Le origini de Castagnaro jè antiche come ne pol testimoniar i resti de vilagi preistorici catadi in questo teritorio. Nel periodo romano la strada consolar Emilia-Altinate la travèrsava la zona e i abitanti i era specialisadi ne la produssion de quarei tanto da deventar famosi in tuto l'impero infati nel comune gh'era sparse qua e la un bel mucio de fatorie e fabriche con fornase. Ne la frassion Menà jè stà catade verso la fin del 1800 ben 1258 monete romane tra "denari" e "quinari", pochi ani dopo altre 1031 oltre a resti de anfore e quarei. Dopo le invasioni barbariche le stà la 'olta de la famosa piena de l'Adese che provocando la "Rotta della Cucca" nel 589 d.C. (toponimo de Veronela), l'à spostado a sud e in questo teritorio el corso del fiume, sensa contar che bona parte de 'sta zona l'è stà somersa da fango, deventando palude e butando zo albari, tra questi un bel pochi de "Ipocastani" che i querzea Castagnaro. Dopo questa serie de problemi se vede la nassita de do località, le future Menà (l'atual frassion) e Castagnaro (l'atual comune) in zone più riparade da eventuali piene. In epoca medioeval gh'era el Canal Castagnaro in grado de unir l'Adese al Tartaro utile par el trasporto de mercansie fin al mar Adriatico. L' ondese marso del 1387, durante la dominasion scaligera, ne le campagne de Castagnaro ghe stà una de le bataje più grosse de la storia veronese contro i Padovani; 40.000 soldà in tuto, 4600 prigionieri scaligeri e relativi capitani. Dopo aver perso, el 19 april 1387 Verona passa ai Visconti e tramonta la signoria Scaligera. Dopo Napoleon da 'ste parti jè passadi anca i austriaçi armadi anca de bona volontà. L'è propio grassie a lori, che scomincià l'opera de bonifica, lo svilupo economico e agricolo oltre a l'introdussion dei "Cavaleri". In più l'è stà costruido el Canal Emissario e sul Ponte Rosso una lapide ricorda 'sta opera: "Questi luoghi natura da secoli impaludò, arte in pochi anni redense". Da visitar assolutamente la césa parochial del 1822 costruida su n'altra de origini medioeval, 'ndoe ghe custodì de drio l'altar una pala del pitor Brusasorzi che rafigura la Madona col butin, San Nicola e San Gioani Batista; un San Francesco de la scola del Moretto del 1500; un magnifico afresco de San Nicola sul sofito e infine 'na statuta de la Madona del 1838. Inveçe ne la frassion Menà, la cinquecentesca ceséta dedicada a Sant'Ana voluda dai Monaci Benedetini de Ferara la se presenta drento, con dei magnifici afreschi de la scola dei Caroto. Nel teritorio se pol contar anca numarose case coloniche rurali (in bona parte serade) de propietà de conti o signori de la zona apartegnude un tempo a fameje veronesi importanti, Dal Verme, Donà, Fracanzani, Rangoni, Sacrati, Trotti, Barbarigo, Fiocco, Grechi. Tra i esempi de vila rurale gavemo Vila Bianchini con una bela "giazara" drento al parco e Vila Grechi. Importanti par la comunità de Castagnaro, jè anca, par storia e tradission, i "sete capitei", ceséte 'ndoe se celebra ancora al dì de ancò le funsioni religiose.