El comun de Castel d'Assan el se cata a 'na diesina de chilometri a sud de Verona, longo la strada par Vigasi e Mantoa. Le prime testimonianse de un insediamento uman in 'sto teritorio jè del I° Secolo d.C. come ne dimostra le tombe catade a Palasso Nogarola e longo la strada Bacasieta-Assan o un poche de epigrafi a San Martin. Quasi sicuramente Castel d'Assan l'era traersà da la via Claudia Augusta e come ne dise la toponomastica el nome "Azzano" el deriva da la fameja romana de la "Gens Attia" testimoniada più 'olte a Verona. Verona essendo stà ben fortificada fin dai tempi dei romani, no la permeteva facilmente invasioni e assalti, così la campagna intorno a la çità l'era deventà un logo 'ndoe se podea ciavar de tuto e far sponsàr le trupe; infati ne la zona de Castel d'Assan el s'à fermà l'esercito bisantin impegnà ne la guera contro i Goti. In epoca feudal i castei che i vari signoroti i costruiva ne le campagne jà contribuido a una çerta difesa nonché al svilupo de l'agricoltura e nel caso de 'sto comun el merito l'è stà de la fameja dei conti Nogarola. In 'sto periodo el teritorio de Castel d'Assan l'era diviso in tri: 'na parte l'era dei Nogarola in particolar el castel e un toco de Becasieta, n'altra parte la fasea parte de la campagna aministrada dal comun de Verona mentre Assan l'era soto el monastero de San Zen grassie a 'na concession de Federico I a l'Abate con 'n diploma del 27 otobre 1184. Inveçe, le atuali frassioni che le forma el comune de Castel d'Assan jè quatro: Becasieta, Assan, San Martin e La Rissa. El primo documento che parla de la frassion de Assan l'è del 926, 'ndoe se lese el nome de un çerto Rodibertus de vico Aciano. Ma 'sta località l'è deventà importante par merito dei Scaligeri che riussendo a far deventar Abate de San Zen uno de lori, par èssar precisi Giusepe e fasendose conferir la gestion dei afari dal monastero sanzenato, jè entradi in possesso de le propietà. Un poche de 'ste chi, jè stà consegnade dai De la Scala ne le mane dei nobili Nogarola deventadi parenti, che jè riussidi a portar un bel svilupo nel paese e costruendo tra le altre, verso la fin del XIII secolo el so palasso, conossudo come "Castel" che el dà el nome a la contrada omonima e a tuto el paese. Dopo le ocupassioni dei Cararesi e dei Visconti el teritorio el passa ne le mane dei Venessiani, ancora spacà in tanti tochi come in passà e con numarosi Vicariadi. Fin da la metà del '400 l'è documentada anca la presensa de un altra nobile fameja tra le più potenti nel veronese, i Malaspina che i era entrà in possesso del Vicariado de Cà de Tinaldi (che corisponde a Assan). Soto Venessia la vita la va avanti ben, in paçe, sensa tanti problemi, con un fraco de laoro, un bel svilupo de l'agricoltura, del comercio e con l'introdussion dei cavaleri. Ma 'sto benèssar el vien roinà nel '500 da le lote de Lega de Cambrai par vint'ani in 'sta zona che le à portado malatie, fame e miseria. A parte la peste del 1630 e la tremenda sicità del 1779 l'economia l'è andà avanti pian pianela. Con Napoleon i ariva altre guere e altre rogne, come la contestasion de la giurisdission dei Nogarola su la Parochial. Nel 1814 soto i austriaçi vien istituido el primo consijo comunal. Tra belesse artistiche da 'edar l'è el famoso "Castel" conossudo come Vila Violini-Nogarola storica residensa dei nobili Nogarola rifato e sgrandà ne l'otoçento ora sede municipal, Vila Malaspina a Assan 'ndoe i dise el sia morto uno dei Gonzaga de Mantoa, l'incantovole Vila Cesari-Perbelini con oratorio e afreschi, la corte rural Cà Tinaldi. Tra le cése, la parochial de Assan dedicada a Santa Maria butà zò nel 1965 e rifata noa, l'è la piassé antica del comune. Vien ricordà de la so esistensa a partir nel 1110 con el titolo de San Michel e nominada ne la bola papal de Eugenio III nel 1145 e parochia nel 1530 con el titolo de San Piero. Drento ghe conservadi un afresco atribuido al Brusasorzi e de le tele de Antonio Vicentini. L'altra parochial del comune l'è dedicada a San Maria Annunziata e ricostruida su 'n altra vecia; esistente dal 1310 par merito dei Nogarola. In contrada Caporala gh'è l'Oratorio de Ognissanti costruido tra el 1743 e 'l 1746. E par finir a Forete, la césa dedicada a San Martin costruida sora 'n altra del XV secolo.