Cavrin el se cata ai piè del Monte Baldo, ne le vicinanse del Monte Creta e tra el Lago de Garda e la Vald'Adese. Storicamente in questo teritorio se pol contar una bona quantità de posti 'ndoe l'è passà l'omo preistorico come le Grote de la Val Vecia, de Valmenon, i covoli de la Creta, de cengia Rossa, de la Strisia e del Santo. Dopo molti secoli jè stà costruidi i "Castelieri" de Pradonego, la Mota, San Michel, Tere Rosse e Frati, unidi da una bela rete de sentieri "roi" da parte dei Cauri, antica popolasion de origine retica. De qua jè passadi anca i Etruschi sconfiti dai Celti e sucessivamente i Galli Cenomani e i Galli Boi. Ne l' 89 a.C. jè arivadi anca i romani che dopo resistensa con la popolasion local jè deventà paroni de la zona riedificando "Caurin" solo nel 16 a.C. valorisandolo come çentro de lavorasion e de racolta del fero catà a Ferara de Monte Baldo. Tra i numarosi reperti de origine romana, gh'è da segnalar quel più importante che'l se cata soto la barchessa de Palasso Carlotti, el cipo "Calpurnus mercator". Dopo la fine de l'impero roman la val l'è stà invasa da Eruli, Goti, Longobardi e Franchi. L'è passà anca Re Alboin nel 500 da Cavrin e de questa so presensa gh'è un bel reperto conossudo come "Sarcofago de Campasso" con scolpida una crose longobarda. In questi ani se forma le "curtes" con el scopo de salvaguardar l'economia local e sucessivamente el "contado" con potere decisional del signoroto. Con le invasioni dei Ungari i veci castelieri jè tornà de moda, tanto che la zente che l'abitava in fondoval, in riva ai progni, l'è scapà in questi çentri fortificadi. Nel 1193 el Comune de Verona el riscata el teritorio da Enrico VI dando inissio a un bel raporto comercial con la çità, tanto che le comunità de Cavrin, Pesina, Boi, Ceredel e Lubiara le aquista una propia autonomia aministrativa. Intorno a ogni sede comunal, ne le zone de colina, nasse novi çentri abitativi come Bera e Montecio o vissin a sorgenti come Passon, Porçin, Vilmesan e Braga o in zone montane come Pradonego. Cavrin l'è stà a le dipendense dei Scaligeri che i avea concesso la gestion de la val ai Dal Verme e dopo ai Malaspina. In epoca venessiana gran parte del teritorio l'è stà diviso e comprà dai nobili Negrelli, Malaspina, Brenzoni, Nichesola, Carlotti, Gaiter, Zuccalmaglio che i costruisse splendide vile come Vila Nogarola e Vila Negrelli a Pesina, Vila Zuccalmaglio a Cavrin, Vila Cariola-Bevilacqua a Preele de Passon, Vila Colpani a Lubiara, Vila Nichesola-Sometti, Vila Nichesola o de quatro camini, Vila Nichesola-Zambellini e Vila Nichesola-Rigo a Platano, Vila Nichesola-Camis a Onè. Palasso Carlotti che dal 1952 l'è sede comunal l'è ormai deventà uno dei simboli de Cavrin basta 'edar i afreschi che ghe al'interno, le decorasioni, le statue in tufo e stanse con disegni fantasiosi sui muri come la "sala dei sogni". Nel 1630 l'è comparsa da ste parti la peste dimesando la popolasion; ci l'era contagià el vegnea portado al lasareto de Valdoneghe e dopo sepelido nel "Campo de la Morte" viçin a l'atual césa Ceredel. Nel 1786 la Serenissima conçede el marcà setimanal del sabo. In questa epoca l'economia local l'è ai massimi livei tanto che se vede nàsar un poche de atività artigianali; i mugnai come a esempio a Valseca e Caiar 'ndoe gh'era i molini, i ferari a Vilmesan (l'è conservà un majo idraulico), i spremidori de olive (gh'era frantoi a Montecio e Bera), laterizi (con le fornase de Porçin se