Le prime testimonianse de la presensa de l'omo nel teritorio de Costerman jè da considerar risalenti a "l'Età del Bronso" come ne vien dimostrà dai reperti in ceramica e vasi biconici catadi in località Meoni, mentre ne le vicinanse de Marciaga numerose incisioni rupestri con guerieri e spade le dovarìa risalir a "l' Età del Ferro". De epoca romana jè i reperti catadi nel 1897 e a l'inissio del '900 a Valdoneghe, ne le località de Castel, Campo de la Morte e a Ca' Nova de Albarè come un querciolo de sarcofago, na statueta de bronso e qualche toco de strassa laorada par la sepoltura. Così s'à pensà inissialmente che'l nome de Costerman podesse derivar da "Castro Romano", ma secondo i esperti el toponimo l'è de origini longobarde, in latin medioeval, "Costa Arimannorum" che'l fa riferimento a la presensa dei "arimanni", òmeni libari. Con la presensa a partir da l' VIII° secolo dei possedimenti in questo teritorio dei monasteri de San Colomban de Bobbio e de Santa Giulia de Bressia, se nota un çerto svilupo dei çentri de Costerman, Marciaga, Castion e Sapora (l'atual Albarè). I primi documenti scriti i ne parla de la località Montegolo (XV febrar 810: "In fundo Cabrinade seu in Montecolo), o Cervinica, l'atual Baesse presente ne l'atestado del XV diçembre 837 mentre la prima testimoniansa scrita par Costerman l'è su el diploma del 22 lujo 1045 de l'imperador Enrico III in favor del Monastero de Santa Giulia 'ndoe i abitanti del "Castrum quod vocatur Novum castrum situm in Monte Rezino in vicinia Garde" jè esentadi a fornir ricovero e magnar par i cavai dei funsionari imperiali; a metà del XII secolo dal documento "Breve recordationis de Terris Ecclesiae Sancti Columbani" vien provada l'esitensa de Sapora. Soto el dominio scaligero, Costerman fasea parte de la "Gardesana del'Aqua", federasion de diese comuni (Malsésen, Brenson, Pai, Tórri, Albisan, Garda, Costerman, Bardolin, Cisan e Lasise) che la gavea compiti de repression e de ripartision dei oneri fiscali oltre a una larga autonomia riconossuda anca da i dominadori sucessivi come i Visconti (1387), i Da Carrara (1404) e la Republica de Venesia fin al 1802. Soto el governo de la Serenissima, el teritorio el godea de un periodo abastansa tranquilo a parte nel 1630 l'ano de la peste; e propio in questo ocasion che le cése de San Lorenso e de la Beata Vergine del Socorso jè stà trasformade in lazareti. Dopo el dominio Austriaco el paese el passa soto l'Italia nel 1866. La parochia de Costerman l'è stada costituida nel 1497 e la cesa atual dedicada a San Antonio Abate, l'è stà costruida nel 1850. Da segnalàr tra Virle e Marciaga el Santuario de la Madona del Socorso 'ndoe secondo tradission el 6 setembre ai primi del XVI secolo, un pastor sordomuto l'era guarido magnando un toco de pan che gavea dà la Madona dopo la so aparission. La césa l'è a navada unica con l'altar de destra dedicado a la Vergine del Rosario e con una pala rafigurante i Santi Antonio Abate e Nicola da Bari mentre su l'altar de sanca gh'è una pala dei Santi Bartolomeo e Francesco con soto la Madona con butin tra i angeli, de la scola del Brusasorzi. In stile baroco l'è l'altar magior in marmo con baldachin del 1765, che conserva una taolaeta in legno dei primi del XVI sec. con rafigurado l'aparision de la Vergine al pastorel. Da visitar tra Costerman e Castion l'è l'antico borgo con céseta del XII secolo de San Verolo; a Marciaga la césa parochial dei Apostoli Filippo e Giacomo l'è stà costruida su n'altra del XVI secolo. La parochia l'è stà creada nel 1541 con la separasion da la Pieve de Garda. La césa parochial de Santa Maria Madalena a Castion ultimada nel 1752, sembrarìa essar stà costruida con un poche de piere de quela vecia posissionada un tempo sul Monte San Michel. A l'interno gh'è conservà una tela del Brusasorzi. E sempre in questa frassion gh'è la stupenda Vila Pellegrini con giardin a l'italiana, costruida nel 1760 modificando quela esistente del XIV secolo. De questa ghe resta alcune lapidi del '500 e un afresco de Francesco Morone del 1492. Da segnalar altre vile come la Torri-Giuliari de propietà dei Salesiani a Albarè, la Rizzardi-Becelli del XV secolo, la Marchi e la Ferrario. Da visitar a Marciàga la tór otoniana del 783, la Val dei Molini scavada dal progno Tesina e par finir el çimitero de guera todesco 'ndoe i riposa in paçe 21.951 soldà de l'ultima guera mondial.