El teritorio de Dolçè el se estende longo la sponda de sanca de l'Adese, a partir dal confin regional tra Ossenigo e Borgheto, atraversando la "Chiusa" finendo a sud de Volargne longo la strada statal del'Abeton (S.S. 12) che da Verona la porta a Trento. Le frassioni jè: Cerain con Chiusa e Stazione, Peri con Ossenigo e Volargne con Colombare. El paese più popolado l'è Volargne, ma la sede comunal la se cata a Dolçè. Questo logo l'era zà conossudo in epoca preistorica bastar 'edar el riparo Soman del Paleolitico superior, sucessivamente in epoca romana, sensa contar che nel medioevo l'era conossudo come "Dolcetum" e gavea un castel de cui se pol amirar i ruderi. El çentro storico de Dolçe el pol vantar tri fantastiçi palassi signorili: Ruzzenenti-Fasanotto, Guerrieri Rizzardi e Salgari (ora Municipio) oltre a la césa parochial intitolada a Santa Lùssia, ricostruida nel 1758 e consacrada el 10 setembre 1775. La campagna viçina, adatada a coltura viti-vinicola, l'è stà bonificada al'inissio del '900 da le piere de origine fluvial che le querzea la zona. A sud de Dolçè catemo la frassion Cerain a un passo da la Chiusa Veneta e possisionado soto al forte austriaco Hlawaty. Proseguendo in diression Verona ne se presenta davanti un altra bela frassion, Volargne; el so nome a quanto sembra deriva da l'espression latina "vadum ad ilum agerem" (guado sul corso d'aqua). Conossuda un tempo come stassion de posta, dove i fasea una sosta forestieri e relativi cavai, conserva ancora una stupenda vila rinassimental (XV-XVI sec.), deventà un simbolo par questo teritorio. Stemo parlando de Vila Del Bene che l'a ospitado numerosi prelati del Concilio de Trento, nobili, personagi par conto de la Serenissima e 'ndoe podemo restar incantadi dal maestoso portal de ingresso decorado da una molona che simbolegia Cristo e da un disco solar con interventi de Michele Sammicheli, grandiosi afreschi realisadi dai più grandi pitori presenti a Verona Giovan Francesco e Giovanni Caroto, Domenico Brusasorzi, Bernardino India: ne la scala interna (pergoladi d'ua con puti che i vendemia) atribuidi a Domenico Brusasorzi, nela losa sène de paesagi del'Adese e de la Chiusa, atribuide a Nicola Crollanza, episodi de storia romana e telamoni atribuiti a Brusasorzi, nel salon nobile (oto sibile e quatro sène del'Apocalisse e in alcune stanse sène de la sacra Scritura, tra cui la Sacra Fameja, el Batesimo de Gesù, el sogno de Giacobbe, el bancheto del rico Epulone, Cristo sul lago de Galilea atribuidi a Domenico Brusasorzi, Nicola Crollanza e Bernardino India. Andando verso nord, partendo dal çentro del paese incontremo la località Ceradel (ceradello), un tempo sorvejada dal'Opera Napoleonica, un bastion in terapien costruido, da le armate Napoleoniche par controlar la viabilità de la val par tera e par aqua. Ne la stessa diression qualche chilometro più avanti, incontremo l'abitado de Peri. El paese rapresenta un punto vialibilistico de una çerta importansa, parchè ne le so vicinanse, gh'è presente l'unico ponte par traversar el fiume nel tòco veronese de la Val d'Adese, sensa contar la strada Peri-Fosse in grado de colegar la val con i monti Lessini. Storicamente jè stà catadi reperti preistorici e romani, in particolar a la Ca Rota e al Col Ara in più ve segnalemo la cesa, dedicada a SS.Filippo e Giacomo, parochia con "capellanus curatus" fin dal 1553 ricostruida nel 1951. El paese de Ossenigo inveçe lo incontremo dopo Peri; alcuni storiçi i dise che'l nome de questa località g'abia origini galiche e che un tempo el sia stà punto de ristoro, de ricovero par maladi e viandanti gestido dai Crociferi e Dogana. La parochia l'è stada divisa da quela de Avio nel 1539, con sede prima nela cesa de S.Andrea Apostolo e dopo, dal 1953, in quela de Santa Maria. Da segnal i ruderi de un castèl conquistado nel 1211 da Ribaldo Turrisendo e passà dopo ai Conti de Sambonifacio. Ne la storia scrita da Lodovico Moscardo, infati, se cata: "I Veronesi nel 1211 avendo eletto, per loro podestà, il Conte Bonifacio Sambonifacio e vedendo che Ossenigo, Castello posto vicino alla Chiusa per molto tempo veniva indebitamente occupato da Ribaldo Turisendo, uomo scellerato, il quale rubando e depredando quei luoghi circonvicini, gli serviva di ricovero, andarono ad espugnarlo, il che seguito, lo distrussero dai fondamenti". Le abitassioni jè possisionade longo la strada prinçipal un tempo ciamada "Vecchia Postale" o anca "Strada d'Alemagna" e jè vardà da l'alto da la Césa romanica de Sant'Andrea, ultimo "avanposto" Veneto prima de entrar in Trentino.