Comune non massa grando, sul confin col mantoan e traersà dal fiume Tion. Abitado fin da la preistoria e ocupado dai eserciti longobardi, sto borgo el vien segnalado a partir dal IX, come la ne dise la prima citasion su "Vicus Erbeto" del 28 majo 846 quando Engelberto fiol de Grimoaldo, nel so testamento el fa riferimento al paese:"Hacto in curte mea in Erbeto". Erbè no risulta sui diplomi e privilegi concessi al monastero de San Zen de Verona prima del diploma rilassado da l'imperador Enrico II a l'abate Rozo del 21 majo 1014 "In oedem teritorio veronesi....castellum Herbetum cum adjacentiis et pertinentiis suis" El castel e vari possedimenti i vien confermadi al monastero da Enrico III nel 1047 mentre con el privlegio de Federico I del 1163 non se fa più riferimento al castel ma a 'na corte: "Curte Herbetum cum pertinentiis et distroctu". Con el diploma de Federico II l'Abassia la ciapa una discreta autonomia aministrativa deventando un vero e propio feudo: "Curtem Herbeti, cum pertinentiis, et districtu, Comitatu, et jurisdictione". 'Sto feudo nel 1668 el comprendea Traensòl, Moratica, Roncolevà e Granarolo e i teritori de San Piero in val fin a tuto el XVIII secolo. Parò non bisogna desmentegarse che anca da chi jè passadi i romani che i s'à costruido un vilajo con tanto de ponte. Che pol darne conferma de la presensa preistorica de l'omo in questo teritorio jè i reperti, catadi durante dei scavi, de oltre 2000 ani prima de Cristo in località Tremolina. Nel 1976 jè stà catadi tochi de ceramica, ossa de bestie, longo el Tion, mentre studi più aprofondidi ne porta a conossensa dei resti de palafite, stesse de quele rinvegnude su le coline del Garda. Nel 1982, in località Castion, invesse, l'è stà ritrovà 'n abitado, con numarose tombe de l'Epoca del Fero apartegnude a la çiviltà paleoveneta. Da' edar assolutamente l'è la césa de Santa Maria Novela de Erbedel (Erbedello) del IX secolo con afreschi stratificadi che i va dal '200 al '400. Tra i più numarosi da segnalar quei con la "Madona in trono" mentre quei absidali i dise i sia meno veci e piturà da Antonio Badile. In contrada Madona nel 1721 l'è stà costruido l'Oratorio de la Madona del Carmine. La césa parochial atual de San Gioani Batista l'è del 1735 in stile baroco costruida su le rovine de la precedente che l'era guidà da un arciprete, (se pol notar ancora el campanil e 'l presbiterio del 1526) con una sola navada e con quatro capele laterali in marmo. De drio l'altar major gh'è una tela de Andrea Voltolini con rapresentà el santo che batesa el Signor tra i angeli. In paese molto bela l'è Vila Gallici del XVI secolo, 'na 'olta abitasion dei laorenti e trasformada ne l'800 in una elegante casa da Gaspare, come ne dise n'iscrission: "A.R.S.-1803-l'opera che gli antenati lasciarono incompleta portò a termine Gaspare Gallici".