El Comun de Fumane el se cata a 18 km da Verona, ne la parte çentral de la Valpolesela e precisamente a l'inissio de la "Val dei Progni" dominà dal Corno d'Aquilio e dal Monte Pastel, in un teritorio che partendo dai 155 m.s.l.m. el se rampega fin ai 1127 m. con le frassioni Cavalo, Masurega, Breonio e Molina posissionade ne la parte meridional de la Lessinia. El nome "Fumane" podarìa derivar da l'espression "a le fumane o fumare", logo 'ndoe se produsea el carbon de legna forse sul Col Fumana. L'Omo l'è presente nel teritorio de Fumane fin da l'antichità come pol dimostrar le zone 'ndoe jè stà scoerti importanti reperti del Paleolitico e del' Età del Bronso: Casterna, Fumane, Val del Lena, Grota de la Giassara, Val dei Progni, Sacheta de Molina, Riparo Solinas, Scalete de Molina, i Covoloni, Casteion de Molina, Vaio de la Merla, Castel Soto Sengia, Castel de Cavalo, Forte Masua, Breonio, Dosso Lonardelli. De l'Età del Fer se pol contar numarosi castelieri come quei de Molina, Breonio e Cavalo, probabilmente unidi tra lori, formando un importante sistema fortificado con altri vilai presenti in Lessinia. In epoca romana Fumane l'era la capital del "Pagus Arusnatium", un çentro aministrativo che'l se gestiva da solo e comprendea gran parte de l'atual Valpolesela; de 'sto periodo jè restà un poche de scrite su piera e altri reperti, conservadi ne le cése, in costrussioni del Comun o al Museo Mafeian de Verona. In epoca Longobarda la val l'era ciamà Val de Sala o Val Salaria, toponimo che podemo catarlo par la prima 'olta nel documento del 927 insieme col castel costruido dopo le invasioni dei Ungari nel IX secolo e ricordà in un documento del 1011; de 'sto castel no gh'è restà gnente e nel XIII secolo el risulta tra le propietà del Monastero de San Zen dopo essar stà regalà dai abitanti nel 1054. El nome de Fumane podemo catarlo, par la prima 'olta, scrito in un documento del 1159 come "in curia Fumansi locus ubi dicitur Malzane (tr. Marzane) " mentre nel 1178 con un decreto de Federico Barbarossa el g'a dà in concession la gestion del teritorio al conte Sauro de la fameja Sambonifacio. Nel periodo Scaligero la storia de Fumane l'è quasi istessa de quela de la Valpolesela deventà contea autonoma nel 1311 soto Federico De la Scala fin a quando Cangrande l'à capido el tradimento. Nel periodo venessian Fumane l'era nel Vicariato de la Valpolesela, e s'à 'isto la nassita de numarose vile sparse nel teritorio. Tra le cesé da segnalàr in contrà Vaio la ceséta de epoca longobarda de Santa Maria del Degnano (dal latin Dignus) documentà fin dal XI secolo quando l'era tra le propietà de l'Abassia de San Zen, la presenta modifiche del quatrosento e decorassioni del siesento, mentre de la vecia costrussion gh'è restà la base del campanil e i muri. Altra romanica l'è la "césa vecia" de Cavalo costruida nel XII secolo par volontà de le comunità de Cavalo, Masurega e Monte par averghe un logo de preghiera insieme. Ristruturada ben nel XV secolo, conserva ancora i resti del campanil del '300, mentre nel 1979 l'è vegnuda a la luçe durante el novo restauro un ara sacrifical dedicà a la dea Lualda. L'atual césa parochial inaugurà nel 1785 conserva dei afreschi co' i Apostoli del 1791 de Marco Marcola, mentre sora a la porta prinçipal gh'è 'na tela co' la Madona in Gloria, San Zen, Sant'Eurosia e San Luigi de Pio Piatti. A Breonio (toponimo forse da "Breuni antica popolassion alpina) l'antica césa de San Marziale del '400, afrescà e decorà dal Ridolfi, Morone e Domenico Brusasorzi mentre l'atual césa parochial l'è stà costruida nel 1959 su progeto del Ronca in sostitussion de quela vecia del 1830 'bandonà nel 1952 dopo essar vegnuda zò quasi tuta dopo 'na frana. Del XVIII secolo l'è l'atual parochial de Masurega (Mazzurega) dedicà a San Bartolomeo Apostolo la conserva un bel dipinto de Antonio Badile del 1556. La parochial de Fumane dedicà a San Zen l'è del '700 costruida al posto de quela vecia. El Santuario de la Madona de la Salette costruido nel 1860 dai abitanti come ex-voto a la Madona su stil del tempio de Grenoble. Tra le vile da segnalar Vila Della Torre costruida su imitassion de le struture de le vile romane da la fameja omonima nel XVI secolo, al posto de quela dei Maffei forse costruida ancora prima dei Scaligeri. El progeto de la vila costruida nel 1560 l'è de Giulio Romano ma gh'è ci dise anca Sanmicheli e Ridolfi. Non sicura anca l'origine de la tor merlada forse del Sanmicheli come el tempieto otagonal nel cortil superior. Del '700 l'è la Corte de l'Abate Lorenzi in località Cavarena de Masurega mentre de l'800 l'è Vila Ravignani a Cà Melchiori costruida su disegno del Barbieri. Da la contrà Paroleto parte la strada par el forte italian Masùa, costruido a la fin de l'800 ora privato. Molina e Breonio jè deventà frassioni del Comun de Fumane solo dal 1929, quando jè stà tirade ia da Sant'Ana d'Alfaedo. Da visitar a Molina gh'è sicuramente el Museo Botanico de la Lessinia arente al campanil de la césa, dedicà al botanico nato da 'ste parti nel 1773 Gioani Zantedeschi, 'ndoe se pol averghe 'na panoramica su la vegetassion e la flora de la Lessinia e de l'alta Valpolesela. E sempre a Molina prima de andar a visitar el Parco de le Cascate su 150.000 mq. consiliemo de far quatro passi ne l'antico borgo con i veci molini le case costruide in piera tipiche de la Lessinia.