Antico comun cimbro posissionà su l'altopian dei Monti Lessini ne le prealpi veronesi. El so teritorio che'l parte da quota 700m e l'ariva ai 1.765 de Castelberto l'è inserido in gran parte nel Parco Natural Regional confinando a nord col Trentin e serà a est dal Vajo de l'Anguila e a ovest dal Vajo Falconi. Storicamente Arbedo come scrito nei documenti, el vien ciamà Herbezium nel 1182, Herbetium nel 1184 toponimo che podarìa indicar i magnifiçi pra de la zona e "Erbeço" nel 1219 campum erbeçi qui est ubi dicitru curte alta. Nel 1224 i canonici e 'l Comun de Verona i à begà par i diriti ne la Frissolana, in Arbedo e nei loghi superiori fin ad Lexinum. 'Ste do località i era soto al Comune de Verona come confermà in una locasion del 4 dugno 1306 Silua Herbezi Communis Verone. Arbedo l'è stà fondà dai Cimbri (che in epoca Viscontea i à fondà i XIII comuni del Vicariado de le Montagne) a partir dal 1287 quando el Vescovo de Verona Bartolomeo de la Scala l'avea concesso a dei boscaioli-cimbri "Tzimberer" originari de la Baviera, dei tochi de tera in Lessinia par abitarghe e disboscar in parte con importanti privilegi confermadi sia dai Visconti che da la Republica Venessiana ma non da Napoleon nel 1797. In altri documenti, come quel del 1348 se parla de un prà dei canonici in pradaria de Arbeze e nel diploma del 1354 de Cangrande II de la Scala vien riconfermà i privilegi ai coloni e conferidi de novi a communibus et hominibus de Albezio, Cancari, Alzaredi, Boschis Frizolane, Valbussa et Scolis Buscorum. El 6 genàr 1621 l'antico Comun de Bosco con Frizzolana se divide in do, Césanoa o Frissolana e Arbedo o Bosco e nel 1660 vien verificadi i confini tra i du comuni. Da segnalàr la césa parochial costruida nel 1720 sui resti de un altro tempio mentre la parochia col "capellanus" poi col "rector" l'è del 1529 "membrum ecclesiae novae sun Grezzianae". Drento se pol amirar 'na tela atribuida a Francesco Torbido con La Madona e i SS.Filipo e Giacomo. Par ci ghe piase far quatro passi consiliemo el Vajo de l'Anguila e quel dei Modi in meso a la natura incontaminada e a canyon scavà dai progni o tra le carateristiche malghe come la Menegazzi e Busimo o tra le case con muri in piera e querti de lastroni de marmo. A Passo de le Fitanse (1399 m) el panorama el se verze verso el Trentin longo la Val d'Adese, con dei particolari unici e de un çerto interesse naturalistico. Arbedo l'è deventà nel corso dei ani un importante çentro montano turistico sia invernal che estivo che se dedica soratuto a l'alevamento, a l'agricoltura e la produsion del formajo Monte D.O.P. Tra le curiosità, da sotolinear che Arbedo l'è el Comun piassé alto de la provincia Veronese.