Zerea l'è uno dei piassé importanti comuni de la Bassa Veronese con le frassioni San Vito, Cherubine, Frescà, Aselogna, Sparè (Asparetto), Barbere, Palesela e Santa Teresa in Val. Le origini de 'sto comun jè preistoriche come pol dimostrarne i reperti de l'Età del Bronso, come la capana catà a le Morandine e 'l vilaio su ben quatordese etari in località Castel che secondo la fantasia popolar sarìa identificabile ne la mitica çità de Carpenea. A Zerea inveçe, altri reperti come lapidi e un ara con bassorilievi de sène de caza de epoca romana, pol farne capir ancor piassé l'importansa de 'sto paese zà ne l'antichità. Tra i primi documenti scriti su Zerea g'avemo quel del 923, 'ndoe se lese che Eriprando Arcidiacono de Verona l'à concesso ai capifameja de ricostruir el "castrum" e de finir la costrussion del "castel" con intorno muri e piere par poderghe abitar. Pochi ani dopo el Comun de Verona e i conti Canossa e San Bonifacio, jè entrà in conflito con i Canonici de la Catedral de Verona par entrar in possesso de Zerea. In sto periodo se sentìa l'udor de cambiamento con la nassita de una strutura comunal e nomine dei podestà che sicuramente non ghe andava zò ai Canonici che i pensava a un gesto autonomista. Cossita grassie a la presensa a Gazo de Federico II i Canonici i s'à fato rilassar un diploma che'l vietava ai abitanti libere elessioni e nomine aministrative. Ma 'sti divieti no jè servidi gnente, al punto che, i Canonici, jè stà costreti a véndar i so beni el 12 dugno 1223, 'isto le numarose ribelioni in corso, al novo Comun. Nel 1233 Zerea l'è stà messa a fero e fogo da i soldà Mantoani, case e castei in completa rovina. Dopo el Dominio de Eselin da Roman e dei Scaligeri jè arivà i Venessiani a l'inissio del '400; a parte un altra distrussion del paese da parte de la Lega de Cambrai nel 1509 e la ridussion del numaro de abitanti con la peste nel 1630, la vita soto la Serenissima l'è andà avanti in tuta tranquilità, se vede la nàssita de numarose vile e palassoni anca nel çentro abitado da parte de nobili fameje. Nel 1796 finida la Republica Venessiana, l'è arivà Napoleon con i soldà e la cavaleria par combàtar contro i austriaçi. Soto i francesi nel Regno d'Italia Napoleonico, Zerea l'à soferto un periodo bastansa bruto con numarosi episodi de delinquensa, mentre soto i austriaçi un pochi de ani dopo, no gh'è stà particolari pericoli ma 'na costante difusion del spirito patriotico, con gran dimanda de amission dei ceretani nei grupi volonatari contro la dominassion straniera. Dopo èssar entrà a far parte de l'Italia nel 1866 l'è scomincià 'na grande opera de bonifica ne le "Grandi Valli Veronesi" dando inissio al svilupo del paese. A l'inissio del '900 grassie al "Marangon" Bepi Merlin de Sparè che g'avù l'idea de trasformar un mobile vecio e carolà in un mobile in stil, Zerea l'è deventà la capital ne la produssion del mobile d'arte, prinçipale fonte economica del comune e in gran parte de la Bassa Veronese. Tra le cése da segnalar la parochial de Zerea dedicà a San Zen e la Beata Vergine Maria del XVIII secolo costruida sora a n'altra dopo che l'è vegnuda zò nel stesso secolo; drento podemo 'edar sié capele con pale come Santa Lussia de l'Ugolini, La Sacra fameja del Danieli e La Madona coi Santi Zen e Domenico del Brusasorzi e l' Ultima çena del Perotti; numarose statue in legno o in marmo Sacro Cuore, Imacolà, San Zen, San Francesco, San Roco, San Antonio, Santa Teresa del Bambin Gesù; el fonte Batesimal l'è a destra, ai pié del'altar major: bloco unico in marmo bianco, a forma otagonal, de la seconda metà del XVI secolo; mentre fora, el campanil l'è del '400. N'altra césa le quela de la Madona del Spasimo del XVIII secolo costruida inglobando el capitel "miracoloso" de la Madona, con le donassioni de ci nel 1630 el s'à salvà da la peste. Da ricordar la césa del '500 de San Vito e Modesto ne la frassion de San Vito, un tempo fasea parte de un convento de Carmelitani 'ndoè l'è stà scoerta 'n ara romana. E par finir in belessa, la césa romanica de San Zen, fata costruir nel XII secolo da Matilde de Canossa, vegnuda zò piassé 'olte l'è stà ricostruida in modo masisso a l'inissio del XX secolo; de la vécia costrussion gh'è restà dei afreschi del '300 con Santi e Madone, l'abside e un poche de colone; chi jè stà catade du lapidi funerarie de epoca romana. Tra le vile da segnalàr Vila Franco-Bertelè "El Piaton" del XVII secolo, costruida su dei tereni comprà da la fameja Franco nel XVI secolo, arente a la césa de San Zen, completa de giardin, corte, porteghi, barchesse, stale e l'oratorio de Sant'Antonio Abate del XVIII secolo con tele de Michelangelo Prunati; Vila Dionisi "Cà del Lago" del XVIII secolo con drento afreschi de Marco Marcola e G.Montanari, arente a 'na tor del '400, presenta un bel parco con statue e l'oratorio de Sant'Eurosia; a Remedel gh'è Vila Guastaverza del XIX secolo in origne del '400 con arente l' Oratorio de Sant'ana del XVII secolo. Tra i palassi da segnalar Palasso Grigolli antica residensa dei conti omonimi vissudi nel XIII secolo e Palasso Ormaneto. Tra i personagi famosi da segnalar Paride da Zerea cronista veronese del XIII secolo e 'l matematico-idraulico Antonio Maria Lorgna. Par ghe piase la natura incontaminada consiliemo de far un salto a l'Oasi del Brusà.