Comune de la val de Ilasi a est de Verona con le frassioni de Monte e Vila, Pieve, Strà, San Vitor, San Zen e Cadelara, longo la strada che in epoca romana l'era l'antica Via Postumia. E propio a quel periodo deriva el toponimo "Coloniola o Coloniola ad Colles", infati, in 'sta zona s'à fermà i veterani de l' XI legion Claudia Pia Fedele formando 'na "Colonia" con relativo "vicus" e incaricadi de tegnér d'ocio l'importante arteria stradal da possibili incursioni straniere. I Romani i dividea con un çerto criterio i tereni (710 metri quadri par lato) "centuratio" in modo da podér contentàr 100 veterani. E zà in quel periodo vegnea fato el vin, ricordà parfin da Plino, Marziale e Strabone, el famoso "Reticum". E cossita, 'ista la so importansa, el paese l'è deventa sempre piassé grando, tanto che nei primi secoli dopo Cristo l'è stà costruida 'na fortessa. Tra i reperti romani, da segnalar scrite de ogni tipo, tochi de 'na vila e de 'n aquedoto, monede, cipi, fibule, vasi; in particolar che i pol dimostrarne de la centurassion romana ghe i cipi gromatiçi ne la frassion Pieve e 'na scrita dedicà a Mercurio murà ne la fassada de l'antica pieve. Colognola nel' XI secolo l'era feudo de la fameja Nogarola come pol testimoniar la lapide catada nel vecio campanil de la césa, e propio in 'sta epoca l'è stà costruido el castel su la colina sora ai tochi de fortificassion romana 'ndoe 'desso gh'è la césa parochial. El nobil e grande castello l'è stà butà zò e ricostruido un fraco de 'olte, come nel 1231, quando, a causa de l'autodeterminasion de la popolasion de Colognola che l'à voludo stacarse da la çità, el Podestà de Verona "condannò a fil di spada quel povero popolo, abbandonò la rocca e le case al furore del ferro e del fuoco che le distrusse dal fondo". Dopo la distrussion del castel, Colognola l'è passà soto al dominio Scaligero e col tempo Visconteo e Venessian con giurisdision dei Conti Nogarola e dopo dei Nobili Priuli. Con "il mal contagioso" importà in Italia nel 1630 dai Lansichenechi conossudo come peste, la popolasion l'è passà dai 2172 abitanti a i 1083 de l'ano dopo. Colognola l'è rimasta fedele a Venessia fin al tratato de Campoformio del 1797 quando l'è passà a Napoleon, mentre nei ani sucessivi fin al 1812 ghe stà un bel poche de bataje tra francesi e austriaçi de 'na çerta importansa ne la zona, finendo definitivamente soto l'Austria nel distreto de San Bonifacio fin al 1866 quando l'è deventà "Italiana". Tra le cése da segnalar la parochial dedicà ai Santi Fermo e Rustico, ricostruida nel '600 al posto de l'antica capela ricordà da papa Eugenio III nel 1145, sgrandà nel XV secolo. Gh'è rimasto ancora dei tochi de l'antica costrussion come capitei, colone e bassorilievi del '300 con rafigurà la vita de S. Biagio mentre la fasada e 'l campanil jè de la metà del '700. Tra le zonte del XIX secolo gh'è la cupola e l'altar maior col tabernacolo, copia picenina de l'Arco dei Gavi, mentre tra quele del XX secolo ghe le quatro capele. Drento la césa se pol 'edar 'na bela scultura del Giolfino del '400 con rafigurà S.Antonio Abate, 'na bela "Anunciasion" del Morone e un fonte batesimal del XV secolo. Un importante Pieve l'è ne la frassion omonima, 'na 'olta antica sede parochial la "Plebem Coloniolae" citada ne la bola papal de Eugenio III nel 1145 e costruida sora a un tempio pagan dedicà a Mercurio come scrito su la fasada. Drento se pol 'edar numarosi afreschi del '300 e '400, statute del XV secolo e du altari del '600. Altre cése interessanti jè quela de San Vitor costruida nel '900 al posto de n'altra del XI secolo, de San Zen costruida nel 1770 al posto de l'oratorio arente al çimitero con drento una pala del Farinati e l'Oratorio de Santa Crose fato costruir dal Conte Nichesola nel 1786 arente vila Fano. Tra le vile da segnalar quela ne la piassa prinçipal la vila Cavalli-Peverelli del '500 con tochi de l'antico castel, Palasso Portalupi in stil baroco e nel teritorio de Colognola Vila Fano ne la frassion Vila del '700, Vila Zoppi a San Zen del XVIII secolo, Vila Moscardo con capela del '700, Vila Maffei de origine del '500 a Cadelara. Colognola s'à svilupà soratuto ne l'agricoltura con le colture de l'ua, de l'olivo e in particolar dei bisi conossudi par l'otima qualità dei "Verdoni". Foto: l'Antica Pieve