Paese abitado fin da l'età del bronso e in epoca romana importante via de comunicassion tra el Lago de Garda e la via Claudia Augusta. Cavaion l'è situado tra lo sboco de la Val d'Adese e 'l Lago de Garda ne la parte meridional del Monte Moscal su le pendici del Monte San Michel (342m). El teritorio el comprende la frassion de Sega con intorno tante contrade come Biccolari, Bossema, Casette, Mascalzoni, Mastego, Naiano, Pelizzara, Pigno, Pressenga, Tabono e Villa de Sora. Da lontan podemo amirar la Césa de S.Gioani Batista con fasàda in stile neoclassico, ricostruida ne l'otoçento sui resti de una césa romanica del XIII° sec. Drento ne salta subito ai oci dipinti, altari e aredi de pregevole qualità. Inveçe l'è çitada in un documento del 1197 la Céseta de San Faustino e Giudita che sucessivamente l'è stà circondada da un lasareto nel 1630. Anca chi, come ne la viçina Afi, podemo catàr palassi e vile de notevole interesse come nel caso de Vila Cordevigo, antica vila-fatoria de epoca romana, ricostruida sucessivamente, presenta un bel giardin a l'italiana e la capela de San Martin con a l'interno una colession de più de tremila reliquie de santi. Re Berengario nel' 899 l'à concesso la costrussion del la tor civica che dopo el restauro del 1885 l'è deventà parte integrante de Vila Frinzi-Trabucchi. Piene de tradission jè anca le corti, tra cui ne piase segnalar Corte Torcolo 'ndoe un tempo l'era presente el torchio par strucar l'ua, Corte Colombara 'ndoe un tempo gh'era una tor colombara utilisada par difesa e infine corte Quaranta con un insieme de case contadine afiancade nel XVI secolo da la casa dominicale. Legendario l'è el posso de l'amor, 'ndoe un tempo i disea che un omo pien de schei e una butela poareta, i sà butà drento a causa del so amor infeliçe e contrastado da le rispetive fameje. Dal ponto de vista storico un documento del 1111 el ne porta a la scoerta de le origini del nome del paese, citando "Cavalion", mentre nel 1130 devien man man: "Caput Leonis", "Capalionis", "Cavallone" e finalmente, nel 1208, "Cabaliono" e dopo qualche ano "Cavaion". Secondo lo studioso Olivieri, Cavaion vol dir: "pagliaro a due spioventi, cui si sia forse per estensione, attribuito il senso di collina a schiena di cavallo", mentre altri i fa riferimento a le cae de piera del teritorio. Nel VII secolo nel teritorio i governava i longobardi nome del Duca de Verona, mentre ne l'800, soto i Franchi, Cavaion l'è passa' ala "judiciaria Gardesana". Nel 899 con le invasioni dei Ungari, Berengario I l'à fato fortificar el paese. Dal 1193 Cavaion l'e' passa' soto el Comun de Verona, con aministrassion a cargo de l'Abassia de San Zen. Dal XIII secolo el teritorio l'e' deventà con Castelnovo de l'Abate, Affi e Incaffi un comun solo. Dal 1405 al 1797 i Venessiani jà ocupà el teritorio fin a l'arivo dei francesi e dei austriaci.