Caldier l'era conossudo fin dai tempi dei romani come "Calidarium" con le so magnifiche terme, costruide dal console Petronio. Le terme de Giunon così ciamade, par la presensa de un tempieto dedicado a la dea venerada dai romani, che'l se catava un tempo su la colina vissina. L'è solo nel '500 che'l paese l'è deventà stassion de cura. L'aqua che sgorga da le risorgive "Brentela e Cavala" l'è stà classificada come "Ipotermal, Mediomineral, Bicarbonato, Solfato Calcio-Magnesiaca" con presensa de metai alcalini come el stronsio, cloruri e floruri a la temperadura costante de 26.4° C con Ph 7.3, limpida, incolor e inodor. Queste do vasche-risorgive ancora in funsion le g'a un çerto significado storico: la Cavala, così ciamada parchè nel 1796 i soldà francesi i s'era fermà par curarghe le feride ai cavai dopo la famosa bataja de Caldier tra l'esercito napoleonico e i austriaci; la Brentela inveçe l'era de uso esclusivamente de la nobiltà, tanto che nel muro esterno, gh'è incastonada una lapide che la ne ricorda la visita del marchese Federico II Gonzaga nel 1524. Su la stessa colina gh'era, un tempo, un castel, distruto da Eselin da Roman nel 1233 e in recenti scavi, l'è stà portà a la luçe un deposito archeologico de l'età del bronso ( XVI-XIII secolo a.C.). Sora ai resti l'è stà costruida Vila La Roca. Par bona parte del medioevo, vegnea considerado "disdicevole" frequentar le terme, e così pian pian l'è andà in disuso. Le aque de caldier le vegnea così utilisade da i abitanti par "maserar el lino" e infati la fonte dei bagni de Giunon se ciama "Masera". Da visitar l'è la césa parochial dedicada ai Santi Piero e Matia che presenta 'na tela de Felice Brusasorzi "Cristo che consegna le chiavi a San Pietro". Da visitar l'è anca la céseta del XII° Secolo de San Piero in col, con numerosi afreschi. A Caldierin se pol far un salto a la césa de San Lorenso Martire, parochia del Comune de Rota nel 1595. Nel teritorio de Caldier da segnalar gh'è anca la Vila Zenobio del XVI° Secolo, Vila Panarota del XVII° Secolo, Vila Bressan del XVIII° secolo e a Strà, la Vila Cà Rizzi con a l'interno un ciclo pitorico che'l ne parla del laoro dei campi.