Comun de la Val Traméa a est del teritorio de la Val de Ilasi e a ovest de la Val d'Alpon. El nome Cassan el deriva da “Cadianum” o ”Gadum”, parola tardo-latina par indicar un logo de cacia e boschi o da la "gens romana Cassia" mentre Traméa da “Vallis Terminea”, nome anca del progno che nasse in difarenti sorgenti ne la zona formando propio nel çentro del paese un lagheto picenin. Cassàn in epoca medioval l'era identicado come Cadianum, logo 'ndoe secondo i "Itinera" gh'era el cambio dei cavai "mutatio" longo la via Postumia non distante dal paese. I primi documenti scriti su Cassan jè del X secolo quando vien nominà la pieve de San Giorgio, del XI secolo risulta tra i possedimenti de Cadalo col tempo deventà antipapa e nel XIII secolo un pochi de tereni de la zona i era gestidi da le Abassie Benedetine de San Zen e Badia Calavena. Dopo el periodo Scaligero l'è stà la 'olta de quel Venessian. Nel XVI secolo el teritorio del Vicariado de Cassan l'era stà dà in gestion a la potente fameja dei Pompei, signori del Castel de i Lasi, na siélta non propio feliçe da parte de la Serenissima 'isto le numarose proteste nei secoli da parte dei abitanti par el bruto comportamento tegnudo da 'sta nobil casada. A parte qualche episodio, la vita l'è andà avanti tranquilamente in 'sto periodo fin ai combatimenti tra francesi e austriaci del 1809 in zona, con el relativo passajo vitorioso de le trupe imperiali. Tra le cése, da segnalar la parochial dedicada a San Giorgio, rimessa a novo nel 1870 in stile gotico su disegno de Don Gottardi, la conserva tochi de la vecia costrussion del '300 sgrandà nel XV secolo, de la qual gh'è restà 'n tabernacolo in tufo murà ne la sagrestia con scolpidi "Angeli adoranti e i Santi Giorgio e Bartolomeo", l'altar magior e 'n batistero otagonal in marmo rosso; la césa de San Pietro in Brian con afreschi sia drento che fora del '300 de la Passion, I dodese Apostoli e altri santi; la céseta romanica de San Feliçe a caval tra la val de i Lasi e la Val Tramegna costruida tra el IX secolo e 'l X secolo con afreschi tra el XIII e 'l XV secolo del maestro Cicogna. In 'sto logo l'è passà papa Lucio III durante 'la so visita a l'Abazia de Badia Calavena; ne la frassion de Campiàn se pol 'edar la ceseta de San Bernardo. Curiosa l'è la presensa dei "gadòi" (iris) un tempo coltivadi come fonte de guadagno (espr. sbondàr i gadòi: dopo la fioritura vegnea catadi su le raise dei gadòi, netà e utilisadi par parfùmi e uso farmaceutico). Cassan l'è un comune che nel corso de la so storia l'è sempre stà ligà, dal ponto de 'ista economico, a l'agricoltura, infati el prodoto tipico l'è la "Mora", varietà de siresa de la Val Traméa o "Val dei Siresari" con mostra-marcà a dugno. Foto: Césa de San Feliçe