Importante comune de la Valpantena a pochi chilometri da Verona con le frassioni prinçipali Stalavena, Lugo, Sago (Azzago), Senago (Alcenago), Rosaro e Romagnan. El Teritorio de Gressana l'è stà frequentado fin dal Paleolitico inferior da l'Homo Erectus comparso circa tri milioni de ani fa. Numarosi reperti jè stà catadi a tal proposito in Lessinia e ne la zona de Gressana come i strumenti litici recuperadi a Monte Gazzo e Lotrago. L'omo del Paleolitico Medio, inveçe, l'à frequentà ben 'sto teritorio come documentado dai reperti archeologici de Zovo, Croseta, del Vajo Troto e del Riparo Tagliente (Coal de le Tessare) che l'à ciapà el nome da un sior che l'à scoerto 'sto logo nel 1962 de l'Homo neanderthalensis. Resti de un pochi de çentri abitadi del periodo Eneolitico jè stà catadi a Belori, Sago, Magnavaca nel Vaio del Paradiso, Monte Cuco (m.461 a sud - est de Sago), Casale de soto (m.633), Dosso de Casal (m.701), Monte S. Viola (m.858) e in località Borgo de Gressana. Del Bronso medio e tardo jè inveçe i reperti catadi a la Roca sora Lugo a m.653 come piati e vasi biconiçi dei secoli XV-Xlll a.C.; A Bellori, ne la zona de confluensa del Vaio de l'Anguila con el Progno de Valpantena jè stà catade scudele e vasi; Al Dosso Magnavaca jè stà catadi anca material litico e ceramico; a Ca' Nova dei Casoti (m. 575) jè stà scoerte do fondi de capane, vasi ovoidali e biconici, scudele. Questi loghi abitadi i sembra 'bandoné nel I secolo a.C., forse a causa de un intervento armà dei Romani. A Gressana numarose jè anca le testimonianse romane catade; nel 1860 dei bei tochi de piera incurvà 'arente la césa; nel 1886 do tombe romane; la fonte batesimal de la Parochial ricavà da un cipo roman. Se pensa adiritura che la base del so campanil el sia stà in origine una tor romana. Par 'sto motivo no l'è impossibile pensar che'l nome de Gressana el g'àbia 'ste origini; s'à pensà a un tempio dedicà a le Grazie o dal nome de 'na persona Graecius o Gratianus forse propietaria de un pochi de tereni ne la zona. A Romagnan dal latin Romanius, jè sta rinvegnude de le luserne e du iscrisioni romane. El nome de Lumiago forse deriva da "Aemilius" più suf. -ACU, Lotrago da "lotterius" più -ACU, Sago dal nome del patrisio "Attius", Lugo da Lucus (bosco) e Stalavena da "stallum avenis", parchè gh'era la stassion de posta par el cambio dei cavai e dei bo' che i tirava i careti. La prima testimoniansa scrita del paese de Gressana l'è del X secolo anca se catemo 'na "plebem S.Martini de Gratiana" in un documento datado 839 'ndoe el Vescovo Ratoldo el passa la pieve al diacono Audone. La stessa pieve l'è ricordà ne la bola papal de Eugenio III nel 1145. In 'sto periodo Gressana l'era feudo del Capitolo dei Canonici de la Catedral de Verona e sicuramente gh'era anca un castel. Piassé tardi jè 'rivà i Scaligeri che i l'à inserida nel "Capitanado de la Montagna", mentre soto i Venessiani a l'inissio del '400 l'è stà spartìa da le fameje Oliboni, Alegri, Malaspina, Farinati e Giusti. Anca le frassioni jè piene de storia: Sago l'è ricordà nei documenti del 988 e del 996 da Ottone III 'ndoe se parla dei possedimenti de l'Abassia de San Zen "in vico Azzago" e nel 1145 da Eugenio III; stessa bola papal anca par Senago "Curtem Alcenagi". Ne la césa parochial del '400 de San Clemente ghe una lapide che la ne ricorda de 'na capela dedicada al santo ne l'XI secolo; altri possedimenti de San Zen i vien confermadi da Federico I nel 1163 ne la zona de Lugo de Valpantena. La césa parochial del '700 atual dedicada a S.Apolinare Martire l'è stà rimessa a posto par ben non molto tempo fa ma conservando el batistero del 1440 e 'l campanil romanico; anca Romagnan l'era in possesso de l' Abassia de San Zen su concession de Otone I nel 967, a l'epoca l'era un "castrum" abità dai "Herimani" òmini libari. Da sotolinear che ne la césa parochial, pieve dedicà a Santa Maria de origine romanica conserva anca un bel coro ligneo del '400 intajà e una pala del Brusasorzi. Nel teritorio da visitar jè assolutamente le vile, tra le più importanti e tra le più grandiosi del veronese gh'è Vila Arvedi del '600 a Cussan (Cuzzano) con decorasioni, afreschi un bel giardin a l'italiana e un l'oratorio dedicà a San Carlo; Vila Pavarana del XV secolo che la se cata sul coston del monte de 'Sago, caraterisada da porteghi e colone oltre a la capela de la Madona del Rosario; Vila Pelegrini conossuda come "El Serbaro", da le forme venete con parco e relative fontane la presenta anca una capela dedicà a San Francesco Saverio; Vila Cometti-Giusti del '500 con afreschi del '700 a Gressana e parco costruido dai Bevilaqua de Lasise; a Stalavena Vila Cologne con portego, colombare e un bel parco con oratorio. Da visitar par ci ghe piase le curiosità l'è la tor del Falasco sora località Cologne, utilisado anticamente come rifugio e logo de control par passar ne l'alta val ma soratuto base dei banditi, composto da un riparo e 'na costrussion in tufo; el carateristico molin de Belori; el forte militar costruido nel 1905 sul Monte Santa Viola. Foto: Vila Arvedi