Comune de la Bassa Veronese a sud de Zerea e a nord de le Grandi Valàde Veronesi. Un paese conossudo sia par el mobile d'arte ma anca par la so vocassion agricola che nel corso dei secoli l'è stà una de le poche fonti de sopravivensa de la popolasion. El teritorio parò l'à subìo un fraco de inondasioni da parte de le aque dei fiumi che i le traversa, cossita l'è restà par ani e ani una bela e granda palude, complicando el laoro dei campi. Solo verso la fin del XVIII secolo, soto la Serenissima, l'è stà pensà de darghe na bela sistemada a la zona come ne dise i documenti: "Il luoco di Casaleone si trova in situazione bassa e distante un miglio circa dalla valle, e come che la maggior parte de luochi superiori del Veronese scolano a questa parte le acque, ingrossano in modo tale li fiumi Tartaro, Tregnon e Menago con altri Dugali, Sanuda e Focchiara, quali tutti fiancheggiano li beni di detta comunità che gonfiandosi e desalveando, per lo più vengono inondati et allagati la maggior parte de beni ch'erano e sono di maggior rendita et entrade".Le prime testimonianse su Casaleon jè de le monede romane scoerte nel teritorio, che pol farne pensar de l'origine romana del Comune. I documenti piassé antichi jè del XII secolo, quando, ne la bola papal de Eugenio III del 1145 vien ricordà tra le altre la Ecclesia Casalavuni e nel 1180 se parla de Casalaurnus, mentre quarantani dopo in un par de ati notarili, se pol lezar Casaluponis. In altri documenti del 1184 catemo Casalavoni cum Ravagnani mentre nei statuti del Comune de Zerea la variante Casalvonus. In quél periodo Casaleon l'era feudo de la fameja Sanbonifacio passado ai Ragnoli e dopo ai Dal Verme. E a proposito de fameje nobili, da segnalar le magnifiche abitasioni: i Serego-Alighieri ne la frasion Sustinenza i g'avea nel XVII secolo 'na vila con 150 campi intorno; Vila Borghesana fata costruir verso la fine del XV secolo da Borghesano del Borgo sul confin col Comune de Gazo, corte rural passada col tempo ne le mane prima dei Cagli e poi dei Basadonna par finir in quele dei Michieli. La capela de la corte, costruida da Antonio Basadona nel 1676 la conserva 'na tela con la "Madona de le Grazie" del Liberale; poco distante da la precedente gh'è Vila Le Boldiere dei fradei Boldieri primi propietari che i l'à consegnà ani dopo a Carlo Canossa; el simbolo de Casaleon l'è Palasso dei Conti de Sangueneda o di Sanguinetto, palasso a tri piani con dipinti e afreschi mentre poco distante gh'è la césa del Sant'Antonio da Padoa del 1663 voluda dai propietari del palasson. Tra le cése, da visitar nel çentro de Casaleon, la parochial dedicà a San Biagio rifata in stile gotico incorporando la parte de l'abside de la vecia césa che la funsiona da Oratorio, e che podemo amirar arente a quela noa, mentre el campanil l'è stà costruido nel XVIII secolo. Drento la césa atual gh'è altari minori e quel magior in stile baroco del 1693 trasportadi da la vecia. La césa, deventà parochia nel 1480, l'è stà ricordà ne la bola papal da Eugenio III nel 1145; a Sustinensa, toponimo che deriva da Sustigneza che vol dir sostegno par raforsar l'àrzaro, catemo la parochial dedicà a San Giacomo Magior ricostruida nel 1947 sui resti de la césa vecia ma parochia dal 1526. Drento podemo 'edar una pala del '500 con rafigurà la Madona col Butin in gloria contemplà da San Giacomo e altri santi atribuida al Brusasorzi o al Creara.