Nel 1416 i comuni che i fasea parte del vicariado i era riussidi a liberarse da la schiavitù feudal e aministrando col tempo, el teritorio in modo autonomo fin a la fine de la domininassion venesiana. In 'sto periodo se vede la nassita de numarosi fossi par dar da bear a le risare. Un documento del 15 lujo 1585 ne parla de un çerto Zampaolo Brà che'l dimandava a l'Aministrassion de la Serenissima el parmesso de usar 'na vecia fossa: la quale comincia a Ca' di David, scorre sino a Buttapietra per ritrovarvene d'acqua per unirla con altra acqua di sua ragione per irrigare in pertinenza di Isola della Scala suoi beni. El 5 april 1799 ne la frassion Magnan ghe stà 'na bataja tra Francesi e Austriaci. In 'sto periodo la popolassion l'è stà sbalotà da un comun a n'altro, nel 1814 fasea parte del Comun de Castel d'Assan, nel 1815 de quel del Comun de Verona e nel 1820 l'è deventà comune autonomo. Che traversa el teritorio comunal ghe una serie de canai e corsi d'aqua da risorgiva come el Menago e 'l Piganzo che i finisse nel Tartaro. Tra le risorgive piassé importanti e bele de la provincia veronese gh'è quela ciamada Fontanon de l'Aqua Ciara su la strada tra Butapiera e Raldon. A Butapiera podemo 'dar interessanti case padronali e corti de campagna, come Corte a la Zera del '500 con céseta de San Gioani Batista, Corte Fenileto e Vila Giuliari a Setimo del '700 progetada da l'architeto Pompei. Ne la frassion Bovo (da l'omonima fameja provensal) un tempo gh'era un castel butà zò da Eselin da Roman nel 1234 e a ricordarlo gh'è ancora un obelisco, mentre la césa parochial dedicada a San Bovo conserva le pale del Gobbini, Brusasorzi e Farinati. La césa parochial de Butapiera inveçe (parochia dal 1526 con capelan), l'è intitolada a l'Esaltasion de la Santa Crose e costruida nel XVIII secolo; drento la presenta 'na pala con rafigurà "S. Elena che adora la Crose" del Ghiarelli e un afresco con la Madona.