Comune de la pianura veronese a 46 Km da Verona al confin con la provincia de Vicensa e bagnà dal progno Guà, el gà come frassioni Baldaria, Sabion, Sant'Andrea, San 'Bastian, Spessa, Porceti. La presensa de l'omo da 'ste parti l'è antichissima come pol testimoniar i reperti catadi de le çiviltà Euganea (1000 a. C.), Paleoveneta (VIII-VII sec. a. C.), Veneta e Romana con urne, ceramiche e scudele, conservà nel magnifico Museo Archeologico de Cologna. Dopo la conquista romana e l'organisassion de Cesare dei "Municipia" (49-45 a. C.), ne la località l'è stà fondà 'na "Colonia" agricola da parte de Otaviano Augusto (29 a.C.) per ricompensar i propi veterani. Cologna l'era traversà da l'antica via Romana Porciliana o Porcilana che partendo da San Martin Bon Albergo la univa la Via Postumia a la Via Emilia-Altinate passando par Porçil (Belfior), Desmontà, Cuca (Veronela), Strà, Olmo, Pressana e Montagnana. Con tuta probabilità l'è la "Colonia" scrita da Catullo nel primo capoverso del Carme XVII "O Colonia quae cupis ponte ludere longo", presente anca nel stema comunal. In epoca Romana l'Adese el passava in 'sto teritorio in diression Ateste (Este) prima de la famosa piena con relativa "Rotta della Cucca" del 589 d.C. che l'à fato deviar el fiume verso Albaredo in diression Legnago creando el Guà o "Flumen Novum". Cologna l'era importantissima par i romani ma anca par Odoacre che nel V secolo dopo l'invasion barbarica dei Unni de Attila, el l'à ricostruida con el nome de "Colonia Gotica". Ne la frassion de Sabion secondo 'na legenda gh'era un castel fato costruir da Rosmunda fiola de Cunimondo re dei Gepidi, 'ndoe nel 547 l'à progetà de copar con Elmichi, so marì Alboin. Dopo i longobardi Cologna l'è passà ai Conti Maltraversi paroni de Vicensa e Padoa col tempo al "ramo de fameja" i Conti Malacapella che i à fato costruir castel e fortificasioni, sensa desmentegarse del possesso de Cologna da parte dei Estensi. Nel 1239 Eselin da Roman dopo vari assalti l'è deventà paron de Cologna ma la popolassion no l'era massa contenta, al ponto che nel 1256 i abitanti con a capo Jacopo Bonfado i s'à rioltà sperando ne l'aiuto del Pontificato e de Azzo d'Este che parò no l'è rivà. Eselin dopo aver risposto a l'insuression l'à fato finta de catar 'n acordo con Bonfado che 'pena l'a girà el canton el g'a tajà la gola insieme con el fiol Aprile. Nel periodo Scaligero Cologna l'è stà el çentro de uno dei Vicariadi piassé grandi de la provincia veronese goernà da sindaci soi, ma essendo posissionà in una zona de confin l'è stà par un fraco 'de 'olte in meso a le guere tra veronesi e padoani come nel 1278, mentre nel 1280, dopo la vitoria dei De la Scala, l'è stà deciso de butàr zò el castel e de vietar la costrussion de le fortificassioni con un decreto, che dopo no'l venarà rispetà. Dopo i Scaligeri, nel giro de quasi vint'ani Cologna l'è passà ai Visconti, ai Carraresi e par finir ai Venessiani nel 1405, deventando un çentro importante e soratuto autonomo, esentà dal pagamento de le tasse e dal fornir soldà, ma fedelissima a Venessia che 'ista 'sta devossion l'à ricompensà Cologna piassé 'olte con privilegi e bonifiche. Dopo l'ocupassion de le trupe straniere de la Lega de Cambrai nel '500, Cologna l'è passà da novo a Venessia deventando feudo dei Serego. Nel periodo Venessian se vede una bona coltivassion e laorassion de la canapa par far soghe da darghe a le imbarcassioni navali de la Republica Veneta. Dopo i Venessiani jè arivà ne l'800, le dominassioni straniere, francese e par ultima austriaça e nel 1866 Cologna l'è deventà italiana. Da segnalar tra le cése el Domo del 1807 'ndoe un tempo gh'era el castel con drento 'na pala del '500 del Brustolon e un crocefisso in avorio del '700 de Andrea Brustolon mentre el campanil del 1841 l'è l'imitassion de quel de San Marco a Venessia costruido su la base de 'na tor de 'n antica fortificassion ciamà "Mainarda"; la césa de San Bartolomeo ricostruida nel XVIII secolo con dipinto de la Madona del spasimo; la césa de Santo Spirito del 1535. De le fortificassioni gh'è restà i tochi de una de le oto tori del castel scaligero, mentre l'atual Tor Civica con campana e orologio del '500 l'è costruida sui quel che gh'è restà de la tor del castel nel XVI secolo; interessanti anca le porte de le mura çitadine come Porta Piassa e Porta de le Capucine verta nel 1602 e porta Veronese. Se Ve piase i dolsi verso diçembre podì andar a Cologna a magnarVe un bel toco de mandolato, el piassé bon del mondo!