Storicamente, de 'sto comune de la Bassa Veronese non g'avemo notisie prima del XII secolo, quando vien citado in un documento de l'imperador Corado III nel 1144 tra i possedimenti de l'Abate de Nonantola "Cum Camarisa". Su l'origine del toponimo Concamarise g'avemo varie versioni, come quela che podarìa derivar da na conchilia del mar "Choncamaris". Se analisemo la parola "conca" la vien usada nel Veneto par indicar un qualcosa de scavà in modo natural, come quel che podarìa provocar un corso d'aqua su 'n teren, in pratica 'n "incavo". Nel 1225 un vilajo 'ndoe ghe atualmente Corte Verità, l'era posissionà "in capo al ponte di pietra" e quindi da 'ste parti gh'era un progno o fiume. L'altra parola da ciapar in considerasion l'è "lama" e le relative derivasioni "lamàra e lamàr" voçe veneta par dir stagno, aqua ferma, palude o come da documenti venesiani nel senso de "fossa". Quindi podarìa risultar, zontandoghe l'agetivo, la parola "lamarése". In pratica la spiegasion piassé logica, l'è che da 'ste parti gh'era 'na zona che l'era impaludà a causa de questa conca nel teren "Conca Lamerése". Storicamente Concamarise, deventa comune autonomo nel 1225 come scrito nei documenti del XIII secolo. In 'sto periodo a Concamarise catemo importanti fameje nobili, come i conti Da Palazzo esiliadi da Verona che i g'avea de le propietà da 'ste parti. Propietà confiscade a causa de l'esilio dal Comune de Verona, sensa contar le confische precedenti nel XIII da parte dei "amiçi" conti Sanbonifacio e nel 1247 da parte de Eselin da Roman. Ma la fameja piassé importante de 'sto comun l'è stà quela dei conti Verità a partir dal XV secolo soto el governo dei Cararesi che col tempo l'è deventà un simbolo a Concamarise. Nel XVII secolo la fameja Malaspina l'à eredità el possedimento de quela che ancò vien ciamada Vila Lasise. Ne l'800 inveçe, l'è arivà anca la fameja Montanari. Nel 1929 Concamarise vien incorporà a Sanguinè par restarghe fin al 1948. Al dì de ancò el paese el se presenta diviso in do çentri abitadi, el primo 'ndoe gh'è el çentro antico con la vecia césa parochial, le vile Lasise e Verità mentre el secondo lo catemo al de là del corso d'aqua del Sanuda con la frassion Capitel (gh'è la sede comunal, la noa parochial e le scole). La vecia césa dedicada ai Santi Lorenso e Stefano l'è stà restaurada in modo consistente nel XVIII secolo con el contributo dei conti Verità, ma le so origini jè antiche parché la risulta tra i possedimenti del monastero de Nonantola nel XII secolo e deventà parochia nel 1460. Le opere piassé importanti de la vecia césa, el fonte batesimal in marmo rosso e le do pale con rafigurà i Santi Antonio da Padoa, Carlo Boromeo e Francesco d'Assisi de G.B. Amigazzi e 'l Redentor con i Santi Stefano e Lorenso jè stà spostade ne la noa césa nel 1958. Poco distante gh'è l'antica residensa dei conti Verità dal XIV al XVII secolo, un tempo fortificada e trasformà in residensa de campagna de la fameja con davanti un bel parco con lagheto. El paese l'è conossù soratuto par la coltivazion del tabaco oltre che par la produssion e l'antiquariado del mobile d'arte.