Le origini del paese le se perde ne la note dei tempi, basta pensàr ai ossi, selci e freçe catade ne la frassion de Ronchi o a la scoerta sucessive come le fondamenta de 'n vecio castel forse de l'ano mile. Castelnovo l'è caraterisado da la presensa de la tor con orolojo posissionada su l'antica roca, resto del castel costruido a la fine del XIV secolo da Giangaleazzo Visconti e butà zò nel 1530 e da la césa parochial de Santa Maria con campanil romanico. El comune comprende le frassioni de Cavalcasele con le contrade con Albara, Burlin, Camalavicina, Palù e Zuccotti, Sandrà con Volperara, Oliosi con Campagnarossa, Mischi, Mangabia, Valcerea, Zenati e infine Ronchi. Nel teritorio comunal podemo ricordar Vila Rizzini-Salvelli in çentro paese con un bel parco intorno, Villa Ridolfi Sella con una magnifica losa formada da numerose colonete e una meridiana afiancada da una masìsa colombara, Vila Mosconi a Sandrà e Vila Arvedi d'Emilei a Cavalcasele. In questa frassion sul col de San Lorenso, Re Carlo Alberto l'osservava le manovre e le strategie durante le guere d'Indipendensa. Non molto lontan podemo notàr la presensa de la céseta de la Madona dei Angeli con un ex-convento e un tempieto dedicado a San Lorenso. Nel çentro de Cavalcasele gh'è la césa dei Santi Filipo e Giacomo mentre ne la frassion de Sandrà gh'è la céseta de San Martin messa ai passi del poro limon e infine la césa de Sant'Andrea con al'interno una stupenda pala del Brusasorzi. Ne la frassion de Oliosi gh'è la cesa de la Madonna dei Angeli, con afreschi datadi 1434 e dove ogni tersa dominica de noembre gh'è la Fiera del bestiame. Storicamente la prima grande distrussion del paese l'è stà a opera de Federico Barbarossa. L'Imperador l'a combatudo contri i Veronesi a Vaccaldo (vissin a Vigasi) dopo éssar stà a Roma e obligà a passar l'inverno a Isola de la Scala, el volea tornar in Germania passando par Verona. A quel ponto i Veronesi insieme con Milanesi i volea farghe atraversar l'Adese a Ponton, ma el Barbarossa informado da de le spie l'à sconfito in questa località le trupe nemiche che nel fratempo le s'era rinforsà con i padoani. Infufà come 'na bestia Federico l'a dato l'ordine de métar a fero e fogo i 22 castei tra l'Adese e 'l lago de Garda, tra questi anca quel de Castelnovo. Nei XVII secolo l'à costruido la strada che da la Baviera passando par Cerain, Ponton e Castelnovo la portava a Mantova, denominada "dei Barbari". Questo comune, importante dal ponto de 'ista strategico, l'è stà un grande testimone de eventi storici come a esempio nel 1509 quando i francesi de Luigi XII, mentre durante el periodo dela Liga Santa, par tegnér libaro el teren par la difesa, al paese de Castelnovo ghe stà imposto de tajar tute le piante intorno al paese. Nel 1626 el doge de Venessia el confermava el Vicariato a Castelnòo, con dirito de jurisdission fin a 10 lire veronesi, mentre el conte Alvise Cossali el podea giudicar cause tra le 10 e le 100 lire. Sensa contar la peste del 1630 che l'a fato comparsa anca da ste parti grassie a le trupe imperiali comandade da Collalto. Da segnalar che nel 1780 el sindaco de Peschiera l'à dimandà al Podestà de Verona de inglobar Castelnovo, ma nel 1781 tri ambassadori del paese, contro el Senato de Venessia jè riussidi a non far realisar sto progeto. Non podea mancar Napoleon vinsidor su i Austriaci ne la bataja de Castelnovo. Questo paese l'è stà teatro anca de le saguinose guere de indipendensa infati el catava justo justo in meso al famoso "quadrilatero". I austriaci al comando del general Principe Thurn und Taxis par vendicarse de l'ocupassion del paese da parte de diversi volontari con a capo Luciano Manara, dovuda al rifornimento de munissioni e altri 450 omeni del Di Noaro, jà brusado el paese massacrando done, omeni e buteleti. Sucessivamente ne la seconda guera de indipendensa con al comando Alberto d'Asburgo i s'a acampado otantamila soldà austriaçi intorno al paese dopo essar scapadi da Solferin. A Sandrà, el 28 april del 1848 ghe stada la bataja tra la Brigata Savona contro i Austriaci comandadi dal general Wohlgmut e anca la carica del magior Lamarmora contro du' squadroni de ussari (ungheresi). Mentre a Oliosi ne la seconda guera de indipendensa, quaranta italiani del 44° fanteria con a capo Benati jè riussidi a difendarse da un batajon de Ulani.