Ilasi l'è posissionà al çentro de la so val, a sanca rispeto l'omonimo progno con l'importante frassion Thèlore (Cellore). Sicuramente 'sta zona l'era abità fin da la preistoria, ma le origni del paese jè probabilmente romane come pol dimostrarne, scrite, tombe, monede, tochi de muri e de grandi colone funerarie come quele che le fasea parte de un monumento funebre de la fameja dei Sertori, conservade al Museo Mafeian de Verona; nel I° secolo d.C. Ilasi l'è stà logo de colonisassion romana, donà ai veterani de la XI legion. De 'sto periodo l'è anca l'origine del toponimo, se pensa che possa derivar dal nome de un centurion roman del tardo impero, un çerto Gelagio, in latin Gelasius e cambià nel tempo in Jlasio e Jlaso. Tra le prime testimonianse scrite sul paese g'avemo quela del 883 a la fin del periodo carolingio quando el vien ciamà Illaso e nel 996 in un documento de Ottone III se nota la comparsa de la letara 'I' final Ilasi e curia Ilasii, mentre nel 1004 catemo Castrum Illasii. Tra i reperti de Epoca Longobarda g'avemo inveçe du crosi in lamina d'oro e numarose armi come scudi, spade, cortei catà ne la necropoli de Thèlore, nome che deriva dal tardo latin Cellulae "depositi de fruta campestre non grandi". Ilasi l'è stà feudo tra el XI e 'l XIII secolo de Cadalo l'antipapa veronese, dei monasteri de Santa Maria in Organo, San Colomban de Bobio e San Zen come scrito in un diploma de Federico I del 1162, del Vescovo de Verona, dei Montecchi, che jà ricostruido el castel (forse zà esistente prima del XI secolo) e nel '200 dei Nobili Pompei. Nel 1239 Eselin Da Roman l'à butà zò el castel e nel 1243 Ilasi l'è deventà el so feudo ma poco tempo dopo jè rivà i Scaligeri che jà ricevù el castel dal Comun che a so 'olta el ghe l'avù da Uberto della Tavola nel 1270. Nel 1387 dopo el periodo Scaligero se vede i Visconti che contro i Cararesi nel 1390 jà perso el paese ma non el castel. Dal 1405 al 1439 Ilasi l'è stà soto i Venessiani ma dopo jè ritornà i Visconti con a capo Niccolò Piccinino e nel 1509 el ritorno ancora de la Serenissima che i à lassà el feudo ne le mane de Girolamo Pompei in concession perpetua (confermà nel 1517) 'isto la fedeltà dimostrada fin a l'epoca Napoleonica. Nei secoli sucessivi la storia de Ilasi no la segnala particolari eventi e la vita l'à andà avanti abastansa tranquila. El castel el se cata sora a la colina che varda Ilasi con el so mastio a quatro lati e i resti de la tor. Ai pié catemo la magnifica vila Perez-Pompei costruida nel 1615 da la fameja Pompei e grandà nel 1737 su disegno de l'architeto Dal Pozzo con saloni afrescadi e un bel parco; tra le opere artistiche ne la vila, da segnalar le tele e tempere de Francesco Lorenzi, Gianbetin Cignaroli, Antonio Mela e Andrea Porta. Altra vila l'è la Carlotti-Pompei, sgrandà nel 1737 su progeto de Alessandro Pompei, ma con la parte çentral e 'l portego tra le do tori del '600; de un çerto interesse jè le decorassioni e le statue nel parco. Tra le cése da segnalar la parochial dedicà a San Giorgio, antica pieve ricostruida ne l'800 da Bartolomeo Giuliari la conserva do statue del Schiavi con rafigurà San Bartolomeo e San Giorgio e ne la sagrestia 'na Madona col Butìn e i angeli afrescà da Stefano da Zevio nel XV secolo; l'altra parochial l'è quela de Thèlore del 1880 dedicà a San Zen che conserva du crocefissi del XV e XVII secolo, mentre ne la ceséta che ghe arente se pol 'edar i afreschi del 1500 opere de Francesco Morone e Girolamo Dai Libri. Sicuramente de origini antiche 'isto che l'era capela soto la gestion del Monastero de San Zen come confermà da Federico I nel 1163 e Urbano III nel 1187. Verso Cassan gh'è la ceséta de San Colomban del '500 con un grande afresco con rafigurà 'na Madona in catedra; par finir dovemo segnalar quela che l'è ritegnù la prima sede de la parochia de Ilasi, l'antica césa de Santa Giustina con campanil del 1100. E par finir non podemo desmentegarse dei oratori de Sant'Ana o Natività de la Maria Vergine del 1650 belo e afrescà, l'oratorio de San Roco e par finir quel dedicà a Sant'Antonio da Padoa del 1656 in località Donselin.