Garda, splendido comune che se specia ne le aque de l'omonimo lago, posissionà in un gran golfo che scominciando a sud da le contrà de Bardolin el termina a nord con Ponta San Vigilio. El Teritorio l'è çircondà da una corona de coline e serà ne la parte meridional da la Roca mentre ne la parte setentrional dal Monte Lupia. Le origini de Garda jè molto antiche come ne pol testimoniar i ritrovamenti de epoca preistorica ai piè de la Roca come i resti de un vilajo su palafite, çeramiche e bronsi, mentre ne la località Sabionara i è stà catadi tòcheti de çeramiche de l'età del Bronso e in via San Bernardo disnove tombe anca queste de l'età del bronso, con vasi, piati, bronsi e ossi laoradi. De gran interesse jè le "incisioni rupestri" del Monte Lupia con più de 4000 ani de storia. Anca i Romani jè passadi da Garda basta vardar la disposission del çentro storico secondo i classici criteri imperiali, el cipo funerario che se cata in Piassal Roma e varie lapidi che ne prova l'esistensa de un antico vilajo roman. A causa de numarose invasioni in epoca Barbarica el paese l'era deventado un ponto molto importante nel sistema difensivo de la parte inferiore del lago contro i eserciti che i vegnea da le Alpi. El nome Garda el deriva probabilmente dal Longobardo Warda, (gh'è ci dise anca dal tedesco Warte) che vol dir guardia, come podarìa essar stà nel caso de la Roca. Nel corso dei secoli sucessivi questa costrussion l'era dal ponto de vista strategico-militar molto importante. El primo documento 'ndoe gh'è scrito el nome de Garda l'è del 712 a.C., ai tempi de Liutprando, re longobardo, che ne parla del "teritorio gardense". Soto el dominio dei Franchi (774-888) Garda l'è restà autonoma e 'l so feudatario el stava ne la Roca aministrando el teritorio. De l'epoca medioeval l'è famosa la storia de la Regina Adelaide de Borgogna, imprisonada ne la Roca da Berengario Duca de Ivrea che'l volea obligarla a sposar el fiol Alberto. Grassie a l'aiuto de un frate l'era riussida a tajar la corda deventando mojer de Ottone I che par vendicarla la butà zò la Roca.

..."Da ti, Garda, el lago el spina
le memorie vecie e intate....
L'era tua quela regina,
ch'è scapà vestì da frate
col rosario atorno al col"... (Berto Barbarani poesia "Garda")

In epoca comunal, el nobile veronese Turrisendo dei Turrisendi, l'era riussido ne l'impresa de resistar par oltre un ano a Federico Barbarossa (1162) sempre da l'interno de questa fortessa mentre j è stà manco fortunadi i scaligeri, sconfiti nel 1387 dai Visconti. E propio soto el dominio scaligero, Garda fasea parte de la "Gardesana del'Aqua", federasion de diese comuni (Malsésen, Brenson, Pai, Tórri, Albisan, Garda, Costerman, Bardolin, Cisan e Lasise) che la gavea compiti de repression e de ripartision dei oneri fiscali oltre a una larga autonomia (con a capo el "Capitan del Lago" che dovarìa aver abità par qualche tempo nel Palasso dei Capitani difronte al porto), riconossuda anca da i dominadori sucessivi come i Visconti (1387), i Da Carrara (1404) e la Republica de Venesia fin al 1802. Nel 1452 nasse la "Corporassion dei Antichi Originari", composta da le fameje originarie da Garda e relativi eredi con diriti su la pesca ne le aque del lago. Nel 1508 da segnalar el passajo dei soldà Venessiani e quei dei Stati de la "Lega de Cambrai" mentre i Lansichenechi direti verso Roma dopo essar passadi nel 1526 iè vegnudi ancora da ste parti nel 1630 portando la peste. Dal 1797 i s'a alternado domini austriaçi e francesi par un pochi de ani, par finir in mane austriache fin al 1866 prima de passar soto el Regno d'Italia. Da visitar, uno dei posti piassè bei del Lago, Ponta San Vigilio con la splendida Vila Guarienti costruida nel çinquesento par l'umanista Agostino Brenzone su disegno del Sanmicheli, la céseta dedicada a San Gioani Nepomuceno, la storica locanda, el portesel e la Baia de le Sirene. El tuto visitado da Maria Luigia duchessa de Parma, nel 1816, l'imperador Alessandro de Russia, nel 1822, el re de Napoli, nel 1823, Winston Churchill, Laurence Olivier e Vivien Leigh, el prinçipe Carlo d'Inghiltera. Se Ve piase far quatro passi a piè, consiliemo (partendo da la césa parochial) de far 'na visita a le do çime de la Roca de Garda, 'ndoe da la prima se pol amirar el paese da l'alto e su la seconda gh'è l'Eremo dei Camaldolesi costruido dai frati de San Romualdo con a l'interno conservà una pala del pitor Palma "El Zoeno" che rafigura el santo protetor e un San Giorgio de Giovanni Tedeschi. A Garda val la 'pena 'edar la Vila Carlotti, vissin a la tór civica che la finisse in un edificio "la Losa" costruido su disegno del Sanmicheli; el Palasso Fregoso costruido nel '500 da un condotier genovese in esilio; Vila Albertini e la vissina césa de San Carlo Borromeo i era de propietà dei nobili Becelli de Costerman e dopo essar passà in man ai conti Degli Albertini nel '700, l'è deventà famosa par aver ospitado par qualche giorno Re Carlo Alberto (durante la prima guera de indipendensa nel dugno 1848), che l'à fato firmar ai lombardi la sotomission al Piemonte. Molto belo l'è el parco con statue, fontane, tórete; tra Garda e San Vigilio gh'è Vila Carlotti-Canossa de l'800 con drento un bel poche de opere d'arte. Val la 'pena far una visita a la Césa parochial de Santa Maria Assunta costruida ne la forma atual nel '500, zontandoghe el campanil nel 1571 con murà un angelo de epoca longobarda, mentre la parte piassè antica l'è composta da la canonica e dal ciostro con un tochetin de ciborio longobardo. Drento gh'è un bel altar de San Luigi del Palma, 'na pala de l'Anunziada del Paglia e n'antico afresco in sagrestia. Da segnalar anca altre cése del paese come quela de San Stefano che conserva un importante "martirio" del Farinati e quela de San Bernardo del XIV secolo. Se Ve piase "tradisioo" e folclor, beh, alora non podì mancar a l'anual Pal del Vo', 'ndoe i pescadori con le barche piene de reti e seguidi da altre imbarcasioni i speta el passajo dei banchi de sardele par dopo magnarle durante la famosa "Sardelada al Pal del Vò", frisendole e spiansandole col vin. A questa tradission no l'à voludo mancar gnanca Federico III nel 1489, che da sora una galea de la republica venessiana, el s'à godù a pescar. De antica tradission l'è anca la "gara de le bisse", 'ndoe quatro remadori in piè su ogni imbarcasion de origine venessiana, provenienti da le varie località lacustri, i se sfida ne le aque del Garda........