fasea i cópi e i quarei) e cave de marmo (Lubiara e Gamberon). Da segnalar che ne la Val de Salve Regina da la sorgente de la Bergola sgorga l'aqua del "Campion" che atraversando la val de Cavrin un tempo el dava "energia" ai molini. Un tempo esisteva anca le calchere par la produssion de calçe viva e le giassare par la produssion de giasso e la conservassion del magnar. El 31 majo 1796 i fa visita in questo teritorio i francesi corendoghe drio ai austriaci e butando zo el leon venessian. Nel 1801 sparisse le comunità de Cavrin, Ceredel, Lubiara e Pesina con la riforma napoleonica e vien nominà Cavrin unico çentro giuridico-aministrativo. Dopo Napoleon e i austriaci el teritorio el vien colpido da le guere de indipendensa; con el sucessivo passajo a Italia ne l'otobre del 1866 e la crisi economica parte l'epoca de le grandi emigrassioni verso l'estero. Se Ve piase l'arte minor Ve segnalemo i stafoleti dedicadi a la Madona de la Corona a Cavrin, quel de Salve Regina ne le vicinanse de Pradonego e quel de la Madona Adolorada a Boi con tri, quatrosento ani su le spale. Le crosi inveçe jè più reçenti ma altretanto carateristiche come quele in marmo de le Aque vissin a Cavrin o quela del Gal a Montecio. Val la 'pena far 'na visita a Passon, località con carateristiche case de piera e una bela fontana vissin a la césa e Porçin con un bel lavatoio e resti de le fornase. Oviamente non podea mancar un breve discorso anca par el Santuario de la Madona de la Corona a Spiassi, el più "ardito d'Italia". El se cata tacà via a le rocie a strapiombo su la Val d'Adese e rifato più 'olte nel corso dei secoli con l'atual fasàda de fine '800. El simbolo l'è una "Pietà" de marmo con la Madona col Cristo morto sui zenoci. La statua la presenta una scrita "Hoc opus fecit fieri Ludovicus de Castrobarco A:D. 1432" mentre secondo la tradission l'è sparida nel 1522 da l'isola greca de Rodi, durante 'n ataco dei turchi e ricatada li' tra i sassi del Baldo. Documenti storiçi i dise che nel logo "de la Corona" ancor prima de l'arivo de la statua gh'era dei eremiti benedetini. La césa l'è stà sgrandada 'isto l'alto numaro dei pelegrini da tuta Italia e nel 1985 da segnalar la visita de Papa Giovanni Paolo II. Da visitar inoltre la césa-oratorio de S.Cristina a Ceredel del XIII secolo, quela de San Roco a Pesina del XV secolo, la Parochial de Cavrin, quela de San Martin ne la contrada omonima risalente al XIII secolo, quela de San Roco a Gaon, quela de Santa Eurosia a Rubiana del '700, quela de la Madona de la Mercede a Boi e infine quela de Passon dedicada ai SS. Vito, Modesto e Crescenzio del XIII secolo, anca se fin al 1933 l'e' stada continuamente modificada. L'è doveroso spendar quatro parole par la césa parochial de Cavrin costruida a la fine del '700 (su 'n 'antica pieve romanica) con la fasàda in marmo de Lubiara. A l'interno se pol amirar un vasca batesimale otagonale in marmo rosso fregiada con 'na croçe greca, un altar in stile baroco con 'na pala rafigurante la "Madonna con bambino e cinque santi" sensa contar statue e quadri de un çerto pregio. Par ci ghe piase i forti austriaci e italiani, in questo teritorio, in stato de abandono, ghe quei de San Marco vissin a Lubiara e Cimo Grande vissin a Spiassi. Ne la località Platano, con i so 400 ani gh'è un bel esemplar de "Platanus Orientalis" soranominado "El Platano dei Bersajeri", uno dei più antichi albari d'Italia tanto da èssar deventà monumento nassional.